Pramāṇa · Search · About · API

Thanamga 3.2

Ṭhāṇaṃga 3.2

Language
Ardhamāgadhī Prakrit

Contents

3.2.1.1

tivihē lōgē paṇṇattē taṁ jahā — nāmalōgē ṭhavaṇalōgē davvalōgē, tivihē lōgē paṇṇattē taṁ jahā — nāṇalōgē daṁsaṇalōga carittalōgē, tivihē lōgē paṇṇattē taṁ jahā — uḍḍhalōgē ahōlōgē tiriyalōgē.

3.2.2.1

camarassa ṇaṁ asurindassa asurakumāraraṇṇō taō parisāō paṇṇattāō taṁ jahā — samitā caṇḍā jāyā, abbhintaritā samitā majjhimitā caṇḍā bāhiritā jāyā, camarassa ṇaṁ asurindassa asurakumāraraṇṇō sāmāṇitāṇaṁ dēvāṇaṁ taō parisāō paṇṇattāō taṁ jahā — samitā jahēva camarassa, ēvaṁ- tāvattīsagāṇavi lōgapālāṇaṁ- tumbā tuḍiyā pavvā, ēvaṁ- aggamahisīṇavi, balissavi ēvaṁ cēva, jāva aggamahisīṇaṁ.

3.2.2.2

dharaṇassa ya sāmāṇiya-tāyattīsagāṇaṁ ca samitā caṇḍā jātā, lōgapālāṇaṁ aggamahisīṇaṁ-īsā tuḍiyā daḍharahā jahā dharaṇassa tahā sēsāṇaṁ bhavaṇavāsīṇaṁ, kālassa ṇaṁ pisāindassa pisāyaraṇṇō taō parisāō paṇṇattāō taṁ jahā — īsā tuḍiyā daḍharahā ēvaṁ- sāmāṇiyā-aggamahisīṇaṁ, ēvaṁ jāva gīyaratigīyajasāṇaṁ, candassa ṇaṁ jōtisindassa jōtisaraṇṇō taō parisāō paṇṇattāō taṁ jahā — tumbā tuḍiyā pavvā ēvaṁ- sāmāṇiya aggamahisīṇaṁ, ēvaṁ- sūrassavi.

3.2.2.3

sakkassa ṇaṁ dēvindassa dēvaraṇṇō taō parisāō paṇṇattāō taṁ jahā — samitā caṇḍā jāyā, ēvaṁ jahā camarassa jāva aggamahisīṇaṁ, ēvaṁ jāva accutassa lōgapālāṇaṁ.

3.2.3.1

taō jāmā paṇṇattā taṁ jahā — paḍhamē jāmē majjhimē jāmē pacchimē jāmē, tihiṁ jāmēhiṁ āyā kēvalipaṇṇattaṁ dhammē labhejja savaṇayāē taṁ jahā — paḍhamē jāmē majjhimē jāmē pacchimē jāmē. ēvaṁ jāva kēvalanāṇaṁ uppāḍejjā taṁ jahā — paḍhamē jāmē majjhimē jāmē pacchimē jāmē.

3.2.3.2

taō vayā paṇṇattā taṁ jahā — paḍhamē vaē majjhimē vaē pacchimē vaē, tihiṁ vaēhiṁ āyā kēvalipannattaṁ dhammaṁ labhejja savaṇayāē taṁ jahā — paḍhamē vaē majjhimē vaē pacchimē vaē, ēsō cēva gamō nēyavvō, jāva kēvalanāṇanti.

3.2.4.1

tivihā bōdhī paṇṇattā taṁ jahā — nāṇabōdhī daṁsaṇabōdhī carittabōdhī, tivihā buddhā paṇṇattā taṁ jahā — nāṇabuddhā daṁsaṇabuddhā carittabuddhā, ēvaṁ mōhē, ēvaṁ mūḍhā.

3.2.5.1

tivihā pavvajjā paṇṇattā taṁ0- ihalōgapaḍibaddhā paralōgapaḍibaddhā duhatō paḍibaddhā, tivihā pavvajjā pannattā taṁ jahā — puratōpaḍibaddhā maggatōpaḍibaddhā duhaō paḍibaddhā, tivihā pavvajjā paṇṇattā taṁ jahā — tuyāvaïttā puyāvaïttā buāvaïttā, tivihā pavvajjā pannattā taṁ jahā — ōvātapavvajjā akkhātapavvajjā saṅgārapavvajjā.

3.2.6.1

taō niyaṇṭhā nōsaṇṇōvaüttā pa0 taṁ0 jahā — pulāē niyaṇṭhē siṇāē, taō niyaṇṭhā saṇṇa-nōsaṇṇōvaüttā pannattā taṁ jahā baüsē paḍisēvaṇā kusīlē kasāyakusīlē.

3.2.7.1

taō sēhabhūmīō pannattāō taṁ jahā — ukkōsā majjhimā jahaṇṇā, ukkōsā chammāsā majjhimā caümāsā jahaṇṇā sattarāindiyā.

3.2.7.2

taō thērabhūmīō pannattāō taṁ jahā — jātithērē suyathērē pariyāyathērē, saṭṭhivāsajāē samaṇē nigganthē jātithērē, ṭhāṇasamavāyadharē ṇaṁ samaṇē nigganthē suyathērē, vīsavāsapariyāē ṇaṁ samaṇē nigganthē pariyāyathērē.

3.2.8.1

taō purisajāyā pannattā taṁ jahā — sumaṇē dummaṇē nōsumaṇē-nōdummaṇē, taō purisajāyā pannattā taṁ jahā — gantā nāmēgē sumaṇē bhavati, gantā nāmēgē dummaṇē bhavanti, gantā nāmēgē nōsamaṇē-nōdummaṇē bhavanti, taō purisajāyā pannattā taṁ jahā — jāmītēgē sumaṇē bhavati, jāmītēgē dummaṇē bhavati jāmītēga nōsumaṇē-nōdummaṇē bhavati, taō purisajāyā pannattā taṁ jahā — jāissāmītēgē sumaṇē bhavati, jāissāmītēgē dummaṇē bhavati, jāissāmītēgē nōsumaṇē-nōdummaṇē bhavati.

3.2.8.2

taō purisajāyā paṇṇattā taṁ jahā — agantā ṇāmēgē sumaṇē bhavati, agantā ṇāmēgē dummaṇē bhavati, agantā ṇāmēgē nōsumaṇa-nōdummaṇē bhavanti.

3.2.8.3

taō purisajāyā pannattā taṁ jahā — na jāmi ēgē sumaṇē bhavati, na jāmi ēgē dummaṇē bhavati, na jāmi ēgē nōsumaṇē nōdummaṇē bhavati. taō purisajāyā pannattā taṁ jahā — na jāissāmi ēgē sumaṇē bhavati na jāissāmi ēgē dummaṇē bhavati na jāissāsi ēgē nōsumaṇē-nōdummaṇē bhavati.

3.2.8.4

ēvaṁ āgantā nāmēgē sumaṇē bhavati, ēmitēgē sumaṇē-3, ēssāmīti ēgē sumaṇē bhavati-3, ēvaṁ ēēṇaṁ abhilāvēṇaṁ-

3.2.9.1

gantā ya agantā ya āgantā khalu tahā aṇāgatā
ciṭṭhittamaciṭṭhittā nisitittā cēva nō cēva

3.2.10.1

hantā ya ahantā ya chindittā khalu tahā achindittā
būtittā abūtittā bhāsittā cēva nō cēva

3.2.11.1

daccā ya adaccā ya bhuñjittā khalu tahā abhuñjittā
lambhittā alambhittā piittā cēva nō cēva

3.2.12.1

sutittā asutittā jujjhittā khalu tahā ajujjhittā
jatittā ajayitā ya parājiṇittā cēva nō cēva

3.2.13.1

saddā rūvā gandhā rasā ya phāsā tahēva ṭhāṇā ya
nissīlassa garahitā pasatthā puṇa sīlavantassa

3.2.13.2

ēvamikkekkē tinni u tinni u ālāvagā bhāṇiyavvā, saddaṁ suṇettā nāmēgē sumaṇē bhavati-3, ēvaṁ suṇēmīti-3, suṇissāmīti-3, ēvaṁ asuṇettā nāmēgē sumaṇē bhavati-3, na suṇēmīti-3, na suṇissāmīti-3, ēvaṁ rūvāiṁ gandhāiṁ rasāiṁ phāsāiṁ, ekkekkē cha cha ālāvagā bhāṇiyavvā- 127- ālāvagā bhavanti.

3.2.14.1

taō ṭhāṇā nisīlassa nivvayassa nigguṇassa nimmērassa nippaccakkhāṇapōsahōva-vāsassa garahitā bhavanti taṁ jahā — assiṁ lōgē garahitē bhavati uvavātē garahitē bhavati āyāti garahitā bhavati taō ṭhāṇā susīlassa suvvayassa saguṇassa sumērassa sapaccakkhāṇapōsahōvavāsassa pasatthā bhavanta taṁ jahā — assiṁ lōgē pasatthē bhavati uvavāē pasatthē bhavati ājātī pasatthā bhavati.

3.2.15.1

tividhā saṁsārasamāvaṇṇagā jīvā pannattā taṁ jahā — itthī purisā napuṁsagā, tivihā savvajīvā pannattā taṁ jahā — sammaddiṭṭhī micchāddiṭṭhī sammāmicchaddiṭṭhī, ahavā — tivihā savvajīvā pannattā taṁ jahā — pajjattagā apajjattagā nōpajjattagā-nō'pajjattagā. ēvaṁ- sammaddiṭṭhi-pajjataga-parittā-suhuma-sanni-bhaviyā ya.

3.2.16.1

tividhā lōgaṭhitī pannattā taṁ jahā — āgāsapaïṭṭhiē vātē vātapaïṭṭhiē udahī uidahīpaïṭṭhiyā puḍhavī, taō disāō pannattāō taṁ jahā — uḍḍhā ahā tiriyā, tihiṁ disāhiṁ jīvāṇaṁ gatī pavattati- uḍḍhāē ahāē tiriyāē, tihiṁ disāhiṁ jīvāṇa-āgatī vakkatī āhārē vuḍḍhī nivuḍḍhī gatipariyāē samugdhātē kālasañjōgē daṁsaṇābhigamē jīvābhigamē paṇṇattē taṁ jahā — uḍḍhāē ahāē tiriyāē tihiṁ disāhiṁ jīvāṇaṁ ajīvābhigasē paṇṇattē taṁ jahā — uḍḍhāē ahē tiriyāē ēvaṁ-pañcindiyatirikkhajōṇiyāṇaṁ ēvaṁ-maṇussāṇavi.

3.2.17.1

tivihā tasā pannattā taṁ jahā — tēukāiyā vāukāiyā urālātasā pāṇā, tivihā thāvarā pannattā taṁ jahā — puḍhavikāiyā āukāiyā vaṇassaïkāiyā.

3.2.18.1

taō acchejjā pannattā taṁ jahā — samaē padēsē paramāṇū, ēvaṁ abhejjā, aḍajjhā, agijjhā, aṇaḍḍhā, amajjhā, apaēsā, taō avibhāimā pannattā taṁ jahā — samaē padēsē paramāṇū.

3.2.19.1

ajjōti samaṇē bhagavaṁ mahāvīrē gōtamādī samaṇē nigganthē āmantettā ēvaṁ vayāsī — kimbhayā-pāṇā? samaṇāusō!, gōtamādī samaṇā nigganthā samaṇaṁ bhagavaṁ mahāvīraṁ uvasaṅkamanti uvasaṅkamittā vandanti namaṁsanti vandittā namaṁsittā ēvaṁ vayāsī — nō khalu vayaṁ dēvāṇuppiyā! ēyamaṭṭhaṁ jāṇāmō vā pāsāmō vā, taṁ jadi ṇaṁ dēvāṇuppiyā ēyamaṭṭhaṁ nō gilāyanti parikahittaē tamicchāmō ṇaṁ dēvāṇuppiyāṇaṁ antiē ēyamaṭṭhaṁ jāṇittaē, ajjōti samaṇē bhagavaṁ mahāvīrē gōtamādī samaṇē nigganthē āmantettā ēvaṁ vayāsī — dukkhabhayā pāṇā samaṇāusō! sē ṇaṁ bhantē! dukkhē kēṇa kaḍē? jīvēṇaṁ kaḍē, pamādēṇaṁ| sē ṇaṁ bhantē! dukkhē kahaṁ vēijjati? appamāēṇaṁ.

3.2.20.1

annaütthiyā ṇaṁ bhantē! ēvaṁ āikkhanti ēvaṁ bhāsanti ēvaṁ paṇṇaventi ēvaṁ parūventi kahaṇṇaṁ samaṇāṇaṁ nigganthāṇaṁ kiriyā kajjati? tattha jā sā kaḍā kajjaï nō taṁ pucchanti, tattha jā sā kaḍā nō kajjati, nō taṁ pucchanti, tattha jā sā akaḍā nō kajjati nō taṁ pucchanti, tattha jā sā akaḍā kajjati nō taṁ pucchanti, sē ēvaṁ vattavvaṁ siyā? akiccaṁ dukkhaṁ aphusaṁ dukkhaṁ akajjamāṇakaḍaṁ dukkhaṁ akaṭṭu-akaṭṭu pāṇā bhūyā jīvā sattā vēyaṇaṁ vēdentitti vattavvaṁ, jē tē ēvamāhaṁsu micchā tē ēvamāhaṁsu, ahaṁ puṇa ēvamāikkhāmi ēvaṁ bhāsāmi ēvaṁ paṇṇavēmi ēvaṁ parūvēmi- kiccaṁ dukkhaṁ phusaṁ dukkhaṁ kajjamāṇakaḍaṁ dukkhaṁ kaṭṭu-kaṭṭu pāṇā bhūyā jīvā sattā vēyaṇaṁ vēyantitti vattavvayaṁ siyā.

Translations (2)

Commentaries (2)

Discussed in (1)