The Recognition of Śakuntalā 10.5.231

10.5.231

sthita iti śeṣaḥ | anena bindūnāmanavatarapātitā sthūlatāṣṇatāyavāvasthitiśca dhvanitā | tena mārjanakāraṇasāmagryāṃ satyāmapi yattadanutpattiḥ sā viśeṣoktiḥ | mohāditi nimittasyoktatvādyuktanimittā | tāvadādau āditvakathanāpekṣayā taṃ bāṣpaṃ pramṛjya prāśya vigatānuśayo gatapaścāttāpo bhaveyam | āśaṃkāyāṃ liṅ | kīdṛśam | ā īṣatkuṭilaṃ yatpakṣma tatra vilagnaṃ saṃbaddham | anenāsya bāṣpasya bindutvābhāvastadabhāvenādharapīḍanābhāvaśca dhvanitaḥ| nanu tasya bāṣpasyātītatvāttamiti tacchevanirdeśaḥ kathamiti ceducyate | yataścirānubhūtānyapi bandhudarśanājjanasya duḥkhāni navībhavantītyuktadiśā enaṃ dṛṣṭvā tasyāḥ pūrvaduḥkhasmaraṇena yo bāṣpa utpannaḥ sa tacchabdena rājñā parāmṛṣṭaḥ | duḥkhahetutvādubhayoḥ | ākuṭileti vyatirekaḥ | yatastadā śokāvegavaśādvindurūpa evotpanno'dhunā kramikatvāttadavasthasya bhāva iti boddhavyam | ata etatpramārjanena vigatānuśayatvam | idamevoddhṛtaviṣādaśalyatvam | yato'parādhādinānuśayo hi viṣādaḥ | taduktaṃ sudhākare—‘‘aparādhaparijñānādanutāpastu yo bhavet | viṣādaḥ ’’ iti | śrutivṛttyanuprāsau | vasantatilakaṃ vṛttam | yathoktamanutiṣṭhati | bāṣpamārjanaṃ karotītyarthaḥ | tacca tripatākavakrānāmakeyeti jñeyam | taduktaṃ saṃgītaratnākare-‘‘ tanmārjane ca syādadho yāntīmanāmikām | netrakṣetragatāṃ bibhrat ’’ iti | anena kathayiṣyāmīti yaduktaṃ tatprasaṅgo'pyupadarśitaḥ | āryaputra idaṃ te'ṅgulīyakam | aṅgulīyasyopalambhaḥ prāptistasmāt | viṣamaṃ kṛtamanena yattadāryaputrasya pratyayakāle durlabhamāsīt | tena kāraṇena | hi niścitam |