Tithyarka 4.p1.37

4.p1.37

eṣā sāṃvatsarī pūjā tavā'stu garuḍadhvaja !
aparādhasahasrāṇi kriyante'harniśaṃ mayā
dāso'hamiti māṃ matvā kṣamasva madhusūdana !
tataḥ pavitraṃ gurave dadyād gandhādipūrvakam
brāhmaṇān vaiṣṇavāṃścaiva gandhapuṣpādinā'rcayet
pakṣaṃ dvimāsaṃ sadyo vā trirātraṃ pañca vā nava
sāṃvatsarīṃ śubhāṃ pūjāṃ saṃpādya vidhivanmamaḥ
vrajedānīṃ pavitra ! tvaṃ viṣṇulokaṃ visarjitam
mantreṇānena tatsūtramavatārya yathāvidhi
uttārya brāhmaṇe dadyāttoye vā'tha visarjayet
anenaiva vidhānena sarveṣāṃ tridivaukasām
pavitrāropaṇaṃ kuryānmūrtī vā sthaṇḍile'pi vā
tattanmantraiḥ samāveśo visarjanavidhikriyāḥ |" iti dik
bhādraśukladvādaśī vāmanajayantī, tasyāṃ vāmanāvatārāt | taduktaṃ
śrībhāgavate'ṣṭamaskandhe'ṣṭādaśādhyāyārambhe—
“śroṇāyāṃ śravaṇadvādaśyāṃ muhūrte'bhijiti prabhuḥ
grahanakṣatratārādyāścakrustajjanma dakṣiṇam
dvādaśyāṃ savitā tiṣṭhanmadhyaṃdinagato nṛpa !
vijayā nāma sā proktā tasyāṃ janma vidurhareḥ ||”
vratahemādrau pakṣāntaramuktam—
“atha kāle bahutithe gate sā gurviṇī bhavet
suṣuve navame māsi putraṃ sā vāmanaṃ harim
etatsarvaṃ samabhavadekādaśyāṃ yudhiṣṭhira !
teneṣṭā devadevasya sarvathā vijayā tithiḥ ||” iti
atra kalpabhedena vyavasthā | samprati śrībhāgavatapakṣa evādriyate
śiṣṭaiḥ | iyaṃ madhyāhne vāmanaprādurbhāvānmadhyāhnavyāpinī
grāhyā | dinadvaye madhyāhnavyāptāvavyāptau vā pūrvā, pūrvoktaskāndavacanāt | tatra vidhirvratahemādrāvagnipurāṇe—
“nadīnāṃ saṅgame strāyādarcayedatra vāmanam
sauvarṇaṃ vastrasaṃyuktaṃ dvādaśāṅgulamucchritam ||”