Kalaviveka 77.p1.72

77.p1.72

kṛṣṇāṣṭamyāntu nakṣatratrayasyaiva asambhavaḥ
atha paṭhanti
“śaśiputrasamāyuktā śuklapakṣāṣṭamo ca yā
tasyāṃ niyamakarttāro na syuḥ khaṇḍitasampadaḥ ||”
yadā pūrṇā sitāṣṭamīti vā dvitīyaḥ pādaḥ
tathāparaṃ paṭhanti
“aṣṭamī budhavāreṇa pakṣayorubhayorapi
bhaviṣyati tadā tasyāṃ vratametatkariṣyati ||”
atha liṅgapurāṇam
“aśokakalikāñcāṣṭau ye pibanti punarvvasau
caitre māsi sitāṣṭamyāṃ na te śokamavāpnuyuḥ ||”
tatraiva pānamantraḥ
“tvāmaśoka harābhīṣṭa madhumāsasamudbhava
pibāmi śokasantapto māmaśokaṃ sadā kuru ||”
paṭhanti
“pṛthivyāṃ yāni tīrthāni saritaḥ sāgarāstathā
sarvve lauhityamāyānti caitre māsi sitāṣṭamīm
punarvvasau vṛṣe lagne caitre māsi sitāṣṭamīm
lauhitye vidhivatsnātvā vājapeyaphalaṃ labhet
caitrāṣṭamyādipūrṇimā maśokairmanmathārccanam
tacca kāryyamaśokārthaṃ kriyā vāsantikī hi sā ||†
māghe māsi sitāṣṭamyāṃ salilaṃ bhīṣmavarmmaṇe
śrāddhañcāpi sadā kuryyuste syuḥ santatibhāginaḥ
śuklāṣṭamyāntu māghasya dadyādbhīṣmāya yo jalam
saṃvatsarakṛtaṃ pāpaṃ tatkṣaṇādeva muñcati
bhīṣmaḥ śāntanavo vīraḥ satyavādī jitendriyaḥ
ābhiradbhiravāpnotu putrapautrocitāṃ kriyām ||”
“vaiyāghrapadyagotrāya sāṅkṛtipravarāya ca
aputrāya dadāmyetatsalilaṃ bhīṣmavarmmaṇe ||”
“aṣṭamyāntu site pakṣe bhīṣmāya tu tilodakam
annañca vidhivaddadyuḥ sarvve varṇā dvijātayaḥ ||”)❊
kiñca bhīṣmaprabhṛtiśrāddhavidhāvādimattā prasajyeta anuvādamātrantu
tat†
atha navamī
tatra varāhapurāṇam
“navamyāntu sadā pūjyā gaurī devī samādhinā
varadā sarvvalokasya bhaviṣyati na saṃśayaḥ