Ashtangasamgraha 28.38

28.38

tatra vāyurāmānvayaḥ sāmaḥ sārtiḥ san ādhmānakṛdasañcaraśca bhavati | pittamāmānvayaṃ durgandhitvādiguṇayuktaṃ bhavati | kapha āmānvaya āvilatvādiyuktaḥ | āvilo ghanaḥ | tantavo rajjavaḥ śleṣmamayāḥ | yathoktasvarūpaviparyaye tu vātādīnāṃ pakvatvaṃ nirāmatvaṃ vijñeyam | pittaśleṣmaṇostu nirāmayorviśeṣa ucyate | pittaṃ nirāmaṃ tāmrattvādiguṇayuktam | samecakamanekavarṇam | śleṣmā nirāma accho bhavati | śuṣkatvāt piṇḍito vā bhavati | viśadatvādiguṇayuktaśca | madhuro'tiśayena | nanu cā'maṃ kimucyata āha | ūṣmaṇa ityādi | ādyaṃ dhātumāhārasārākhyaṃ svasyoṣmaṇo'gneralpatvenā'pācitaṃ duṣṭamāmāśayagataṃ santaṃ rasamāmamityācāryāḥ pracakṣate | anye punarācāryā anyathā āmasya sambhavaṃ varṇayanti kathabhityāha | doṣebhya eva vātādibhyo'tiduṣṭebhyo'nyonyaṃ parasparaṃ sammūrcchanāt phenavadāmasambhavaḥ | yathā kodravākhyebhyaḥ śālibhyo deśakālāpekṣayā viṣasambhavaḥ tenaitaduktaṃ bhavati | yathā kodravā eva viṣaṃ sampadyante | evaṃ doṣāḥ apyatiduṣṭāḥ svenaiva bhāvenā''maḥ sampadyante |