Tithyarka 5.p1.40

5.p1.40

pradoṣe pūrṇimābhāvastadā bhadrāpucche kāryā,
“pṛthivyāṃ yāni kāryāṇi śubhāni tvaśubhāni tu
tāni sarvāṇi siddhyanti viṣṭipucche na saṃśayaḥ ||”
iti lallokteḥ | viṣṭipucchamuktaṃ jyotiḥśāstre—
“pañcadvayadrikṛtāṣṭarāmarasabhūyāmādighaṭyaḥ śarā
viṣṭerāsyamasadvajendurasarāmāṅkaśivabāṇābdhiṣu
yāmeṣvantyaghaṭītrayaṃ śubhakaraṃ pucchaṃ tathā vāsare
viṣṭistithyaparārddhajā śubhakarī rātrau tu pūrvārddhajā ||”
asyārthaḥ—śuklakṛṣṇapakṣayoścaturthyaṣṭamyekādaśīpaurṇamāsītṛtīyāsaptamīcaturdaśīṣu krameṇa pañcamadvitīyasaptamacaturthāṣṭamatṛtīyaṣaṣṭhaprathamapraharāṇāṃ prathamaghaṭīpañcakaṃ bhadrāmukham, tadaśubham,
āsveva tithiṣvaṣṭamaprathamaṣaṣṭhatṛtīyasaptamadvitīyapañcamacaturthaprahareṣvantimaṃ ghaṭītrayaṃ bhadrāpuccham, tacchubham; śeṣaṃ spaṣṭamiti
yadā tvasminneva viṣaye uttaradine sārddhayāmatrayamitā tato'dhikā
vā paurṇamāsī pratipadaścāpare'hnivṛddhistadā paurṇamāsyuttaramapi
pratipatpradoṣa eva holikā kāryā, na pūrve'hni viṣṭipucche
taduktaṃ bhaviṣye—
“sārddhayāmatrayaṃ pūrṇā dvitīye divase yadā
pratipadvarddhamānā tu tadā sā holikā smṛtā ||” iti
yattu vacanam—“vahnau vahniṃ parityajet” iti, vahnau holikāyāṃ
vahniṃ pratipadaṃ varjayedityarthaḥ, tadetat sāyaṅkāle bhadrārahitapaurṇamāsīlābhe'pi tāmatikramya pratipadi na karttavyamityetatparamunneyam, bhaviṣyavākyasya nirarthakatābhīteḥ | yadā pūrvarātribhadrānvitā, uttare'hni pradoṣe grastodayātmakaṃ candragrahaṇam, tadā
snātvā holā kāryā,
"snātvā karmāṇi kurvīta śṛtamannaṃ vivarjayet"