Taittirīya Āraṇyaka 6: āraṇyake ṣaṣṭhaḥ praśnaḥ 6
Taittirīyāraṇyaka (complete text) 6
- Language
- Sanskrit
Contents
- 6.1 — 1 part
- 6.2 — 3 parts
- 6.3 — 2 parts
- 6.4 — 3 parts
- 6.5 — 3 parts
- 6.6 — 3 parts
- 6.7 — 1 part
- 6.8 — 2 parts
- 6.9 — 2 parts
- 6.10 — 2 parts
- 6.11 — 1 part
- 6.27 — 10 parts
āraṇyake ṣaṣṭhaḥ praśnaḥ 6
6.p1
0 saṃ tvā siñcāmi yajuṣā prajāmāyurdhanaṃ ca ||
6.p2
oṃ śāntiḥ śāntiḥ śāntiḥ ||
6.p3
1 pareyuvāṃsaṃ pravato mahīranu bahubhyaḥ panthāmanapaspaśānam | vaivasvataṃ saṃgamanaṃ janānāṃ yamaṃ rājānaṃ haviṣā duvasyata | idaṃ tvā vastraṃ prathamaṃ nvāgannapaitadūha yadihābibhaḥ purā | iṣṭāpūrtamanusaṃpaśya dakṣiṇāṃ yathā te dattaṃ bahudhā vi bandhuṣu | imau yunajmi te vahnī asunīthāya voḍhave | yābhyāṃ yamasya sādanaṃ sukṛtāṃ cāpi gacchatāt | pūṣā tvetaścyāvayatu pravidvānanaṣṭapaśurbhuvanasya gopāḥ | sa tvaitebhyaḥ paridadāt pitṛbhyo'gnirdevebhyaḥ suvidatrebhyaḥ | pūṣemā āśā anuveda sarvāsso asmāṃ abhayatamena neṣat | svastidā aghṛṇissarvavīro'prayucchanpura etu pravidvān ||
6.p4
2 āyurviśvāyuḥ paripāsati tvā pūṣā tvā pātu prapathe purastāt |
yatrāsate sukṛto yatra te yayustatra tvā devassavitā dadhātu |
bhuvanasya pata idaṃ haviḥ | agnaye rayimate svāhā | puruṣasya sayāvaryapedaghāni mṛjmahe | yathā no atra nāparaḥ purā jarasa āyati |
puruṣasya sayāvari vi te prāṇamasisrasam | śarīreṇa mahīmihi svadhayehi pitṝnupa prajayā'smānihāvaha | maivaṃ māgstā priye'haṃ devī satī pitṛlokaṃ yadaiṣi | viśvavārā nabhasā saṃvyayantyubhau no lokau payasā'bhyāvavṛthsva ||
6.p5
3 iyaṃ nārī patilokaṃ vṛṇānā nipadyata upa tvā martya pretam | viśvaṃ purāṇamanupālayantī tasyai prajāṃ draviṇaṃ ceha dhehi | udīrṣva nāryabhi jīvalokamitāsumetamupaśeṣa ehi |
hastagrābhasya didhiṣostvametatpatyurjanitvamabhi saṃbabhūva |
suvarṇaṃ hastādādadānā mṛtasya śriyai brahmaṇe tejase balāya | atraiva tvamiha vayaṃsuśevā viśvāsspṛdho abhimātīrjayema |
dhanurhastādādadānā mṛtasya śriyai kṣatrāyaujase balāya | atraiva tvamiha vayaṃ suśevā viśvāsspṛdho abhimātīrjayema | maṇiṃ hastādādadānā mṛtasya śriyai viśe puṣṭyai balāya | atraiva tvamiha vayaṃ suśevā viśvāsspṛdho abhimātīrjayema ||
6.p6
4 imamagne camasaṃ mā vijīhvaraḥ priyo devānāmuta somyānām | eṣa yaścamaso devapānastasmindevā amṛtā mādayantām | agnervarma pari gobhirvyayasva saṃprorṇuṣva medasā pīvasā ca | nettvā dhṛṣṇurharasā jarhṛṣāṇo dadhadvidhakṣyanparyaṅkhayātai |
mainamagne vidaho mā'bhiśoco mā'sya tvacaṃ cikṣipo mā śarīram | yadā śṛtaṃ karavo jātavedo'themenaṃ prahiṇutātpitṛbhyaḥ |
śṛtaṃ yadā'karasi jātavedo'themenaṃ paridattātpitṛbhyaḥ |
yadā gacchātyasunītimetāmathā devānāṃ vaśanīrbhavāti | sūryaṃ te cakṣurgacchatu vātamātmā dyāṃ ca gaccha pṛthivīṃ ca dharmaṇā |
apo vā gaccha yadi tatra te hitamoṣadhīṣu pratitiṣṭhā śarīraiḥ |
ajo'bhāgastapasā taṃ tapasva taṃ te śocistapatu taṃ te arciḥ |
yāste śivāstanuvo jātavedastābhirvahemaṃ sukṛtāṃ yatra lokāḥ |
ayaṃ vai tvamasmādadhi tvametadayaṃ vai tadasya yonirasi | vaiśvānaraḥ putraḥ pitre lokakṛjjātavedo vahemaṃ sukṛtāṃ yatra lokāḥ ||
6.1
vidvānabhyāvavṛthsvābhimātīrjayema śarīraiścatvāri ca ||
6.1.p1
5 ya etasya patho goptārastebhyassvāhā ya etasya patho rakṣitārastebhyassvāhā ya etasya patho'bhirakṣitārastebhyassvāhā''khyātre svāhā'pākhyātre svāhā'bhilālapate svāhā'palālapate svāhā'gnaye karmakṛte svāhā yamatra nādhīmastasmai svāhā | yasta idhmaṃ jabharathsiṣvidāno mūrdhānaṃ vāta tapate tvāyā | divo viśvasmāthsīmaghāyata uruṣyaḥ | asmāttvamadhi jāto'si tvadayaṃ jāyatāṃ punaḥ | agnaye vaiśvānarāya suvargāya lokāya svāhā ||
6.2
ya etasya tvatpañca ||
6.2.p1
6 pra ketunā bṛhatā bhātyagnirāvirviśvāni vṛṣabho roravīti | divaścidantādupa māmudānaḍapāmupasthe mahiṣo vavardha |
idaṃ ta ekaṃ para ū ta ekaṃ tṛtīyena jyotiṣā saṃviśasva |
saṃveśanastanuvai cāruredhi priyo devānāṃ parame sadhasthe |
nāke suparṇamupa yatpatantaṃ hṛdā venanto abhyacakṣata tvā |
hiraṇyapakṣaṃ varuṇasya dūtaṃ yamasya yonau śakunaṃ bhuraṇyum |
atidrava sārameyau śvānau caturakṣau śabalau sādhunā pathā | athā pitṝnthsuvidatrāṃ apīhi yamena ye sadhamādaṃ madanti | yau te śvānau yama rakṣitārau caturakṣau pathirakṣī nṛcakṣasā | tābhyāṃ rājanparidehyena2ṃ svasti cāsmā anamīvaṃ ca dhehi ||
6.2.p2
7 uruṇasāvasutṛpāvulumbalau yamasya dūtau carato'vaśāṃanu | tāvasmabhyaṃ dṛśaye sūryāya punardattāvasumadyeha bhadram |
soma ekebhyaḥ pavate ghṛtameka upāsate | yebhyo madhu pradhāvati tāgścidevāpi gacchatāt | ye yudhyante pradhaneṣu śūrāso ye tanutyajaḥ | ye vā sahasradakṣiṇāstāgścidevāpi gacchatāt | tapasā ye anādhṛṣyāstapasā ye suvargatāḥ | tapo ye cakrire mahattāgścidevāpi gacchatāt | aśmanvatī revatīḥ saṃrabhadhvamuttiṣṭhata prataratā sakhāyaḥ |
atrā jahāma ye asannaśevāḥ śivān, vayamabhi vājānuttarema ||
6.2.p3
8 yadvai devasya savituḥ pavitraṃ sahasradhāraṃ vitatamantarikṣe | yenāpunādindramanārtamārtyai tenāhaṃ māṃsarvatanuṃ punāmi |
yā rāṣṭrātpannādapayanti śākhā abhimṛtā nṛpatimicchamānāḥ |
dhātustāssarvāḥ pavanena pūtāḥ prajayā'smānrayyā varcasā saṃsṛjātha | udvayaṃ tamasaspari paśyanto jyotiruttaram | devaṃ devatrā sūryamaganma jyotiruttamam | dhātā punātu savitā punātu | agnestejasā sūryasya varcasā ||
6.3
dhehyuttaremāṣṭau ca ||
6.3.p1
9 yaṃ te agnimamanthāma vṛṣabhāyeva paktave | imaṃ taṃ śamayāmasi kṣīreṇa codakena ca | yaṃ tvamagne samadahastvamu nirvāpayā punaḥ | kyāmbūratra jāyatāṃ pākadūrvāvyalkaśā | śītike śītikāvati hlāduke hlādukāvati | maṇḍūkyā susaṅgamayema2ṃ svagniṃ śamaya | śaṃ te dhanvanyā āpaḥ śamu te santvanūkyāḥ | śaṃ te samudriyā āpaḥ śamu te santu varṣyāḥ | śaṃ te sravantīstanuve śamu te santu kūpyāḥ | śaṃ te nīhāro varṣatu śamu pṛṣvā'vaśīyatām ||
6.3.p2
10 avasṛja punaragne pitṛbhyo yasta āhutaścarati svadhābhiḥ | āyurvasāna upayātu śeṣaṃ saṃgacchatāṃ tanuvā jātavedaḥ |
saṃgacchasva pitṛbhissa2ṃ svadhābhissamiṣṭāpūrtena parame vyomann | yatra bhūmyai vṛṇase tatra gaccha tatra tvā devassavitā dadhātu | yatte kṛṣṇaḥ śakuna ātutoda pipīlaḥ sarpa uta vā śvāpadaḥ |
agniṣṭadviśvādanṛṇaṃ kṛṇotu somaśca yo brāhmaṇamāviveśa |
uttiṣṭhātastanuvaṃ sambharasva meha gātramavahā mā śarīram |
yatra bhūmyai vṛṇase tatra gaccha tatra tvā devassavitā dadhātu | idaṃ ta ekaṃ para ū ta ekaṃ tṛtīyena jyotiṣā saṃviśasva | saṃveśanastanuvai cāruredhi priyo devānāṃ parame sadhasthe | uttiṣṭha prehi pradravaukaḥ kṛṇuṣva parame vyoman | yamena tvaṃ yamyā saṃvidānottamaṃ nākamadhirohemam | aśmanvatī revatīryadvai devasya savituḥ pavitraṃ yā rāṣṭrātpannādudvayaṃ tamasaspari dhātā punātu |
asmāttvamadhijāto'syayaṃ tvadadhijāyatām | agnaye vaiśvānarāya suvargāya lokāya svāhā ||
6.4
avaśīyatāṃ sadhasthe pañca ca ||
6.4.p1
11 āyātu devassumanābhirūtibhiryamo ha veha prayatābhiraktā | āsīdatāṃ suprayate ha barhiṣyūrjāya jātyai mama śatruhatyai | yame iva yatamāne yadaitaṃ pra vāṃ bharanmānuṣā devayantaḥ | āsīdatagg svamu lokaṃ vidāne svāsasthe bhavatamindave naḥ | yamāya somaṃsunuta yamāya juhutā haviḥ | yamaṃha yajño gacchatyagnidūto araṃkṛtaḥ | yamāya ghṛtavaddhavirjuhota pra ca tiṣṭhata | sa no deveṣvāyamaddīrghamāyuḥ prajīvase | yamāya madhumattamaṃ rājñe havyaṃ juhotana | idaṃ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ ||
6.4.p2
12 yo'sya kauṣṭhya jagataḥ pārthivasyaika idvaśī | yamaṃ bhaṅgyaśravo gāya yo rājā'naparodhyaḥ | yamaṃ gāya bhaṅgyaśravo yo rājā'naparodhyaḥ | yenāpo nadyo dhanvāni yena dyauḥ pṛthivī dṛḍhā | hiraṇyakakṣyānthsudhurān hiraṇyākṣānayaśśaphān | aśvānanaśyato dānaṃ yamo rājā'bhitiṣṭhati | yamo dādhāra pṛthivīṃ yamo viśvamidaṃ jagat | yamāya sarvamitrasthe yatprāṇadvāyurakṣitam | yathā pañca yathā ṣaḍyathā pañcadarṣayaḥ | yamaṃ yo vidyāthsa brūyādyathaika ṛṣirvijānate ||
6.4.p3
13 trikadrukebhiḥ patati ṣaḍurvīrekamidbṛhat | gāyatrī triṣṭupchandāṃsi sarvā tā yama āhitā | aharaharnayamāno gāmaśvaṃ puruṣaṃ jagat | vaivasvato na tṛpyati pañcabhirmānavairyamaḥ |
vaivasvate vivicyante yame rājani te janāḥ | ye ceha satyenecchante ya u cānṛtavādinaḥ | te rājanniha vivicyante'thā yanti tvāmupa | devāgśca ye namasyanti brāhmaṇāgścāpacityati | yasminvṛkṣe supalāśe devaiḥ saṃpibate yamaḥ | atrā no viśpatiḥ pitā purāṇā anuvenati ||
6.5
pathikṛdbhyo vijānate'nuvenati ||
6.5.p1
14 vaiśvānare haviridaṃ juhomi sāhasramuthsaṃ śatadhārametam | tasminneṣa pitaraṃ pitāmahaṃ prapitāmahaṃ bibharatpinvamāne |
drapsaścaskanda pṛthivīmanu dyāmimaṃ ca yonimanu yaśca pūrvaḥ |
tṛtīyaṃ yonimanu saṃcarantaṃ drapsaṃ juhomyanu sapta hotrāḥ |
imaṃ samudraṃ śatadhāramuthsaṃ vyacyamānaṃ bhuvanasya madhye | ghṛtaṃ duhānāmaditiṃ janāyāgne mā hiṃsīḥ parame vyomann | apeta vīta vi ca sarpatāto ye'tra stha purāṇā ye ca nūtanāḥ |
ahobhiradbhiraktubhirvyaktaṃ yamo dadātvavasānamasmai | savitaitāni śarīrāṇi pṛthivyai māturupastha ādadhe | tebhiryujyantāmaghniyāḥ ||
6.5.p2
15 śunaṃ vāhāḥ śunaṃ nārāḥ śunaṃ kṛṣatu lāṅgalam | śunaṃ varatrā badhyantāṃ śunamaṣṭrāmudiṅgaya śunāsīrā śunamasmāsu dhattam |
śunāsīrāvimāṃ vācaṃ yaddivi cakrathuḥ payaḥ | tenemāmupasiñcatam | sīte vandāmahe tvā'rvācī subhage bhava | yathā nassubhagā sasi yathā nassuphalā sasi | savitaitāni śarīrāṇi pṛthivyai māturupastha ādadhe | tebhiradite śambhava | vimucyadhvamaghniyā devayānā atāriṣma tamasaspāramasya |
jyotirāpāma suvaraganma ||
6.5.p3
16 pra vātā vānti patayanti vidyuta udoṣadhīrjihate pinvate suvaḥ | irā viśvasmai bhuvanāya jāyate yatparjanyaḥ pṛthivīṃ retasā'vati | yathā yamāya hārmyamavapanpañca mānavāḥ | evaṃ vapāmi hārmyaṃ yathā'sāma jīvaloke bhūrayaḥ | citasstha paricita ūrdhvacitaḥ śrayadhvaṃ pitaro devatā | prajāpatirvassādayatu tayā devatayā | āpyāyasva saṃ te ||
6.6
aghniyā aganma sapta ca ||
6.6.p1
17 utte tabhnomi pṛthivīṃ tvatparīmaṃ lokaṃ nidadhanmo ahaṃriṣam |
etāg sthūṇāṃ pitaro dhārayantu te'trā yamaḥ sādanātte minotu | upasarpa mātaraṃ bhūmimetāmuruvyacasaṃ pṛthivīṃ suśevām | ūrṇamradā yuvatirdakṣiṇāvatyeṣā tvā pātu nirṛtyā upasthe | ucchmañcasva pṛthivi mā vibādhithāḥ sūpāyanā'smai bhava sūpavañcanā | mātā putraṃ yathā sicā'bhyenaṃ bhūmi vṛṇu | ucchmañcamānā pṛthivī hi tiṣṭhasi sahasraṃ mita upa hi śrayantām | te gṛhāso madhuścuto viśvāhā'smai śaraṇāssantvatra | eṇīrdhānā hariṇīrarjunīssantu dhenavaḥ | tilavathsā ūrjamasmai duhānā viśvāhā santvanapasphurantīḥ ||
6.6.p2
18 eṣā te yamasādane svadhā nidhīyate gṛhe | akṣitirnāma te asau |
idaṃ pitṛbhyaḥ prabharema barhirdevebhyo jīvanta uttaraṃ bharema | tattvamārohāso medhyo bhavaṃ yamena tvaṃ yamyā saṃvidānaḥ | mā tvā vṛkṣau saṃbādhiṣṭāṃ mā mātā pṛthivi tvam | pitṝn hyatra gacchāsyedhāsaṃ yamarājye | mā tvā vṛkṣau saṃbādhethāṃ mā mātā pṛthivī mahī | vaivasvataṃ hi gacchāsi yamarājye virājasi |
naḻaṃ plavamārohaitaṃ naḻena patho'nvihi | sa tvaṃ naḻaplavo bhūtvā saṃtara pratarottara ||
6.6.p3
19 savitaitāni śarīrāṇi pṛthivyai māturupastha ādadhe | tebhyaḥ pṛthivi śambhava | ṣaḍḍhotā sūryaṃ te cakṣurgacchatu vātamātmā dyāṃ ca gaccha pṛthivīṃ ca dharmaṇā | apo vā gaccha yadi tatra te hitamoṣadhīṣu pratitiṣṭhā śarīraiḥ | paraṃ mṛtyo anuparehi panthāṃ yaste sva itaro devayānāt | cakṣuṣmate śṛṇvate te bravīmi mā naḥ prajāṃ rīriṣo mota vīrān | śaṃ vātaḥ śaṃhi te ghṛṇiḥ śamu te santvoṣadhīḥ | kalpantāṃ me diśaḥ śagmāḥ | pṛthivyāstvā loke sādayāmyamuṣya śarmāsi pitaro devatā | prajāpatistvā sādayatu tayā devatayā | antarikṣasya tvā divastvā diśāṃ tvā nākasya tvā pṛṣṭhe bradhnasya tvā viṣṭape sādayāmyamuṣya śarmāsi pitaro devatā | prajāpatistvā sādayatu tayā devatayā ||
6.7
anapasphurantīruttara devatayā dve ca ||
6.7.p1
20 apūpavānghṛtavāgścarureha sīdatūttabhnuvanpṛthivīṃ dyāmutopari | yonikṛtaḥ pathikṛtassaparyata ye devānāṃ ghṛtabhāgā iha stha |
eṣā te yamasādane svadhā nidhīyate gṛhe'sau | daśākṣarā tāṃ rakṣasva tāṃ gopāyasva tāṃ te paridadāmi tasyāṃ tvā mā dabhanpitaro devatā | prajāpatistvā sādayatu tayā devatayā | apūpavāñchṛtavān kṣīravān dadhivān madhumāgścarureha sīdatūttabhnuvanpṛthivīṃ dyāmutopari | yonikṛtaḥ pathikṛtassaparyata ye devānāṃ śṛtabhāgāḥ, kṣīrabhāgā dadhibhāgā madhubhāgā iha stha |
eṣā te yamasādane svadhā nidhīyate gṛhe'sau | śatākṣarā sahasrākṣarā'yutākṣarā'cyutākṣarā tāṃ rakṣasva tāṃ gopāyasva tāṃ te paridadāmi tasyāṃ tvāmādabhanpitaro devatā | prajāpatistvā sādayatu tayā devatayā ||
6.8
apūpavānasau daśa ||
6.8.p1
21 etāste svadhā amṛtāḥ karomi yāste dhānāḥ parikirāmyatra | tāste yamaḥ pitṛbhissaṃvidāno'tra dhenūḥ kāmadughāḥ karotu |
tvāmarjunauṣadhīnāṃ payo brahmāṇa idviduḥ | tāsāṃ tvā madhyādādade carubhyo apidhātave | dūrvāṇāg stambamāharaitāṃ priyatamāṃ mama |
imāṃ diśaṃ manuṣyāṇāṃ bhūyiṣṭhā'nu virohatu | kāśānāg stambamāhara rakṣasāmapahatyai | ya etasyai diśaḥ parābhavannaghāyavo yathā te nābhavānpunaḥ | darbhāṇāg stambamāhara pitṛṇāmoṣadhīṃ priyām |
anvasyai mūlaṃ jīvādanu kāṇḍamatho phalam ||
6.8.p2
22 lokaṃ pṛṇa tā asya sūdadohasaḥ | śaṃ vātaḥ śaṃ hite ghṛṇiḥ śamu te santvoṣadhīḥ | kalpantāṃ te diśassarvāḥ | idameva meto'parāmārtimārāma kāṃcana | tathā tadaśvibhyāṃ kṛtaṃ mitreṇa varuṇena ca | varaṇo vārayādidaṃ devo vanaspatiḥ | ārtyai nirṛtyai dveṣācca vanaspatiḥ | vidhṛtirasi vidhārayāsmadaghā dveṣāṃsi śami śamayāsmadaghā dveṣāṃsi yava yavayāsmadaghā dveṣāṃsi | pṛthivīṃ gacchāntarikṣaṃ gaccha divaṃ gaccha diśo gaccha suvargaccha suvargaccha diśo gaccha divaṃ gacchāntarikṣaṃ gaccha pṛthivīṃ gacchāpo vā gaccha yadi tatra te hitamoṣadhīṣu pratitiṣṭhā śarīraiḥ | aśmanvatī revatīryadvai devasya savituḥ pavitraṃ yā rāṣṭrātpannādudvayaṃ tamasaspari dhātā punātu ||
6.9
phalaṃ punātu ||
6.9.p1
23 ārohatā''yurjarasaṃ gṛṇānā anupūrvaṃ yatamānā yatiṣṭa | iha tvaṣṭā sujanimā suratno dīrghamāyuḥ karatu jīvase vaḥ | yathā'hānyanupūrvaṃ bhavanti yathartava ṛtubhiryanti klṛptāḥ | yathā na pūrvamaparo jahātyevā dhātarāyūṃṣi kalpayaiṣām | na hi te agne tanuvai krūraṃ cakāra martyaḥ | kapirbabhasti tejanaṃ punarjarāyu gauriva | apa naḥ śośucadaghamagne śuśuddhyā rayim | apa naḥ śośucadaghaṃ mṛtyave svāhā | anaḍvāhamanvārabhāmahe svastaye | sa na indra iva devebhyo vahnissaṃpāraṇo bhava ||
6.9.p2
24 ime jīvā vi mṛtairāvavartinnabhūdbhadrā devahūtiṃ no adya |
prāñjo'gāmā nṛtaye hasāya drāghīya āyuḥ pratarāṃ dadhānāḥ |
mṛtyoḥ padaṃ yopayanto yadaima drāghīya āyuḥ pratarāṃ dadhānāḥ | āpyāyamānāḥ prajayā dhanena śuddhāḥ pūtā bhavatha yajñiyāsaḥ |
imaṃ jīvebhyaḥ paridhiṃ dadhāmi mā no'nu gādaparo ardhametam |
śataṃ jīvantu śaradaḥ purūcīstiro mṛtyuṃ dadmahe parvatena | imā nārīravidhavāḥ supatnīrāñjanena sarpiṣā saṃmṛśantām | anaśravo anamīvāssuśevā ārohantu janayo yonimagre | yadāñjanaṃ traikakudaṃ jātaṃ himavataspari | tenāmṛtasya mūlenārātīrjambhayāmasi | yathā tvamudbhinathsyoṣadhe pṛthivyā adhi | evamima udbhindantu kīrtyā yaśasā brahmavarcasena | ajo'syajāsmadaghā dveṣāṃsi yavo'si yavayāsmadaghā dveṣāṃsi ||
6.10
bhava jambhayāmasi trīṇi ca ||
6.10.p1
25 apa naḥ śośucadaghamagne śuśuddhyā rayim | apa naḥ śośucadagham | sukṣetriyā sugātuyā vasūyā ca yajāmahe | apa naḥ śośucadagham |
pra yadbhandiṣṭha eṣāṃ prāsmākāsaśca sūrayaḥ | apa naḥ śośucadagham |
pra yadagnessahasvato viśvato yanti sūrayaḥ | apa naḥ śośucadagham |
pra yatte agne sūrayo jāyemahi pra te vayam | apa naḥ śośucadagham ||
6.10.p2
26 tvaṃ hi viśvatomukha viśvataḥ paribhūrasi | apa naḥ śośucadagham | dviṣo no viśvato mukhā'ti nāveva pāraya | apa naḥ śośucadagham |
sa nassindhumiva nāvayā'tiparṣā svastaye | apa naḥ śośucadagham |
āpaḥ pravaṇādiva yatīrapāsmathsyandatāmagham | apa naḥ śośucadagham | udvanādudakānīvāpāsmathsyandatāmagham | apa naḥ śośucadagham |
ānandāya pramodāya punarāgāg svāngṛhān | apa naḥ śośucadagham |
na vai tatra pramīyate gauraśvaḥ puruṣaḥ paśuḥ | yatredaṃ brahma kriyate paridhirjīvanāya kamapa naḥ śośucadagham ||
6.11
aghamaghaṃ catvāri ca ||
6.11.p1
27 apaśyāma yuvatimācarantīṃ mṛtāya jīvāṃ pariṇīyamānām | andhena yā tamasā prāvṛtā'si prācīmavācīmavayannariṣṭyai | mayaitāṃ māgstāṃ bhriyamāṇā devī satī pitṛlokaṃ yadaiṣi | viśvavārā nabhasā saṃvyayantyubhau no lokau payasā''vṛṇīhi | rayiṣṭhāmagniṃ madhumantamūrmiṇamūrjassantaṃ tvā payasopasaṃsadema | saṃ rayyā samu varcasā sacasvā nassvastaye | ye jīvā ye ca mṛtā ye jātā ye ca jantyāḥ | tebhyo ghṛtasya dhārayituṃ madhudhārā vyundatī | mātā rudrāṇāṃ duhitā vasūnāg svasā''dityānāmamṛtasya nābhiḥ | pra ṇu vocaṃ cikituṣe janāya mā gāmanāgāmaditiṃ vadhiṣṭa | pibatūdakaṃ tṛṇānyattu |
omuthsṛjata ||
6.12
vadhiṣṭa dve ca ||
6.12_2
pareyuvāṃsaṃ pravidvānbhuvanasyābhyāvavṛthsvājo bhāgo'yaṃ vai catuścatvāriṃśadya etasya tvatpañca pra ketunedaṃ te nāke suparṇaṃ yau te ye yudhyante tapasā'śmanvatī revatīssaṃ rabhadhvamaṣṭāviṃśatiryaṃ te yatta uttiṣṭhedaṃ ta uttiṣṭha prehyaśman yadvā udvayamayaṃ pañcaviṃśatirāyātu triṃśadvaiśvānare tasmindrapsa imamapetāhobhiryujyantāmaghniyā adite pāraṃ va āpyāyasva saptaviṃśatirutte tabhnomyakṣitistebhyaḥ pṛthivi ṣaḍḍhotā paraṃ me śagmāḥ pṛthivyā antarikṣasya dvātriṃśadapūpavānasau daśa śata daśaitāste te diśassarvā idamaśmanviṃśatirārohata tanuvai krūraṃ cakāra punarmṛtyave mā no'nu gāddadmaha imā nārīḥ pari trayoviṃśatirapa nassukṣetriyā pra yadbhandiṣṭhaḥ prayadagneḥ pra yatte agne tvaṃhi dviṣassanassindhumāpaḥ pravaṇādudvanādānandāya na vai tatra yatredaṃ caturviṃśatirapaśyāmā''vṛṇīhi dvādaśa dvādaśa ||
6.27
pare yuvāṃ samāyātvetāste saptaviṃśatiḥ ||
6.27.p1
pareyuvāṃsamomuthsṛjata ||
6.27.p2
0 saṃ tvā siñcāmi yajuṣā prajāmāyurdhanaṃ ca ||
6.27.p3
oṃ śāntiḥ śāntiḥ śāntiḥ ||
6.27.p4
sumaṅgalīriyaṃ vadhūrimāṃ sameta paśyata |
saubhāgyamasyai datvāyāthāstaṃ viparetana ||
6.27.p5
oṃ śāntiḥ śāntiḥ śāntiḥ ||
6.27.p6
iti taittirīya-āraṇyakam 1 ||
6.27.p7
taittirīya-āraṇyakam - 2
6.27.p8
upaniṣadaḥ ekāgnikāṇḍaṃ ca ||
6.27.p9
śrī gurubhyo namaḥ ||
6.27.p10
hariḥ o(4)m ||
Linked texts (7)
- Āgniveśyagṛhyasūtra — Agniveśa, Sanskrit
- Kauṣītakagṛhyasūtra — Sanskrit
- Baudhāyanaśrautasūtra — Baudhāyana, Sanskrit
- Merutantra — Gommaṭa, Sanskrit
- Āpastambaśrautasūtra — Āpastamba, Sanskrit
- Bhāradvājaśrautasūtra — Sanskrit
- Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī) — Sanskrit