Nirnayasindhu 6.2

6.2

iti || tadatra samūlatvanirṇaye sati kalpabhedena vyavasthā draṣṭavyā || etāśca tadupāsakānāṃ
nityāḥ anyeṣāṃ tu kāmyāḥ || janmāṣṭamīmadyau tu viśeṣaṃ vakṣyāmaḥ
caitraśuklapañcamīnirṇayaḥ
caitraśuklapañcamī kalpādiḥ | taduktaṃ hemādrau mātsye-"brahmaṇo yā dinasyādiḥ kalpādiḥ
sā prakīrtitā || vaiśākhasya tṛtīyā yā kṛṣṇā yā phālgunasya ca || pañcamī caitramāsasya tathaivāṃtyā tathāparā || śuklā trayodaśī māghe kārtikasya tu saptamī || navamī
mārgaśīrṣasya saptaitāḥ saṃsmarāmyaham
"kalpānāmādayo hyetā dattasyākṣayakārakāḥ || atra sarvopi nirṇayo manvādivajjñeyaḥ
hemādrau brāhme-“śuklāyāmatha pañcamyāṃ caitre māsi śubhānanā | śrīrbrahmalokānmānuṣyaṃ
samprāptā keśavājñayā || atastāṃ pūjayettatra yastaṃ lakṣmīrna muñcati ||”
caitraśuklāṣṭamīnirṇayaḥ
caitraśuklāṣṭamyāṃ bhavānyā utpattiḥ || tatra navamīyutā grāhyā | 'aṣṭamī navamīyutā' iti
brahmavaivarttāt || atra bhavānīyātroktā kāśīkhaṇḍe-“bhavānīṃ yastu paśyeta śuklāṣṭamyāṃ
madhau naraḥ | na jātu śokaṃ labhate sadānandamayo bhavet ||” iti|| atraivāśokakalikāprāśanamuktaṃ hemādrau laiṅge-“aśokakalikāścāṣṭau ye pibanti punarvasau || caitre māsi
siteṣṭamyāṃ na te śokamavāpnuyuḥ ||” prāśanamantrastu-“tvāmaśokavarābhīṣṭaṃ madhumāsasamudbhavam | pibāmi śokasantapto māmaśokaṃ sadā kuru ||” iti | atra viśeṣaḥ pṛthvīcandrodaye viṣṇuḥ-“punarvasubudhopetā caitre māsi sitāṣṭamī | prātastu vidhivatsnātvā
vājapeyaphalaṃ labhet ||” iti || tithitattve kālikāpurāṇe-“caitre māsi sitāṣṭamyāṃ
yo naro niyatendriyaḥ | snāyālauhityatoyeṣu sa yāti brahmaṇaḥ padam || caitre tu sakalaṃ
māsaṃ śuciḥ prayatamānasaḥ | lauhityatoye yaḥ snāyātsa kaivalyamavāpnuyāt ”