The Compendium of Suśruta 58.14

58.14

kṛṣṇavrīhirityādinā āśuśabdavācyavārṣikadhānyopadeśaḥ | atrānte vrīhaya iti padaṃ sarveṣāṃ vrīhitvopadarśanārtham | pāke'madhurā īṣadamlamadhurāḥ | ahisā ityuṣṇāḥ | eteṣāṃ carake'mlapākatvopadeśe'pi yathā na prameyavirodhaḥ, tadvarṇitameva vipākaniyamapakṣe | kṛṣṇavrīhirvara iti svajātivrīhyapekṣayā pathyatvamucyate | 'alpābhiṣyandinastulyāḥ ṣaṣṭikairbalavardhanāḥ' iti tu pāṭho'nārṣaḥ, yena pāṭalaḥ sarvatantreṣu tridoṣakaraḥ paṭhitaḥ | taduktaṃ carake- "tridoṣastveva pāṭalaḥ" ( ca. sū. a. 27) iti | hārīte'pi "pāṭalaḥ khedaviṇmūtrabahulaḥ syāttridoṣakṛt" ityuktaṃ, tena pāṭalasya tathā vrīhīṇāṃ ca lokasiddhāpathyabhāvānāṃ pathyaiḥ ṣaṣṭikaiḥ samaṃ tulyatā na yuktā || 12-14 ||