The Recognition of Śakuntalā 10.5.212

10.5.212

yathā kaścinmārgamuddhṛtakaṇṭakaṃ karototyuktaleśaḥ | etena kleśābhāvo dhvanitaḥ | atha ca sukhaparasya siṃhīvilāsalālasasya hareḥ siṃhasya tridivamiva tridivaṃ sthānaṃ yadvā tridivaṃ sukhaṃ vidyate yatra tat | arśaāditvādac | ‘‘tridivaṃ sukhe | svarge ca tridivā nayām’’ iti haimaḥ | etādṛśaṃ sthānaṃ madodakaṃ vānti prāpnuvanti | doṣopanyāsaḥ | kairubhayairityata āha-taveti | adhunā natāni parvāṇi yeṣāṃ te nataparvāṇastaiḥ | parvāṇāṃ natatvaṃ granthisthale tallakṣaṇāt | etena saralatvaṃ śīghragatvaṃ manoharatvaṃ ca dhvanitam | tava paramaśūrasya vikhyātapauruṣasya śarairnānyasyeti saṃbandhasya vyañjakatvaṃ boddhavyam | purā pūrvaṃ ca puruṣakesariṇo nṛsiṃhasya parvaṇaḥ sakāśāt | natamiti bhāve ktaḥ | nataṃ parvaṇo yeṣāṃ tairnakhaiśca | indraṃ pratyubhayasyāprākaraṇikatvena nataparvatvasāmyāttulyayogitā | tena nakhaiḥ śarāṇāṃ nṛsiṃhapadena cāpasya rājña aupamyaṃ dhvanitam | upamānuprāsau | nanu dānavā eva kaṇṭakā iti rūpakaṃ saṃdehasaṃkaro vāstu kathamupameti ceducyate | uddhṛtapadasya dānavakaṇṭakayoḥ sādhāraṇyāna rūpakasādhakatvaṃ kiṃca rūpake kaṇṭakānāṃ prādhānyānnṛhariduṣyantayoranutkarṣāpātāt | upamāyāṃ tu dānavānāmeva prādhānyāttadutkarṣasiddheḥ | ataeva na saṃkaro'pi | upamākaraṇaprayojanaṃ pūrvamevoktamiti hīnopamāpi nāśaṅkanīyā | drutavilambitaṃ vṛttam | sidhyantīti | mahatsvapi karmasu kāryeṣu niyojyāḥ sevakā yatsidhyanti kāryaniṣpādakā bhavantīśvarāṇāṃ prabhūṇāṃ yatsaṃbhāvanā gauravaṃ tasya guṇaṃ tamavehi jānīhi | prabhumahattvenaiva tatkāryasiddhiḥ |