The Recognition of Śakuntalā 10.5.204

10.5.204

“ rājā—saṃropite ” ityādinā “mohamupagataḥ” ityantena mūrchanā nāma kāmadaśoktā | samāśvasitu bhartā | sati khalu dīpe vyavadhānaṃ deśāntareṇāpatrarakādinā ca sa eva doṣastenāndhakāradoṣaṃ mohalakṣaṇamatha ca timirakṛtaṃ doṣaṃ vastvadarśanalakṣaṇamanubhavati | satyāmapi śakuntalāyāṃ taddarśane prastute sāmyāddīpa kasyāprastutasya vacanādaprastutapraśaṃsā | ahamidānīmeva nirvṛtaṃ sukhitaṃ karomi | athavetyākṣepe | śrutaṃ mayā śakuntalāṃ samāśvāsayantyā mahendrajananyā aditermukhāt | yajñabhāgotsukā devā eva tathāvasthāsyanti yathācireṇa dharmapatnīṃ śakuntalāṃ bhartābhinandiṣyatīti | tanna yuktaṃ kālaṃ pratipālayituṃ vilambaṃ kartumityarthaḥ | yāvadanena vṛttāntena priyasakhīṃ śakuntalāṃ samāśvāsayāmi| śrutamityādinā vakṣyamāṇamātalipraveśaḥ sūcitaḥ | anenādānaṃ nāmāṅgamapakṣiptam | tallakṣaṇaṃ tu— “ bījakāryopagamanamādānamiti saṃjñitam ” iti | bhartā śakuntalāmabhinandiṣyatīti bījakāryopagamanam | udbhrāntakenetyudbhrāntakanāmnotplutikaraṇena | tallakṣaṇaṃ saṃgītasudhānidhau— “ pūrvaṃ dakṣiṇamaṅghimutthāpayitvātra kuñcayet | vāmaṃ śīghraṃ bhramedbhāmāvartamudbhrāntakaṃ viduḥ | deśīvidāṃ tu keṣāṃcidvāhyabhramarikā matā ” iti | abrahmaṇyamavadhyaḥ | “ abrahmaṇyamavadhyoktau ” ityamaraḥ | māḍhavyasyeva vidūṣakasyeva | paritrāyatāṃ devaḥ | saṃśayagataṃ jīvanamaraṇasaṃśayaṃ prāptam | vayasyaṃ vidūṣakam | anena bhayanāmakaṃ saṃdhyantarāṅgamapakṣiptam | tallakṣaṇaṃ tu—“bhayaṃ tvākasmikastrāsaḥ ” iti | āttagandho'bhibhūtaḥ | “ āttagandho'bhibhūtaḥ syāt ” ityamaraḥ |