Pramāṇa · Search · About · API

Thanamga 4.4

Ṭhāṇaṃga 4.4

Language
Ardhamāgadhī Prakrit

Contents

4.4.1.1

cattāri pasappagā pannattā taṁ jahā — aṇuppannaṇaṁ bhōgāṇaṁ uppāettā ēgē pasappaē puvvuppannāṇaṁ bhōgāṇaṁ avippaōgēṇaṁ ēgē pasappaē aṇuppannāṇaṁ sokkhāṇaṁ uppāittā ēgē pasappaē puvvuppannāṇaṁ sokkhāṇaṁ avippaōgēṇaṁ ēgē pasappaē.

4.4.2.1

ṇēraïyāṇaṁ caüvvihē āhārē paṇṇattē taṁ jahā — iṅgālōvamē mummurōvamē sītalē himasītalē.

4.4.2.2

tirikkhajōṇiyāṇaṁ caüvvihē āhārē pa0 taṁ0- kaṅkōvamē bilōvamē nāmamaṁsōvamē puttamaṁsōvamē.

4.4.2.3

maṇussāṇaṁ caüvvihē āhārē paṇṇattē taṁ jahā — asaṇē pāṇē khāimē sāimē dēvāṇaṁ caüvvihē āhārē paṇṇattē taṁ jahā — vaṇṇamantē gandhamantē rasamantē phāsamantē.

4.4.3.1

cattāri jātiāsīvisā pa0 taṁ0- vicchuyajātiāsīvisē maṇḍukkajātiāsīvisē uragajātiāsīvisē maṇussajātiāsīvisē.

4.4.3.2

vicchuyajātiāsīvisassa ṇaṁ bhantē! kēvaïē visaē paṇṇattē? pabhū ṇaṁ vicchuyajātiāsīvisē addhabharahappamāṇamettaṁ bondiṁ visēṇaṁ visapariṇayaṁ visaṭṭamāṇiṁ karittaē visaē sē visaṭṭhatāē nō cēva ṇaṁ sampattīē karēṁsu vā karenti vā karissanti vā maṇḍukkajātiāsīvisassa ṇaṁ bhantē! kēvaïē visaē paṇṇattē? pabhū ṇaṁ maṇḍukka-jātivaāsīvisē bharahappamāṇamettaṁ bondiṁ visēṇaṁ visapariṇayaṁ visaṭṭamāṇiṁ0 sēsaṁ taṁ cēva- jāva karissanti vā uragajāti pucchā- pabhū ṇaṁ uragajātiāsīvisē jambuddīvapamāṇamettaṁ bondiṁ visēṇaṁ0 sēsaṁ taṁ cēva jāva karissanti vā, maṇussajāti pucchā- pabhū ṇaṁ maṇussa-jātiāsīvisē samayakhettapamāṇamettaṁ bondi visēṇaṁ visapariṇataṁ visaṭṭamāṇiṁ karettaē, visaē sē visaṭṭhatāē nō cēva ṇaṁ jāva karissanti vā.

4.4.4.1

caüvvihē vāhī paṇṇattē taṁ jahā — vātiē pittiē simbhiē saṇṇivātiē.

4.4.4.2

caüvvihā tigicchā pannattā taṁ0 vijjō ōsadhāiṁ āurē pariyāraē.

4.4.5.1

cattāri tigicchagā pannattā taṁ jahā — ātatigicchaē nāmamēgē nō paritigicchaē, paritigicchaē nāmamēgē nō ātatigicchaē-4.

4.4.5.2

cattāri purisajāyā pannattā taṁ jahā — vaṇakarē ṇāmamēgē nō vaṇaparibhāsī, vaṇaparibhāsī nāmamēgē nō vaṇakarē, ēgē vaṇakarēvi vaṇaparimāsīvi, ēgē nō vaṇakarē nō vaṇaparibhāsī; cattāri purisajāyā pannatatā taṁ jahā — vaṇakarē nāmamēgē nō vaṇasārakkhī-4.

4.4.5.3

cattāri purisajāyā pannattā taṁ jahā — vaṇakarē nāmamēgē nō vaṇasaṁrōhī-4.

4.4.5.4

cattāri vaṇā pannattā taṁ jahā — antōsallē nāmamēgē nō bāhiṁsallē-4. cattāri purisajāyā pannattā taṁ jahā — antōsallē nāmamēgē nō bāhiṁsallē-4.

4.4.5.5

cattāri vaṇā pannattā taṁ jahā — antōduṭṭhē nāmamēgē nō bāhinduṭṭhē, bāhinduṭṭhē nāmamēgē nō antōduṭṭhē-4. ēvāmēva cattāri purisajāyā pannattā taṁ jahā — antōduṭṭhē nāmamēgē nō bāhinduṭṭhē-4.

4.4.5.6

cattāri purisajāyā pannattā taṁ jahā — sēyaṁsē nāmamēgē sēyaṁsē, sēyaṁsē nāmamēgē pāvaṁsē, pāvaṁsē nāmamēgē sēyaṁsē, pāvaṁsē nāmamēgē pāvaṁsē.

4.4.5.7

cattāri purisajāyā pannattā taṁ jahā — sēyaṁsē nāmamēgē sēyaṁsetti sālisaē, sēyaṁsē nāmamēgē pāvaṁsetti sālisaē-4.

4.4.5.8

cattāri purisajāyā pannattā taṁ jahā — sēyaṁsē nāmamēgē sēyaṁsetti maṇṇati sēyaṁsē nāmamēgē pāvaṁsetti maṇṇati-4 ..

4.4.5.9

cattāri purisajāyā pannattā taṁ jahā — sēyaṁsē nāmamēgē sēyaṁsetti sālisaē maṇṇatti sēyaṁsē nāmamēgē pāvaṁsetti sālisaē maṇṇatti-4.

4.4.5.10

cattāri purisajāyā pannattā taṁ jahā — āghavaïttā nāmamēgē nō paribhāvaïttā, paribhāvaïttā nāmamēgē nō ādhavaïttā-4.

4.4.5.11

cattāri purisajāyā pannattā taṁ jahā — ādhavaïttā nāmamēgē nō uñchajīvīsampaṇṇē, uñchajīvisampaṇṇē nāmamēgē nō ādhavaïttā-4.

4.4.5.12

caüvvihā rūkkhaviguvvaṇā pannattā taṁ jahā — pavālattāē pattattāē pupphattāē phalattāē.

4.4.6.1

cattāri vādisamōsaraṇā pannattā taṁ jahā — kiriyāvādī akiriyāvādī annāṇiyāvādī vēṇaïyāvādī.

4.4.6.2

nēraïyāṇaṁ cattāri vādisamōsaraṇā pannattā taṁ jahā — kiriyāvādī jāva vēṇaïyāvādī, ēvamasura-kumārāṇavi jāva thaṇiyakumārāṇaṁ ēvaṁ- vigalindiyavajjaṁ jāva vēmāṇiyāṇaṁ.

4.4.7.1

cattāri mēhā pannattā taṁ jahā — gajjittā nāmamēgē nō vāsittā, vāsittā nāmamēgē nō gajjittā, ēgē gajjittāvi vāsittāvi, ēgē nō gajjittā nō vāsittā; ēvāmēva cattāri purisajāyā pannattā taṁ jahā — gajjittā nāmamēgē nō vāsittā-4.

4.4.7.2

cattāri mēhā pannattā taṁ jahā — gajjittā nāmamēgē nō vijjuyāittā vijjuyāittā nāmamēgē nō gajjittā-4. ēvāmēva cattāri purisajāyā pannattā taṁ jahā — gajjittā nāmamēgē nō vijjuyāittā-4.

4.4.7.3

cattāri mēhā pannattā taṁ jahā — vāsittā nāmamēgē nō vijjuyāittā, vijjuyāittā nāmamēgē nō vāsittā-4. ēvāmēva cattāri purisajāyā pannattā taṁ jahā — vāsittā nāmamēgē nō vijjuyāittā-4.

4.4.7.4

cattāri mēhā pannattā taṁ jahā — kālavāsī nāmamēgē nō akālavāsī, akālavāsī nāmamēgē nō kālavāsī-4. ēvāmēva cattāri purisajāyā pannattā taṁ jahā — kālavāsī nāmamēgē nō akālavāsī-4.

4.4.7.5

cattāri mēhā pannattā taṁ jahā — khettavāsī nāmamēgē nō akhettavāsī, akhettavāsī nāmamēgē nō khettavāsī-4. ēvāmēva cattāri purisajāyā pannattā taṁ jahā — khettavāsī nāmamēgē nō akhettavāsī-4.

4.4.7.6

cattāri mēhā pannattā taṁ jahā — jaṇaïttā nāmamēgē nō nimmavaïttā, nimmavaïttā nāmamēgē nō jaṇaïttā-4. ēvāmēva cattāri ammapiyarō pannattā taṁ0 jaṇaïttā nāmamēgē nō nimmavaïttā nimmavaïttā-4.

4.4.7.7

cattāri mēhā pannattā taṁ jahā — dēsavāsī nāmamēgē nō savvavāsī, savvavāsī nāmamēgē nō dēsavāsī-4. ēvāmēva cattāri rāyāṇō pannattā taṁ jahā — dēsādhivatī nāmēgē nō savvādhivatī-4.

4.4.8.1

cattāri mēhā pannattā taṁ jahā — pukkhalasaṁvaṭṭatē pajjuṇṇē jīmūtē jimhē, pukkhalasaṁvaṭṭaē ṇaṁ mahāmēhē ēgēṇaṁ vāsēṇaṁ dasavāsasahassāiṁ bhāvēti pajjuṇṇē ṇaṁ mahāmēhē ēgēṇaṁ vāsēṇaṁ dasavāsasayāiṁ bhāvēti, jīmūtē ṇaṁ mahāmēhē ēgēṇaṁ vāsēṇaṁ dasavāsāiṁ bhāvēti jimhē ṇaṁ mahāmēhē bahūhiṁ vāsēhiṁ ēgaṁ vāsaṁ bhāvēti vā na vā bhāvēti.

4.4.9.1

cattāri karaṇḍagā pannattā taṁ jahā — sōvāgakaraṇḍaē vēsiyākaraṇḍaē gāhāvatikaraṇḍaē rāyakaraṇḍaē; ēvāmēva cattāri āyariyā pannattā taṁ jahā — sōvāgakareṇḍagasamāṇē vēsiyākaraṇḍagasamāṇē gāhāvatikaraṇḍagasamāmē rāyakaraṇḍagasamāṇē.

4.4.10.1

cattāri rukkhā pannattā taṁ jahā — sālē nāmamēgē sālapariyāē sālē nāmamēgē ēraṇḍapariyāē ēraṇḍē nāmamēgē sālapariyāē ēraṇḍē nāmamēgē ēraṇḍapariyāē; ēvāmēva cattāri āyariyā pannattā taṁ jahā — sālē nāmamēgē sālapariyāē sālē nāmamēgē ēraṇḍapariyāē-4.

4.4.10.2

cattāri rukkhā pannattā taṁ jahā — sālē nāmamēgē sālaparivārē, sālē nāmamēgē ēraṇḍaparivārē-4. ēvāmēva cattāri āyariyā pannattā taṁ jahā — sālē nāmēgē sālaparivārē sālē nāmamēgē ēraṇḍaparivārē ēraṇḍē-4.

4.4.11.1

sāladumamajjhayārē jaha sālē nāma hōi dumarāyā
iya sundara āyariē sundara sīsē muṇēyavvē

4.4.12.1

ēraṇḍamajjhayārē jaha sālē nāma hōi dumarāyā
iya sundaraāyariē maṅgulasīsē muṇēyavvē

4.4.13.1

sāladumamajjhayārē ēraṇḍē nāma hōi dumarāyā
iya maṅgulaāyariē sundarīsīsē muṇēyavvē

4.4.14.1

ēraṇḍamajjhayārē ēraṇḍē nāma hōi dumarāyā
iya maṅgulaāyariē maṅgulasīsē muṇēyavvē

4.4.15.1

cattāri macchā pannattā taṁ jahā — aṇusōyacārī paḍisōyacārī antacārī majjhacārī, ēvamēva cattāri bhikkhāgā pannattā taṁ jahā — aṇusōyacārī paḍisōyacārī antacārī majjhacārī.

4.4.15.2

cattāri gōlā pannattā taṁ jahā — madhusitthagōlē jaügōlē dārugōlē maṭṭiyāgōlē ēvāmēva cattāri purisajāyā pannattā taṁ jahā — madhusitthagōlasamāṇē-4.

4.4.15.3

cattāri gōlā pannattā taṁ jahā — ayagōlē taügōlē tambagōlē sīyagōlē, ēvāmēva cattāri purisajāyā pannattā taṁ jahā — ayagōlasamāṇē jāva sīsagōlasamāṇē.

4.4.15.4

cattāri gōlā pannattā taṁ jahā — hiraṇṇagōlē suvaṇṇagōlē rayaṇagōlē vayaragōlē, ēvāmēva cattāri purisajāyā pannattā taṁ jahā — hiraṇṇagōlasamāṇē jāva vayaragōlasamāṇē.

4.4.15.5

cattāri pattā pananattā taṁ jahā — asipattē karapattē khurapattē kalambacīriyāpattē ēvāmēva cattāri purisajāyā pannattā taṁ jahā — asipattasamāṇē jāva kalambacīriyāpattasamāṇē.

4.4.15.6

cattāri kaḍā pannattā taṁ jahā — sumbakaḍē vidalakaḍē cammakaḍē kambalakaḍē, ēvāmēva cattāri purisajāyā pannattā taṁ jahā — sumbakaḍasamāṇē jāva kambalakaḍasamāṇē.

4.4.16.1

caüvvihā caüppayā pannattā taṁ jahā — ēgakhurā dukhurā gaṇḍīpadā saṇapphayā.

4.4.16.2

caüvvihā pakkhī pannattā taṁ jahā — cammapakkhī lōmapakkhī samuggapakkhī vitatapakkhī.

4.4.16.3

caüvvihā khuḍḍapāṇā pannattā taṁ jahā — bēindiyā tēindiyā caürindiyā saṁmucchimapañcindiya-tirikkhajōṇiyā.

4.4.17.1

cattāri pakkhī pannattā taṁ jahā — nivatittā nāmamēgē nō parivaïttā parivaïttā nāmamēgē nō nivatittā ēgē nivatittāvi parivaïttāvi ēgē nō nivatittā nō parivaïttā; ēvāmēva cattāri bhikkhāgā pannattā taṁ jahā — nivatittā nāmamēgē nō parivaïttā parivaïttā nāmamēgē nō nivatittā-4.

4.4.18.1

cattāri purisajāyā pannattā taṁ jahā — nikkaṭṭhē nāmamēgē nikkaṭṭhē, nikkaṭṭhē nāmamēgē anikkaṭṭhē, anikkaṭṭhē nāmamēgē nikkaṭṭhē, anikkaṭṭhē nāmamēgē anikkaṭṭhē.

4.4.18.2

cattāri purisajāyā pannattā taṁ jahā — nikkaṭṭhē nāmamēgē nikkaṭṭhappā nikkaṭṭhē nāmamēgē anikkaṭṭhappā aṇikkaṭṭhē nāmamēgē nikkaṭṭhappā anikkaṭṭhē nāmamēgē anikkaṭṭhappā.

4.4.18.3

cattāri purisajāyā pannattā taṁ jahā — buhē nāmamēgē buhē buhē nāmamēgē abuhē abuhē-4.

4.4.18.4

cattāri purisajāyā pannattā taṁ jahā — budhē nāmamēgē budhahiyaē budhē nāmamēgē abudhahiyaē abudhē nāmamēgē budhahiyaē abudhē nāmamēgē abudhahiyaē.

4.4.18.5

cattāri purisajāyā pannattā taṁ jahā — āyāṇukampaē nāmamēgē nō parāṇukampaē parāṇukampaē nāmamēgē nō āyāṇukampaē-4.

4.4.19.1

caüvvihē saṁvāsē paṇṇattē taṁ jahā — divvē āsurē rakkhasē māṇusē; caüvvihē saṁvāsē pananattē taṁ jahā — dēvē nāmamēgē dēvīē saddhiṁ saṁvāsaṁ gacchati, dēvē nāmamēgē asurīē saddhiṁ saṁvāsaṁ gacchati asurē nāmamēgē dēvīē saddhiṁ saṁvāsaṁ gacchati, asurē nāmamēgē asurīē saddhiṁ saṁvāsaṁ gacchati.

4.4.19.2

caüvvihē saṁvāsē paṇṇattē taṁ jahā — dēvē nāmamēgē dēvīē saddhiṁ saṁvāsaṁ gacchati, dēvē nāmamēgē rakkhasīē saddhiṁ saṁvāsaṁ gacchati, rakkhasē nāmamēgē dēvīē saddhiṁ saṁvāsaṁ gacchati, rakkhasē mamēgē rakkhasīē saddhiṁ saṁvāsaṁ gacchati.

4.4.19.3

caüvvidhē saṁvāsē paṇṇattē taṁ jahā — dēvē nāmamēgē dēvīē saddhiṁ saṁvāsaṁ gacchati, dēvē nāmamēgē maṇussīē saddhiṁ saṁvāsaṁ gacchati, maṇussē nāmēgē dēvīē saddhiṁ saṁvāsaṁ gacchati, maṇussē nāmamēgē maṇussīē saddhiṁ saṁvāsaṁ gacchati.

4.4.19.4

caüvvidhē saṁvāsē paṇṇattē taṁ jahā — asurē nāmamēgē asurīē saddhiṁ saṁvāsaṁ gacchati, asurē nāmamēgē rakkhasīē saddhiṁ saṁvāsaṁ gacchati, rakkhasē nāmamēgē asurīē saddhiṁ saṁvāsaṁ gacchati, rakkhasē nāmamēgē rakkhasīē saddhiṁ saṁvāsaṁ gacchati.

4.4.19.5

caüvvidhē saṁvāsē paṇṇattē taṁ jahā — asurē nāmamēgē asurīē saddhiṁ saṁvāsaṁ gacchati, asurē nāmamēgē maṇussīē saddhiṁ saṁvāsaṁ gacchati, maṇussē nāmamēgē asurīē saddhiṁ saṁvāsaṁ gacchati, maṇussē nāmamēgē maṇussīē saddhiṁ saṁvāsaṁ gacchati.

4.4.19.6

caüvvidhē saṁvāsē paṇṇattē taṁ jahā — rakkhasē nāmamēgē rakkhasīē saddhiṁ saṁvāsaṁ gacchati rakkhasē nāmamēgē maṇussīē saddhiṁ saṁvāsaṁ gacchatiṁ, maṇussē nāmamēgē rakkhasīē saddhiṁ saṁvāsaṁ gacchati, maṇussē nāmamēgē maṇussīē saddhiṁ saṁvāsaṁ gacchati.

4.4.20.1

caüvvihē avaddhaṁsē paṇṇattē taṁ jahā — āsurē ābhiōgē saṁmōhē dēvikibbisē caühiṁ ṭhāṇēhiṁ jīvā āsurattāē kammaṁ pagarenti taṁ jahā — kōvasīlatāē pāhuḍasīlatāē saṁsattatavokkamēṇaṁ nimittā-jīvayāē.

4.4.20.2

caühiṁ ṭhāṇēhiṁ jīvā ābhiōgattāē kammaṁ pagarenti taṁ jahā — attukkamōsēṇaṁ paraparivāēṇaṁ bhūti-kammēṇaṁ kōuyakaraṇēṇaṁ.

4.4.20.3

caühiṁ ṭhāṇēhiṁ jīvā sammōhattāē kammaṁ pagarenti taṁ jahā — ummaggadēsaṇāē magganta-rāēṇaṁ kāmāsampaōgēṇaṁ bhijjāniyāṇakaraṇēṇaṁ.

4.4.20.4

caühiṁ ṭhāṇēhiṁ jīvā dēvakibbisiyattāē kammaṁ pagarenti taṁ jahā — arahantāṇaṁ avaṇṇaṁ vadamāṇē arahantapannattassa dhammassa avaṇṇaṁ vadamāṇē āyariyaüvajjhāyāṇamavaṇṇaṁ vadamāṇē cāuvaṇṇassa sandhassa avaṇṇaṁ vadamāṇē.

4.4.21.1

caüvvihā pavvajjā pannattā taṁ jahā — ihalōgapaḍibaddhā paralōgapaḍibaddhā duhatōlōga-paḍibaddhā appaḍibaddhā; caüvvihā pavvajjā pannattā taṁ jahā — puraōpaḍibaddā maggaō paḍibaddhā duhatōpaḍibaddhā appaḍibaddhā.

4.4.21.2

caüvvihā pavvajjā pannattā taṁ jahā — ōvāyapavvajjā akkhātapavvajjā saṅgārapavvajjā vihagagaïpavvajjā.

4.4.21.3

caüvvihā pavvajjā pannattā taṁ jahā — tuyāvaïttā puyāvaïttā buāvaïttā paripuyāvaïttā caüvvihā pavvajjā pannattā taṁ jahā — naḍakhaïyā bhaḍakhaïyā sōhakhaïyā siyālakhaïyā.

4.4.21.4

caüvvihā kisī pannattā taṁ jahā — vāviyā parivāviyā ninditā parininditā ēvāmēva caüvvihā pavvajjā pannattā taṁ jahā — vāvitā parivāvitā ninditā parininditā.

4.4.21.5

caüvvihā pavvajjā pannattā taṁ jahā — dhaṇṇapuñjitasamāṇā dhaṇṇavirallitasamāṇā dhaṇṇavikkhittasamāṇā dhaṇṇasaṅkaṭṭitasamāṇā.

4.4.22.1

cattāri sannāō pa0 taṁ0- āhārasannā bhayasannā mēhuṇasannā pariggahasannā.

4.4.22.2

caühiṁ ṭhāṇēhiṁ āhārasaṇṇā samuppajjati taṁ jahā — ōmakoṭṭhātāē, chuhāvēyaṇijjassa kammassa udaēṇaṁ, matīē, tadaṭṭhōvaōgēṇaṁ.

4.4.22.3

caühiṁ ṭhāṇēhiṁ bhayasannā samuppajjati taṁ jahā — hīṇasattattāē, bhayavēyaṇijjassa kammassa udaēṇaṁ, matīē, tadaṭṭhōvagēṇaṁ.

4.4.22.4

caühiṁ ṭhāṇēhiṁ mēhuṇasannā samuppajjati taṁ jahā — cittamaṁsasōṇiyayāē, mōhaṇijjassa kammassa udaēṇaṁ, matīē, tadaṭṭhōvaōgēṇaṁ.

4.4.22.5

caühiṁ ṭhāṇēhiṁ pariggahasannā samuppajjati taṁ jahā — avimuttayāē, lōbhavēyaṇijjassa kammassa udaēṇaṁ, matīē, tadaṭṭhōvaōgēṇaṁ.

4.4.23.1

caüvvihā kāmā pa0 taṁ0-siṅgārā kaluṇā bībhacchā roddā; siṅgārā kāmā dēvāṇaṁ, kaluṇā kāmā maṇuyāṇaṁ, bībhacchā kāmā tirikkhajōṇiyāṇaṁ, roddā kāmā nēraïyāṇaṁ.

4.4.24.1

cattāri udagā pa0 taṁ0- uttāṇē nāmamēgē uttāṇōdaē, uttāṇē nāmamēgē gambhīrōdaē, gambhīrē nāmamēgē uttāṇōdaē, gambhīrē nāmamēgē gambhīrōdaē; ēvāmēva cattāri purisajāyā pannattā taṁ jahā — uttāṇē nāmamēgē uttāṇahidaē uttāṇē nāmamēgē gambhīrahidaē gambhīrē nāmamēgē uttāraṇahidaē gambhīrē nāmagē gambhīrahidaē.

4.4.24.2

cattāri udagā pannattā taṁ jahā — uttāṇē nāmamēgē uttāṇōbhāsī, uttāṇē nāmamēgē gambhīrōbhāsī, gambhīrē nāmamēgē uttānōbhāsī, gambhīrē nāmamēgē gambhīrōbhāsī; ēvāmēva cattāri purisajāyā paṇṇattā taṁ jahā — uttāṇē nāmamēgē uttāṇōbhāsī uttāṇē nāmamēgē gambhīrōbhāsī-4.

4.4.24.3

cattāri udahī pannattā taṁ jahā — uttāṇē nāmamēgē uttānōdahī, uttāṇē nāmamēgē gambhīrōdahī-4. ēvāmēva cattārī purisajāyā pannattā taṁ jahā — uttāṇē nāmamēgē uttāṇahiyaē-4.

4.4.24.4

cattāri udahī pannattā taṁ jahā-uttāṇē nāmamēgē uttāṇōbhāsī, uttāṇē nāmamēgē gambhīrōbhāsī-4. ēvāmēva cattāri purisajāyā pannattā taṁ jahā — uttāṇē nāmamēgē uttāṇōbhāsī-4.

4.4.25.1

cattāri taragā pannattā taṁ jahā — samuddaṁ tarāmītēgē samuddaṁ tarati, samuddaṁ tarāmītēgē goppayaṁ tarati goppayaṁ tarāmītēgē-4.

4.4.25.2

cattāri taragā pannattā taṁ jahā — samuddē tarettā nāmamēgē samuddē visīyati, samuddaṁ tarettā nāmamēgē goppaē visīyati, goppayaṁ tarettā nāmamēgē samuddē visīyati-4.

4.4.26.1

cattāri kumbhā pannattā taṁ jahā — puṇṇē nāmamēgē puṇṇē, puṇṇē nāmamēgē tucchē, tucchē nāmamēgē puṇṇē, tucchē nāmamēgē tucchē, ēvāmēva cattāri purisajāyā pannattā0 puṇṇē nāmamēgē puṇṇē-4.

4.4.26.2

cattāri kumbhā pannattā taṁ jahā — puṇṇē nāmamēgē puṇṇōbhāsī, puṇṇē nāmamēgē tucchōbhāsī, tucchē nāmamēgē puṇṇōbhāsī, tucchē nāmamēgē tucchōbhāsī; ēvāmēva cattāri purisajāyā pannattā taṁ jahā — puṇṇē nāmamēgē puṇṇōbhāsī-4.

4.4.26.3

cattāri kumbhā pannattā taṁ jahā — puṇṇē nāmamēgē puṇṇarūvē puṇṇē nāmamēgē tuccharūvē-4. ēvāmēva cattāri purisajāyā pannattā taṁ jahā — puṇṇē nāmamēgē puṇṇarūvē-4.

4.4.26.4

cattāri kumbhā pannattā taṁ jahā — puṇṇēvi ēgē piyaṭṭhē, puṇṇēvi ēvē avadalē, tucchēvi ēgē piyaṭṭhē, tucchēvi ēgē avadalē; ēvāmēva cattāri purisajāyā pannattā taṁ jahā — puṇṇēvi ēgē piyaṭṭhē.

4.4.26.5

cattāri kumbhā pannattā taṁ jahā — puṇṇēvi ēgē vissandati, puṇṇēvi ēgē nō vissandati, tucchēvi ēgē vissadanti, tucchēvi ēgē nō vissadanti; ēvāmēva cattāri purisajāyā pannattā taṁ jahā — puṇṇēvi ēgē vissandati-4.

4.4.26.6

cattāri kumbhā pannattā taṁ jahā — bhiṇṇē jajjariē parissāī aparissāī; ēvāmēva caüvvihē carittē paṇṇattē taṁ jahā — bhiṇṇē jāva aparissāī.

4.4.26.7

cattāri kumbhā pannattā taṁ jahā — mahukumbhē nāmamēgē mahuppihāṇē, mahukumbhē nāmamēgē visapihāṇē, visakumbhē nāmamēgē mahupihāṇē, visakumbhē nāmamēgē visapihāṇē; ēvāmēva cattāri purisajāyā pannattā taṁ jahā — mahukumbhē nāmamēgē mahupihāṇē-4.

4.4.27.1

hiyayamapāvamakalusaṁ jīhā'vi ya mahurabhāsiṇī niccaṁ
jammi purisammi vijjati sē madhukumbhē madhupihāṇē

4.4.28.1

hiyayamapāvamakalusaṁ jīhā'vi yaṁ kaḍuyabhāsiṇī niccaṁ
jammi purisammi vijjati sē madhukumbhē visapihāṇē

4.4.29.1

jaṁ hiyayaṁ kalusamayaṁ jīhā'vi ya madhurabhāsiṇī niccaṁ
jammi purisammi vijjati sē visakumbhē madhupihāṇē

4.4.30.1

jaṁ hiyayaṁ kalusamayaṁ jīhā'vi ya kaḍuyabhāsiṇī niccaṁ
jammi purisammi vijjati sē visakumbhē visapihāṇē

4.4.31.1

caüvvihā uvasaggā pannattā taṁ0- divvā māṇusā tirikkhajōṇiyā āyasañcēyaṇijjā, divvā uvasaggā caüvvihā pannattā taṁ jahā — hāsā pāōsā vīmaṁsā puḍhōvēmātā, māṇusā uvasaggā caüvvihā pannattā taṁ jahā — hāsā pāōsā vīmaṁsā kusīlapaḍisēvaṇayā, tirikkhajōṇiyā uvasaggā caüvvihā pannattā taṁ jahā — bhayā padōsā āhārahēuṁ avaccēlaṇasārakkhaṇayā, āyasañcēyaṇijjā uvasaggā caüvvihā pannattā taṁ jahā — ghaṭṭaṇatā pavaḍaṇatā thambhaṇatā lēsaṇatā.

4.4.32.1

caüvvihē kammē paṇṇattē taṁ jahā — subhē nāmamēgē subhē, subhē nāmamēgē asubhē, asubhē nāmēgē subhē, asubhē nāmamēgē asubhē.

4.4.32.2

caüvvihē kammē pa0 taṁ jahā — subhē nāmamēgē subhavivāgē, subhē nāmamēgē asubhavivāgē, asubhē nāmamēgē subhavivāgē, asubhē nāmamēgē asubhavivāgē.

4.4.32.3

caüvvihē kammē paṇṇattē taṁ jahā — pagaḍīkammē ṭhitīkammē aṇubhāvakammē padēsakammē.

4.4.33.1

caüvavihē saṅghē pa0 taṁ0 jahā — samaṇā samaṇīō sāvagā sāviyāō.

4.4.34.1

caüvvihā buddhī pannattā taṁ jahā — uppattiyā vēṇaïyā kammiyā pariṇāmiyā.

4.4.34.2

caüvvihā maī pannattā taṁ jahā — uggahamatī īhāmatī avāyamatī dhāraṇāmatī; ahavā — caüvvihā matī pannattā taṁ jahā — arañjarōdagasamāṇā viyarōgadasamāṇā sarōdagasamāṇā sāgarōdagasamāṇā.

4.4.35.1

caüvvihā saṁsārasamāvaṇṇagā jīvā pannattā taṁ jahā — nēraïyā tirikkhajōṇiyā maṇussā dēvā caüvvihā savvajīvā pannattā taṁ jahā — maṇajōgī vaïjōgī kāyajōgī ajōgī, ahavā — caüvvihā savvajīvā pannattā taṁ jahā — itthivēyagā purisavēyagā nampusakavēyagā avēyagā, ahavā — caüvvihā savvajīvā pannattā taṁ jahā — cakkhudaṁsaṇī acakkhudaṁsaṇī ōhindasaṇī kēvaladaṁsaṇī, ahavā — caüvvihā savvajīvā pannattā taṁ jahā — sañjayā asañjayā sañjayā-sañjayā nōsañjayā nōasañjayā.

4.4.36.1

cattāri purisajāyā pannattā taṁ jahā — mittē nāmamēgē mittē, mittē nāmamēgē amittē, amittē nāmamēgē mittē, amittē nāmamēgē amittē; cattāri purisajāyā pannattā0 mittē nāmamēgē mittarūvē caübhaṅgō.

4.4.36.2

cattāri purisajāyā pannattā taṁ jahā — muttē nāmamēgē muttē, muttē nāmamēgē amuttē-4.

4.4.36.3

cattāri purisajāyā pannattā taṁ jahā — muttē nāmamēgē muttarūvē muttē nāmamēgē amuttarūvē-4.

4.4.37.1

pañcindiyatirikkhajōṇiyā caügaīyā caüāgaīyā pa0 taṁ0- pañcidiyatirikkhajōṇiē pañcidiyatirikkhajōṇiēsu uvavajjamāṇē nēraïēhintō vā tirikkhajōṇiēhintō vā maṇussēhintō vā dēvēhintō vā uvavajjejjā, sē cēva ṇaṁ sē pañcidiyatirikkhajōṇiē pañcindiyatirikkhajōṇiyattaṁ vippajahamāṇē nēraïyattāē vā jāva dēvattāē vā uvāgacchejjā, maṇussā caügaīyā caüāgaīā, ēvaṁ cēvamaṇussāvi.

4.4.38.1

bēṁidiyā ṇaṁ jīvā asamārabhamāṇassa caüvvihē sañjamē kajjati taṁ0 jibbhāmayātō sokkhātō avavarōvittā bhavati, jibbhāmaēṇaṁ dukkhēṇaṁ asañjōgettā bhavati, phāsāmayātō sokkhatō avavarōvettā bhavati ēvaṁ cēva-4,.

4.4.38.2

bēindiyā ṇaṁ jīvā samārabhamāṇassa caüvidhē asañjamē kajjati taṁ jahā — jibbhāmayātō sokkhātō vavarōvittā bhavati, jibbhamaēṇaṁ dukkhēṇaṁ sañjōgittā bhavati, phāsāmayātō sokkhātō vavarōvettā bhavati.

4.4.39.1

sammaddiṭṭhiyāṇaṁ nēraïyāṇaṁ cattāri kiriyāō pannattāō taṁ jahā — ārambhiyā pāriggahiyā māyāvattiyā apaccakkhāṇakiriyā.

4.4.39.2

sammaddiṭṭhiyāṇamasurakumārāṇaṁ cattāri kiriyāō pannattāō taṁ jahā ēvaṁ cēva, ēvaṁ vigalindiyavajjaṁ jāva vēmāṇiyāṇaṁ.

4.4.40.1

caühiṁ ṭhāṇēhiṁ santē guṇē nāsejjā taṁ jahā — kōhēṇaṁ paḍinivēsēṇaṁ akayaṇmuyāē micchattābhinivēsēṇaṁ.

4.4.40.2

caühiṁ ṭhāṇēhiṁ asantē guṇē dīvejjā taṁ jahā — abbhāvasattiyaṁ paracchandāṇuvattiyaṁ kajjahēuṁ katapaḍikatēti vā.

4.4.41.1

nēraïyāṇaṁ caühiṁ ṭhāṇēhiṁ sarīruppattī siyā taṁ jahā — kōhēṇaṁ māṇēṇaṁ māyāē lōbhēṇaṁ ēvaṁ jāva vēmāṇiyāṇaṁ, nēraïyāṇaṁ caüṭṭhāṇanivvattitē sarīrē paṇṇattē taṁ jahā — kōhanivvattiē māṇanivvattiē māyānivvattiē lōbhanivvattiē ēvaṁ jāva vēmāṇiyāṇaṁ.

4.4.42.1

cattāri dhammadārā pannattā taṁ jahā — khantī muttī ajjavē maddavē.

4.4.43.1

caühiṁ ṭhāṇēhiṁ jīvā nēraïyāuyattāē kammaṁ pagarenti taṁ0 mahārambhatātē mahāpariggahayāē pañcidiyavahēṇaṁ kuṇimāhārēṇaṁ.

4.4.43.2

caühiṁ ṭhāṇēhiṁ jīvā tirikkhajōṇiya āuyattāē kammaṁ pagarenti taṁ jahā — māillatāē niyaḍillatāē aliyavaṇēṇaṁ kūḍatulakūḍamāṇēṇaṁ.

4.4.43.3

caühiṁ ṭhāṇēhiṁ jīvā maṇussāuyattāē kammaṁ pagarenti taṁ jahā — pagatibhaddatāē pagativiṇīyayāē sāṇukkōsayāē amaccharitāē caühiṁ ṭhāṇēhiṁ jīvā dēvāuyattā kammaṁ pagarenti taṁ jahā — sarāgasañjamēṇaṁ sañjamāsañjamēṇaṁ bālatavōkammēṇaṁ akāmanijjarāē.

4.4.44.1

caüvvihē vajjē paṇṇattē taṁ jahā — tatē vitatē ghaṇē jhusirē; caüvvihē naṭṭē paṇṇattē taṁ jahā — añciē ribhiē ārabhaḍē bhasōlē caüvvihē gēē paṇṇattē taṁ jahā — ukkhittaē pattaē mandaē rōvindaē, caüvvihē mallē paṇṇattē taṁ jahā — ganthimē vēḍhimē pūribhē saṅghātimē; caüvvihē alaṅkārē paṇṇattē taṁ jahā — kēsālaṅkārē vatthālaṅkārē mallalaṅkārē ābharaṇālaṅkārē.

4.4.44.2

caüvvihē abhiṇaē paṇṇattē taṁ jahā — diṭṭhantiē pāḍisutē sāmaṇṇaōviṇivāiyaṁ lōgamajjhā-vasitē.

4.4.45.1

saṇaṅkumāra-māhindēsu ṇaṁ kappēsu vimāṇā caüvaṇṇā pannattā taṁ jahā — nīlā lōhitā hāliddā sukkillā; mahāsukka-sahassārēsu ṇaṁ kappēsu dēvāṇaṁ bhavadhāraṇijjā sarīragā ukkōsēṇaṁ cattāri rayaṇīō uḍḍhaṁ uccattēṇaṁ pannattā.

4.4.46.1

cattāri dagagabbhā pannattā taṁ jahā — ussā mahiyā sītā usiṇā cattāri dagagabbhā pannattā taṁ jahā — hēmagā abbhasanthaḍā sītōsiṇā pañcarūviyā.

4.4.47.1

māhē u hēmagā gabbhā phagguṇē abbhasanthaḍā
sītōsiṇā u cittē vaïsāhē pañcarūviyā

4.4.48.1

cattāri māṇussīgabbhā pannattā taṁ jahā — itthittāē purisattāē napuṁsagattātē bimbattāē.

4.4.49.1

appaṁ sukkaṁ bahuṁ ōyaṁ itthī tattha pajāyati
appaṁ ōyaṁ bahuṁ sukkaṁ purisō tattha jāyati

4.4.50.1

dōṇhampi rattasukkāṇaṁ tullabhāvē napuṁsaō
itthī-ōyasamāyōgē bimbaṁ tattha pajāyati

4.4.51.1

uppāyapuvvassa ṇaṁ cattāri calavatthū pannattā.

4.4.52.1

caüvvihē kavvē paṇṇattē taṁ jahā — gajjē pajjē katthē gēē

4.4.53.1

nēraïyāṇaṁ cattāri samugghātā pannattā taṁ jahā — vēyaṇāsamugdhātē kasāyasamugdhātē māraṇantiyasamugghātē vēuvvisamugghātē ēvaṁ vāukkaïyāṇavi.

4.4.54.1

arahantō ṇaṁ ariṭṭhanēmissa cattāri sayā coddasapuvvīṇamajiṇāṇaṁ jiṇasaṅkāsāṇaṁ savvakkharasaṇṇivāīṇaṁ jiṇō jiṇāṇaṁ iva avitathaṁ vāgaramāṇāṇaṁ ukkōsiyā caüddasa puvvisampayā hutthā.

4.4.55.1

samaṇassa ṇaṁ bhagavaō mahāvīrassa cattāri sayā vādīṇaṁ sadēvamaṇuyāsurāēparisāē aparājiyāṇaṁ ukkōsitā vādisampayā hutthā.

4.4.56.1

heṭṭhillā cattāri kappā addhacandasaṇṭhāmasaṇṭhiyā pannattā taṁ jahā — sōhammē īsāṇē saṇaṅkumārē māhindē, majjhilā cattāri kappā paḍipuṇṇacandasaṇṭhāṇasaṇṭhiyā pannattā taṁ jahā — bambhalōgē lantaē mahāsukkē sahassārē, uvarillā cattāri kappā addhacandasaṇṭhāṇasaṇṭhiyā pannattā taṁ jahā — āṇatē pāṇatē āraṇē accutē.

4.4.57.1

cattāri samuddā pattēyarasā pa0 taṁ0-lavaṇōdē varuṇōdē khīrōdē ghatōdē.

4.4.58.1

cattāri āvatā pannattā taṁ jahā — kharāvattē uṇṇatāvattē gūḍhāvattē āmisāvattē, ēvāmēva cattāri kasāyā pannattā taṁ jahā — kharāvattasamāṇē kōhē uṇṇatāvattasamāṇē māṇē gūḍhāvattasamāṇā māyā āmisāvattasamāṇē lōbhē. kharāvattasamāṇaṁ kōhaṁ aṇupaviṭṭhē jīvē kālaṁ karenti nēraïēsu uvavajjati uṇṇatāvattasamāṇaṁ māṇaṁ aṇupaviṭṭhē jāva nēraïēsu uvavajajti gūḍhāvattasamāṇaṁ māyaṁ jāva nēraïēsu uvavajjati āmisāvattasamāṇaṁ lōbhamaṇupaviṭṭhē jīvē kālaṁ karēti nēraïēsu uvavajjati.

4.4.59.1

anurāhanakkhattē caüttārē paṇṇattē, puvvāsāḍhā ēvaṁ cēva. uttarāsāḍhā ēvaṁ cēva.

4.4.60.1

jīvāṇaṁ caüṭṭhāṇanivvattitē poggalē pāvakammattāē ciṇiṁsu vā ciṇanti vā ciṇissanti vā, nēraïyanivvattitē tirikkhajōṇiyanivvattitē maṇussanivvattitē dēvanivvattitē ēvaṁ- uvaciṇiṁsu vā uvaciṇanti vā uvaciṇissanti vā, ēvaṁ-ciṇa-uvaciṇa-bandha-udīra-vēya taha nijjarā cēva.

4.4.61.1

caüpadēsiyā khandhā anantā pannattā, caüpadēsōgāḍhā poggalā anantā pannattā, caüsamayaṭṭhitīyā poggalā anantā pannattā, caüguṇakālagā poggalā anantā, jāva caüguṇalukkhā poggalā anantā pannattā.

Translations (2)

Commentaries (2)