Pramāṇa · Search · About · API

Thanamga 4.3

Ṭhāṇaṃga 4.3

Language
Ardhamāgadhī Prakrit

Contents

4.3.1.1

cattāri rāīō pannattāō taṁ jahā — pavvayarāī puḍhavirāī vāluyarāī udagarāī, ēvāmēva caüvvihē kōhē paṇṇattē taṁ jahā — pavvayarāisamāṇē puḍhavirāisamāṇē vāluyarāisamāṇē udagarāisamāṇē, pavvayarāisamāṇaṁ kōhamaṇupaviṭṭhē jīvē kālaṁ karēi nēraïēsu uvavajjati, puḍhavirāisamāṇaṁ kōhamaṇupaviṭṭhē jīvē kālaṁ karēi tirikkhajōṇiēsu uvavajjati, vāluyarāisamāṇaṁ kōhamaṇupaviṭṭhē jīvē kālaṁ karēi maṇussēsu uvavajjati, udagarāisamāṇaṁ kōhamaṇupaviṭṭhē jīvē kālaṁ karēi dēvēsu uvavajjati.

4.3.1.2

cattāri udagā pannattā taṁ jahā — kaddamōdaē khañjaṇōdaē vāluōdaē sēlōdaē, ēvāmēva caüvvihē bhāvē paṇṇattē taṁ jahā — kaddamōdagasamāṇē khañjaṇōdagasamāṇē vāluōdagasamāṇē sēlōdagasamāṇē, kaddamōdagasamāṇaṁ bhāvamaṇupaviṭṭhē jīvē kālaṁ karēi nēraïēsu uvavajjati, ēvaṁ jāva sēlōdagasamāṇaṁ bhāvamaṇupaviṭṭhē jīvē kālaṁ karēi dēvēsu uvavajjati.

4.3.2.1

cattāri pakkhī pannattā taṁ jahā — rutasampaṇṇē nāmamēgē nō ruvasampaṇṇē, ruvasampaṇṇē nāmamēgē nō rutasampaṇṇē, ēgē rutasampaṇṇēvi ruvasampaṇṇēvi, ēgē nō rutasampaṇṇē nō ruvasampaṇṇē; ēvāmēva cattāri purisajāyā pannattā taṁ jahā — rutasampaṇṇē nāmamēgē nō rūva sampaṇṇē-4; cattāri purisajāyā pannattā taṁ jahā — pattiyaṁ karēmītēgē pattiyaṁ karēti, pattiyaṁ karēmītēgē appattiyaṁ karēti, appattiyaṁ karēmītēgē pattiyaṁ karēti, appattiyaṁ karēmītēgē appattiyaṁ karēti; cattāri purisajāyā pannattā taṁ jahā — appaṇō nāmamēgē pattiyaṁ karēti nō parassa, parassa nāmamēgē pattiyaṁ karēti nō appaṇō, ēgē appaṇōvi pattiyaṁ karēti parassavi, ēgē nō appaṇō pattiyaṁ karēti nō parassa.

4.3.2.2

cattāri purisajāyā pannattā taṁ jahā — pattiyaṁ pavēsāmītēgē pattiyaṁ pavēsēti, pattiyaṁ pavēsāmītēgē appattiyaṁ pavēsēti-4; cattāri purisajāyā pa0 taṁ0 jahā — appaṇō nāmamēgē pattiyaṁ pavēsēti nō parassa parassa-4.

4.3.3.1

cattāri rukkhā pa0 taṁ0- pattōvaē pupphōvaē phalōvaē chāyōvaē; ēvāmēva cattāri purisa-jāyā pannattā taṁ jahā — pattōvārukkhasamāṇē pupphōvārukkhasamāṇē phalōvārukkhasamāṇē chāyōvārukkhasamāṇē.

4.3.4.1

bhāraṇṇaṁ vahamāṇassa cattāri āsāsā pannattā taṁ jahā — jattha ṇaṁ aṁsāō aṁsaṁ sāharaï tatthavi ya sē ēgē āsāsē paṇṇattē, jatthavi ya ṇaṁ uccāraṁ vā pāsavaṇaṁ vā pariṭṭhavēti tatthavi ya sē ēgē āsāsē paṇṇattē, jatthavi ya ṇaṁ nāgakumārāvāsaṁsi vā suvaṇṇakumārāvāsaṁsi vā vāsaṁ uvēti tatthavi ya sē ēgē āsāsē paṇṇattē, jatthavi ya ṇaṁ āvakahāē ciṭṭhati tatthavi ya sē ēgē āsāsē paṇṇattē.

4.3.4.2

ēvāmēva samaṇōvāsagassa cattāri āsāsā pannattā taṁ jahā — jatthavi ya ṇaṁ sīlavvata-guṇavvata-vēramaṇa-paccakkhāṇa-pōsahōvavāsāiṁ paḍivajjati tatthavi ya sē ēgē āsāsē paṇṇattē, jatthavi ya ṇaṁ sāmāiyaṁ dēsāvagāsiyaṁ sammamaṇupālēi tatthavi ya sē ēgē āsāsē paṇṇattē, jatthavi ya ṇaṁ cāuddasamuṭṭhapuṇṇamāsiṇīsu paḍipuṇṇa pōsahaṁ sammaṁ aṇupālēi tatthavi ya sē ēgē āsāsē paṇṇattē, jatthavi ya ṇaṁ cāuddasaṭṭhamuddhiṭṭhapuṇṇa-māsiṇīsu paḍipuṇṇaṁ pōsahaṁ sammaṁ aṇupālēi tatthavi ya sē ēgē āsāsē paṇṇattē, jatthavi ya ṇaṁ apacchima-māraṇantita-saṁlēhaṇā-jhūsaṇā-jhūsitē bhattapāṇa piyāikkhitē pāōvagatē kālamaṇavakaṅkhamāṇē viharati tatthavi ya sē ēgē āsāsē paṇṇattē.

4.3.5.1

cattāri purisajāyā pannattā taṁ jahā — uditōditē nāmamēgē uditatthamittē ṇāmamēgē atthamitōditē ṇāmēgē atthamitatthamitē nāmamēgē, bharahē rāyā cāurantacakkavaṭṭī ṇaṁ uditōditē, bambhadattē ṇaṁ rāyā cāurantacakkavaṭṭī uditatthamitē hariēsabalē ṇaṁ aṇagārē ṇaṁ atthamitōditē, kālē ṇaṁ sōyariyē atthamitthamitē.

4.3.6.1

cattāri jummā pannattā taṁ jahā — kaḍajummē tēyōē dāvarajummē kaliōē, nēraïyāṇaṁ cattāri jummā pannattā taṁ jahā — kaḍajummē tēōē dāvarajummē kaliōē, ēvaṁ-asurakumārāṇaṁ jāva thaṇiyakumārāṇaṁ, ēvaṁ-puḍhavikāiyāṇaṁ āu-tēuvāu-vaṇassatikāiyāṇaṁ bendiyāṇaṁ tēindiyāṇaṁ caürindiyāṇaṁ pañcidiyatirikkhajōṇiyāṇaṁ maṇussāṇaṁ vāṇamantara-jōisiyāṇaṁ vēmāṇiyāṇaṁ-savvēsiṁ jahā nēraïyāṇaṁ.

4.3.7.1

cattāri sūrā pannattā taṁ jahā — khatisūrē tavasūrē dāṇasūrē juddhasūrē, khantisūrā arahantā, tavasūrā aṇagārā, dāṇasūrē vēsamaṇē, juddhasūrē vāsudēvē.

4.3.8.1

cattāri purisajāyā pannattā taṁ jahā — uccē nāmamēgē uccacchandē, uccē nāmamēgē nīyacchandē, nīē nāmamēgē uccacchandē, nīē nāmamēgē nīyacchandē.

4.3.9.1

asurakumārā cattāri lēsāō pannattāō taṁ jahā — kaṇhalēsā nīlalēsā kāulēsā tēulēsā ēvaṁ jāva thaṇiyakumārāṇaṁ ēvaṁ puḍhavikāiyāṇaṁ āu-vaṇassaïkāiyāṇaṁ vāṇamantarāṇaṁ-savvēsiṁ jahā asurakumārāṇaṁ.

4.3.10.1

cattāri jāṇā pannattā taṁ jahā — juttē nāmamēgē juttē, juttē nāmamēgē ajuttē, ajuttē nāmamēgē juttē, ajuttē nāmamēgē ajuttē; ēvāmēva cattāri purisajāyā pannattā taṁ jahā — juttē nāmamēgē juttē, juttē nāmamēgē ajuttē, ajuttē nāmamēgē juttē, ajuttē nāmamēgē ajuttē.

4.3.10.2

cattāri jāṇā pannattā taṁ jahā — juttē nāmamēgē juttapariṇatē juttē nāmamēgē ajuttapariṇatē0 ēvāmēva cattāri purisajāyā pannattā taṁ jahā — juttē nāmamēgē juttapariṇatē-4.

4.3.10.3

cattāri jāṇā pannattā taṁ jahā — juttē nāmamēgē juttarūvē juttē nāmamēgē ajuttarūvē, ajuttē nāmamēgē juttarūvē, ajuttē nāmamēgē ajuttarūvē; ēvāmēva cattāri purisajāyā pannattā taṁ jahā — juttē nāmamēgē juttarūvē-4.

4.3.10.4

cattāri jāṇā pannattā taṁ jahā — juttē nāmamēgē juttasōbhē juttē nāmamēgē ajuttasōbhē-4, ēvāmēva cattāri purisajāyā pannattā taṁ jahā — juttē nāmamēgē juttasōbhē-4.

4.3.10.5

cattāri juggā pannattā taṁ jahā — juttē nāmamēgē juttē juttē nāmamēgē ajuttē-4, ēvāmēva cattāri purisajāyā panntā taṁ jahā — juttē nāmamēgē juttē-4.

4.3.10.6

ēvaṁ jadhā jāṇēṇa cattāri ālāvagā tathā juggēṇavi, paḍipakkhō tahēva purisajātā jāva sōbhetti.

4.3.10.7

cattāri sārahī pannattā taṁ jahā — jōyāvaïttā ṇāmaṁ ēgē nō vijōyāvaïttā, vijōyāvaïttā nāmamēgē nō jōyāvaïttā, ēgē jōyāvaïttāvi vijōyāvaïttāvi, ēgē nō jōyāvaïttā nōvijjōyāvaïttā; ēvāmēva cattāri purisajāyā pannattā taṁ jahā — jōyāvaïttā ṇāmaṁ ēgē nō vijōyāvaïttā-4.

4.3.10.8

cattāri hayā pannattā taṁ jahā — juttē nāmamēgē juttē, juttē nāmamēgē ajuttē-4. ēvāmēva cattāri purisajāyā pannattā taṁ jahā — juttē nāmamēgē juttē-4. ēvaṁ juttapariṇatē, juttarūvē, juttasōbhē savvēsiṁ paḍivakkhō purisa jātā.

4.3.10.9

cattāri gayā pannattā taṁ jahā — juttē nāmamēgē juttē juttē nāmamēgē ajuttē-4, ēvāmēva cattāri purisajāyā pannattā taṁ jahā — juttē nāmamēgē juttē-4; ēvaṁ jahā hayāṇaṁ tahā gayāṇa vi bhāṇiyavvaṁ, paḍivakkhō tahēva purisajāyā.

4.3.10.10

cattāri juggāritā pannattā taṁ jahā — panthajāī nāmamēgē nō uppahajāī, uppahajāī nāmamēgē nō panthajāī, ēgē panthajāīvi uppajāīvi, ēgē nō panthajāī nō uppahajāī; ēvāmēva cattāri purisajāyā pannattā taṁ jahā — panthajāī nāmamēgē nō uppahajāī-4.

4.3.10.11

cattāri pupphā pannattā taṁ jahā — rūvasampaṇṇē nāmamēgē nō gandhasampaṇṇē, gandhasampaṇṇē nāmamēgē nō rūvasampaṇṇē, ēgē rūvasampaṇṇēvi gandhasampaṇṇēvi, ēgē nō rūvasampaṇṇē nō gandhasampaṇṇē; ēvāmēva cattāri purisajāyā pannattā taṁ jahā — rūvasampaṇṇē nāmamēgē nō sīlasampaṇṇē-4.

4.3.10.12

cattāri purisajāyā pannattā taṁ jahā — jātisampaṇṇē nāmamēgē nō kulasampaṇṇē, kulasampaṇṇē nāmamēgē nō jātisampaṇṇē-4, cattāri purisajāyā pannattā taṁ jahā — jātisampaṇṇē nāmamēgē nō balasampaṇṇē balasampaṇṇē nāmamēgē nō jātisampaṇṇē-4.

4.3.10.13

ēvaṁ jātītē rūvēṇa-4, cattāri ālāvagā, ēvaṁ jātītē suēṇa-4, ēvaṁ jātītē sīlēṇa-4, ēvaṁ jātītē carittēṇa-4, ēvaṁ kulēṇa balēṇa-4, ēvaṁ kulēṇa rūvēṇa-4, kulēṇa sutēṇa-4, kulēṇa sīlēṇa-4, kulēṇa carittēṇa-4.

4.3.10.14

cattāri purisajāyā pa0 taṁ0- balasampannē nāma ēgē nō rūvasampannē-4, ēvaṁ balēṇa sutēṇa-4, ēvaṁ balēṇa sīlēṇa-4, ēvaṁ balēṇa carittēṇa-4.

4.3.10.15

cattāri purisajāyā pa0 taṁ0- rūvasampannē nāmamēgē nō suyasampannē-4, ēvaṁ rūvēṇa sīlēṇa-4, rūvēṇa carittēṇa-4. cattāri purisajāyā pa0 taṁ0- suyasampannē nāmamēgē nō sīlasampannē-4, ēvaṁ suttēṇa carittēṇa-4. cattāri purisajāyā pa0 taṁ0- sīlasampannē nāmamēgē nō carittasampannē-4. ētē ekkavīsaṁ bhaṅgā bhāṇitavvā.

4.3.10.16

cattāri phalā pannattā taṁ jahā — āmalagamahurē muddiyāmahurē khīramahurē khaṇḍamahurē, ēvāmēva cattāri āyariyā pannattā taṁ jahā — āmalagamahuraphalasamāṇē jāva khaṇḍamahuraphalasamāṇē.

4.3.10.17

cattāri purisajāyā pannattā taṁ jahā — ātavēyāvaccakarē nāmamēgē nō paravēyāvaccakarē, paravēyāvaccakarē nāmamēgē nō ātavēyāvaccakarē, ēgē ātavēyāvaccakarēvi paravēyāvaccakarēvi, ēgē nō ātavēyāvaccakarē nō paravēyāvaccakarē; cattāri purisajāyā pannattā taṁ jahā — karēti nāmamēgē vēyāvaccaṁ nō paḍicchaï paḍicchaï nāmamēgē vēyāvaccaṁ nō karēti-4; cattāri purisajāyā pannattā taṁ jahā — aṭṭhakarē nāmamēgē nō māṇakarē, māṇakarē nāmamēgē nō aṭṭhakarē, ēgē aṭṭhakarēvi māṇakarēvi, ēgē nō aṭṭhakarē nō māṇakarē; cattāri purisajāyā pannattā taṁ jahā — gaṇaṭṭhakarē nāmamēgē nō māṇakarē-4; cattāri purisajāyā pannattā taṁ jahā — gaṇasaṅgahakarē nāmamēgē nō māṇakarē-4; cattāri purisajāyā pannattā taṁ jahā — gaṇasōbhakarē nāmamēgē nō māṇakarē-4; cattāri purisajāyā pannattā taṁ jahā — gaṇasōhikarē nāmamēgē nō māṇakarē-4.

4.3.10.18

cattāri purisajāyā pannattā taṁ jahā — rūvaṁ nāmamēgē jahati nō dhammaṁ, dhammaṁ nāmamēgē jahati nō rūvaṁ, ēgē rūvampi jahati dhammampi, ēgē nō rūvaṁ jahati nō dhammaṁ; cattāri purisajāyā pannattā taṁ jahā — dhammaṁ nāmamēgē jahati nō gaṇasaṇṭhitiṁ, gaṇasaṇṭhiti nāmamēgē jahati nō dhammaṁ-4.

4.3.10.19

cattāri purisajāyā pannattā taṁ jahā — piyadhammē nāmamēgē nō daḍhadhammē, daḍhadhammē nāmamēgē nō piyadhammē, ēgē piyadhammē vi daḍhadhammēvi, ēgē nō piyadhammē nō daḍhadhammē; cattāri āyariyā pannattā taṁ jahā — pavvāvaṇāriē nāmamēgē nō uvaṭṭhāvaṇāyariē, uvaṭṭhāvaṇāyariē nāmēgē nō pavvāvaṇāyariē, ēgē pavvāvaṇāyariēvi uvaṭṭhāvaṇāyariēvi, ēgē nō pavvāvaṇāyariē nō uvaṭṭhāvaṇāyariē dhammāyariē, cattāri āyariyā pannattā taṁ jahā — uddēsaṇāyariē nāmamēgē nō vāyaṇāyariē, vāyaṇāyariē nāmamēgē nō uddēsaṇāyariē-4.

4.3.10.20

cattāri antēvāsī pannattā taṁ jahā — pavvayaṇantēvāsī nāmamēgē nō uvaṭṭhāṇantēvāsī-4- dhammantēvāsī, cattāri antēvāsī pannattā taṁ jahā — uddēsaṇantēvāsī nāmamēgē nō vāyaṇantēvāsī-4-dhammantēvāsī.

4.3.10.21

cattāri nigganthā pannattā taṁ jahā — rātiṇiē samaṇaē nigganthē mahākammē mahākiriē aṇāyāvī asamittē dhammassa aṇārādhaē bhavati, rātiṇiē samaṇē nigganthē appakammē appakiriē ātāvī samiē dhammassa ārāhaē bhavati, ōmarātiṇiē samaṇē nigganthē mahākammē mahākiriē aṇātāvī asamitē dhammassa aṇārāhaē bhavati, ōmarātiṇiē samaṇē nigganthē appakammē appakiriē ātāvī samitē dhammassa ārāhaē bhavati.

4.3.10.22

cattāri nigganthīō pannattāō taṁ jahā — rātiṇiyā samaṇī nigganthī mahākammā mahākiriyā aṇāyāvī asamitā dhammassa aṇārādhiyā bhavati ēvaṁ cēva-4.

4.3.10.23

cattāri samaṇōvasagā pannattā taṁ jahā — rāiṇiē samaṇōvāsaē mahākammē mahākiriē amāyāvī asamitē dhammassa aṇārādhaē bhavati tahēva-4.

4.3.10.24

cattāri samaṇōvāsiyāō pannattō taṁ jahā — rāiṇiyā samaṇōvāsitā mahākammā mahākiriyā aṇāyāvī asamitā tahēva cattārigamā.

4.3.11.1

cattāri samaṇōvāsagā pannattā taṁ jahā — ammāpitisamāṇē bhātisamāṇē mittasamāṇē savattisamāṇē; cattāri samaṇōvāsagā pa0 taṁ0- addāgasamāṇē paḍāgasamāṇē khāṇusamāṇē kharakaṇḍaya-samāṇē.

4.3.12.1

samaṇassa ṇaṁ bhavatō mahāvīrassa samaṇōvāsagāṇaṁ sōdhammē kappē aruṇābhē vimāṇē cattāri paliōvamāiṁ ṭhitī pannattā.

4.3.13.1

caühiṁ ṭhāṇēhiṁ ahuṇōvavaṇṇē dēvē dēvalōgēsu icchejjā māṇusaṁ lōgaṁ havvamāgacchittaē nō cēva ṇaṁ sañcātēti havvamāgacchittaē, taṁ jahā — (1) ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē sē ṇaṁ māṇussaē kāmabhōgē nō āḍhāi nō pariyāṇāti nō aṭṭhaṁ bandhaï nō niyāṇaṁ pagarēti nō ṭhitipagappaṁ pagarēti (2) ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē tassa ṇaṁ māṇussaē pēmē vocchiṇṇē divvē saṅkantē bhavati, (3) ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē tassa ṇaṁ ēvaṁ bhavati-iṇhiṁ gacchaṁ muhuttēṇaṁ gacchaṁ tēṇaṁ kālēṇamappāuyā maṇussā kāladhammuṇā sañjuttā bhavanti, (4) ahuṇōvavaṇṇē dēvē dēvalōgēsu divvēsu kāmabhōgēsu mucchittē giddhē gaḍhitē ajjhōvavaṇṇē tassa ṇaṁ māṇussaē gandhē paḍikūlē paḍilōmē yāvi bhavati uḍḍhampi ya ṇaṁ māṇussaē gandhē jāva cattāri pañca jōyaṇasatāiṁ havvamāgacchati; iccētēhiṁ caühiṁ ṭhāṇēhiṁ ahuṇōvavaṇṇē dēvē dēvalōēsu icchejjā māṇusaṁ lōgaṁ havvamāgacchittaē nō cēva ṇaṁ sañcāēti havvamāgacchittaē.

4.3.13.2

caühiṁ ṭhāṇēhiṁ ahuṇōvavaṇṇē dēvē dēvalōēsu icchejja māṇusaṁ lōgaṁ havvamāgacchittaē sañcāēti havvamāgacchittaē taṁ jahā — (1)ahuṇōvavaṇṇē dēvē dēvalōgēsu divvēsu kāmabhōgēsu amucchitē agiddhē agaḍhitē aṇajjhōvavaṇṇē, tassa ṇaṁ ēvaṁ bhavati- atthi khalu mama māṇussaē bhavē āyariēti vā uvajjhāēti vā pavattīti vā thērēti vā gaṇīti vā gaṇadharēti gaṇāvacchēdēti vā jēsiṁ pabhāvēṇaṁ maē imā patārūvā divvā dēviḍḍhī divvā dēvajutī divvē dēvāṇubhāvē laddhē pattē abhisamaṇṇāgatē, taṁ gacchāmi ṇaṁ tē bhagavantē vandāmi namaṁsāmi sakkārēmi sammāṇēmi kallāṇaṁ maṅgalaṁ dēvayaṁ cēīyaṁ pajjuvāsāmi, (2)ahuṇōvavaṇṇē dēvē dēvalōēsu jāva aṇajjhōvavaṇṇē tassa ṇamēvaṁ bhavati- ēsa ṇaṁ māṇussaē bhavē nāṇīti vā tavassīti vā aïdukkara-dukkarakāragē, taṁ gacchāmi ṇaṁ tē bhagavantē vandāmi jāva pajjuvāsāmi, (3)ahuṇōvavaṇṇē dēvē dēvalōēsu jāva aṇajjhōvavaṇṇē tassa ṇamēva bhavati- atthi ṇaṁ mama māṇussaē bhavē mātāti vā jāva suṇhāti vā, taṁ gacchāmi ṇaṁ tēsimantiyaṁ pāubbhavāmi pāsantu tā mē imamētārūvaṁ divvaṁ dēviḍḍhiṁ divvaṁ dēvajuttiṁ divvaṁ dēvāṇubhāvaṁ laddhaṁ pattaṁ abhisamaṇṇāgataṁ, (4)ahuṇōvavaṇṇē dēvē dēvalōgēsu jāva aṇajjhōvavaṇṇē tassa ṇamēvaṁ bhavati- atthi ṇaṁ mama māṇussaē bhavē mittēti vā sahāti vā jāva sahāēti vā saṅgaïēti vā, tēsiṁ ca ṇaṁ amhē aṇṇamaṇṇassa saṅgārē paḍisutē bhavati, jō mē puvviṁ cayati sē sambōhētavvē iccētēhiṁ jāva sañcāēti havvamāgacchittaē.

4.3.14.1

caühiṁ ṭhāṇēhiṁ lōgandhagārē siyā taṁ jahā — arahantēhiṁ vocchijjamāṇēhiṁ, arahantapaṇṇattē dhammē vocchijjamāṇē, puvvagatē vocchijjamāṇē, jāyatējē vocchijjamāṇē.

4.3.14.2

caühiṁ ṭhāṇēhiṁ lōujjōtē siyā taṁ jahā — arahantēhiṁ jāyamāṇēhiṁ, arahantēhiṁ pavvayamāṇēhiṁ, arahantāṇaṁ nāṇuppāyamahimāsu, arahantāṇaṁ parinivvāṇamahimāsu.

4.3.14.3

māṇussaṁ lōgaṁ havvamāgacchanti ēvaṁ jahā tiṭhāṇē jāva lōgantitā dēvā māṇussaṁ lōgaṁ havvamāgacchejjā, taṁ0 arahantēhiṁ jayamāṇēhiṁ jāva arahantāṇaṁ parinivvāṇamahimāsu.

4.3.15.1

cattāri duhasejjāō pannattāō taṁ jahā — tattha khalu imā paḍhamā duhasejjā taṁ0- sē ṇaṁ muṇḍē bhavittā agārāō aṇagāriyaṁ pavvaïē nigganthē pāvayaṇē saṅkitē kaṅkhitē vitigicchatē bhēyasamāvaṇṇē kalusasamāvaṇṇē nigganthaṁ pāvayaṇaṁ nō saddahati nō pattiyāti nō rōēi, nigganthaṁ pāvayaṇaṁ asaddahamāṇē apattiyamāṇē arōēmāṇē maṇaṁ uccāvayaṁ niyacchati viṇighātamāvajjati paḍhamā duhasejjā, ahāvarā doccā duhasejjā – sē ṇaṁ muḍē bhavittā agārāō aṇagāriyaṁ pavvaïē saēṇaṁ lābhēṇaṁ nō tussati parassa lābhamāsāēti pīhēti patthēti abhilasati parassa lābhamāsāēmāṇē jāva abhilasamāṇē maṇaṁ uccāvayaṁ niyacchaï viṇighātamāvajjati doccā duhasejjā, ahāvarā taccā duhasejjā-sē ṇaṁ muṇḍē bhavittā jāva pavvaïē divvē māṇussaē kāmabhōgē āsāēi jāva abhilasati divvē māṇussaē kāmabhōgē āsāēmāṇē jāva abhilasamāṇē maṇaṁ uccāvayaṁ niyacchati viṇidhātamāvajjati- taccā duhasejjā, ahāvarā caütthā duhasejjā – sē ṇaṁ muṇḍē jāva pavvaïē tassa ṇaṁ ēvaṁ bhavati jayā ṇaṁ ahamagāravāsamāvasāmi tadā ṇamahaṁ saṁvāhaṇa-parimaddaṇa-gātabbhaṅga-gātucchōlaṇāiṁ labhāmi jappabhiiṁ ca ṇaṁ ahaṁ muṇḍē jāva pavvaïē tappabhiiṁ ca ṇaṁ ahaṁ saṁvāhaṇa jāva gātucchōlaṇāi nō labhāmi, sē ṇaṁ saṁvāhaṇa jāva gātucchōlaṇāiṁ āsāēti jāva abhilasati sē ṇaṁ sambāhaṇa jāva gātucchōlaṇāiṁ āsāēmāṇē jāva maṇaṁ uccāvayaṁ niyacchati viṇidhātamāvajjati, caütthā duhasejjā.

4.3.15.2

cattāri suhasejjāō pannattāō taṁ jahā — tattha khaluṁ imā paḍhamā suhasejjā- sē ṇaṁ muṇḍē bhavittā agārāō aṇagāriyaṁ pavvaïē nigganthē pāvayaṇē nissaṅkitē nikkaṅkhitē nivvitigicchiē nō bhēdasamāvaṇṇē nō kalusasamāvaṇṇē nigganthaṁ pāvayaṇaṁ saddahaï pattiyaï rōēti nigganthaṁ pāvayaṇaṁ saddahamāṇē pattiyamāṇē rōēmāṇē nō maṇaṁ uccāvayaṁ niyacchati nō viṇighātamāvajjati paḍhamā suhasejjā, ahāvarā doccā suhasejjā- sē ṇaṁ muṇḍē jāva pavvaïē saēṇaṁ lābhēṇaṁ tussati parassa lābhaṁ nō āsāēti nō pīhēti nō patthēti nō abhilasati parassa lābhamaṇāsāēmāṇa jāva aṇabhilasamāṇē nō maṇaṁ uccāvayaṁ niyacchati nō viṇighātamāvajjati, doccā suhasejjā, ahāvarā taccā suhasejjā- sē ṇaṁ muṇḍē jāva pavvaïē divvamāṇussaē kāmabhōgē nō āsāēti jāva nō abhilasati divvamāṇussaē kāmabhōgē aṇāsāēmāṇē jāva aṇabhilasamāṇē nō maṇaṁ uccāvayaṁ niyacchati nō viṇighātamāvajjati, taccā suhasejjā, ahāvarā caütthā suhasejjā- sē ṇaṁ muṇḍē jāva pavvaïē tassa ṇaṁ ēvaṁ bhavati- jaï tāva arahantā bhagavantō haṭṭhā arōgā baliyā kallasarīrā aṇṇayarāiṁ ōrālāiṁ kallāṇāiṁ viulāiṁ payatāiṁ pagga-hitāiṁ mahāṇubhāgāiṁ kammakkhayakaraṇāiṁ tavokkamāiṁ paḍivajjanti kimaṅga puṇa ahaṁ abbhōvagamiōvakkamiyaṁ vēyaṇaṁ nō sammaṁ sahāmi khamāmi titikkhēmi ahiyāsēmi mamaṁ ca ṇaṁ abbhōvagamiōvakkamiyaṁ vēyaṇaṁ nō sammaṁ sahāmi khamāmi titikkhēmi ahiyāsēmi mamaṁ ca ṇaṁ abbhōvagamiōvakkamiyaṁ vēyaṇaṁ sammamasahamāṇassa akkhamamāṇassa atitikkhamāṇassa aṇahiyāsēmāṇassa kiṁ maṇṇē kajjati? ēgantasōmē.

4.3.16.1

cattāri avāyaṇijjā pa0-aviṇīē vigaīpaḍibaddhē aviōsavitapāhuḍē māī.

4.3.16.2

cattāri vāyaṇijjā pa0-viṇītē avigatipaḍibaddhē viōsavitapāhuḍē amāī.

4.3.17.1

cattāri purisajāyā pannattā taṁ jahā — ātambharē nāmamēgē nō parambharē, parambharē nāmamēgē nō ātambharē, ēgē ātambharēvi parambharēvi, ēgē nō ātambharē nō parambharē.

4.3.17.2

cattāri purisajāyā pannattā taṁ jahā — duggaē nāmamēgē duggaē, duggaē nāmamēgē suggaē, suggaē nāmamēgē duggaē, suggaē nāmamēgē suggaē.

4.3.17.3

cattāri purisajāyā pannattā taṁ jahā — duggaē nāmamēgē duvvaē, duggaē nāmamēgē suvvaē, suggaē nāmamēgē duvvaē, suggaē nāmamēgē suvvaē, cattāri purisajāyā pannattā taṁ jahā — duggaē nāmamēgē duppaḍitāṇandē, duggaē nāmamēgē suppaḍitāṇandē-4.

4.3.17.4

cattāri purisajāyā pannattā taṁ jahā — duggaē nāmēgē duggatigāmī, duggaē nāmamēgē suggatigāmī-4.

4.3.17.5

cattāri purisajāyā pannattā0 taṁ jahā — duggaē nāmamēgē duggatiṁ gatē, duggaē nāmamēgē suggatiṁ gatē-4 cattāri purisajāyā pannattā taṁ jahā — tamē nāmamēgē tamē, tamē nāmamēgē jōtī, jōtī nāmamēgē tamē jōtī nāmamēgē jōtī.

4.3.17.6

cattāri purisajāyā pa0 taṁ0 jahā — tamē nāmamēgē tamabalē, tamē nāmamēgē jōtibalē, jōtī nāmamēgē tamabalē, jōtī nāmamēgē jōtibalē, cattāri purisajāyā pa0 taṁ0 jahā — tamē nāmamēgē tamabalapalajjaṇē, tamē nāmamēgē jōtibalapalajjaṇē-4.

4.3.17.7

cattāri purisajāyā pannattā taṁ jahā — pariṇṇātakammē nāmamēgē nō pariṇṇātasaṇṇē, pariṇṇātasaṇṇē nāmamēgē nō pariṇṇātakammē, ēgaṁ pariṇṇātakammēvi pariṇṇāta0-4.

4.3.17.8

cattāri purisajāyā pannattā taṁ jahā — pariṇṇātakammē nāmamēgē nō pariṇṇātagihāvāsē, pariṇṇātagihāvāsē nāmamēgē nō pariṇṇātakammē, ēgē pariṇṇātakammēvi0-4.

4.3.17.9

cattāri purisajāyā pannattā taṁ jahā — pariṇātasaṇṇē nāmamēgē nō pariṇṇātagihāvāsē, pariṇṇātagihāvāsē nāmamēgē nō pariṇṇatasaṇṇē-4.

4.3.17.10

cattāri purisajāyā pana0taṁ0 jahā-ihatthē nāmamēgē nō paratthē, paratthē nāmamēgē nō ihatthē-4.

4.3.17.11

cattāri purisajāyā pannattā taṁ jahā — ēgēṇaṁ nāmamēgē vaḍḍhati, ēgēṇaṁ hāyati ēgēṇaṁ, ēgēṇa nāmamēgē vaḍḍhati, dōhiṁ hāyati dōhiṁ nāmamēgē vaḍḍhati ēgēṇaṁ hāyati ēgē dōhiṁ nāmamēgē vaḍḍhati dōhiṁ hāyati.

4.3.17.12

cattāri pakanthagā pannattā taṁ jahā — āiṇṇē nāmamēgē āiṇṇē, āiṇṇē nāmamēgē khaluṅkē, khaluṅkē nāmamēgē āiṇṇē, khaluṅkē nāmamēgē khaluṅkē; ēvāmēva cattāri purisajāyā pannattā taṁ jahā — āiṇṇē nāmamēgē āiṇṇē caübhaṅgō.

4.3.17.13

cattāri pakanthagā pannattā taṁ jahā — āiṇṇē nāmamēgē āiṇṇātaē vahati, āiṇṇē nāmamēgē khaluṅkatāē vahati,-4, ēvāmēva cattāri purisajāyā pannattā taṁ jahā — āiṇṇē nāmamēgē āiṇṇatāē vahati caübhaṅgō.

4.3.17.14

cattāri pakanthagā pannattā taṁ jahā — jātisampaṇṇē nāmamēgē nō kulasampaṇṇē, kulasampaṇṇē nāmamēgē nō jātisampaṇṇē-4, ēvāmēva cattāri purisajāyā pannattā taṁ jahā — jātisampaṇṇē nāmamēgē nō kulasampaṇṇē0 caübhaṅgō.

4.3.17.15

cattāri pakanthagā pannattā taṁ jahā — jātisampaṇṇē nāmamēgē nō balasampaṇṇē-4, ēvāmēva cattāri purisajāyā pannattā taṁ jahā — jātisampaṇṇē nāmamēgē nō balasampaṇṇē-4.

4.3.17.16

cattāri pakanthagā pannattā taṁ jahā — jātisampaṇṇē nāmamēgē nō rūvasampaṇṇē-4; ēvāmēva cattāri purisajāyā pannattā taṁ jahā — jātisampaṇṇē nāmamēgē nō rūvasampaṇṇē-4.

4.3.17.17

cattāri pakanthagā pannattā taṁ jahā — jātisampaṇṇē nāmamēgē nō jayasampaṇṇē-4; ēvāmēva cattāri purisajāyā pannattā taṁ jahā — jātisampaṇṇē nāmamēgē nō jayasampaṇṇē-4.

4.3.17.18

ēvaṁ kulasampannēṇa ya balasampannēṇa ya, kulasampannēṇa ya rūvasampannēna ya, kulasampannēṇa ya jayasampannēṇa ya, ēvaṁ balasampannēṇa ya rūvasampannēṇa ya, balasampannēṇa ya jaya sampannēṇa ya-4- savvattha purisajāyā paḍivakkhō.

4.3.17.19

cattāri kanthagā ya pa0 taṁ0- rūvasampannē nāmamēgē nō jayasampannē-4; ēvāmēva cattāri purisajāyā pa0 taṁ0- rūvasampannē nāmamēgē nō jayasampannē-4.

4.3.17.20

cattāri purisajāyā pannattā taṁ jahā — sīhattāē nāmamēgē nikkhantē sīhattāē viharaï, sīhattāē nāmamēgē nikkhantē sīyālattāē viharaï, sīyālattāē nāmamēgē nikkhantē sīhattāē viharaï, sīyālattāē nāmamēgē nikkhantē sīyālattāē viharaï.

4.3.18.1

cattāri lōgē samā pannattā taṁ jahā — apaïṭṭhāṇē naraē, jambuddīvē dīvē, pālaē jāṇavimāṇē, savvaṭṭhasiddhē mahāvimāṇē. cattāri lōgē samā sapakkhiṁ sapaḍidisiṁ pannattā taṁ jahā — sīmantaē naraē, samayakkhettē, uḍuvimāṇē, isīpabbharā puḍhavī.

4.3.19.1

uḍḍhalōgē ṇaṁ cattāri bisarīrā pannattā taṁ jahā — puḍhavikāiyā āukāiyā vaṇassaïkāiyā urālā tasā pāṇā, ahōlōgē ṇaṁ cattāri bisarīrā pannattā taṁ jahā — puḍhavikāiyā0 ēvaṁ cēva, ēvaṁ tiriyalōē vi-4.

4.3.20.1

cattāri purisajāyā pa0 taṁ0-hirisattē hirimaṇasattē, calasattē, thirasattē.

4.3.21.1

cattāri sejjapaḍimāō pannattāō, cattāri vatthapaḍimāō pannattāō, cattāri pāyapaḍi-māō pannattāō, cattāri ṭhāṇapaḍimāō pannattāō.

4.3.22.1

cattāri sarīragā jīvaphuḍā pannattā taṁ jahā — vēuvviē āhāraē tēyaē kammaē, cattāri sarīragā kammummīsagā pannattā taṁ jahā — ōrāliē vēuvviē āhāraē tēyaē.

4.3.23.1

caühiṁ atthikāēhiṁ lōgē phuḍē paṇṇattē taṁ jahā — dhammatthikāēṇaṁ adhammatthikāēṇaṁ jīvatthikāēṇaṁ puggalatthikāēṇaṁ; caühiṁ bādarakāēhiṁ uvavajjamāṇēhiṁ lōgē phuḍē paṇṇattē taṁ jahā — puḍhavikāiēhiṁ, āukāiēhiṁ, vāukāiēhiṁ, vaṇassakāiēhiṁ.

4.3.24.1

cattāri paēsaggēṇaṁ tullā pannattā taṁ jahā — dhammatthikāē, adhammatthikāē, lōgāgāsē, ēgajīvē.

4.3.25.1

caüṇhamēgaṁ sarīraṁ nō supassaṁ bhavaï taṁ jahā — puḍhavikāiyāṇaṁ, āukāiyāṇaṁ, tēukāiyāṇaṁ, vaṇassaïkāiyāṇaṁ.

4.3.26.1

cattāri indiyatthā puṭṭhā vēdenti taṁ jahā — sōindiyatthē ghāṇindiyatthē jibbhindiyatthē phāsindiyatthē.

4.3.27.1

caühiṁ ṭhāṇēhiṁ jīvā ya poggalā ya nō sañcāenti bahiyā lōgantā gamaṇayāē, taṁ jahā — gatiabhāvēṇaṁ, niruvaggahayāē, lukkhatāē, lōgāṇubhāvēṇaṁ.

4.3.28.1

caüvvihē ṇātē pa0 taṁ0- āharaṇē āhāraṇataddēsē āharaṇataddōsē uvaṇṇāsōvaṇaē, āharaṇē caüvvihē paṇṇattē taṁ jahā — avāē uvāē ṭhavaṇākammē paḍuppaṇṇaviṇāsī; āharaṇataddēsē caüvvihē paṇṇattē taṁ jahā — aṇusiṭṭhī uvālambhē pucchā nissāvayaṇē; āhāraṇataddōsē caüvvihē paṇṇattē taṁ jahā — adhammajuttē paḍilōbhē attōvaṇītē duruvaṇītē; uvaṇṇāsōvaṇaē caüvvihē paṇṇattē taṁ jahā — tavvatthutē tavaṇṇatthutē paḍiṇibhē hētū, hēū caüvvihē paṇṇattē taṁ jahā — jāvaē thāvaē vaṁsaē lūsaē, ahavā —hēū caüvvihē paṇṇattē taṁ jahā — paccakkhē anumānē ōvammē āgamē, ahavā —hēū caüvvihē paṇṇattē taṁ jahā — atthitaṁ atthi sō hēū, atthittaṁ natthi sō hēū, natthittaṁ atthi sō hēū, natthittaṁ natthi sō hēūṁ.

4.3.29.1

caüvvihē saṅkhāṇē paṇṇattē taṁ jahā — parikammaṁ vavahārē rajjū rāsī.

4.3.29.2

ahōlōgē ṇaṁ cattāri andhagāraṁ karenti taṁ jahā — naragā nēraïyā pāvāiṁ kammāiṁ asubhā poggalā, tiriyalōgē ṇaṁ cattāri ujjōtaṁ karenti taṁ jahā — candā sūrā maṇī jōtī, uḍḍhalōgē ṇaṁ cattāri ujjōtaṁ karenti taṁ jahā — dēvā dēvīō vimāṇā ābharaṇā.

Translations (2)

Commentaries (2)