Mahanisiha 2.3: Uddeśaka 3

Mahānisīha 2.3

Language: Ardhamāgadhī Prakrit

Uddeśaka 3

2.3.289

evaṃ mehuṇa-doseṇaṃ, vedittā thāvarattaṇaṃ|
keseṇamaṇaṃta-kālāo mānusa-joṇī samāgayā||

2.3.290

dukkhaṃ jareṃti āhāraṃ, ahiyaṃ sitthaṃ pi bhuṃjiyaṃ|
pīḍaṃ karei tesiṃ tu, taṇhābāhe khaṇe khaṇe||

2.3.291

addhāṇa-maraṇaṃ tesiṃ, bahujappaṃ kaṭṭhāsaṇaṃ|
thāṇuvvālaṃ niviṇṇāṇaṃ niddāe jaṃti no vaṇiṃ||

2.3.292

evaṃ pariggahāraṃbhadoseṇaṃ naragāuyaṃ|
tettīsa-sāgarukkosaṃ veittā iha samāgayā||

2.3.293

chuhāe pīḍijjaṃti bhutta-bhuttuttare vi ya|
caraṃtā ahannisaṃ tittiṃ no gacchaṃtī pasave jahā||

2.3.294

kohādīnaṃ tu doseṇaṃ ghoramāsīvisattaṇaṃ|
veittā nārayaṃ bhūo roddā mecchā bhavaṃti te||

2.3.295

saḍha-kūḍa-kavaḍa-niyaḍīe ḍaṃbhāo suiraṃ guruṃ|
veittā citta-tericchaṃ mānusa-joṇiṃ samāgayā||

2.3.296

kei bahuvāhi-rogāṇaṃ dukkha-sogāṇa bhāyaṇaṃ|
dāridda-kalahamabhibhūyā khiṃsaṇijjā bhavaṃtihaṃ||

2.3.297

takkammodaya-doseṇaṃ niccaṃ pajjaliya-boṃdiṇaṃ|
īsā-visāya-jālāhiṃ dhaga-dhaga-dhaga-dhagassa u||

2.3.298

jammaṃ pi goyamā vole-bahu-duhasaṃdhukkiyāṇa ya|
tesiṃ, saduccariya-doso kassa rūsaṃtu te ihaṃ||

2.3.299

evaṃ vaya-niyama-bhaṃgeṇaṃ, sīlassa u khaṃḍaṇeṇa vā|
asaṃjama-pavattaṇayā, ussuttumaggāyaraṇeṇa hi||

2.3.300

negehiṃ vitahāyaraṇehiṃ pamāyā sevaṇehiṃ ya
maṇeṇaṃ ahava vāyāe ahavā kāeṇa katthai|
kaya-kārigā'numaehiṃ, pamāyasevaṇeṇa vā||

tiviheṇamaniṃdiyamagarahiyamanāloiyamapaḍikkaṃtamakaya-pāyacchittamavisuddhāsaya-dosao||
sasalle āmagabbhesuṃ pacciya pacciya-anaṃtaso|
viyalaṃte-duti-cau-paṃca-chaṇhaṃ māsāṇaṃ asaṃbaddhaṭṭhīkara-sira-caraṇacchavī||

2.3.302

laddhe vi mānuse jamme kuṭṭhādī-bāhi-saṃjue|
jīvaṃte ceva kimiehiṃ khajjaṃtī macchiyāhi ya|
anudiyahaṃ khaṃḍaṃ-khaṃḍehiṃ saḍahaḍassa saḍe tanuṃ||

2.3.303

evamādī-dukkhamabhibhūe| lajjaṇijje khiṃsaṇijje niṃdaṇijje garahaṇijje|
uvvevaṇijje aparibhoge niya-suhi-sayaṇa-baṃdhavāṇaṃ pi bhavaṃtī te durappane||

2.3.304

ajjhavasāya-visesaṃ taṃ paḍuccā kei tārisaṃ|
akāma-nijjarāe u bhūya-pisāyattaṃ labhate|

2.3.305

tappuvva-salla-doseṇaṃ bahu-bhavaṃtara-tthāiṇā|
ajjhavasāya-visesaṃ taṃ paḍuccā keī tārisaṃ||

2.3.306

dasasu vi disāsu uddhaddho nicca dūrappie daḍhaṃ|
nirucchalla-nirussāse nirāhāre na pāṇie||

2.3.307

saṃpiṃḍiyaṃgamaṃge ya, moha-madirāe ghammarie|
adiṭṭhaggamana-atthamaṇe bhave puḍhavīe golayā kimī||

2.3.308

bhava-kāya-ṭṭhitīe veettā taṃ tehiṃ kimiyattaṇaṃ|
jai kaha vi lahaṃti manuyattaṃ tao te hoṃti napuṃsage||

2.3.309

ajjhavasāya-visesaṃ taṃ pavahaṃte aikūra-ghora-roddaṃ tu tārisaṃ|
vammaha-saṃdhukkiyā marituṃ jammaṃ jaṃti vanassaī||

2.3.310

vanassaī gae jīve uḍḍhapāe ahomuhe|
ciṭṭhaṃti'naṃtayaṃ kālaṃ no labhe beiṃdiyattaṇaṃ||

2.3.311

bhava-kāya-ṭṭhitīe veittā tamega-bi-ti-cauriṃdiyattaṇaṃ|
tappuvva-salla-doseṇaṃ tericchesūvavajjiuṃ||

2.3.312

jai ṇaṃ bhave mahāmacche pakkhīvasaha-sīhādayo|
ajjhavasāya-visesaṃ taṃ paḍucca accaṃta-kūrayaraṃ||

2.3.313

kuṇimamāhārattāe paṃceṃdiyavaheṇaṃ ya|
aho aho pavissaṃti jāva puḍhavīu sattamā||

2.3.314

taṃ tārisaṃ mahāghoraṃ dukkhamanubhaviuṃ ciraṃ|
puṇo vi kūratiriesu uvavajjiya narayaṃ vae||

2.3.315

evaṃ naraya-tiricchesuṃ pariyaṭṭaṃte viciṭṭhati|
vāsakoḍie vi no sakkā kahiuṃ jaṃ taṃ dukkhaṃ anubhavamānage||

2.3.316

aha kharuṭṭa-baillesuṃ bhavejjā tabbhavaṃtare,
sagaḍāyaḍḍhaṇa-bharuvvahaṇa-khu-taṇha-sīyāyavaṃ||

2.3.317

vaha-baṃdhanaṃkaṃṇa ḍahaṇaṃ nāsa-bheda-nilaṃchaṇaṃ,
jamalārāīhiṃ kuccādihiṃ kuccijjaṃtāṇa ya,
jahā rāī tahā diyahaṃ savvaddhā u sudāruṇaṃ||

2.3.318

emādī-dukkha-saṃghaṭṭaṃ anuhavaṃti cireṇa u,
pāṇe payahiṃti kaha kaha vi aṭṭajjhāṇa-duhaṭṭie||

2.3.319

ajjhavasāya-visesaṃ taṃ paḍuccā kei kaha kaha vi labbhaṃtī mānusattaṇaṃ|
tappuvva-salla-doseṇaṃ mānusatte vi āgayā|

2.3.320

bhavaṃti jamma-dāriddā-vāhī-khasa-pāma-parigayā|
evaṃ adiṭṭha-kallāṇe savva-janassa siri-hāiuṃ||

2.3.321

saṃtappaṃte daḍhaṃ manasā akayatave nihanaṃ vae|
ajjhavasāya-visesaṃ taṃ paḍuccā kei tārisaṃ||

2.3.322

puṇo vi puḍhavimāīsuṃ bhamaṃtī te du-ti-cauro paṃciṃdiesu vā|
taṃ tārisaṃ mahā-dukkhaṃ suroddaṃ ghora-dāruṇaṃ||

2.3.323

caugai-saṃsāra-kaṃtāre anuhavamāṇe sudūsahaṃ|
bhavakāya-ṭṭhitīe hiṃḍaṃte savvajoṇīsu goyamā||

2.3.324

ciṭṭhaṃti saṃsaremāṇe jamma-jara-maraṇa-bahu-vāhi veyaṇā-roga-soga-dāridda-kalaha-bbhakkhāṇaṃ-saṃtāva-gabbhavāsādi-dukkhasaṃdhu-kie|
tappuvvasalla-doseṇaṃ niccānaṃda-mahūsava-thāma-joga-aṭṭhārasa-sīlaṃga-sahassāhiṭṭhiyassasavvā suha-pāvakammaṭṭha-rāsi-nidda-haṇa-ahiṃsā-lakkhaṇa-samaṇa-dhammassa bohiṃ no pāviṃti te||

2.3.325

ajjhavasāya-visesaṃ taṃ paḍuccā keī tārisaṃ|
poggala-pariyaṭṭalakkhesuṃ bohiṃ kaha kaha vi pāvae||

2.3.326

evaṃ sudullahaṃ bohiṃ savva-dukkha-khayaṃ karaṃ|
laddhūṇaṃ je pamāejjā tayahuttaṃ so puṇo vae||

2.3.327

tāsuṃ tāsuṃ ca joṇīsuṃ puvvutteṇa kameṇa u|
paṃtheṇaṃ teṇaī ceva dukkhe te ceva anubhave||

2.3.328

evaṃ bhava-kāya-ṭṭhitīe savva-bhāvehiṃ poggale|
savve sapajjave loe savva vannaṃtarehi ya|

2.3.329

gaṃdhattāe rasattāe phāsattāe saṃṭhāṇattāe|
pariṇāmittā sarīreṇaṃ bohiṃ pāvejja vā na vā||

2.3.330

evaṃ vaya-niyama-bhaṃgaṃ je kajjamāṇamuvekkhae|
aha sīlaṃ khaṃḍijjaṃtaṃ, ahavā saṃjama-virāhaṇaṃ||

2.3.331

ummagga-pavattaṇaṃ vā vi, usuttāyaraṇaṃ pi vā|
so vi ya anaṃtarutteṇaṃ kameṇaṃ caugaī bhame||

2.3.332

rusau tusau paro mā vā visaṃ vā pariyattau|
bhāsiyavvā hiyā bhāsā sapakkha-guṇakāriyā||

2.3.333

evaṃ laddhāmavi bohiṃ jai ṇaṃ no bhavai nimmalā|
tā saṃvuḍāsava-ddāre pagati-ṭṭhii-paesānubhāviyabaṃdho, no hāso no ya nijjare||

2.3.334

emādī-ghora-kammaṭṭhajāleṇaṃ kasiyāṇa bho |
savvesimavi sattāṇaṃ kuo dukkha-vimoyaṇaṃ||

2.3.335

puvviṃ dukkaya-duciṇṇāṇaṃ duppaḍikaṃtāṇaṃ nicaya-kammāṇaṃ|
na aveiyāṇa mokkho ghorataveṇa ajjhosiyāṇa vā||

2.3.336

anusamayaṃ bajjhae kammaṃ, natthi abaṃdho u pāṇiṇo|
mottuṃ siddhe ajogī ya selesī saṃṭhie tahā||

2.3.337

suhaṃ suhajjhavasāeṇaṃ, asuhaṃ duṭṭhajjhavasāyao|
tivvayareṇaṃ tu tivvayaraṃ, maṃdaṃ maṃdeṇa saṃciṇe||

2.3.338

savvesiṃ pāvakammāṇaṃ egībhūyāṇaṃ jettiyaṃ|
rāsiṃ bhave, tamasaṃkhaguṇaṃ vaya-tava-saṃjama-cārittakhaṃḍaṇa-virāhaṇeṇaṃ|
ussuttummagga-pannavaṇa-pavattaṇa-āyaraṇovekkhaṇeṇa ya samajjiṇe||

2.3.339

aparimāṇagurutuṃgā mahaṃtā ghana-niraṃtarā|
pāva-rāsī khayaṃ gacche, jahā taṃ savvovāehimāyare||

2.3.340

āsavadāre niruṃbhittā appamādī bhave jayā|
baṃdhe sappaṃ bahu vede, jai sammattaṃ sunimmalaṃ||

2.3.341

āsavadāre niruṃbhittā āṇaṃ no khaṃḍae jayā|
daṃsaṇa-nāṇa-carittesuṃ ujjutto jo daḍhaṃ bhave||

2.3.342

tayā vee khaṇaṃ baṃdhe, porāṇaṃ savvaṃ khave|
aṇuinnamavi uīrittā nijjiya-ghora-parīsaho||

2.3.343

āsavadāre niruṃbhittā savvāsāyaṇa-virahio|
sajjhāya-jjhāṇa-jogesuṃ ghora-vīra-tave rao||

2.3.344

pālejjā saṃjamaṃ kasiṇaṃ vāyā manasā u kammuṇā|
jayā tayā na baṃdhejjā ukkosamaṇaṃtaṃ ca nijjare||

2.3.345

savvāvassagamujjutto savvālaṃbaṇavirahio|
vimukko savvasaṃgehiṃ sabajjhabbhaṃtarehi ya||

2.3.346

gaya-rāga-dosamohe ya ninniyāṇe bhave jayā|
niyatte visayatattīe bhīe gabbhaparaṃparā||

2.3.347

āsavadāre niruṃbhittā khaṃtādī dhamme ṭhite|
sukkajjhāṇaṃ samāruhiya selesiṃ paḍivajjae||

2.3.348

tayā na baṃdhae kiṃci cirabaddhaṃ asesaṃ pi|
niḍḍahiyajjhāṇa-joga-aggīe bhasamī kare daḍhaṃ||
lahu-paṃcakkharuggiraṇa-metteṇaṃ kāleṇa bhavovagāhiyaṃ|

2.3.349

evaṃ sajīva-viriya-sāmattha-pāraṃparaeṇa goyamā|
pavimukka-kamma-mala-kavayā samaeṇaṃ jaṃti pāṇiṇo||

2.3.350

sāsaya-sokkha-anābāhaṃ roga-jara-maraṇa-virahiyaṃ|
adiṭṭha-dukkha-dāriddaṃ niccāṇaṃdaṃ sivālayaṃ||

2.3.351

atthege goyamā pāṇī je eyaṃ mannae visaṃ|
āsava-dāra-nirohādī-iyara-heya-sokkhaṃ care||

2.3.352

tā jāva kasiṇa-ṭṭha kammāṇi ghora-tava-saṃjameṇa u|
no niddaḍḍhe suhaṃ tāva natthi siviṇe vi pāṇiṇaṃ||

2.3.353

dukkhamevamavīsāmaṃ savvesiṃ jagajaṃtuṇaṃ|
ekkaṃ samayaṃ na sama-bhāve jaṃ sammaṃ ahiyāsiuṃ tare||

2.3.354

thevamavi thevataraṃ thevayarassāvi thevayaṃ|
jeṇaṃ goyama tā peccha kuṃthū tasseva ya tanū||

2.3.355

pāya-talesu na tassāvi tesimegadesaṃ muṇa|
pharisaṃto, kuṃthū jeṇaṃ caraī kassai sarīrage||

2.3.356

kuṃthūṇaṃ saya-sahasseṇaṃ toliyaṃ no palaṃ bhave|
egassa kettiyaṃ gattaṃ, kiṃ vā tollaṃ bhavejja se||

2.3.357

tassa vi pāyatala deseṇaṃ pharisio tamavatthaṃtaraṃ|
puvvuttaṃ goyamā gacche pāṇī, to ṇaṃ imaṃ suṇe||

2.3.358

bhamaṃta-saṃcaraṃto ya hiṃḍi no maile tanuṃ|
na kare kuṃthū khayaṃ tāṇaṃ, na yāvāsī ya ciraṃ vase||

2.3.359

aha ciṭṭhe khaṇamegaṃ tu, bīyaṃ no parivase khaṇaṃ|
aha bīyaṃ pi virattejjā, tā bujjeyaṃ tu goyamā||

2.3.360

rāgeṇaṃ no paoseṇaṃ, macchareṇaṃ na keṇaī|
na yāvi puvvavereṇaṃ kheḍḍāto kāmakārao||

2.3.361

kuṃthū kassai dehissa āruhei khaṇaṃ tanuṃ|
viyaliṃdī bhūṇa-pāṇe jalaṃtaggī vāvī vise||

2.3.362

na ciṃtevaṃ jahā me sa puvvaverī'havā suhī
tā kiṃcī khema-pāvaṃ vā saṃjaṇemi eyassa'haṃ||

2.3.363

puvva-kaḍa-pāva-kammassa virase bhuṃjaṃto phale|
tiri-uḍḍāha-disānudisaṃ kuṃthū hiṃḍe varāya se||

2.3.364

caraṃtevamabāhāe sārīraṃ dukkhamānasaṃ|
kuṃthū vi dūsahaṃ janne rodda-ṭṭa-jjhāṇa-vaḍḍhaṇaṃ||

2.3.365

tā u sallamārabhettāṇaṃ mana-jogaṃ annayareṇa vā|
samayāvaliya-muhuttaṃ vā sahasā tassa vivāgayaṃ||

2.3.366

kaha sahihaṃ bahu-bhava-ggahaṇe duhamanusamayamahaṇṇisaṃ|
ghora-payaṃḍaṃ-mahāroddaṃ hā-hā-kaṃda-parāyaṇā||

2.3.367

nāraya-tiriccha-joṇīsu attāṇāsaraṇā vi ya|
egāgī sasarīreṇaṃ asahāyā kaḍu-virasaṃ ghanaṃ||

2.3.368

asivaṇa-veyaraṇī jaṃte karavatte kūḍasāmaliṃ|
kuṃbhī-vāyāsā-sīhe emādī nārae duhe||

2.3.369

natthaṃkaṇa-vaha-baṃdhe ya paulukkaṃta-vikattaṇaṃ|
sagaḍā-kaḍḍhaṇa bharuvvahaṇaṃ jamalā ya taṇhā chuhā||

2.3.370

khara-khura-camaḍhaṇa-satthaggī-khobhaṇa-bhaṃjaṇamāie|
parayattāvasa-nittiṃse dukkhe tericche tahā||

2.3.371

kuṃthū-paya-pharisa-janiyaṃ pi dukkhaṃ na ahiyāsiuṃ tare|
tā taṃ maha-dukkha-saṃghaṭṭaṃ kaha nitthariha sudāruṇaṃ||

2.3.372

nāraya-tericcha-dukkhāo kuṃthu-jāniyāu aṃtaraṃ|
maṃdaragiri-anaṃta-guṇiyassa paramāṇussā vi no ghaḍe||

2.3.373

cirayāle saṃsuhaṃ pāṇī kaṃkhaṃto āsāe nivvuo|
bhave dukkhamaīyaṃ pi saraṃto accaṃta-dukkhio||

2.3.374

bahu-dukkha-saṃkaḍaṭṭhetthaṃ āvayā-lakkha-parigae|
saṃsāre parivase pāṇī, ayaḍe mahu-biṃdū jahā||

2.3.375

patthāpatthaṃ ayāṇaṃte kajjākajjaṃ hiyāhiyaṃ|
sevvo sevvamasevvaṃ ca caraṇijjā caraṇijjaṃ tahā||

2.3.376

evaiyaṃ vaiyaraṃ soccā dukkhassaṃta-gavesiṇo|
itthī-pariggahāraṃbhe ceccā ghoraṃ tavaṃ care||

2.3.377

ṭhiyāsaṇatthā saiyā paraṃmuhī, suyalaṃkariyā vā analaṃkariyā vā|
nikkhamāṇā pamayā hi dubbalaṃ, manussamāleha-gayā vi karissaī||

2.3.378

citta-bhittiṃ na nijjhāe nāriṃ vā suyalaṃkiyaṃ|
bhakkharaṃ pi va daṭṭhūṇaṃ diṭṭhiṃ paḍisamāhare||

2.3.379

hattha-pāya-paḍicchinnaṃ, kanna-nāsoṭṭhi-viyappiyaṃ|
saḍamāṇī-kuṭṭhavāhīe, tamavitthīyaṃ dūrayareṇaṃ baṃbhayārī vivajjae||

2.3.380

thera-bhajjā ya jā itthī, paccaṃgubbhaḍa-jovvaṇā|
junna-kumāriṃ, pautthavaiṃ, bāla-vihavaṃ taheva ya||

2.3.381

aṃteuravāsinī ceva, sa-para-pāsaṃḍa-saṃsriyaṃ|
dikkhiyaṃ sāhuṇī vā vi, vesaṃ taha ya napuṃsagaṃ||

2.3.382

kaṇhiṃ goṇiṃ khariṃ ceva, vaḍavaṃ avilaṃ aviṃ tahā|
sippitthiṃ paṃsuliṃ vā vi, jammarogi-mahilaṃ tahā||

2.3.383

cire saṃsaṭṭhamacellikkaṃ-emādīpāvitthio|
pagamaṃtī jattha rayaṇīe aha pairikke dinassa vā||

2.3.384

taṃ vasahiṃ sannivesaṃ vā savvovāehiṃ savvahā|
dūrayara-sudūra-dūreṇaṃ baṃbhayārī vivajjae||

2.3.385

eesiṃ saddhiṃ saṃlāvaṃ addhāṇaṃ vā vi goyamā |
annāsuṃ vā vi itthīsuṃ khaṇaddhaṃ pi vivajjae||

2.3.386

(1) se bhayavaṃ kimitthīyaṃ no ṇaṃ nijjhāejjā goyamā no ṇaṃ nijjhāejjā|
(2) se bhayavaṃ kiṃ suniyatthaṃ vatthālaṃkariya-vihūsiyaṃ itthīyaṃ no ṇaṃ nijjhāejjā, uyāhu ṇaṃ
viniyaṃsaṇiṃ goyamā ubhayahā vi ṇaṃ no nijjhāejjā|
(3) se bhayavaṃ kimitthīyaṃ no ālavejjā goyamā no ṇaṃ ālavejjā|
(4) se bhayavaṃ kimitthīsuṃ saddhiṃ khaṇaddhamavi no saṃvasejjā goyamā no ṇaṃ saṃkhasejjā|
(5) se bhayavaṃ kimitthīsuṃ saddhiṃ no addhāṇaṃ paḍivajjejjā goyamā ege baṃbhayārī egitthīe saddhiṃ no paḍivajjejjā|

2.3.387

(1) se bhayavaṃ keṇaṃ aṭṭheṇaṃ evaṃ vuccai jahā ṇaṃ no itthīṇaṃ nijjhāejjā| no namālavejjā| no ṇaṃ tīe saddhiṃ parivasejjā| no ṇaṃ addhāṇaṃ paḍivajjejjā
(2) goyamā savva-ppayārehi ṇaṃ savvitthīyaṃ accatthaṃ maukkaḍattāe rāgeṇaṃ saṃdhukkijjamāṇī
kāmaggie saṃpalittā sahāvao ceva visaehiṃ bāhijjai|
(3) tao savva-payārehiṃ ṇaṃ savvatthiyaṃ accatthaṃ maukkaḍattāe rāgeṇaṃ saṃdhu-kkijjamāṇī kāmaggīe saṃpalittā sahāvao ceva visaehiṃ bāhijjamāṇī, anusamayaṃ savva-disi-vidisāsuṃ ṇaṃ savvattha visae patthejjā
(4) jāvaṃ ṇaṃ savvattha-visae patthejjā, tāva ṇaṃ savva-payārehiṃ ṇaṃ savvattha savvahā purisaṃ saṃkappijjā,
(5) jāva ṇaṃ purisaṃ saṃkappejjā, tāva ṇaṃ soiṃdiyovaogattāe, cakkhuriṃdiovaogattāe rasaniṃdio-vaogattāe, ghāṇiṃdiovaogattāe, phāsiṃdiovao-gattāe| jattha ṇaṃ kei purīse
(6) kaṃta-rūve i vā, akaṃta-ruve i vā, paḍuppannajovvaṇe i vā, apaḍuppanna-jovvaṇe i vā, gaya-jovvaṇe i vā, diṭṭha-puvve i vā, adiṭṭha-puvve i vā, iḍḍhimaṃte i vā, aniḍḍhimaṃte i vā, iḍḍhipatte i vā, aniḍḍhī patte i vā, visayāure i vā, nivvinna-kāmabhoge i vā, uddhaya-boṃdīe i vā, anuddhayaboṃdīe i vā, mahāsatte i vā, hīna-satte i vā, mahā-purise i vā, kāpurise i vā, samaṇe i vā, māhaṇe i vā,
annayare i vā, niṃdiyāhama-hīna-jāīe vā,
(7) tattha ṇaṃ ihā poha-vīmaṃsaṃ pauṃji-ttāṇaṃ, jāva ṇaṃ saṃjoga-saṃpattiṃ jhāejjā
(8) jāva ṇaṃ saṃjoga-saṃpattiṃ parikappe, tāva ṇaṃ se citte saṃkhudde bhavejjā
(9) jāva ṇaṃ se citte saṃkhudde bhavejjā, tāva ṇaṃ se citte visaṃvaejjā
(10) jāva ṇaṃ se citte visaṃvaejjā, tāva ṇaṃ se dehe maeṇaṃ addhāsejjā
(11) jāva ṇaṃ se dehe maeṇaṃ addhāsejjā, tāva ṇaṃ se daravidare iha-paralogāvāe pamhusejjā,
(12) jāva ṇaṃ se dara-vidare iha-paralogāvāe pamhusejjā tāva ṇaṃ ciccā lajjaṃ bhayaṃ ayasaṃ akittiṃ meraṃ, ucca-ṭhāṇāo nīya-ṭṭhāṇaṃ ṭhāejjā,
(13) jāva ṇaṃ ucca-ṭhāṇāo nīya-ṭṭhāṇaṃ ṭhāejjā tāva ṇaṃ vaccejjā asaṃkheyāo samayāvaliyāo
(14) jāva ṇaṃ ṇīiṃti asaṃkhejjāo samayāvaliyāo, tāva ṇaṃ jaṃ paḍhamaṃ samayāo kammaṭṭhiiṃ taṃ bīyasamayaṃ paḍuccā, taiyā diyāṇaṃ samayāṇaṃ saṃkhejjaṃ anaṃtaṃ vā aṇukkamaso kammaṭhiiṃ saṃciṇijjā
(15) jāva ṇaṃ anukamaso anaṃtaṃ kammaṭhiiṃ saṃciṇai tāva ṇaṃ asaṃkhejjāiṃ avasappiṇī-osappiṇī-koḍilakkhāiṃ jāvaeṇaṃ kāleṇaṃ parivattaṃti, tāvaiyaṃ kālaṃ dosuṃ ceva nirayatiricchāsuṃ gatīsuṃ ukkosa-ṭṭhitīyaṃ kammaṃ āsaṃkalejjā|
(16) jāva ṇaṃ ukkosaṭṭhitīyaṃ kammamāsaṃkalejjā tāva ṇaṃ se vivanna-juiṃ vivanna-kaṃtiṃ viyaliya- lāvanna-sirīyaṃ ninnaṭṭhaditti-teyaṃ boṃdī bhavejjā
(17) jāva ṇaṃ cuya-kaṃti-lāvanna-siriyaṃ nitteya-boṃdī bhavejjā, tāva ṇaṃ se sīejjā pharisiṃdie| jāva ṇaṃ sīejjā pharisiṃdie tāva ṇaṃ savvaṭṭhā vivaḍḍhejjā savvattha cakkhurāge|
(18) jāva ṇaṃ savvattha vivaḍḍhejjā cakkhurāge, tāva ṇaṃ rāgāruṇe nayana-juyale bhavejjā
(19) jāva ṇaṃ rāgāruṇe ya nayanajuyale bhavejjā tāva ṇaṃ rāgaṃdhattāe, na gaṇejjā sumahaṃta-guru-dose vayabhaṃge, na gaṇejjā sumahaṃta-guru dose niyama-bhaṃge, na gaṇejjā sumahaṃta-ghora-pāva-kamma- samāyaraṇaṃ sīla-khaṃḍaṇaṃ, na gaṇejjā sumahaṃta-savva-guru-pāva-kamma-samāyaraṇaṃ saṃjama-virāhaṇaṃ
(20) na gaṇejjā ghoraṃdhayāraṃ para-loga-dukkhabhayaṃ, na gaṇejjā āyaī, na gaṇejjā sakamma-guṇaṭṭhāṇagaṃ, na gaṇejjā sasurāsurassā vi ṇaṃ jagassa alaṃghaṇijjaṃ āṇaṃ, na gaṇejjā anaṃtahutto culasīi- joṇilakkha-parivatta-gabbha-paraṃparaṃ, aladdhaṇimi-saddha-sokkhaṃ, caugai-saṃsāra-dukkhaṃ|
(21) na pāsijjā jaṃ pāsaṇijjaṃ, na pāsijjā, jaṃ apāsaṇijjaṃ, savva-jaṇa-samūha-majjha-
sanniviṭṭhaṭṭhiyāṇivanna-cakkamiya-nirikkhijjamāṇī vā dippaṃta-kiraṇa-jāla-dasa-dīsī-payāsiya -tavaṃta-teyarāsī-sūrie vi tahā vi ṇaṃ pāsejjā sunnaṃdhayāre savve disā bhāe
(22) jāva ṇaṃ rāgaṃdha-ttāe na gaṇejjā sumahallaguru-dose vaya-bhaṃge niyama-bhaṃge sīla-khaḍaṇe saṃjama- virāhaṇe paraloga-bhae-āṇā-bhaṃgāikkame anaṃta-saṃsāra-bhae, pāsejjā apāsaṇijje, savva-
jana-payaḍa-dinayare vi ṇaṃ mannijjā ṇaṃ sunnaṃdhayāre savve disābhāe, [jāva ṇaṃ bhave na gaṇejjā sumahalla- gurudose vaya-bhaṃge sīla-khaṃḍaṇijjā] tāva ṇaṃ bhavejjā accaṃta-nibbhaṭṭha-sohaggāisae vicchāe rāgā-ruṇa-paṃḍure duddaṃsaṇijje anirikkhaṇijje vayaṇa-kamale bhavejjā
(23) jāva ṇaṃ accaṃta nibbhaṭṭha-sohaggāisae vicchāe rāgāruṇa-paṃḍure duddaṃsaṇijje anirikkhaṇijje vayaṇa-kamale bhavejjā tāva ṇaṃ phuruphurejjā saṇiyaṃ saṇiyaṃ boṃda-puḍa-niyaṃba-vacchoruha- bāhu-lai-uru-kaṃṭha-paese|
(24) jāva ṇaṃ phuruphureṃti boṃda-puṃḍa-niyaṃba-vacchoruha-bāhulai-uru-kaṃṭhappaese| tāva ṇaṃ moṭṭāyamāṇī aṃgapāliyāhiṃ niruvalakkhe vā sovalakkhe vā bhaṃjejjā savvaṃgovaṃge|
(25) jāva ṇaṃ moṭṭāyamāṇī aṃgapāliyāhiṃ bhaṃjejjā savvagovaṃge, tāva ṇaṃ mayaṇasarasannivāeṇaṃ
jajjariyasaṃbhinne savvaroma-kūve taṇū bhavejjā|
(26) jāva ṇaṃ mayaṇa-sara-sannivāeṇaṃ viddhaṃsie boṃdī bhavejjā, tāva ṇaṃ tahā pariṇamejjā taṇū jahā ṇaṃ managaṃ payalaṃti dhātūo
(27) jāva ṇaṃ managaṃ payalaṃti dhātūo, tāva ṇaṃ accatthaṃ vāhijjaṃti poggala-niyaṃboru-bāhulaiyāo|
(28) jāva ṇaṃ accatthaṃ vāhijjai niyaṃbo tāva ṇaṃ dukkheṇaṃ dharejjā gatta-jaṭṭhiṃ,
(29) jāva ṇaṃ dukkheṇaṃ dharejjā gatta-yaṭṭhiṃ tāva ṇaṃ se novalakkhejjā attīyaṃ sarīrāvatthaṃ
(30) jāva ṇaṃ novalakkhejjā attīyaṃ sarīrāvatthaṃ, tāva ṇaṃ duvālasehiṃ samaehiṃ dara-nicceṭṭhaṃ bhave boṃdī
(31) jāva ṇaṃ duvālasehiṃ dara-nicceṭṭhaṃ bhave boṃdī, tāva ṇaṃ paḍikhalejjā se ūsāsa-nīsāse|
(32) jāva ṇaṃ paḍikhalejjā ūsāsa-nīsāse, tāva ṇaṃ maṃdaṃ maṃdaṃ ūsasejjā maṃdaṃ maṃdaṃ nīsasejjā,
(33) jāva ṇaṃ eyāiṃ ettiyāiṃ bhāvaṃtaraṃ avatthaṃtarāiṃ vihārejjā, tāva ṇaṃ jahā mahagghatthe kei purise i vā, itthi i vā, visuṃṭhulāe pisāyāe bhāratīe asaṃbaddhaṃ saṃlaviyaṃ visaṃkhulaṃtaṃ avvattaṃ ullavejjā,
(34) evaṃ siyā ṇaṃ itthīyaṃ visamāvatta-mohaṇa-mammaṇullāveṇaṃ purise,
(35) diṭṭha-puvve i vā, adiṭṭha puvve i vā, kaṃtarūve i vā, akaṃtarūve i vā, gaya jovvaṇe i vā,
paḍuppanna-jovvaṇe i vā, mahāsatte i vā, hīnasatte i vā, sappurise i vā, kāpurise i vā, iḍḍhimaṃte i vā, aniḍḍhimaṃte i vā, visayāure i vā, nivvinnakāmabhoge i vā, samaṇe i vā, māhaṇe i vā| jāva ṇaṃ annayare vā keī niṃdiyāhama-najāīe i vā,
(36) ajjhattheṇaṃ sasajjhaseṇaṃ āmaṃtemāṇī ullāvejjā,
(37) jāva ṇaṃ saṃkhejja-bhedabhinneṇaṃ sarāgeṇaṃ sareṇaṃ diṭṭhie i vā purise ullāvejjā nijjhāejja vā, tāva ṇaṃ jaṃ taṃ asaṃkhejjāiṃ avasappiṇī-osappiṇī-koḍi-lakkhāiṃ dosuṃ naraya-tiricchāsuṃ gatīsuṃ ukkosa-ṭṭhitīyaṃ kammaṃ āsaṃkaliyaṃ āsio taṃ nibaṃdhejjā| no ṇaṃ baddha-puṭṭhaṃ karejjā,
(38) se vi ṇaṃ jaṃ samayaṃ purisassa na sarirāvayava-pharisaṇābhimuhaṃ bhavejjā no ṇaṃ pharisejjā, taṃ samayaṃ ceva taṃ kamma-ṭhiiṃ baddha-puṭṭhaṃ karejjā| no ṇaṃ baddha -puṭṭha-nikāyaṃ ti|

2.3.388

(39) eyāvasarammi u goyamā saṃjogeṇaṃ saṃjujjejjā|
(40) se vi ṇaṃ saṃjoe purisāyatte
(41) purise vi ṇaṃ je ṇaṃ na saṃjujje, se dhanne; je ṇaṃ saṃjujje se adhanne||

2.3.389

(1) se bhayavaṃ keṇaṃ aṭṭheṇa evaṃ vuccai jahā purise vi ṇaṃ je ṇaṃ na saṃjujje se ṇaṃ dhanne je ṇaṃ saṃjujje se adhanne
(2) goyamā je ya ṇaṃ se tīe itthīe pāvāe baddha-puṭṭha-kamma-ṭṭhiiṃ ciṭṭhai|
se ṇaṃ purisasaṃgeṇaṃ nikāijjai
(3) teṇaṃ tu baddha-puṭṭha-nikāieṇaṃ kammeṇaṃ sā varāī
(4) taṃ tārisaṃ ajjhavasāyaṃ paḍuccā egiṃdiyattāe puḍhavādīsuṃ gayā samāṇī anaṃta-kāla-pariyaṭṭeṇa vi ṇaṃ no pāvejjā beiṃdiyattaṇaṃ
(5) evaṃ kaha kaha vi bahukeseṇa anaṃta-kālāo egiṃdiyattaṇaṃ khaviya beiṃdiyattaṃ, evaṃ teiṃdiyattaṃ cauriṃ-diyattamavi keseṇaṃ veyaittā paṃciṃdiyatteṇaṃ āgayā samāṇī
(6) dubbhagitthiya-paṃḍa-tericcha-veyamāṇī| hā-hā-bhūya-kaṭṭha-saraṇā, siviṇe vi adiṭṭha-sokkhā, niccaṃ saṃtāvuvveviyā, suhisayaṇa-baṃdhava-vivajjiyā,
(7) ājammaṃ kucchaṇijjaṃ garahaṇijjaṃ niṃdaṇijjaṃ khiṃsaṇijjaṃ bahu-kammaṃtehiṃ anega-cāḍu-saehiṃ laddhodarabharaṇā, savva-loga-paribhūyā,
(8) cau-gatīe saṃsarejjā
(9) annaṃ ca ṇaṃ goyamā jāvaiyaṃ tīe pāva-itthīe baddha-puṭṭhanikāiyaṃ kamma-ṭṭhiiṃ samajjiyaṃ, tāvaiyaṃ itthiyaṃ abhilasiukāme purise ukkiṭṭha-kiṭṭhayaraṃ anaṃtaṃ kammaṭṭhiiṃ baddha-puṭṭha-nikāiyaṃ samajjiṇejjā
(10) eteṇaṃ aṭṭheṇaṃ goyamā evaṃ vuccai| jahā ṇaṃ purise vi ṇaṃ je ṇaṃ no saṃjujje se ṇaṃ dhanne| je ṇaṃ saṃjujje se ṇaṃ adhanne||

2.3.390

(1) bhayavaṃ kesa ṇaṃ purise sa ṇaṃ pucchā jāva ṇaṃ dhannaṃ vayāsi
(2) goyamā chavvihe purise nee| taṃ jahā–aha-māhame, ahame, vimajjhime, uttame, uttamuttame,
savvuttamuttame|

2.3.391

(3) tattha ṇaṃ je savvuttamuttame purise, se ṇaṃ paṃcaṃgubbhaḍajovvaṇa-savvuttama -rūva-lāvanna-kaṃti-kaliyāe vi itthīe niyaṃbārūḍho vāsasayaṃ pi ciṭṭhijjā, no ṇaṃ manasā vi taṃ itthiyaṃ abhilasejjā|

2.3.392

(4) je ṇaṃ tu se uttamuttame, se ṇaṃ jai kahavi tuḍī-tihāeṇaṃ manasā samayamekkaṃ abhilase, tahā vi bīya samaye maṇaṃ sanniruṃbhiya attāṇaṃ niṃdejjā garahejjā, na puṇo bīeṇaṃ tajjamme itthīyaṃ manasā vi u abhilasejjā,
(5) je ṇaṃ se uttame, se ṇaṃ jai kaha vi khaṇaṃ muhuttaṃ vā itthiyaṃ kāmijjamāṇiṃ pekkhejjā, tao manasā abhilasejjā| jāva ṇaṃ jāmaddhajāmaṃ vā, no ṇaṃ itthīe samaṃ vikammaṃ samāyarejjā|

2.3.393

jai ṇaṃ baṃbhayārī kayapaccakkhāṇābhiggahe
(6) ahā ṇaṃ no baṃbhayārī no kayapaccakkhāṇābhiggahe, to
ṇaṃ niya-kalattebhayaṇā na tu ṇaṃ tivvesu kāmesu abhilāsī bhavejjā
(7) tassa eyassa ṇaṃ goyamā atthi baṃdho, kiṃtu anaṃta-saṃsāriyattaṇaṃ no nibaṃdhejjā|

2.3.394

(8) je ṇaṃ se vimajjhime, se ṇaṃ niya-kalatteṇa saddhiṃ vikammaṃ samāyarejjā, no ṇaṃ para-kalatteṇaṃ,
(9) ese ya ṇaṃ jai pacchā ugga-baṃbhayārī no bhavejjā, to ṇaṃ ajjhavasāya-visesaṃ taṃ tārisamaṃgīkāūṇaṃ anaṃta-saṃsāriyattaṇe bhayaṇā,
(10) jao ṇaṃ je kei abhigaya-jīvāi-payatthe savva-satte āgamāṇusāreṇaṃ susāhūṇaṃ dhammovaṭṭhaṃbha-dānāi-dāna-sīla-tava-bhāvanāmaie cauvvihe dhamma-khaṃdhe samanuṭṭhejjā| se ṇaṃ jai kahavi niyama-vayabhaṃgaṃ na karejjā
(11) tao ṇaṃ sāya-paraṃparaeṇaṃ sumānusatta-sudevattāe| jāva ṇaṃ aparivaḍiya-sammatte, nisaggeṇa vā abhigameṇa vā jāva aṭṭhārasasīlaṃga-sahassadhārī bhavittāṇaṃ niruddhāsavadāre, vihūya-rayamale, pāvayaṃ kammaṃ khavittāṇaṃ sijjhejjā|

2.3.395

(12) je ya ṇaṃ se ahame, se ṇaṃ sa-para-dārāsatta-mānase nusamayaṃ kūrajjhavasāyajjhavasiya-citte
hiṃsāraṃbha-pariggahāisu abhirae bhavejjā,
(13) tahā ṇaṃ je ya se ahamāhame, se ṇaṃ mahā-pāva-kamme savvāo itthīo vāyā manasā ya kammuṇā tivihaṃ tiviheṇaṃ nusamayaṃ abhilasejjā,
(14) tahā accaṃtakūrajjhavasāya-ajjhavasiehiṃ citte hiṃsāraṃbha-pariggahāsatte kālaṃ gamejjā
(15) eesiṃ doṇhaṃ pi ṇaṃ goyamā anaṃta-saṃsāriyattaṇaṃ neyaṃ||

2.3.396

(1) bhayavaṃ je ṇaṃ se ahame je vi ṇaṃ se ahamāhame purise tesiṃ ca doṇhaṃ pi anaṃta-saṃsāriyattaṇaṃ
samakkhāyaṃ, to ṇaṃ ege ahame ege ahamāhame
(2) etesiṃ doṇhaṃ pi purisāvatthāṇaṃ ke pai-visese
(3) goyamā je ṇaṃ se ahama-purise, se ṇaṃ jai vi u sa-para-dārāsatta-māṇase kūrajjhavasāya-jjhavasiehiṃ citte hiṃsāraṃbha-pariggahāsatta-citte, tahā vi ṇaṃ dikkhiyāhiṃ sāhuṇīhiṃ annayarāsuṃ ca| sīla-saṃrakkhaṇa-posahovavāsa-nirayāhiṃ dikkhiyāhiṃ gāratthīhiṃ vā saddhiṃ āvaḍiya-pelliyāmaṃtie vi samāṇe no viyammaṃ samāyarejjā,
(4) je ya ṇaṃ se ahamāhame purise, se ṇaṃ niya-jaṇaṇi-pabhiīe jāva ṇaṃ dikkhiyāīhiṃ sāhuṇīhiṃ pi samaṃ viyammaṃ samāyarejjā
(5) te ṇaṃ ceva se mahā-pāva-kamme savvahamāhame samakkhāe,
(6) se ṇaṃ goyamā pai-visese,
(7) tahā ya je ṇaṃ se ahamma-purise, se ṇaṃ anaṃteṇaṃ kāleṇaṃ bohiṃ pāvejjā| je ya u na se ahamāhame mahā-pāvakārī dikkhiyāhiṃ pi sāhuṇīhiṃ pi samaṃ viyammaṃ samāyarijjā| se ṇaṃ anaṃta-hutto
vi anaṃta-saṃsāramāhiṃḍiūṇaṃ pi bohiṃ no pāvejjā,
(8) ese ya goyamā bitie paivisese||

2.3.397

(1) tattha ṇaṃ je se savvuttame, se ṇaṃ chaumattha-vīyarāge nee
(2) jeṇaṃ tu se uttamuttame, se ṇaṃ aniḍḍhi-patta-pabhitīe jāva ṇaṃ uvasāmaga-khavae tāva ṇaṃ nioyaṇīe,
(3) jeṇaṃ ca se uttame, se ṇaṃ appamattasaṃjae nee,
(4) evameesiṃ nirūvaṇā kujjā

2.3.398

(5) jeu na micchadiṭṭhī bhavittāṇaṃ uggabaṃbhayārī bhavejjā hiṃsāraṃbha-pariggahāīṇaṃ virae, se ṇaṃ miccha-diṭṭhī ceva nee, no ṇaṃ samma-diṭṭhī,
(6) tesiṃ ca ṇaṃ aviiya jīvāi-payattha-sabbhāvāṇaṃ goyamā no ṇaṃ uttamatte abhinaṃdaṇijje pasaṃsaṇijje vā bhavai| jao teṇaṃ te anaṃtara-bhavie divvorālie visae patthejjā,
(7) annaṃ ca kayādī te divvitthiyādao saṃcikkhiya, tao ṇaṃ baṃbhavvayāo paribhaṃsejjā niyāṇakaḍe vā havejjā,

2.3.399

(8) je ya ṇaṃ se vimajjhime, se ṇaṃ taṃ tārisamajjhavasāyamaṃgīkiccāṇaṃ virayāvirae daṭṭhavve,

2.3.400

(9) tahā ṇaṃ je se ahame| je ya ṇaṃ se ahamāhame, tesiṃ tu ṇaṃ egaṃteṇaṃ jahā itthīsuṃ tahā ṇaṃ nee| jāva ṇaṃ kamma-ṭṭhiiṃ samajjejjā,
(10) navaraṃ purisassa ṇaṃ saṃcikkhaṇagesuṃ vaccharuhovaratala-pakkhaesuṃ liṃge ya ahiyayaraṃ rāgamuppajje
(11) evaṃ ete ceva chappurisavibhāge||

2.3.401

(1) kāsiṃ ci itthīṇaṃ goyamā bhavvattaṃ sammatta-daḍhattaṃ ca aṃgī-kāūṇaṃ jāva ṇaṃ savvuttame purisavibhāge tāva ṇaṃ ciṃtaṇijje| no ṇaṃ savvesimitthīṇaṃ

2.3.402

(2) evaṃ tu goyamā jīe itthīe-ti kālaṃ purisasaṃjoga-saṃpattī na saṃjāyā| ahā ṇaṃ purisa-saṃjoga-saṃpattīe vi sāhīṇāe jāva ṇaṃ terasame coddasame pannarasame ṇaṃ ca samaeṇaṃ puriseṇaṃ saddhiṃ na saṃjuttā no viyammaṃ samāyariyaṃ,
(3) se ṇaṃ, jahā ghana-kaṭṭha-taṇa-dāru-samiddhe keī gāme i vā nagare i vā, ranne i vā, saṃpalitte caṃḍānila-saṃdhukkie payalittāṇaṃ paya-littāṇaṃ ṇiḍajjhiya niḍajjhiya cireṇaṃ uvasamejjā
(4) evaṃ tu ṇaṃ goyamā se itthī kāmaggī saṃpalittā samāṇī ṇiḍajjhiya-niḍajjhiya samaya-caukkeṇaṃ uvasamejjā
(5) evaṃ igavīsame vāvīsame jāva ṇaṃ sattatīsaime samae jahā ṇaṃ padīva-sihā vāvaṇṇā puna-ravi sayaṃ vā tahāviheṇaṃ cunna-jogeṇaṃ vā payalijjā vā| evaṃ sā itthī-purisa-daṃsaṇeṇa vā purisā-lāvaga-savaṇeṇa vā madeṇaṃ kaṃdappeṇaṃ kāmaggie punaravi u payalejjā||

2.3.403

(1) etthaṃ ca goyamā jaṃ itthīyaṃ bhaeṇa vā, lajjāe vā, kulaṃkuseṇa vā, jāva ṇaṃ dhamma-saddhāe vā taṃ veyaṇaṃ ahi-yāsejjā no viyammaṃ samāyarejjā
(2) se ṇaṃ dhannā, se ṇaṃ puṇṇā, se ya ṇaṃ vaṃdā, se ṇaṃ pujjā, se ṇaṃ daṭṭhavvā, se ṇaṃ savva-lakkhaṇā, se ṇaṃ savva-kallāṇa-kārayā, se ṇaṃ savvuttama-maṃgala-nihi
(3) se ṇaṃ suyadevatā, se ṇaṃ sarassatī, se ṇaṃ aṃbahuṃḍī, se ṇaṃ accuyā, se ṇaṃ iṃdāṇī, se ṇaṃ paramapavittuttamā siddhī muttī sāsayā sivagai tti

2.3.404

(4) jāmatthiyaṃ taṃ veyaṇaṃ no ahiyāsejjā viyammaṃ vā samāyarejjā se ṇaṃ adhannā, se ṇaṃ apunnā, se ṇaṃ avaṃdā, se ṇaṃ apujjā, se ṇaṃ adaṭṭhavvā, se ṇaṃ alakkhaṇā, se ṇaṃ bhagga-lakkhaṇā, se ṇaṃ savva amaṃgala-akallāṇa-bhāyaṇā|
(5) se ṇaṃ bhaṭṭha-sīlā, se ṇaṃ bhaṭṭhāyārā se ṇaṃ paribhaṭṭha-cārittā, se ṇaṃ niṃdaṇīyā, se ṇaṃ garahaṇīyā, se khiṃsaṇijjā, se ṇaṃ kucchaṇijjā, se ṇaṃ pāvā, se ṇaṃ pāva-pāvā, se ṇaṃ mahāpāva-pāvā, se ṇaṃ apavitti tti||
(1) evaṃ tu goyamā caḍulattāe bhīruttāe kāyarattāe lolattāe, ummāyao vā dappao vā
kaṃdappao vā aṇappa-vasao vā āuṭṭiyāe vā,
(2) jamitthiyaṃ saṃjamāo paribhassiya, dūraddhāṇe vā gāme vā nagare vā rāyahāṇīe vā, vesa-ggahaṇaṃ acchaḍḍiya-puriseṇa saddhiṃ viyammaṃ samāyarejjā, bhūo bhūo purisaṃ kāmejja vā ramejja vā ahā ṇaṃ tameva doyatthiyaṃ kajjaṃ, iha parika-ppettā ṇaṃ tamāīvejjā,
(3) taṃ ceva āīvamāṇī passiyāṇaṃ ummāyao vā, dappao vā, kaṃdappao vā, aṇappavasao vā, āuṭṭiyāe vā,
(4) kei āyarie i vā, sāmanna-saṃjae i vā rāya-saṃsie i vā, vāya-laddhijutte i vā, tavo-laddhi jutte i vā, jogacunnaladdhi-jutte i vā, viṇṇāṇaladdhijutte i vā, jugappahāṇe i vā, pavayaṇappabhāvage i vā,
(5) tamatthiyaṃ annaṃ vā rāmejja vā, kāmejja vā, abhilasejja vā, bhuṃjejja vā, paribhuṃjejjā
vā jāva ṇaṃ viyammaṃ vā samāyarejjā
(6) se ṇaṃ duraṃta-paṃta-lakkhaṇe ahanne avaṃde adaṭṭhavve apavitte apasatthe akallāṇe amaṃgale niṃdaṇijje garahaṇijje khiṃsaṇijje kucchaṇijje,
(7) se ṇaṃ pāve, se ṇaṃ pāva-pāve, se ṇaṃ mahāpāve-se ṇaṃ mahāpāva-pāve se ṇaṃ bhaṭṭha-sīle, se ṇaṃ bhaṭṭhāyāre, se ṇaṃ nibbhaṭṭhacāritte mahā-pāva-kammakārī
(8) jai ṇaṃ pāyacchittama-bbhuṭṭhejjā, tao ṇaṃ maṃdaratuṃgeṇaṃ vaireṇaṃ sarīreṇaṃ uttameṇaṃ, saṃghayaṇeṇaṃ, uttameṇaṃ poruseṇaṃ, uttameṇaṃ satteṇaṃ, uttameṇaṃ tatta-pariṇṇāṇeṇaṃ uttameṇaṃ vīriyasāmattheṇaṃ, uttameṇaṃ saṃvegeṇaṃ uttamāe dhamma-saddhāe, uttameṇaṃ āukkhaeṇaṃ taṃ pāyacchittamanucarejjā|
(9) te ṇaṃ tu goyamā sāhūṇaṃ mahānubhāgāṇaṃ aṭṭhārasa-parihāra-ṭṭhāṇāiṃ ṇava-baṃbhacera-guttīo vāgarijjaṃti||

2.3.405

(1) se bhayavaṃ kiṃ pacchitteṇaṃ sujjhejjā
(2) goyamā atthege je ṇaṃ sujjhejjā| atthege je ṇaṃ no sujjhejjā
(3) se bhayavaṃ keṇaṃ aṭṭheṇaṃ evaṃ vuccai | jahā ṇaṃ goyamā atthege je ṇaṃ sujjhejjā, atthege je ṇaṃ no sujjhejjā|
(4) goyamā atthege je ṇaṃ niyaḍī-pahāṇe saḍha-sīle vaṃka-samāyāre| se ṇaṃ sasalle āloittāṇaṃ sasalle ceva pāyacchittamanucarejjā| se ṇaṃ avi-suddha-sakalusāsae no sujjhejjā
(5) atthege je ṇaṃ ujjū paddhara-sarala-sahāve, jahā-vattaṃ nīsallaṃ nīsaṃkaṃ supariphuḍaṃ āloi-ttāṇaṃ jahovaiṭṭhaṃ ceva pāyacchittamanuciṭṭhejjā| se ṇaṃ nimmala-nikkalusa-visuddhāsae vi sujjhejjā|
(6) eteṇaṃ aṭṭheṇaṃ evaṃ vuccai jahā ṇaṃ goyamā atthege je ṇaṃ sujjhejjā| atthege je ṇaṃ no sujjhejjā|

2.3.406

(1) tahā ṇaṃ goyamā itthīyaṃ nāma purisāṇaṃ ahamāṇaṃ savva-pāva-kammāṇaṃ vasuhārā, tama-raya-paṃka-khāṇī soggai-maggassa ṇaṃ aggalā, narayāvayārassa ṇaṃ samoyaraṇa-vattaṇī
(2) abhūmayaṃ visakaṃdaliṃ, aṇaggiyaṃ caḍuliṃ abhoyaṇaṃ visūiyaṃ aṇāmiyaṃ vāhiṃ, aveyaṇaṃ mucchaṃ, aṇovasaggaṃ māriṃ aniyaliṃ guttiṃ, arajjue pāse, aheue maccū,
(3) tahā ya ṇaṃ goyamā itthi-saṃbhoge purisāṇaṃ manasā vi ṇaṃ aciṃtaṇijje, aṇajjhava-saṇijje, apatthaṇijje, aṇīhaṇijje, aviyappaṇijje, asaṃkappaṇijje, aṇabhilasaṇijje, asaṃbharaṇijje tivihaṃ tiviheṇaṃ ti|
(4) jao ṇaṃ itthiyaṃ nāma purisassa ṇaṃ, goyamā savvappagāresuṃ pi dussāhiya-vijjaṃ pi va dosuppapāyaṇiṃ, sāraṃbha saṃjaṇagaṃ pi va puṇo asaṃjamāyaraṇaṃ apuṭṭhadhammaṃ,
(5) khaliyacārittaṃ piva anāloiyaṃ aniṃdiyaṃ agarahiyaṃ akaya-pāyacchittajjhavasāyaṃ paḍucca anaṃta-saṃsāra-pariyaṭṭaṇa-dukkhasaṃdohaṃ
(6) kaya-pāyacchitta-visohiṃ pi va puṇo asaṃjamāyaraṇaṃ mahaṃta-pāva-kamma-saṃcayaṃ hiṃsaṃ va sayala-telokka-niṃdiyaṃ
(7) adiṭṭha-paraloga-paccavāya-ghoraṃdhayāra-naraya-vāso iva-niraṃtarāṇega-dukkha-nihiṃ ti||

2.3.407

aṃga-paccaṃga-saṃṭhāṇaṃ cārulla viya-pehiyaṃ|
itthīṇaṃ taṃ na nijjhāe kāma-rāga-vivaḍḍhaṇaṃ||

2.3.408

(1) tahā ya itthīo nāma goyamā palaya-kāla-rayaṇī-miva savva-kālaṃ tamovalittāo bhavaṃti|
(2) vijju iva khaṇadiṭṭha-naṭṭha-pemmāo bhavaṃti|
(3) saraṇāgaya-ghāyago iva ekka-jammiyāo takkhaṇa-pasūya-jīvaṃta-muddha-niya-sisu-bhakkhīo iva mahā-pāva-kammāo bhavaṃti|
(4) khara-pavaṇuccāliya-lavaṇovahi-velāiva bahu-viha-vikappa-kallolamālāhiṃ ṇaṃ| khaṇaṃ pi egattha hi asaṃṭhiya-māṇasāo bhavaṃti|
(5) sayaṃbhuramaṇovahimamiva duravagāha-kaitavāo bhavaṃti|
(6) pavaṇo iva caḍula-sahāvāo bhavaṃti
(7) aggī iva savva-bhakkhāo, vāū iva savva-pharisāo, takkaro iva paratthalolāo, sāṇo iva dānamettamettīo, maccho iva havva-paricatta-nehāo,
(1) evamāi-anega-dosa-lakkha-paḍipunna-savvaṃgovaṃga-sabbhiṃtara-bāhirāṇaṃ mahāpāvakammāṇaṃ avinaya-visa-maṃjarīṇaṃ tatthuppanna-anattha-gaṃtha pasūīṇaṃ itthīṇaṃ|
(2) anavaraya-nijjharaṃtaduggaṃdhā'sui-cilīṇa-kuccha-ṇijja-niṃdaṇijja-khiṃsaṇijja-savvaṃgo -vaṃgāṇaṃ sabbhaṃtara-bāhirāṇaṃ|
(3) paramatthao mahāsattāṇaṃ nivvinna-kāma-bhogāṇaṃ goyamā savvuttamuttamapurisāṇaṃ ke nāma sayanne suviṇṇāya-dhammāhamme khaṇamavi abhilāsaṃ gacchijjā|

2.3.409

(4) jāsiṃ ca ṇaṃ abhilasiukāme purise tajjoṇiṃ samucchima-paṃciṃdiyāṇaṃ ekka-pasaṃgeṇaṃ ceva navaṇhaṃ saya-sahassāṇaṃ niyamāo uddavage bhavejjā|
(5) te ya accaṃta-suhumattāo maṃsacakkhuṇo na pāsiyā

2.3.410

ee ṇaṃ aṭṭheṇaṃ evaṃ vuccai jahā ṇaṃ goyamā no itthīyaṃ ālavejjā, no saṃlavejjā, no ullavejjā, no itthīgaṃ aṃgovaṃgāiṃ saṃṇi-rikkhejjā, jāva ṇaṃ no itthīe saddhiṃ ege baṃbhayārī addhāṇaṃ paḍivajjejjā||

2.3.411

(1) se bhayavaṃ kimitthie saṃlāvullāvaṃgovaṃga-nirikkhaṇaṃ vajjejjā, se ṇaṃ uyāhu mehuṇaṃ goyamā ubhayamavi
(2) se bhayavaṃ kimitthi-saṃjoga-samāyaraṇe mehuṇe parivajjiyā, uyāhu ṇaṃ bahuvihesuṃ sacittā-citta-vatthu-visaesuṃ|
(3) mehuṇa-pariṇāme tivihaṃ tiviheṇaṃ maṇo-vai-kāya-jogeṇaṃ savvahā savva-kālaṃ jāvajjīvāe tti | goyamā savvahā vivajjejjā||

2.3.412

(1) se bhayavaṃ je ṇaṃ keī sāhū vā sāhūṇī vā mehuṇamāsevejjā se ṇaṃ vaṃdejjā goyamā je ṇaṃ keī sāhū vā sāhūṇī vā mehuṇaṃ sayameva appaṇā sevejja vā parehi uvaisettuṃ sevāvejjā vā sevijja-māṇaṃ samanujāṇejjā vā divvaṃ vā mānusaṃ vā tirikkha-joṇiyaṃ vā jāva ṇaṃ kara-kammāiṃ sacittācitta-vatthuvisayaṃ vā vivihajjhavasāeṇa kāramākārimovagaraṇeṇaṃ manasā vā vayasā vā kāeṇa vā
(2) se ṇaṃ samaṇe vā samaṇī vā dūraṃta-pata-lakkhaṇa adaṭṭhavve amagga-samāyāre mahāpāva-kamme no ṇaṃ vaṃdejjā, no ṇaṃ vaṃdāvejjā no ṇaṃ vaṃdijjamāṇa vā samanujāṇejjā tivihaṃ tiviheṇaṃ jāva ṇaṃ visohikālaṃ ti|
(3) se bhayavaṃ jaṃ vaṃdejjā se kiṃ labhejjā
(4) goyamā je taṃ vaṃdejjā, se aṭṭhārasaṇhaṃ sīlaṃga-sahassadhārīṇaṃ mahānubhāgāṇaṃ titthayarādīṇaṃ mahatī āsāyaṇaṃ kujjā|
(5) je ṇaṃ titthayarādīṇaṃ āsāyaṇaṃ kujjā, se ṇaṃ ajjhavasāyaṃ paḍuccā| jāva ṇaṃ anaṃta-saṃsāriyattaṇaṃ labhejjā||

2.3.413

vippahiccitthiyaṃ sammaṃ savvahā mehuṇaṃ pi ya|
atthege goyamā pāṇī je no cayai pariggahaṃ||

2.3.414

jāvaiyaṃ goyamā tassa saccittācittobhayattagaṃ|
pabhūyaṃ cānujīvassa bhavejjā u pariggahaṃ||

2.3.415

tāvaieṇaṃ tu so pāṇī sasaṃgo mokkha-sāhaṇaṃ|
nāṇādi-tigaṃ na ārāhe; tamhā vajje pariggahaṃ||

2.3.416

atthege goyamā pāṇī je payahittā pariggahaṃ|
āraṃbhaṃ no vivajjejjā jaṃ cīyaṃ bhavaparaṃparā||

2.3.417

āraṃbhe patthiyassega-viyala-jīvassa vaiyare|
saṃghaṭṭaṇāiyaṃ kammaṃ jaṃ baddhaṃ goyamā suṇa||

2.3.418

(1) ege beiṃdie jīve egaṃ samayaṃ anicchamāṇe balābhiogeṇaṃ hattheṇa vā pāeṇa vā annayareṇa vā salāgāi-uva-garaṇa-jāeṇaṃ je kei pāṇī agāḍhaṃ saṃghaṭṭejjā vā saṃghaṭṭāvejja vā saṃghaṭijjamāṇaṃ vā aṃgāḍhaṃ parehiṃ-samanujāṇejjā,
(2) se ṇaṃ goyamā jayā taṃ kammaṃ udayaṃ gacchejjā tayā ṇaṃ mahayā keseṇaṃ chammāseṇaṃ vedejjā gāḍhaṃ, duvālasahiṃ saṃvaccharehiṃ|
(3) tameva agāḍhaṃ pariyāvejjā vāsa-sahasseṇaṃ gāḍhaṃ, dasahiṃ vāsa-sahassehiṃ|
(4) tameva agāḍhaṃ kilāmejjā, vāsa-lakkheṇaṃ gāḍhaṃ, dasahiṃ vāsalakkhehiṃ|
(5) ahā ṇaṃ uddavejjā, tao vāsa-koḍie|
(6) evaṃ ti-cau-paṃciṃdiesu daṭṭhavvaṃ||

Translations (2)

Mahānisīha: Gujarati translation (Dīparatnasāgara, 2020) — Gujarati
Mahānisīha: Hindi translation (Dīparatnasāgara, 2019) — Hindi

Commentaries (1)

Mahānisīha: ṭīkānusārī vivecana — Muni Dīparatnasāgara 2000, Gujarati