Gita Govinda 18.3

18.3

he mādhava, eṣā matsakhī | eṣeti etatpadapratyakṣe vyāpārādbuddhau pratyakṣīkṛtyāha | eṣā varatanurityevaṃkrameṇa ākalpavikalpatalparacanāsaṃkalpalīlāśatavyāsaktāpi nepathyavitarkakisalayaśayyāviracanalabdhaprāptyucitavilāsaśayaneṣvāsaktāpi satī tvayā vinā niśāṃ na neṣyati niśāṃ netuṃ na śaktā bhaviṣyatīti | itīti kim | tānyeva kānicidāha | aṅgeṣu avayaveṣu tvaccittāpahāri ābharaṇaṃ karoti | kathaṃ bahuśaḥ | bahuśa iti ananurūpaparityāgena tvaccittaprītikaraparigraho dyotyate | api ca | patre vṛkṣapatre patatripakṣe'pi vā | apiśabdāttṛṇādiparispando labhyate | tasminsaṃcāriṇi saṃcāraraṇaśīle tvāmeva prāptaṃ pariśaṅkate vicārayati | atra evakāraṃ vināpi 'pārtho dhanurdharaḥ' itivatsarvāṇi vākyāni sāvadhāraṇānyeveti kṛtvā evakārākṣepaḥ | api ca avaśyamāgamiṣyatīti kṛtvā śayyāṃ vitanute | tatastvāmapaśyantī ciraṃ tvāmeva dhyāyati | śayyāṃ viracayya tena saha mayātraiva me kāmakelayaḥ karttavyā iti ciraṃ dhyāyati | anyo'pi yaḥkaścinmānasavyathābhibhūto rajanyativāhane'samarthaḥ sa tadativāhānārthaṃ kāryāntaravyāsaktyā ceto ramayati | śārdūlavikrīḍitaṃ vṛttaṃ, samuccayo'laṃkāraḥ |