Shraddhamanjari (Bapubhatta Kelakara) 6.1.35

6.1.35

gururbrahmā gururviṣṇurgururdevo maheśvaraḥ
gurureka(kaḥ) paraṃ brahma tasmai śrīgurave namaḥ
ityādimantrairviprāṃstīrtharājaṃ ca namaskṛtya gurvarthaviprahaste pādodakakalaśaṃ dattvā tadājñayā tattīrthaṃ mantreṇa gṛhṇīyāt | tatra mantraḥ—
avidyāmūlaśamanaṃ sarvapāpapraṇāśanam
gurupādodakaṃ citraṃ saṃsāradrumanāśanam
putrādikāmanāyāṃ tu—
śoṣaṇaṃ pāpapaṅkasya dīpanaṃ jñānatejasaḥ
gurupādodakaṃ citraṃ putrapautrapravardhanam
iti mantreṇa gṛhṇīyāt | tato viprānpraṇamya tānanyāṃśca dakṣiṇālaṃkārādibhistoṣayitvā sanmānapuraḥsaraṃ tānanuvrajya karmeśvarārpaṇaṃ kṛtvā
suhṛdyuto bhuñjīteti | itthaṃ vistareṇā''rādhanakaraṇāśaktau yathāśakti
brāhmaṇānāhūya pādaprakṣālanapūrvakaṃ gandhādibhiraṣṭākṣaramantreṇābhyarcya brahmībhūtagurūddeśena bhojayediti | sakṛnmahālayaśrāddhānantaramapyevamevā''rādhanam | idamārodhanaṃ caturvidhānāmapi saṃnyāsināṃ samānameva | caturvidhā
bhikṣavastuktāścandrikāyām—
caturvidhā bhikṣavastu vikhyātā brahmaṇo mukhāt
kuṭīcako bahūdako haṃsaścaiva tṛtīyakaḥ
caturthaḥ paramahaṃsaśca saṃjñābhedaiḥ prakīrtitāḥ || iti
eṣāṃ lakṣaṇāni tatraiva jñeyāni | iti saṃnyāsināmārādhanaprayogaḥ
atha vidhavākartṛkaśrāddham | smṛtisamuccaye—
svabhartṛprabhṛtitribhyaḥ svapitṛbhyastathaiva ca
vidhavā kārayecchrāddhaṃ yathākālamatandritā || iti
catvāri pārvaṇānīha vidhavāyāḥ sadaiva hi
svabhartṛśvaśurādīnāṃ mātāpitrostathaiva ca
tato mātāmahānāṃ ca śrāddhadānamupakramet || iti