Rigvedabrahmana 10.6

10.6

atha manotāmanvāha sarvā ha vai devatāḥ paśumālabhyamānamupasaṃgacchante mama nāma grahīṣyati mama nāma grahīṣyatīti tāsāṃ sarvāsām
paśāveva manāṃsyotāni bhavanti tā atra prīṇāti tathā hāsāṃ sarvāsāmamoghāyaivopasametaṃ bhavati tadāhuryannānādevatāḥ paśava ālabhyante
'tha kasmādāgneyamevānvāheti tisro vai devānāṃ manotā agnirvai devānāṃ
manotā tasminheṣāṃ manāṃsyotāni bhavantyatho vāgvai devānāṃ manotā
tasyāṃ hyeṣāṃ manāṃsyotāni bhavantyatho gaurvai devānāṃ manotā tasyāṃ
hyeṣāṃ manāṃsyotāni bhavantyagniḥ sarvā manotā agnau manotāḥ saṃgacchante tasmādāgneyamevānvāheti tā vai trayodaśa bhavanti trayodaśa vai
paśoravadānāni teṣāṃ samavadyati triḥ prathamayā triruttamayā saptadaśa
saṃpadyante saptadaśo vai prajāpatiretadvā ārdhukaṃ karma yatprajāpatisaṃmitaṃ
saptadaśa sāmidhenīranvāha saptadaśo vai prajāpatiretadvā ārdhukaṃ karma
yatprajāpatisaṃmitamatha yatra paśurālabhyate tadvanaspatiracyuto 'gnirvai vanaspatiḥ sa vai devebhyo haviḥ śapayati tasmādacyuto bhavati sa u vai
payobhājano 'trāgniḥ sarveṣu haviḥṣu bhāgī bhavati tadāhuryaddhāmabhājo
devā atha kasmātpāthobhāgvanaspatiriti dhāma vai devā yajñastāyajanta
pāthaḥ pitaraḥ pitṛdevatya iva vai paśuḥ pitṛdevatyaṃ payastasmāditi brūyāttadāhuḥ kasmātsaumya evādhvare pravṛtāhutī juhvati na haviryajña
ityakṛtaivai vā eṣā devayajyā yaddhaviryajño 'thaiṣaiva kṛtsnā devayajyā
yatsaumyo 'dhvarastasmātsaumya evādhvare pravṛtāhutī juhoti na haviryajña
iti juṣṭo vāco bhūyāsaṃ juṣṭo vācaspaterdevi vāgyatte vāco madhumattamaṃ tasminno adya dhātsvāhā sarasvatyā iti purastātsvāhākāreṇa
juhoti vācaṃ tadutsṛjate tasmādvāgata ūrdhotsṛṣṭā yajñaṃ vahati manasottarāṃ manasā hi manaḥ prītaṃ manasā hi manaḥ prītam