Nirnayasindhu 21.7-2

21.7-2

matsyasūkte-“navamyāṃ pūrvavatpūjā kartavyā bhūtimicchatā | dakṣiṇāṃ vastrayugmaṃ ca ācāryāya nivedayet
śatacaṇḍīvidhānanirṇayaḥ
athātra prasaṅgācchatacaṇḍīvidhānamucyate rudrayāmale- "śatacaṇḍīvidhānaṃ ca procyamānaṃ
śṛṇuṣva tat | sarvopadravanāśārthaṃ śatacaṇḍīṃ samārabhet || ṣoḍaśastaṃbhasaṃyuktaṃ maṇḍalaṃ pallavojjvalam | vasukoṇayutāṃ vedīṃ madhye kuryāttribhāgataḥ || pakkeṣṭakacitāṃ ramyāmucchrāye
hastasaṃmitām | tatra varṇarajobhiśca kuryānmaṇḍalakaṃ śubham || pañcavarṇavitānaṃ ca kiṃkiṇījālamaṇḍitam | ācāryeṇa samaṃ viprānvarayeddaśa suvratān || īśānyāṃ sthāpayetkumbhaṃ
pūrvoktavidhinā caret | vāruṇyāṃ ca prakartavyaṃ kuṇḍaṃ lakṣaṇalakṣitam || mūrtiṃ devyāḥ prakurvīta suvarṇasya palena vai | tadardhena tadardhena tadardhena mahāmate || aṣṭādaśabhujāṃ devīṃ kuryādvāṣṭakarāmāpi | paṭṭakūlayugacchannāṃ devīṃ madhye nidhāpayet || devīṃ sampūjya vidhivajjapaṃ
kuryurdaśa dvijāḥ | śatamādau śataṃ cānte japenmatraṃ navārṇavam || caṇḍīṃ saptaśatīṃ madhye
sampuṭoyamudāhṛtaḥ | ekaṃ dve trīṇi catvāri japeddinacatuṣṭayam || rūpāṇi kramaśastadvatpūjanādikamācaret | pañcamīdivase prātarhomaṃ kuryādvidhānataḥ| guḍūcīṃ pāyasaṃ dūrvāṃ tilāñchuklānyavānapi | caṇḍīpāṭhasya homaṃ tu pratiślokaṃ daśāṃśataḥ || homaṃ kuryādgrahādibhyaḥ
samidājyacarūn kramāt | hutvā pūrṇāhutiṃ dadyādvijebhyo dakṣiṇāṃ kramāt || kapilāṃ gāṃ
nīlamaṇiṃ śvetāśvaṃ chatracāmare | abhiṣekaṃ tataḥ kuryuryajamānasya ṛtvijaḥ | evaṃ kṛte'mareśāna sarvasiddhiḥ prajāyate ||”
sahasracaṇḍīnirṇayaḥ
atha sahasracaṇḍī | sā ca tatraivoktā-“sahasracaṇḍīṃ vidhivacchṛṇu viṣṇo mahāmate
rājyabhraṃśe mahotpāte janamāre mahābhaye || gajamāre'śvamāre ca paracakrabhaye tathā | ityādivividhe duḥkhe kṣayarogādije bhaye || sahasracaṇḍikāpāṭhaṃ kuryādvā kārayettathā | jāpakāstu
śataṃ proktā viṃśaddhastaśca maṇḍapaḥ || bhojyāḥ sahasraṃ viprendrā gośataṃ dakṣiṇāṃ diśet
gurave dviguṇaṃ deyaṃ śayyādānaṃ tathaiva ca | saptadhānyaṃ ca bhūdānaṃ śvetāśvaṃ ca manoharam
pañcaniṣkamitī mūrttiḥ kartavyā vārdhamānataḥ || aṣṭādaśabhujā devī sarvāyudhavibhūṣitā
avāritānnaṃ dātavyaṃ sahasraṃ pratyahaṃ prabho || śataṃ vā niyatāhāraḥ payaḥ pānena vartayet | evaṃ
yaścaṇḍikāpāṭhaṃ sahasraṃ tu samācaret || tasya syātkāryasiddhiratu nātra kāryā vicāraṇā ”