Kalaviveka 77.p1.38

77.p1.38

maitramanurādhā, raudramārdrā, vāsavo dhaniṣṭhā, ajaikapādaḥ pūrvvabhādrapadā, vāruṇaṃ śatabhiṣā
"navasvṛkṣeṣvamāvāsyā yadā syādaparāhnikī
śrāddhe mūlaphalenāpi pitṝṇāmutsavāya sā
māghāsite pañcadaśī kadācidupaiti yogaṃ yadi vāruṇena
ṛkṣeṇa kālaḥ sa paraḥ pitṝṇāmatyalpapuṇyairnṛpa labhyate'sau
kāle dhaniṣṭhā yadi nāma tasmin
bhavanti bhūpāla tadā pitṛbhyaḥ
dattaṃ jalārthaṃ pradadāti tṛptiṃ
varṣāsu taṃ tatkulajairmanuṣyaiḥ
tatraiva cedbhādrapadāsu pūrvvāḥ
kāle pitṛbhyaḥ kriyate tadā bhaiḥ
śrāddhaṃ parāṃ tṛptimavāpnuvanti
svargaṃ samagraṃ pitaraḥ samastāḥ
“śravaṇāśvidhaniṣṭhādrāṃnāgadaivatamastake
yadyamā ravidvāreṇa vyatīpātaḥ sa ucyate ||”
“pañcānanasthau gurubhūmiputrau
meṣe raviḥ syādyadi śuklapakṣe
pāśābhidhānā karabheṇa yuktā
tithivyaitīpāta itīha yogaḥ ||”
ayantu dvādaśīvyatīpātaḥ | yoglokena tu svalpabṛhadgranthabhedena
dvayamevoktam, balābalanirūpaṇākṣamatvāt | nakṣatrayoge varttamāna
eva tannimittā kriyā kāryā
tadāha mārkaṇḍeyaḥ
“kṛttikādibhararāyantaṃ vārāvāravisaptakam
naite saṃyogamātreṇa punanti sakalāntithim ||”
atha kātyāyanaḥ
“svadhanavadamāvāsyāṃ srotaḥsu ceti”
iti tithigocarabahuvidhavivādatamasā tirohito vidvān
tithitattvaṃ suvyaktaṃ cakāra yuktipradīpaśataiḥ
atha pūrvāhnādikaṃ vivicyate
tadā dvidhāvibhaktāhnaḥ pūrvo bhāgaḥ pūrvāhnaḥ, aparo bhāgo'parāhna iti kāladvayaṃ yadāśritya—
pūrvedyurupavāsaḥ syāt pūrvāhne svāpabodhayoḥ
aparāhne yadā rātrau tadaharniyamaṃ viduḥ