Pramāṇa · Search · About · API

Thanamga 3.1

Ṭhāṇaṃga 3.1

Language
Ardhamāgadhī Prakrit

Contents

3.1.1.1

taō indā paṇṇattā taṁ jahā — nāmindē ṭhavaṇindē davvindē, taō indā paṇṇattā taṁ jahā — nāṇindē daṁsaṇindē carittindē, taō indā paṇṇattā taṁ jahā — dēvindē asurindē maṇussindē.

3.1.2.1

tivihā vikuvvaṇā paṇṇattā taṁ jahā — bāhiraē poggalaē pariyādittā ēgā vikuvvaṇā bāhiraē poggalē apariyādittā ēgā vikuvvaṇā bāhiraē poggalē pariyādittāvi apariyādittāvi ēgā vikuvvaṇā, tivihā vikuvvaṇā paṇṇattā taṁ jahā — abbhantaraē poggalē pariyādittā ēgā vikuvvaṇā abbhantaraē poggalē apariyādittā viēgā vikuvvaṇā abbhantaraē poggalē pariyādittāvi apariyādittāvi ēgā vikuvvaṇā, tivihā vikuvvaṇā pa0 taṁ0 jahā-bāhirabbhantaraē poggalē pariyādittā ēgā vikuvvaṇā bāhirabbhantaraē poggalē apariyādittā ēgā vikuvvaṇā bāhirabbhantaraē poggalē pariyādittāvi apariyādittāvi ēgā vikuvvaṇā.

3.1.3.1

tivihā nēraïyā paṇṇattā taṁ jahā — katisañcittā akatisañcitā avattavvagasañcitā, ēvamēgindiyavajjā jāva vēmāṇiyā.

3.1.4.1

tivihā pariyāraṇā paṇṇattā taṁ jahā — ēgē dēvē aṇṇē dēvē aṇṇēsiṁ dēvāṇaṁ dēvīō ya abhijuñjiya-abhijuñjiya pariyārēti appaṇijjiāō dēvīō abhijuñjiya abhijuñjiya pariyārēti appāṇamēva appaṇā viuvviya-viuvviya pariyārēti, ēgē dēvē nō aṇṇē dēvē nō aṇṇēsiṁ dēvāṇaṁ dēvīō abhijuñjiya-abhijuñjiya pariyārēti attaṇijjitāō dēvīō abhijuñjiya-abhijujañjiya pariyārēti appāṇamēva appaṇā viuvviya-viuvviya pariyārēti, ēgē dēvē nō aṇṇē dēvē nō aṇṇēsiṁ dēvāṇaṁ dēvīō abhijuñjiya-abhijuñjiya pariyārēti nō appaṇijjitāō dēvīō abhijuñjiya-abhijuñjiya pariyārēti appāṇamēva appāṇaṁ viuvviya-viuvviya pariyārēti.

3.1.5.1

tivihē mēhuṇē paṇṇattē taṁ jahā — divvē māṇussaē tirikkhajōṇiē, taō mēhuṇaṁ gacchanti taṁ jahā — dēvā maṇussā tirikkhajōṇiyā, taō mēhuṇaṁ sēvanti taṁ jahā — itthī purisā napuṁsagā.

3.1.6.1

tivihē jōgē paṇṇattē taṁ jahā — maṇajōgē vaïjōgē kāyajōgē ēvaṁ nēraïyāṇaṁ vigalindiya vajjāṇaṁ jāva vēmāṇiyāṇaṁ, tivihē paōgē paṇṇattē taṁ jahā — maṇapaōgē vaïpaōgē kāyapaōgē, jahā jōgō vigalindiyavajjāṇaṁ jāva tahā paōgōvi, tivihē karaṇē paṇṇattē taṁ jahā — maṇakaraṇē vaïkaraṇē kāyakaraṇē ēvaṁ- vigalindiyavajjaṁ jāva vēmāṇiyāṇaṁ, tivihē karaṇē paṇṇattē taṁ jahā — ārambhakaraṇē saṁrambhakaraṇē samārambhakaraṇē nirantaraṁ jāva vēmā-ṇiyāṇaṁ.

3.1.7.1

tihiṁ ṭhāṇēhiṁ jīvā appāuyattāē kammē pagarenti taṁ jahā — pāṇē ativātittā bhavati musaṁ vaïttā bhavati tahārūvaṁ samaṇaṁ vā māhaṇaṁ vā aphāsuēṇaṁ aṇēsaṇijjēṇaṁ asaṇapāṇakhāimasāimēṇaṁ paḍilābhettā bhavati, iccētēhi tihiṁ ṭhāṇēhiṁ jāva appāuyattāē kammaṁ pagarenti.

3.1.7.2

tihiṁ ṭhāṇēhiṁ jīvā dīhāuyattāē kammaṁ pagarenti taṁ jahā — nō pāṇē ativātittā bhavaï nō musaṁ vaïttā bhavaï tahārūvaṁ samaṇaṁ vā māhaṇaṁ vā phāsuēṇaṁ ēsaṇijjēṇaṁ asaṇapāṇakhāimasāimēṇaṁ paḍilābhettā bhavaï, iccētēhiṁ tihiṁ ṭhāṇēhiṁ jīvā dīhāuyattāē kammaṁ pagarenti.

3.1.7.3

tihiṁ ṭhāṇēhiṁ jīvā asubhadīhāuyattāē kammaṁ pagarenti, taṁ jahā pāṇē ativātittā bhavaï musaṁ vaïttā bhavaï tahārūvaṁ samaṇaṁ vā māhaṇaṁ vā hīlettā nindittā khiṁsettā garahittā avamāṇittā annayarēṇaṁ amaṇunnēṇaṁ apītikāratēṇaṁ asaṇaṁ0 paḍilābhittā bhavaï, iccētēhiṁ tihiṁ ṭhāṇēhiṁ jīvā asubha dīhāuyattāē kammaṁ pagarenti tihiṁ ṭhāṇēhiṁ jīvā subhadīhāuyattāē kammaṁ pagarenti taṁ jahā — nō pāṇē ativātittā bhavaï nō musaṁ vadittā bhavaï tahārūvaṁ samaṇē vā māhaṇaṁ vā vandittā ṇamaṁsittā sakkārittā sammāṇittā kallāṇaṁ maṅgalaṁ dēvataṁ cētitaṁ pajjuvāsettā maṇuṇṇēṇaṁ pītikāraēṇaṁ asaṇapāṇakhāimasāimēṇaṁ paḍilābhettā bhavaï-iccētēhiṁ tihiṁ ṭhāṇēhiṁ jīvā suhadīhāuyattāē kammaṁ pagarenti.

3.1.8.1

taō guttīō paṇṇattāō taṁ jahā — maṇaguttī vaïguttī kāyaguttī, sañjayamaṇussāṇaṁ taō guttīō paṇṇattāō taṁ jahā — maṇaguttī vaïguttī kāyaguttī.

3.1.8.2

taō aguttīō paṇṇattāō taṁ jahā — maṇaagutī vaïaguttī kāyaaguttī, ēvaṁ- nēraïyāṇaṁ jāva thaṇiyakumārāṇaṁ, pañcidiyatirikkhajōṇiyāṇaṁ asañjata maṇussāṇaṁ vāṇamantarāṇaṁ jōisiyāṇaṁ vēmāṇiyāṇaṁ.

3.1.8.3

taō daṇḍā paṇṇattā taṁ jahā — maṇadaṇḍē vaïdaṇḍē kāyadaṇḍē, nēraïyāṇaṁ taō daṇḍā paṇṇattā taṁ jahā — maṇadaṇḍē vaïdaṇḍē kāyadaṇḍē, vigalindiyavajjaṁ jāva vēmāṇiyāṇaṁ.

3.1.9.1

tivihā garahā paṇṇattā taṁ jahā — maṇasā vēgē garahati vayasā vēgē garahati kāyasā vēgē garahati-pāvāṇaṁ kammāṇaṁ akaraṇayāē, ahavā — garahā tivihā paṇṇattā taṁ jahā — dīhampēgē addhaṁ garahati rahassampēgē addhaṁ garahati kāyapēgē paḍisāharati-pāvāṇaṁ kammāṇaṁ akaraṇayāē.

3.1.9.2

tivihē paccakkhāṇē paṇṇattē taṁ0 maṇasā vēgē paccakkhāti vayasā vēgē paccakkhāti kāyasā vēgē paccakkhāti-pāvāṇaṁ kammāṇaṁ akaraṇayāē, ēvaṁ jahā garahā tahā paccakkhāṇēvi dō ālāvagā bhā0.

3.1.10.1

taō rukkhā paṇṇattā taṁ jahā — pattōvagē pupphōvagē phalōvagē, ēvāmēva taō purisajātā paṇṇattā taṁ jahā — pattōvārukkhasamāṇē pupphōvārukkhasamāṇē phalōvārukkhasamāṇē.

3.1.10.2

taō purisajjāyā paṇṇattā taṁ jahā — nāmapurisē ṭhavaṇapurisē davvapurisē, taō purisajjāyā paṇṇattā taṁ jahānāṇapurisē daṁsaṇapurisē carittapurisē, taō purisajjāyā paṇṇattā taṁ jahā — vēdapurisē cindhapurisē abhilāvapurisē.

3.1.10.3

tivihā purisā paṇṇattā taṁ jahā — uttamapurisā majjhimapurisā jahaṇṇaparisā, uttamapurisā tivihā paṇṇattā taṁ jahā — dhammapurisā bhōgapurisā kammapurisā, dhammapurisā arahantā bhōgapurisā cakkavaṭṭī kammapurisā vāsudēvā. majjhimapurisā tivihā paṇṇattā taṁ jahā — uggā bhōgā rāiṇṇā, jahaṇṇapurisā tivihā paṁ0 taṁ jahā — dāsā bhayagā bhāillāgā.

3.1.11.1

tivihā macchā paṇṇattā taṁ jahā — aṇḍayā pōyayā saṁmucchimā, aṇḍayā macchā tivihā paṇṇattā taṁ0- itthī purisā napuṁsagā, pōtayā macchā tivihā paṇṇattā taṁ jahā — itthī purisā napuṁsagā.

3.1.11.2

tivihā pakkhī paṇṇattā taṁ jahā — aṇḍayā pōyayā saṁmucchimā, aṇḍayā pakkhī tivihā paṇṇattā taṁ jahā — itthī purisā napuṁsagā, pōyayā pakkhī tivihā paṇṇattā taṁ jahā — itthī purisā napuṁsagā ēvamētēṇaṁ abhilāvēṇaṁ uraparisappā vi bhāṇiyavvā, bhujaparisappā vi bhāṇiyavvā.

3.1.12.1

ēvaṁ cēva tivihāō itthīō paṇṇattāō taṁ0- tirikkhajōṇitthīō maṇussitthīō dēvitthīō. tirikkhajōṇīō itthīō tivihāō paṇṇattāō taṁ jahā — jalacarīō thalacarīō khahacarīō maṇussitthīō tivihāō paṇṇattāō taṁ jahā — kammabhūmiyāō akammabhūmiyāō antaradīvigāō.

3.1.12.2

tivihā purisā paṇṇattā taṁ jahā — tirikkhajōṇiyapurisā maṇussapurisā dēvapurisā. tirikkhajōṇiyapurisā tivihā paṇṇattā taṁ jahā — jalacarā thalacarā khahacarā. maṇussapurisā tivihā paṇṇattā taṁ jahā — kammabhūmiyā akammabhūmiyā antaradīvagā. tivihā napuṁsagā paṇṇattā taṁ jahā — nēraïyanapuṁsagā tirikkhajōṇiyanapusaṅgā maṇussanapuṁsagā. tirikkhajōṇiyanapusaṅgā tivihā paṇṇattā taṁ jahā — jalayarā thalayarā khahayarā, maṇussa-napuṁsagā tividhā paṇṇattā taṁ jahā — kammabhūmigā akammabhūmigā antaradīvagā.

3.1.13.1

tivihā tirikkhajōṇiyā paṇṇattā taṁ jahā — itthī purisā napuṁsagā.

3.1.14.1

nēraïyāṇaṁ taō lēsāō paṇṇattāō taṁ0- kaṇhalēsā nīlalēsā kāulēsā.

3.1.14.2

asurakumārāṇaṁ taō lēsāō saṅkiliṭṭhāō paṇṇattāō taṁ jahā — kaṇhalēsā nīlalēsā kāulēsā, ēvaṁ jāva thaṇiyakumārāṇaṁ, ēvaṁ- puḍhavikāiyāṇaṁ āu-vaṇassatikāiyāṇavi, tēukāiyāṇaṁ vāukāiyāṇaṁ bendiyāṇaṁ tendiyāṇaṁ caürindiyāṇaṁvi taō lēssā jahā nēraïyāṇaṁ.

3.1.14.3

pañcidiyatirikkhajōṇiyāṇaṁ taō lēsāō saṅkiliṭṭhāō paṇṇattāō taṁ jahā — kaṇhalēsā nīlalēsā kāulēsā, pañcidiyatirakkhajōṇiyāṇaṁ taō lēsāō asaṅkiliṭṭhāō paṇṇattāō taṁ jahā tēulēsā pamhalēsā sukkalēsā, ēvaṁ maṇussāṇaṁ vi. jahā — kaṇhalēsā nīlalēsā kāulēsā [maṇussāṇaṁ taō lēsāō asaṅkili-ṭṭhāō paṇṇattāō taṁ0 jahā — vāṇamantarāṇaṁ jahā asurakumārāṇaṁ.

3.1.14.4

vēmāṇiyāṇaṁ taō lēssāō paṇṇattāō taṁ0- tēulēsā pamhalēsā sukkalēsā.

3.1.15.1

tihiṁ ṭhāṇēhiṁ tārāruvē calejjā taṁ jahā — vikuvvamāṇē vā pariyārēmāṇē vā ṭhāṇāō vā ṭhāṇaṁ saṅkamamāṇē tārārūvē calejjā, tihiṁ ṭhāṇēhiṁ dēvē vijjuyāraṁ karejjā taṁ jahā — vikuvvamāṇē vā pariyārēmāṇē vā tahārūvassa samaṇassa vā māhaṇassa vā iḍḍhiṁ jutiṁ jasaṁ balaṁ vīriyaṁ purisakkāra-parakkamaṁ uvadaṁsēmāṇē-dēvē vijjuyāra karejjā.

3.1.15.2

tihiṁ ṭhāṇēhiṁ dēvē thaṇiya-saddaṁ karejjā taṁ jahā — vikuvvamāṇē vā, ēvaṁ jahā vijjutārē tahēva thaṇiyasaddampi.

3.1.16.1

tihiṁ ṭhāṇēhiṁ lōgandhayārē siyā taṁ jahā — arahantēhiṁ vocchijjamāṇēhiṁ arahantapaṇṇattē dhammē vocchijjamāṇē puvvagatē vocchijjamāṇē, tihiṁ ṭhāṇēhiṁ lōgujjōtē siyā taṁ jahā — arahantēhiṁ jāyamāṇēhiṁ arahantēhiṁ pavvayamāṇēhiṁ arahantāṇaṁ nāṇuppāyamahimāsu.

3.1.16.2

tihiṁ ṭhāṇēhiṁ dēvandhakārē siyā taṁ jahā — arahantēhiṁ vocchijjamāṇēhiṁ arahantapannattē dhammē vocchijjamāṇē puvvagatē vocchijjamāṇē, tihiṁ ṭhāṇēhiṁ dēvujjōtē siyā taṁ jahā — arahantēhiṁ jāyamāṇēhiṁ arahantēhiṁ pavvayamāṇēhiṁ arahantāṇaṁ nāṇuppāyamahimāsu.

3.1.16.3

tihiṁ ṭhāṇēhiṁ dēvasaṇṇivāē siyā taṁ jahā — arahantēhiṁ jāyamāṇēhiṁ arahantēhiṁ pavvayamāṇēhiṁ arahantāṇaṁ nāṇuppāyamahimāsu ēvaṁ dēvukkaliyā, dēvakahakahaē.

3.1.16.4

tihiṁ ṭhāṇēhiṁ dēvindā māṇusaṁ lōgaṁ havvamāgacchanti taṁ jahā — arahantēhiṁ jāyamāṇēhiṁ arahantēhiṁ pavvayamāṇēhiṁ arahantāṇaṁ nāṇuppāyamahimāsu, ēvaṁ- sāmāṇiyā, tāyattīsagā, lōgapālā dēvā aggamahisīō dēvīō, parisōvavaṇṇagā dēvā, aṇiyāhivaī dēvā, āyarakkhā dēvā, māṇusaṁ lōgaṁ havvamagacchanti.

3.1.16.5

tihiṁ ṭhāṇēhiṁ dēva abbhuṭṭhijjā taṁ jahā — arahantēhiṁ jāyamāṇēhiṁ jāva taṁ cē va | ēvaṁ āsaṇāiṁ calejjā, sīhaṇāyaṁ karejjā, cēlukkhēvaṁ karejjā, tihiṁ ṭhāṇēhiṁ dēvāṇaṁ cēiyarukkhā calejjā taṁ jahā — arahantēhiṁ jāyamāṇēhiṁ [arahantēhiṁ pavvayamāṇēhiṁ arahantāṇaṁ nāṇuppāyamahimāsuṁ].

3.1.16.6

tihiṁ ṭhāṇēhiṁ lōgantiyā dēvā māṇusaṁ lōgaṁ havvamāgacchejjā taṁ jahā — arahantēhiṁ jāyamāṇēhiṁ arahantēhiṁ pavvayamāṇēhiṁ arahantāṇaṁ nāṇuppāyamahimāsu.

3.1.17.1

tiṇhaṁ duppaḍiyāraṁ samaṇāusō! taṁ jahā — ammapiuṇō bhaṭṭissa dhammāyariyassa, sampātō'vi ya ṇaṁ kēi purisē ammāpiyaraṁ sayapāgasahassapāgēhiṁ tēllēhiṁ abbhaṅgettā surabhiṇā gandhaṭṭaēṇaṁ uvvaṭṭittā tihiṁ udagēhiṁ majjāvettā savvālaṅkāravibhūsiyaṁ karettā maṇuṇṇaṁ thālīpāgasuddhaṁ aṭṭhārasavañjaṇāulaṁ bhōyaṇaṁ bhōyāvettā jāvajjīvaṁ piṭṭhivaḍēṁsiyāē parivahejjā, tēṇāvi tassa ammāpiussa duppaḍiyāraṁ bhavaï, ahē ṇaṁ sē taṁ ammāpiyaraṁ kēvalipaṇṇattē dhammē āghavaïttā paṇṇavaïttā parūvaïttā ṭhāvitā bhavati, tēṇāmēva tassa ammāpiussa suppaḍiyāraṁ bhavati samaṇāusō, kēi mahaccē dariddaṁ samukkasejjā, taē ṇaṁ sē dariddē samukkiṭṭhē samāṇē pacchā puraṁ ca ṇaṁ viulabhōgasamitisamaṇṇāgatē yāvi viharejjā, taē ṇaṁ sē mahaccē aṇṇayā kayāi dariddīhūē samāṇē tassa dariddassa antiē havvamāgacchejjā, taē ṇaṁ sē dariddē tassa bhaṭṭissa savvassamavi dalayamāṇē tēṇāvi tassa duppaḍiyāraṁ bhavati, ahē ṇaṁ sē taṁ bhaṭṭiṁ kēvalipaṇṇattē dhammē āghavaïttā paṇṇavaïttā parūvaïttā ṭhāvaïtā bhavati, tēṇāmēva tassa bhaṭṭissa suppaḍiyāraṁ bhavati samaṇāusō.

3.1.17.2

kēti kahārūvassa samaṇassa vā māhaṇassa vā antiē ēgamavi āriyaṁ dhammiyaṁ suvayaṇaṁ soccā nisamma kālamāsē kālaṁ kiccā aṇṇayarēsu dēvalōēsu dēvattāē uvavaṇṇē, taē ṇaṁ sē dēvē taṁ dhammāyariyaṁ dubbhikkhāō vā dēsāō subhikkhaṁ dēsaṁ sāharejjā, kantārāō vā ṇikkantāraṁ karejjā, dīhakāliēṇaṁ vā rōgāntakēṇaṁ abhibhūtaṁ samāṇaṁ vimōejjā tēṇāviṁ tassa dhammāyariyassa duppaḍiyāraṁ bhavati, ahē ṇaṁ sē taṁ dhammāyariyaṁ kēvalipaṇṇattāō dhammāō bhaṭṭaṁ samāṇaṁ bhujjōvi kēvalipaṇṇattē dhammē āghavaïttā paṇṇavaïttā parūvaïttā ṭhāvaïtā bhavati, tēṇāmēva tassa dhammāyariyassa supapḍiyāraṁ bhavati samaṇāusō.

3.1.18.1

tihiṁ ṭhāṇēhiṁ sampaṇṇē aṇagārē aṇādīyaṁ aṇavadaggaṁ dīhamaddhaṁ cāurantaṁ saṁsārakantāraṁ vīīvaejjā, taṁ jahā — anidāṇayāē diṭṭhisampannayāē jōgavāhiyāē.

3.1.19.1

tivihā ōsappiṇī paṇṇattā taṁ jahā — ukkōsā majjhimā jahaṇṇā, ēvaṁ chappi samāō bhāṇiyavvāō jāva dūsama-dūsamā.

3.1.19.2

tivihā ussappiṇī paṇṇattā taṁ jahā — ukkōsā majjhimā jahaṇṇā ēvaṁ chappi samāō bhāṇi0 jāva susama-susamā.

3.1.20.1

tihiṁ ṭhāṇēhiṁ acchiṇṇē poggalē calejjā taṁ jahā — āhārijjamāṇē vā poggalē calejjā vikuvvamāṇē vā poggalē calejjā ṭhāṇāō vā ṭhāṇaṁ saṅkāmijjamāṇē poggalē calejjā.

3.1.20.2

tivihē uvadhī paṇṇattē taṁ jahā — kammōvahī sarīrōvahī bāhirabhaṇḍamattōvahī, ēvaṁ asurakumārāṇaṁ bhāṇiyavvaṁ, ēvaṁ-ēgindiyanēraïyavajjaṁ jāva vēmāṇiyāṇaṁ. ahavā —tivihē uvadhī paṇṇattē taṁ jahā — sacittē, acittē mīsaē, ēvaṁ nēraïyāṇaṁ nirantaraṁ jāva vēmāṇiyāṇaṁ.

3.1.20.3

tivihē pariggahē paṇṇattē taṁ jahā — kammapariggahē sarīrapariggahē bāhirabhaṇḍamatta pariggahē, ēvaṁ- asurakumārāṇaṁ ēvaṁ- ēgindiyanēraïyavajjaṁ jāva vēmāṇiyāṇaṁ. ahavā —tivihē pariggahē paṇṇattē taṁ jahā — sacittē acittē mīsaē ēvaṁ nēraïyāṇaṁ nirantaraṁ jāva vēmāṇiyāṇaṁ.

3.1.21.1

tivihē paṇihāṇē paṇṇattē jaṁ jahā — maṇapaṇihāṇē vayapaṇihāṇē kāyapaṇihāṇē ēvaṁ-pañcidiyāṇaṁ jāva vēmāṇiyāṇaṁ, tivihē suppaṇihāṇē paṇṇattē taṁ jahā — maṇasuppaṇihāṇē vayasuppaṇihāṇē kāyasuppaṇihāṇē, sañjayamaṇussāṇaṁ tivihē suppaṇihāṇē paṇṇattē taṁ jahā — maṇasuppaṇihāṇē vayasuppaṇihāṇē kāyasuppaṇihāṇē, tivihē duppaṇihāṇē paṇṇattē taṁ jahā — maṇaduppaṇihāṇē vayaduppaṇihāṇē kāyaduppaṇihāṇē ēvaṁ-pañcidiṁyāṇaṁ jāva vēmāṇiyāṇaṁ.

3.1.22.1

tivihā jōṇī pa0 taṁ0- sītā usiṇā sīōsiṇā ēvaṁ ēgindiyāṇaṁ vigalindiyāṇaṁ tēukāiyavajjāṇaṁ saṁmucchimapañcidiyatirikkhajōṇiyāṇaṁ saṁmucchimamaṇussāṇaṁ ya.

3.1.22.2

tivihā jōṇī paṇṇattā taṁ jahā — sacittā acittā mīsiyā ēvaṁ- ēgindiyāṇaṁ vigalindiyāṇaṁ saṁmucchimapañcidiyatirikkha jōṇiyāṇaṁ saṁmucchimamaṇussāṇaṁ ya.

3.1.22.3

tivihā jōṇī paṇṇattā taṁ jahā — saṁvuḍā viyaḍā saṁvuḍaviyaḍā.

3.1.22.4

tivihā jōṇī pannatā taṁ jahā — kummuṇṇayā saṅkhāvattā vaṁsīvattiyā, kummuṇṇayā ṇaṁ jōṇī uttamapurisāmāūṇaṁ, kummuṇṇayātē ṇaṁ jōṇiē tivihā uttamapurisā gabbhaṁ vakkamanti taṁ jahā — arahantā cakkavaṭṭī baladēvavāsudēvā, saṅkhāvattā ṇaṁ jōṇī itthīrayaṇassa, saṅkhāvattāē ṇaṁ jōṇīē bahavē jīvā ya poggalā ya vakkamanti viukkamanti cayanti uvavajjanti nō cēva ṇaṁ nipphajjanti vaṁsīvattitā ṇaṁ jōṇī pihajjaṇassa, vaṁsīvattitāē ṇaṁ jōṇiē bahavē pihajjaṇā gabbhaṁ vakkaṁmati.

3.1.23.1

tivihā taṇavaṇassaïkāiyā paṇṇattā taṁ jahā — saṅkhejjajīvikā asaṅkhejjajīvikā anantajīvikā.

3.1.24.1

jambuddīvē dīvē bhārahē vāsē taō titthā paṇṇattā taṁ jahā — māgahē varadāmē pabhāsē, ēvaṁ-ēravaēvi, jambuddīvē dīvē mahāvidēhē vāsē ēgamēgē cakkavaṭṭivijayē taō titthā paṇṇattā taṁ jahā — māgahē varadāmē pabhāsē, ēvaṁ- ghāyaïsaṇḍē dīvē puratthimaddhēvi paccatthimaddhēvi pukkharavaradīvaddhē-puratthimaddhēvi paccatthimaddhēvi.

3.1.25.1

jambuddīvē dīvē bharahēravaēsu vāsēsu tītāē ussappiṇīē susamāē samāē tiṇṇi sāgarō vamakōḍākōḍīō kālē hotthā ēvaṁ ōsappiṇīē navaraṁ pannattē, āgamissātē ussīppaṇīē bhavissati, ēvaṁ-ghāyaïsaṇḍē puratthimaddhē paccatthimaddhē vi, ēvaṁ-pukkharavaradīvaddhē puratthimaddhē paccatthimaddhēvi kālō bhāṇiyavvō.

3.1.25.2

jambuddīvē dīvē bharahēravaēsu vāsēsu tītāē ussappiṇīē susamasusamāē samāē maṇuyā tiṇṇi gāuyāiṁ uḍḍhaṁ uccattēṇaṁ hotthā, tiṇṇi paliōvamāiṁ paramāuṁ pālaïtthā, ēvaṁ-imīsē ōsappiṇīē āgamissāē ussappiṇīē, jambuddīvē dīvē dēvakuruuttarakurāsu maṇuyā tiṇṇi gāuāiṁ uḍḍhaṁ uccattēṇaṁ paṇṇattā, tiṇṇi paliōvamāiṁ paramāuṁ pālayanti, ēvaṁ jāva pukkharavaradīvaddhapaccatthimaddhē.

3.1.25.3

jambuddīvē dīvē bharahēravaēsu vāsēsu ēgamēgāē ōsappiṇi-ussappiṇīē taō vaṁsāō uppajjiṁsu vā uppajjanti vā uppajjissanti vā taṁ jahā — arahantavaṁsē cakkavaṭṭivaṁsē dasāravaṁsē, ēvaṁ jāva pukkharavaradīvaddhapaccatthimaddhē.

3.1.25.4

jambuddīvē dīvē bharahēravaēsu vāsēsu ēgamēgāē ōsappiṇī-ussappiṇīē taō uttamapurisā uppajjiṁsu vā uppajjanti vā uppajjissanti vā taṁ jahā — arahantā cakkavaṭṭī baladēva-vāsudēvā, ēvaṁ jāva pukkharavaradīvaddhapaccatthimaddhē, taō āhāuyaṁ pālayanti taṁ jahā — arahantā cakkavaṭṭī baladēvavāsudēvā, taō majjhimamāuyaṁ pālayanti taṁ jahā — arahantā cakkavaṭṭī baladēvavāsudēvā.

3.1.26.1

bāyaratēukāiyāṇaṁ ukkōsēṇaṁ tiṇṇi rāindiyāiṁ ṭhitī paṇṇattā. bāyaravāukāiyāṇaṁ ukkōsēṇaṁ tiṇṇi vāsasahassāiṁ ṭhiti paṇṇattā.

3.1.27.1

aha bhantē sālīṇaṁ vīhīṇaṁ gōdhūmāṇaṁ javāṇaṁ javajavāṇaṁ- ētēsi ṇaṁ dhaṇṇāṇaṁ koṭṭhāuttāṇaṁ pallāuttāṇaṁ mañcāuttāṇaṁ mālāuttāṇaṁ ōlittāṇaṁ littāṇaṁ lañchiyāṇaṁ muddiyāṇaṁ pihitāṇaṁ kēvaïyaṁ kālaṁ jōṇī sañciṭṭhati? jahaṇṇēṇaṁ antōmuhuttaṁ ukkōsēṇaṁ tiṇṇi saṁvaccharāiṁ, tēṇa paraṁ jōṇī pamilāyati, tēṇa puraṁ jōṇī paviddhaṁsati, tēṇa paraṁ jōṇī viddhaṁsati, tēṇa paraṁ bīē abīē bhavati, tēṇa paraṁ jōṇīvocchēdē paṇṇattē.

3.1.28.1

doccāē ṇaṁ sakkarappabhāē puḍhavīē nēraïyāṇaṁ ukkōsēṇaṁ tiṇṇi sāgarōvamāiṁ ṭhitī paṇṇattā, taccāē ṇaṁ vāluyappamāē puḍhavīē jahaṇṇēṇaṁ nēraïyāṇaṁ tiṇṇi sāgarōvamāiṁ ṭhitī paṇṇattā.

3.1.29.1

pañcamāē ṇaṁ dhūmappabhāē puḍhavīē tiṇṇi nirayāvāsasayasahassā paṇṇattā, tisu ṇaṁ puḍhavīsu nēraïyāṇaṁ usiṇavēyaṇā paṇṇattā taṁ jahā — paḍhamāē doccāē taccāē tisu ṇaṁ puḍhavīsu nēraïyā usiṇavēyaṇaṁ paccaṇubhavamāṇā viharanti taṁ jahā — paḍhamāē doccāē taccāē.

3.1.30.1

taō lōgē samā sapakkhiṁ sapaḍidisiṁ paṇṇattā taṁ jahā — appaïṭṭhāṇē naraē jambuddīvē dīvē savvaṭṭhisiddhē mahā vimāṇē, taō lōgē samā sapakkhiṁ sapaḍidisiṁ paṇṇattā taṁ jahā — sīmantaē ṇaṁ naraē samayakkhettē īsīpabbhārā puḍhavī.

3.1.31.1

taō samuddā pagaīē udagarasēṇaṁ paṇṇattā taṁ jahā — kālōdē pukkharōdē sayambhuramaṇē, taō samuddā bahumacchakacchabhāiṇṇā paṇṇattā taṁ jahā — lavaṇē kālōdē sayambhuramaṇē.

3.1.32.1

taō lōgē nissīlā nivvatā nigguṇā nimmērā nippaccakkhāṇapōsahōvavāsā kālamāsē kālaṁ kiccā ahēsattamāē puḍhavīē appatiṭṭhāṇē naraē nēraïyattāē uvavvajjanti, taṁ jahā — rāyāṇō maṇḍalīyā jē ya mahārambhā kōḍubī, taō lōē susīlā suvvayā sagguṇā samērā sapaccakkhāṇapōsahōvavāsā kālamāsē kālaṁ kiccā savvaṭṭhasiddhē vimāṇē dēvattāē uvavattārō bhavanti taṁ jahā — rāyāṇō paricattakāmabhōgā sēṇāvatī pasatthārō.

3.1.33.1

bambhalōga-lantaēsu ṇaṁ kappēsu vimāṇā tivaṇṇā paṇṇattā taṁ jahā — kiṇhā nīlā lōhiyā, āṇayapāṇayāraṇaccutēsu ṇaṁ kappēsu dēvāṇaṁ bhavadhāraṇijjasarīragā ukkōsēṇaṁ tiṇṇi rayaṇīō uḍḍhaṁ uccatēṇaṁ paṇṇattā.

3.1.34.1

taō pannattīō kālēṇaṁ ahijjanti taṁ jahā — candapannattī sūrapannattī dīvasāgarapannattī.

Translations (2)

Commentaries (2)