Nirnayasindhu 35.2-4.3
Nirṇayasindhu 35.2-4.3
- Language
- Sanskrit
35.2-4.3
atra kecidubhayataḥ sāpiṇḍyanivṛttāvevodvāho nānyathā ityāhuḥ | śuddhacintāmaṇivācaspatiharidattādayastu sagotratvavatsāpiṇḍyasya sapratiyogikatvena saṃyogavadubhayanirūpyatvāt ekato nivṛttāvanyato nivṛtterāvaśyakatvānmūlapuruṣamārabhyāṣṭamo varo mūlapuruṣamārabhya dvitīyātṛtīyādikāṃ kanyāmudvahedityāhuḥ
śiṣṭāstu na vadhūvarayoḥ svataḥ sāpiṇḍyaṃ kiṃ tu kūṭasthasaṃtatitvāttatsāpiṃḍyenaiva|| atoṣṭamavaraṃ prati kanyāyā asāpiṃḍyopi kanyāyāḥ kūṭasthena sāpiṇḍyāttatsaṃtatisthatvādūrastāṃ prati sapiṇḍa evetyavivāhaḥ | sāpiṇḍyatvāsāpiṇḍyayoḥ pratiyogibhedenāvirodhādityāhuḥ || idameva ca yuktam | āśaucepyevaṃ sāpiṇḍayaṃ jñeyam || yatra tu madhye vicchinnamapi sāpiṇḍayaṃ maṇḍūkaplutivatpunaranuvartate || yathā-'kūṭasthātpañcamyoḥ kanyayoḥ
putrau tatra nivṛttiḥ | tadapatyayostvanuvṛttistatrāpi na sāpiṇḍyāsāpiṇḍayayordoṣaḥ
saṃbandhibhedāt || tena tatra na vivāhaḥ || atra kūṭasthamārabhya gaṇanā kāryā | taduktaṃ"vadhvā varasya vā tātaḥ kūṭasthādyadi saptamaḥ | pañcamī cettayormātā tatsāpiṇḍyaṃ nivartate" iti || kūṭastho mūlapuruṣaḥ | viśvarūpanibandhe- "evamuktaprakāreṇa pitṛbandhuṣu saptamāt | ūrdhvameva vivāhyatvaṃ pañcamānmātṛbandhutaḥ || santāno bhidyate yasmāt pūrvajādubhayatra ca | tamādāya gaṇeddhīmān varaṃ yāvacca kanyakām ||” smṛtitattve nāradaḥ- "āsaptamātpañcamācca bandhubhyaḥ pitṛmātṛtaḥ | avivāhyā sagotrā ca samānapravarā tathā ||”
atra bandhubhya iti pañcamīnirdeśāt | pituḥ pitṛṣvasṛputrātsaptamīṃ mātuḥ pitṛṣvasṛputrācca
pañcamīmapi tyajet | evamanyabandhuṣu jñeyam