Kalanirnaya (Kalamadhaviya) 6.p13

6.p13

tatra śukla-kṛṣṇa-pakṣābhyāṃ vyavasthā karttavyā | pakṣa-vṛddhi-kṣaya-vākyamapi pūrveṇa samāna-viṣayatayā vyākhyeyam | varddhamānasya candrasya yaḥ pakṣastasmeti yojanīyam | tathā sati, śuklapakṣadgatyuktaṃ bhavati | yadā pakṣaḥ kṣayaṃ yāti, —ityatrāpi pakṣa-nirvāhakaścandraḥ kṣayaṃ yātīti vyākhyāne kṛṣṇapakṣadati labhyate | atoyathokta-sodaya-trimuhūrtta-vyāpti-kṛto nirṇayaḥ susthitaḥ | atrāpyekabhaktavat ṣoḍhā bhidyate | udayakāle pūrvedyureva trimuhūrttavyāpinī, paredyureva trimuhūrttavyāpinī, ubhayatrāpi trimuhūrttavyāpinī, nobhayatra trimuhūrttasparśinī, ubhayatra sāmyena vaiṣamyeṇa vā trimuhūrttavarttinī, ekadeśavarttinī ceti | atra, prathamapakṣe khaṇḍatithilābhāvānnāsti sandehaḥ| tṛtīyādiṣu caturṣu pakṣeṣu astamaya-vyāpteḥ karma-kālavyāṅgasya ca lābhāt pūrvedyurevānuṣṭhānam | dvitīyapakṣe tu kṣayagāmitve trimuhūrttāmapyuttara-viddhāṃ parityajya pūrvedyurevānuṣṭhānam | vṛddhigāmitve sāmye ca paredyuriti nirṇayaḥ | dṛṣṭyaṅgabhūtā pratipatparva-nirṇaye vakṣyate | ||0|| iti dāna-vrata-nirṇayaḥ ||0|| uktānyupavāsaikabhaktāyācitadānavratāni pratipadviṣayāṇi | tāvatā daiva-viṣayonirṇayaḥ susthitaḥ