Krishnagiti 2.336

2.336

ghaṇṭārarāgeṇa gīyate | ekatāḷena vādyate
priyasakha mukhabāhūrupado me
varṇā jātā nanu pūrvamime
tadapi ca kecana māṃ na bhajante
nivasantaṃ nikhilajanahṛdante
pallavam
niśamaya saṃśayavisaravidāraṃ
nigaditamidamativiśadamudāraṃ (niśa)
ayi mayi vimukhā ye khalu sumate
kathamapi savidhagatā api mama te
nipatanti ca śiva śiva nijapadato
ninditayonau bata niyatamataḥ (niśa)
karmata iha para īśvara iti no
ko'pi bhavediti niyatātmāno
jagati gṛṇanto bahu karmaguṇān
chalayanti ca te bata sūrigaṇam (niśa)
dhanakulavidyādibhiruditamadāḥ
kāmakrodhavaśā jagati sadā
vihasanti ca bata karmasu viratāniha santatamapi te mayi niratān (niśa)
muhurapi vilapati bata niyatākṣaṃ
murahara madhumathaneti samakṣaṃ
gṛhitumayamiha ninditacaritaṃ
vihasantyevamime mayi nirataṃ (niśa)
visaratarairiha hariharacaritairviphalatarairmuhuranugaditaiḥ
adhuneha vidheyaśataṃ viphalaṃ
pralapantyabudhā iti te satataṃ (niśa)
evamime śiva śiva bhāgavatān
karmaparān manmayabhogaratān
māmapi bata jagadantanidānaṃ
vihasantyalamiha mahimānaṃ (niśa)
atilobhaparā dhanameva hṛdi
nidadhata iha nidhanaikakaraṃ
apabhojanadakṣiṇamavidhānaṃ
kathamapi te vidadhati vitānaṃ (niśa)
praṇayākulitān paricayamasṛṇān
viśasanti paśūnapi te kṛpaṇān
nijasukhalābhe vinihitadhiṣaṇairasukaramiha kiṃ nṛbhirapakaruṇaiḥ (niśa)
avigaḷakucasaṅgagīśvara iha tat
nijakarmaiva phalāvahametat
iti kathayanto vihasanti ca tān
mayi te tu nivṛttipathaikaratān (niśa)
dhṛtakarmatatermayi vivṛtamateḥ
sukhamiha yadudyati tadidaṃ
kvacidapi kimutodayate bata
karmiṇa uruviṣayaikarateḥ (niśa)
viṣayaikaratā vyasanaikanidhau
patitā bata te janimṛtijaladhau
mayi khalu vimukhā hanta durante
karmaratā na tu pāramayante (niśa)
bhāṣante'khilamānuṣā hi viṣayānāpadgaṇānāṃ padaṃ
sevante'pi ca sāvadhānamatayo hā hanta rāgāndhitāḥ
aśrāntaṃ śvakharājavatparamamī śrāmyanti duḥkhāvahānudbhrāntāḥ sukhaleśalolupatayā nāthaitadevaṃ katham