Kalamayukha 4.p15

4.p15

māhātmyaṃ bhagavatyāstu purāṇādiṣu kīrtitam | paṭhecca śṛṇuyādvāpi sarvakāmasamṛddhaye || tathā— ekottarābhivṛddhayā tu navamīṃ yāvadeva hi | caṇḍīpāṭhaṃ japeccaiva jāpayedvā vidhānataḥ || vārāhītantre— saṅkalpitastotrapāṭhe saṅkhyāṃ kṛtvā paṭhetsudhīḥ | tatraiva— caṇḍīpāṭhaphalaṃ devi śṛṇuṣva gadato mama | ekāvṛttyādipāṭhānāṃ yathāvatkathayāmi te || saṅkalpapūrvaṃ saṃpūjya nyasyāṅgeṣu manūnsakṛt | pāṭhādvalipradānācca siddhimāpnoti mānavaḥ || upasargopaśāntyarthaṃ trirāvṛttaṃ paṭhennaraḥ | grahopaśāntau karttavyaṃ pañcāvṛttaṃ varānane || mahābhaye samutpanne saptāvṛttaṃ samunnayet | navāvṛttādbhavecchāntirvājapeyaphalaṃ labhet || rājavaṃśyāya bhūtyai ca rudrāvṛttamudīrayet | arkāvṛtte kāmyasiddhirvairahāniśca jāyate || manvāvṛttādripurvaśyastathā strī vaśyatāmiyāt | saukhyaṃ pañcadaśāvṛttācchriyamāpnoti mānavaḥ || kalāvṛttyā putrapautradhanadhānyāgamaṃ viduḥ | rājñāṃ bhītivimokṣāya vairasyoccāṭanāya ca || kuryātsaptadaśāvṛttaṃ tathāṣṭadaśakaṃ priye | mahāraṇavimokṣāya viṃśāvṛttaṃ paṭhetsudhīḥ || pañcaviṃśāvarttanāttu bhavedbandhavimokṣaṇam | saṅkaṭe samanuprāpte duścikitsyāmaye tathā || jātidhvaṃse kulocchede āyuṣo nāśa āgate | vairivṛddhau vyādhivṛddhau dhananāśe tathā kṣaye || tathaiva trividhotpāte tathācaivātipātake | kuryādyatnācchatāvṛttaṃ tataḥ saṃpadyate śubham || śreyovṛddhiḥ śatāvṛttādrājyavṛddhiratathā parā | manasā cintitaṃ devi siddhyedaṣṭottarācchatāt || śatāśvamedhayajñānāṃ phalamāpnoti suvrate | sahasrāvarttanāllakṣmīrāvṛṇoti svayaṃ sthirā || bhuktvā manorathānkāmānnaro mokṣamavāpnuyāt | yathāśvamedhaḥ kratūnāṃ devānāṃ ca yathā hariḥ || stavānāmapi sarveṣāṃ tathā saptaśatīstavaḥ | athavā bahunoktena kimetena varānane | caṇḍyāḥ śatāvṝttipāṭhātsarvāḥ siddhyanti siddhayaḥ || iti | pāṭhaśca nārāyaṇādīnnamaskṛtya kāryaḥ | nārāyaṇaṃ namaskṛtya naraṃ caiva narottamam | devīṃ sarasvatīṃ vyāsaṃ tato jayamudīrayet || itivacanāt | jayaśabdārthaśca bhaviṣyapurāṇe— aṣṭādaśapurāṇāni rāmasya caritaṃ tathā | viṣṇudharmādiśāstrāṇi śivadharmāśca bhārata || kārṣṇaṃ ca pañcamo vedo yanmahābhārataṃ smṛtam | śaivāśca dharmā rājendra mānvoktā mahīpate || jayeti nāma eteṣāṃ pravadanti manīṣiṇaḥ || iti | pāṭhaprakāraśca mātsye— praṇavaṃ cā''dito japtvā stotraṃ vā saṃhitāṃ japet | ante ca praṇavaṃ dadyādanyathā viphalaṃ bhavet || śuddhenānanyacittena paṭhitavyaṃ prayatnataḥ | na kāryāāsaktamanasā kārya stotrasya vācanam || ādhāre sthāpayitvā tu pustakaṃ prajapetsudhīḥ | hastasaṃsthāpanādeva yasmādalpaphalaṃ bhavet || svayaṃ ca likhitaṃ yattu kṛtinā likhitaṃ ca yat | abrāhmaṇena likhitaṃ taccāpi viphalaṃ bhavet