Māṇḍūkya Upaniṣad 6.4.2

6.4.2

gauriva kiṃ catuṣpādityāśaṅkya netyāha - jāgaritasthāno jāgaritaṃ sthānaṃ yasya sa jāgaritasthānaḥ | bahiḥprajño bahī rūpādau cakṣurādigrāhye prajñā yasya sa bahiḥprajñaḥ | saptāṅgaḥ saptasaṃkhyākāni dyusūryava,tyākāśairyapṛthivyāhavanīyākhyāni mūrdhacakṣuḥ prāṇaśarīrāntarbhāgamūtrāśayapādākhyānyaṅgāni yasya sa saptāṅgaḥ | ekonaviṃśati mukhaḥ pañcajñānakarmendriyaprāṇāntaḥkaraṇacatuṣṭayarūpāṇi mukhānyekonaviṃśatisaṃkhyākāni yasya sa ekonaviṃśatimukhaḥ | sthūlabhuk, sthūlaṃ rūpādikaṃ bhuṅkta iti sthaḷabhuk| vaiśvānaro viśveṣāmayaṃ naro viśve vā narā yasya viśvaścāsau naraśceti [ vā ] viśvānaraḥ, sa eṣa vaiśvānaraḥ | athavā viśveṣāṃ naraśabdavācyānāṃ caturvidhānāṃ sthūlānāṃ dehānāmadhiṣṭhātā'yaṃ vaiśvānaraḥ prathamaḥ pādaḥ | ātmano'yaṃ sarvaiḥ sukarāvagamatvātprathamo'śaḥ | idānīṃ dvitīyaṃ pādamāha—svapnasthānaḥ svapnaṃ jāgaritavāsanājanyaṃ sthānaṃ yasya sa svapnasthānaḥ | antaḥprajño'ntarmānasavāsanāvilāse prajñā buddhiryasya so'ntaḥprajñaḥ | saptāṅga ekonaviṃśatimukhaḥ | vyākhyātam | pravibhuktabhukapraviviktaṃ sūkṣmaṃ bhuṅkta iti praviviktabhuk | taijasastejo'ntaḥkaraṇaṃ kartṛkaraṇakāryādibhāvena pariṇataṃ tadeva sthūlaśarīrādihīnaṃ yasya sa taijasaḥ | antaḥkaraṇasya svāmītyarthaḥ | jāgaritānantarabhāvitvāt | dvitīyaḥ pādaḥ | spaṣṭam | idānīṃ tṛtīyaṃ pādaṃ vaktumāha—yatra yasminkāle suptaḥ uparatendriyagrāmo na kaṃcana kāmaṃ kāmayate kamapi puṇyapāpahetubhūtaṃ putrakṣetrādikaṃ nābhilaṣati | na kaṃcana svapnaṃ paśyati |