Pramāṇa · Search · About · API

Nayadhammakahao 1.9

Nāyādhammakahāo 1.9

Language
Ardhamāgadhī Prakrit

Contents

1.9.1.1

jaï ṇaṁ bhantē! samaṇēṇaṁ bhagavayā mahāvīrēṇaṁ jāva sampattēṇaṁ aṭṭhamassa nāyajjhayaṇassa ayamaṭṭhē pannattē navamassa ṇaṁ bhantē! nāyajjhayaṇassa kē aṭṭhē pannattē? ēvaṁ khalu jambū! tēṇaṁ kālēṇaṁ tēṇaṁ samaēṇaṁ campā nāmaṁ nayarī punnabhaddē cēiē tattha ṇaṁ māyandī nāma satthavāhē parivasaï-aḍḍhē, tassa ṇaṁ bhaddā nāmaṁ bhāriyā, tīsē ṇaṁ bhaddāē attayā duvē satthāvāhadārayā hōtthā taṁ0 jiṇapāliē ya jiṇarakkhiē ya.

1.9.1.2

taē ṇaṁ tēsiṁ māgandiya-dāragāṇaṁ aṇṇayā kayāī ēgayaō imēyārūvē mihō kahāsamullāvē samuppajjitthā — ēvaṁ khalu amhē lavaṇasamuddaṁ pōyavahaṇēṇaṁ ēkkārasa vārāō ōgāḍhā savvattha vi ya ṇaṁ laddhaṭṭhā kayakajjā aṇasahamaggā puṇaravi niyagharaṁ havvamāgayā taṁ sēyaṁ khalu amhaṁ dēvāṇuppiyā! duvālasamampi lavaṇasamuddaṁ pōyavahaṇēṇaṁ ōgāhittaē tti kaṭṭu aṇṇamaṇṇassa ēyamaṭṭhaṁ paḍisuṇētiṁ paḍisuṇēttā jēṇēva ammāpiyarō tēṇēva uvāgacchanti uvāgacchittā ēvaṁ vayāsī.

1.9.1.3

ēvaṁ khalu amhē ammayāō! ēkkārasa vārāō taṁ cēva jāva niyadharaṁ havvamāgayā, taṁ icchāmō ṇaṁ ammayāō! tubbhēhiṁ abbhaṇuṇṇāyā samāṇā duvālasampi lavaṇasamuddaṁ pōyavahaṇēṇaṁ ōgāhittaē, taē ṇaṁ tē māgandiya-dāraē ammāpiyarō ēvaṁ vayāsī — imē tē jāyā ajjhaya-jāva paribhāēuṁ taṁ anuhōha tāva jāyā! vipulē māṇussaē iḍḍhīsakkārasamudaē, kiṁ bhē sapaccavāēṇaṁ nirālambaṇēṇaṁ lavaṇasamuddōttārēṇaṁ? ēvaṁ khaluṁ puttā! duvālasamī jattā sōvasaggā yāvi bhavaï, taṁ mā ṇaṁ tubbhē duvē puttā! duvālasampi lavaṇa0 ōgāhēha, mā hu tubbhaṁ sarīrassa vāvattī bhavissaï.

1.9.1.4

taē ṇaṁ tē māgandiya-dāragā ammāpiyarō dōccampi taccampi ēvaṁ vayāsī — ēvaṁ khalu amhē ammayāō! ēkkārasavārāō lavaṇaṁ ōgāḍhā jāva duvālasampi lavaṇasamuddaṁ ōgāhittaē, taē ṇaṁ tē māgandiya-dāraē ammāpiyarō jāhē nō sañcāēnti bahūhiṁ āghavaṇāhiṁ ya pannavaṇāhi ya āghavittaē vā pannavittaē vā tāhē akāmā cēva ēyamaṭṭhaṁ anujāṇitthā.

1.9.1.5

taē ṇaṁ tē māgandiyadā ragā ammāpiūhiṁ abbhaṇuṇṇāyā samāṇā gaṇimaṁ ca dharimaṁ ca mējjaṁ ca pāricchējjaṁ ca bhaṇḍagaṁ gēṇhanti jahā arahannagassa jāva lavaṇasamuddaṁ bahūiṁ jōyasayāiṁ ōgāḍhā.

1.9.2.1

taē ṇaṁ tēsiṁ māgandiya-dāragāṇaṁ aṇēgāiṁ jōyaṇasayāiṁ ōgāḍhāṇaṁ samāṇāṇaṁ aṇēgāiṁ uppāiyasayāiṁ pāubbhūyāiṁ taṁ jahā— akālē gajjiē jāva thaṇiyasaddē kāliyavāē jāva samuṭṭhiē, taē ṇaṁ sā nāvā tēṇaṁ kāliyavāēṇaṁ āhuṇijjamāṇī-āhuṇijjamāṇī sañcālijjamāṇī-sañcālijjamāṇī saṅkhōbhijjamāṇī-saṅkhōbhijjamāṇī salilatikkha-vēgēhiṁ aïaṭṭijjamāṇī-aïaṭṭijja-māṇī kōṭṭimaṁ-sikaratalāhatē viva tindūsaē tatthēva-tatthēva ōvayamāṇī ya uppayamāṇī ya uppayamāṇī viva dharaṇīyalāō siddhāvijjā vijjāharakannagā ōvayamāṇī viva gagaṇatalāō bhaṭṭhavijjā vijjāharakannagā vipalāyamāṇī viva mahāgarulavēga-vittāsiya bhuyagavarakannagā dhāvamāṇī viva mahājaṇa-rasiyasadda-vittatthā ṭhāṇabhaṭṭhā āsakisōrī niguñjamāṇī viva gurujaṇa-diṭṭhāvarāhā sujaṇakulakannagā dhummamāṇī viva vīci-pahāra-sayatāliya galiya-lambaṇā viva gagaṇatalāō rōyamāṇī viva salilaganthi-vippaïra-māṇa-thōraṁsuvāēhiṁ navavahū uvarayabhattuyā vilavamāṇī viva paracakkarāyābhirōhiyā paramamahabbhayābhidduyā mahāpuravarī jhāyamāṇī viva kavaḍa-cchōmaṇa-paōgajuttā jōgaparivvāiyā nīsāsamāṇī viva mahākantāraviṇiggaya-parissantā pariṇayavayā ammayā sōyamāṇī viva tava-caraṇa-khīṇaparibhōgā cavaṇakālē dēvavaravahū sañcuṇṇikaṭṭha-kūvarā bhaggamēḍhi-mōḍiyasahassamālā sūlāiya-vaṅkaparimāsā phalahantara-taḍataḍēnta-phuṭṭantasandhiviyalanta-lōhakiliyā savvaṅga-viyambhiyā parisaḍiyarajjuvisarantasavvagahattā āmagamallagabhūyā akayapunna-jaṇamaṇōrahō viva cintijja-māṇaguruī hāhākkaya-kaṇṇadhāranaviya-vāṇiyagajaṇa-kammakaravilaviyā nānāviha-rayaṇa-paṇiya-sampuṇṇā bahūhiṁ purisasaēhiṁ rōyamāṇēhiṁ kandamāṇēhiṁ sōyamāṇēhiṁ tippamāṇēhiṁ vilavamāṇēhiṁ ēgaṁ mahaṁ antō jalagayaṁ girisiharamāsāittā sambhaggakūvatōraṇā mōḍiyajjhayadaṇḍā valayasayakhaṇḍiya karakarassa tatthēva viddavaṁ uvagayā.

1.9.2.2

taē ṇaṁ tīē nāvāē bhijjamāṇīē tē bahavē purisā vipula-paṇiya-bhaṇḍamāyāē antō jalaṁmi nimajjāviyā yāvi hōtthā.

1.9.3.1

taē ṇaṁ tē māgandiya-dāragā chēyā dakkhā pattaṭṭhā kusalā mēhāvī niuṇasippōvagayā bahūsu pōyavahaṇa-samparāēsu kayakaraṇā laddhavijayā amūḍhā amūḍhahatthā ēgaṁ mahaṁ phalagakhaṇḍaṁ āsādēnti jaṁsi ca ṇaṁ paēsaṁsi sē pōyavahaṇē vivaṇṇē taṁsi ca ṇaṁ paēsaṁsiēgē mahaṁ rayaṇadīvē nāmaṁ dīvē hōtthā-aṇēgāiṁ jōyaṇāiṁ āyāmavikkhambhēṇaṁ aṇēgāiṁ jōyaṇāiṁ parikkhēvēṇaṁ nāṇādumasaṇḍa-maṇḍiuddēsē sassisarīē pāsāīē darisaṇijjē abhirūvē paḍirūvē.

1.9.3.2

tassa bahumajjhadēsabhāē ēttha ṇaṁ mahaṁ ēgē pāsāyavaḍēṁsaē yāvi hōtthā-abbhuggayamūsiya-pahasiē jāva sassirīyarūvē pāsāīē darisaṇijjē abhirūvē paḍirūvē.

1.9.3.3

tattha ṇaṁ pāsāyavaḍēṁsaē rayaṇaddīva-dēvayā nāmaṁ dēvayā parivasaï-pāvā caṇḍā ruddā khuddā sāhassiyā.

1.9.3.4

tassa ṇaṁ pāsāyavaḍēṁsayassa caüddisiṁ cattāri vaṇasaṇḍā-kiṇhā kiṇhō-bhāsā, taē ṇaṁ tē mākandiya-dāragā tēṇaṁ phalayakhaṇḍēṇaṁ ōvujjhamāṇā-ōvujjhamāṇā rayaṇadīvantēṇaṁ saṁvūḍhā yāvi hōtthā, taē ṇaṁ tē māgandiya-dāragā thāhaṁ labhanti muhuttantaraṁ āsasanti phalagakhaṇḍaṁ visajjēnti, rayaṇadīvaṁ uttaranti, phalāṇaṁ maggaṇa-gavēsaṇaṁ karēnti, phalāiṁ āhārēnti, nāliērāṇaṁ maggaṇa-gavēsaṇaṁ karēnti, nāliērāiṁ phōḍēnti, nāliēratēllēṇaṁ annamannassa gattāiṁ abbhaṅgēnti, pōkkharaṇīō ōgāhēnti, jalamajjaṇaṁ karēnti, pōkkharaṇīō paccuttaranti, puḍhavisilā vaṭṭayaṁsi nisīyanti nisīittā āsatthā vīsatthā suhāsaṇavaragayā campaṁ nayariṁ ammāpiuāpucchaṇaṁ ca lavaṇasamuddōttāraṇaṁ ca kāliyavāyasammucchaṇaṁ ca pōyavahaṇavivattiṁ ca phalayakhaṇḍassa sāyaṇaṁ ca rayaṇaddīvōttāraṁ ca anucintēmāṇā-anucintēmāṇā ōhayamaṇasaṅkappā jāva jhiyāyanti.

1.9.3.5

taē ṇaṁ sā rayaṇaddīvadēvayā tē māgandiya-dāraē ōhiṇā ābhōēi asikhēḍagavagga-hatthā-sattaṭṭhatalappamāṇaṁ uḍḍhaṁ vēhāsaṁ uppayaï uppaïttā tāē ukkiṭṭhāē jāva dēvagaīē vīīvayamāṇī-vīīvayamāṇī jēṇēva māgandiya-dārayā tēṇēva uvāgacchaï uvāgacchittā āsuruttā māgandiya-dāraē khara-pharusa-niṭṭhura-vayaṇēhiṁ ēvaṁ vayāsī—

1.9.3.6

haṁ bhō māgandiya-dārayā! appatthiya patthiyā, jaï ṇaṁ tubbhē maē saddhiṁ viulāiṁ bhōga-bhōgāiṁ bhuñjamāṇā viharaha tō bhē atthi jīviyaṁ, ahaṇṇaṁ tubbhē maē saddhiṁ viulāiṁ bhōgabhōgāiṁ bhuñjamāṇā nō viharaha tō bhē imēṇaṁ nīluppalagavalaguliya jāva khuradhārēṇaṁ asiṇā rattagaṇḍamaṁsuyāiṁ māuāhiṁ uvasōhiyāiṁ tālapha-lāṇi va sīsāiṁ ēgantē ēḍēsi, tatē ṇaṁ tē māgandiya-dāragā rayaṇadīvadēvayāē antiē ēyamaṭṭhaṁ sōccā bhīyā karayala0 ēvaṁ vayāsī — jaṇṇaṁ dēvāṇuppiyā! vaïssanti tassa āṇā-uvavāya-vayaṇa-niddēsē ciṭṭhissāmō.

1.9.3.7

taē ṇaṁ sā rayaṇadīvadēvayā tē māgandiya-dāraē gēṇhaï, jēṇēva pāsāya-vaḍēṁsaē tēṇēva uvāgacchaï, asubhapōggalāvahāraṁ karēi, subhapōggalapakkhēvaṁ karēi, taō pacchā tēhiṁ saddhiṁ viulāiṁ bhōgabhōgāiṁ bhuñjamāṇī viharaha kallākalliṁ ca amayaphalāiṁ uvaṇēi.

1.9.4.1

taē ṇaṁ sā rayaṇadīvadēvayā sakkavayaṇa-sandēsēṇaṁ suṭṭhiēṇaṁ lavaṇāhivaïṇā lavaṇasamuddē tisattakhuttō anupariyaṭṭēyavvē tti jaṁ kiñci tattha taṇaṁ vā pattaṁ vā kaṭṭhaṁ vā kayavaraṁ vā asuiṁ pūiyaṁ durabhigandhama-cōkkhaṁ taṁ savvaṁ āhuṇiya-āhuṇiya tisattakhuttō ēgantē ēḍēyavvaṁ ti kaṭṭu niuttā, taē ṇaṁ sā rayaṇadīvadēvayā tē māgandiya-dāraē ēvaṁ vayāsī — ēvaṁ khalu ahaṁ dēvāṇuppiyā! sakkavayaṇa-sandēsēṇaṁ suṭṭhiēṇaṁ taṁ cēva jāva niuttā, taṁ jāva ahaṁ dēvāṇuppiyā! lavaṇasamuddē jāva ēḍimi tāva tubbhē ihēva pāsāvayaḍēṁsaē suhaṁsuhēṇaṁ abhiramamāṇā ciṭṭhaha, jaï ṇaṁ tubbhē ēyaṁsi antaraṁsi uvviggā vā ussuyā vā uppuyā vā bhavējjāha tō ṇaṁ tubbhē puratthimillaṁ vaṇasaṇḍaṁ gacchējjāha, tattha ṇaṁ dō ūū sayā sāhīṇā taṁ jahā—pāusē ya vāsārattē ya.

1.9.5.1

tattha u-kandala-silindha-dantō niusa-varapupphapīvarakarō .
kuḍayajjuṇa-nīva-surabhidāṇō pāusaüū gayavarōsāhīṇō ..

1.9.6.1

tattha ya-suragōvamaṇi-vicittō daddurakularasiya-ujjhararavō .
barahiṇavanda-pariṇaddhasirahō vāsārattaüū pavvaō sāhīṇō ..

1.9.7.1

tattha ṇaṁ tubbhē dēvāṇuppiyā! bahūsu vāvīsu ya jāva sarasarapantiyāsu ya bahūsu ālīgharaēsu ya mālīgharaēsu ya jāva kusumagharaēsu ya suhaṁsuhēṇaṁ abhiramamāṇā abhiramāṇā viharijjāha, jaï ṇaṁ tubbhē tattha vi uvviggā vā ussuyā vā uppuyā vā bhavējjāha tō ṇaṁ tubbhē uttarillaṁ vaṇasaṇḍaṁ gacchējjāha, tattha ṇaṁ dō ūū sayā sāhīṇā taṁ jahā— saradō ya hēmantō ya.

1.9.8.1

tattha u-saṇa-sattivaṇṇa-kaühō nīluppala-paüma-naliṇa-siṅgō .
sārasa-cakkāya-raviyaghōsō sarayaüū gōvaī sāhīṇō ..

1.9.9.1

tattha u-saṇa-sattivaṇṇa-kaühō nīluppala-paüma-naliṇa-siṅgō .
sārasa-cakkāya-raviyaghōsō sarayaüū gōvaī sāhīṇō ..

1.9.10.1

tattha ya-siyakunda-dhavalajōṇhō kusumiya-lōddhavaṇasaṇḍa-maṇḍalatalō .
tusāra-dagadhāra-pīvarakarō hēmantaüū sasī sayā sāhīṇō ..

1.9.11.1

tattha ṇaṁ tubbhē dēvāṇuppiyā! bāvīsu ya jāva viharijjāha, jaï ṇaṁ tubbhē tatthavi uvviggā vā jāva ussuyā vā bhavējjāha tō ṇaṁ tubbhē avarillaṁ vaṇasaṇḍaṁ gacchējjāha, tattha ṇaṁ dō ūū sayā sāhīṇā, taṁ jahā— vasantē ya gimhē ya.

1.9.12.1

tattha u-sahakāra-cāruhārō kiṁsuya-kaṇṇiyārāsōgamaüḍō .
ūsiyatilaga-bakulāyavattō vasantaüū naravaī sāhīṇō ..

1.9.13.1

tattha ya-pāḍala-sirīsa salilō malliyā-vāsantiya-dhavalavēlō .
sīyalasurabhi-nila-magaracariō gimhaüū sāgarōsāhīṇō ..

1.9.14.1

tattha ṇaṁ bahūsu jāva viharējjāē, jaï ṇaṁ tubbhē dēvāṇuppiyā! tattha vi uvviggā vā ussuyā vā bhavējjāha, taō tubbhē jēṇēva pāsayavaḍēṁsaē tēṇēva uvāgacchējjāha, mamaṁ paḍivālēmāṇā-paḍivālēmāṇā ciṭṭhējjāha, mā ṇaṁ tubbhē dakkhiṇillē vaṇasaṇḍaṁ gacchējjāha, tattha ṇaṁ mahaṁ ēgē uggavisē caṇḍavisē ghōravisē mahāvisē aïkāē mahākāē jahā tēyanisaggē masi-mahisa-mūsā-kālaē nayaṇavisarōsapunnē nayaṇavisarōsapuṇṇē añjaṇapuñjaniyarappagāsē rattacchē jamalajuyala-cañcala calantajīhē dharaṇiyala vēṇibhūē ukkaḍa- phuḍa-kuḍila-jaḍula- kakkhaḍa-viyaḍa-phaḍāḍōva-karaṇa-dacchē lōhāgaradhammamāṇa-dhamadhamēntaghōsē aṇāgaliya-caṇḍativvarōsē samuhiya-turiya-cavalaṁ dhamantē diṭṭhīvisē sappēya parivasaï, mā ṇaṁ tubbhaṁ sarīragassa vāvattī bhavissaï tē māgandiya-dāraē dōccampi taccampi ēvaṁ vadati vadittā vēuvviyasamugghāēṇaṁ samōhaṇṇaï samōhaṇittā tāē ukkiṭṭhāē dēvagaīē lavaṇasamuddaṁ tisattakhuttō anupariyaṭṭēuṁ payattā yāvi hōtthā.

1.9.15.1

taē ṇaṁ tē māgandiya-dārayā taō muhuttantarassa pāsāyavaḍēṁsaē saïṁ vā raïṁ vā dhiiṁ vā alabhamāṇā aṇṇamaṇṇaṁ ēvaṁ vayāsī — ēvaṁ khalu dēvāṇuppiyā! rayaṇadīvadēvayā amhē ēvaṁ vayāsī—

1.9.15.2

ēvaṁ khalu ahaṁ sakkavayaṇa-sandēsēṇaṁ suṭṭhiēṇaṁ lavaṇāhivaïṇā jāva vāvattī bhavissaï, taṁ sēyaṁ khalu amhaṁ dēvāṇuppiyā! puratthimillaṁ vaṇasaṇḍaṁ gamittaē-aṇṇamaṇṇassa ēyamaṭṭhaṁ paḍisuṇēnti paḍisuṇēttā jēṇēva puratthimillē vaṇasaṇḍē tēṇēva uvāgacchanti, tattha ṇaṁ vāvīsu ya jāva abhiramamāṇā ālīgharaēsu ya jāva viharanti.

1.9.15.3

taē ṇaṁ tē māgandiya-dāragā tattha vi saïṁ vā jāva alabhamāṇā jēṇēva uttarillē vaṇasaṇḍē tēṇēva uvāgacchanti, tattha ṇaṁ vāvīsu ya jāva ālīgharaēsu ya viharanti, taē ṇaṁ tē māgandiya-dāragā tatthavi saïṁ vā jāva alabhamāṇā jēṇēva paccatthimillē vaṇasaṇḍē tēṇēva uvāgacchanti jāva viharanti.

1.9.15.4

taē ṇaṁ tē māgandiya-dāragā tattha vi saïṁ vā jāva aṇṇamaṇṇaṁ ēvaṁ vayāsī — ēvaṁ khalu dēvāṇuppiyā amhē rayaṇadīvadēvayā ēvaṁvayāsī — ēvaṁ khalu ahaṁ dēvāṇuppiyā! sakkavayaṇa-sandēsaṇaṁ suṭṭhiēṇaṁ lavaṇāhivaïṇā niuttā jāva mā ṇaṁ tubbhaṁ sarīragassa vāvattī bhavissaï taṁ bhaviyavvaṁ ēttha kāraṇēṇaṁ, taṁ sēyaṁ khalu amhaṁ dakkhiṇillaṁ vaṇasaṇḍaṁ jāva tēṇēva pahārēttha gamaṇāē, taō ṇaṁ gandhē niddhāi sē jahā-nāmaē-ahimaḍē i vā jāva aṇiṭṭhatarāē cēva.

1.9.15.5

taē ṇaṁ tē māgandiya-dāragā tēṇaṁ asubhēṇaṁ gandhēṇaṁ abhibhūyā samāṇā saēhiṁ-saēhiṁ uttarijjēhiṁ āsāiṁ pihēnti pihēttā jēṇēva dakkhiṇillē vaṇasaṇḍē tēṇēva uvāgayā tattha ṇaṁ mahaṁ ēgaṁ āghāyaṇaṁ pāsanti-aṭṭhiyarāsi-saya-saṅkulaṁ bhīma-darisaṇijjaṁ ēgaṁ ca tattha sūlāiyaṁ purisaṁ kaluṇāiṁ vissarātiṁ kaṭṭhāiṁ vissarāiṁ kūvamāṇaṁ pāsanti, bhīyā jāva sañjāyabhayā jēṇēva sē sūlāiē purisē tēṇēva uvāgacchanti uvāgacchittā taṁ sūlāiyaṁ purisaṁ ēvaṁ vayāsī—

1.9.15.6

ēsa ṇaṁ dēvāṇuppiyā! kassāghayaṇē tumaṁ ca ṇaṁ kē kaō vā ihaṁ havvamāē kēṇaṁ vā imēyārūvaṁ āvayaṁ pāviē? taē ṇaṁ sē sūlāiē purisē tē māgandiya-dāragē ēvaṁ vayāsī — ēsa ṇaṁ dēvāṇuppiyā! rayaṇadīvadēvayāē āghayaṇē ahaṁ ṇaṁ dēvāṇuppiyā! jambuddīvāō dīvāō bhārahāō vāsāō kāgandīē āsavāṇiyaē vipulaṁ paṇiyabhaṇḍamāyāē pōyavahaṇēṇaṁ lavaṇasamuddaṁ ōyāē, taē ṇaṁ ahaṁ pōyavahaṇavivattīē nibbuḍ-bhaṇḍasārē ēgaṁ phalagakhaṇḍaṁ āsāēmi, tatē ṇaṁ ahaṁ ōvujjhamāṇē-ōvujjhamāṇē rayaṇadīvantēṇaṁ saṁvūḍhē, taē ṇaṁ sā rayaṇadīvadēvayā mamaṁ ōhiṇā pāsaï pāsittā mamaṁ gēṇhaï gēṇhittā maē saddhiṁ viulāiṁ bhōgabhōgāiṁ bhuñjamāṇī viharaï.

1.9.15.7

taē ṇaṁ sā rayaṇadīvadēvayā aṇṇayā kayāi ahālahusagaṁsi avarāhaṁsi parikuviyā samāṇī mamaṁ ēyārūvaṁ āvatiṁ pāvēi taṁ na najjaï ṇaṁ dēvāṇuppiyā! tubbhaṁ pi imēsiṁ sarīragāṇaṁ kā maṇṇē āvaī bhavissaï?.

1.9.16.1

taē ṇaṁ tēmāgandiya-dāragā tassa sūlāigassa antiē ēyamaṭṭhaṁ sōccā nisammaṁ baliyataraṁ bhīyā jāva sañjāyabhayā sūlāiyaṁ purisaṁ ēvaṁ vayāsī — kahaṇṇaṁ dēvāṇuppiyā! amhē rayaṇadīvadēvayāē hatthāō sāhitthaṁ nittharējjāmō? taē ṇaṁ sē sūlāiē purisē tē māgandiya-dāragē ēvaṁ vayāsī—

1.9.16.2

ēsa ṇaṁ dēvāṇuppiyā! puratthimillē vaṇasaṇḍē sēlagassa jakkhassa jakkhāvayaṇē, sēlaē nāmaṁ āsarūvadhārī jakkhē parivasaï, taē ṇaṁ sē sēlaē jakkhē cāuddasaṭṭhamuddiṭṭhupunnamāsiṇīsu āgaya-samaē pattasamaē mahayā-mahayā saddēṇaṁ ēvaṁ vadaï- kaṁ tārayāmi kaṁ pālayāmi? taṁ gacchaha ṇaṁ tubbhē dēvāṇuppiyā! puratthimillaṁ vaṇasaṇḍaṁ sēlagassa jakkhassa maharihaṁ pupphaccaṇiyaṁ karēha karēttā jannupāyavaḍiyā pañjaliuḍā viṇaēṇaṁ pajjuvāsamāṇā ciṭṭhaha, jāhē ṇaṁ sē sēlaē jakkhē āgayasamaē pattasamaē ēvaṁ vaējjā- kaṁ tārayāmi kaṁ pālayāmi, tāhē tubbhē ēvaṁ vadaha- amhē tārayāhi amhē pālayāhi, sēlaē bhē jakkhē paraṁ rayaṇadīvadēvayāē hatthāō sāhatthiṁ nitthārējjā, aṇṇahā bhē na yāṇāmi imēsiṁ sarīragāṇaṁ kā maṇṇē āvaī bhavissaï.

1.9.16.3

taē ṇaṁ tē māgandiya-dāragā tassa sūlāiyassa purisassa antiē ēyamaṭṭhaṁ sōccā nisammā sigghaṁ caṇḍaṁ cavalaṁ turiyaṁ cēiyaṁ jēṇēva puratthimillē vaṇasaṇḍē jēṇēva pōkkhariṇī tēṇēva uvāgacchanti uvāgacchittā pōkkhariṇī ōgāhēnti ōgāhēttā jalamajjaṇaṁ karēnti karēttā jāiṁ tattha uppalāiṁ jāva tāiṁ gēṇhanti gēṇhittā jēṇēva sēlagassa jakkhassa jakkhāyayaṇē tēṇēva uvāgacchanti uvāgacchittā ālōē paṇāmaṁ karēnti karēttā maharihaṁ pupphaccaṇiyaṁ karēnti karēttā jannupāyavaḍiyā sussūsamāṇā namaṁsamāṇā pajjuvāsanti.

1.9.16.4

taē ṇaṁ sē sēlaē jakkhē āgayasamaē pattasamaē ēvaṁ vayāsī — kaṁ tārayami kaṁ pālayāmi? taē ṇaṁ tē māgandiya-dāragā uṭṭhāē uṭṭhēti uṭṭhēttā karayala0 ēvaṁ vayāsī — amhē tārayāhi amhē pālayāhi, taē ṇaṁ sē sēlaē jakkhē tē māgandiya-dāraē ēvaṁ vayāsī — ēvaṁ khalu dēvāṇuppiyā! tubbhaṁ maē saddhiṁ lavaṇasamuddaṁ majjhaṁmajjhēṇaṁ vīīvayamāṇāṇaṁ sā rayaṇadīvadēvayā pāvā caṇḍā ruddā khuddā sāhasiyā bahūhiṁ kharaēhi ya maüēhi ya aṇulōmēhi ya paḍilōmēhi ya siṅgārēhi ya kaluṇēhi ya uvasaggēhi uvasaggaṁ karēhii taṁ jaï ṇaṁ tubbhē dēvāṇuppiyā! rayaṇadīvadēvayāē ēyamaṭṭhaṁ āḍhāha vā pariyāṇahā vā avayēkkhaha vā tō bhē ahaṁ piṭṭhāō vihuṇāmi, aha ṇaṁ tubbhē rayaṇadīvadēvayāē ēyamaṭṭhaṁ nō āḍhāha nō pariyāṇaha nō avayakkhaha tō bhē rayaṇadīvadēvayāēhatthāō sāhatthiṁ nitthārēmi.

1.9.16.5

taē ṇaṁ tē māgandiya-dāragā sēlagaṁ jakkhaṁ ēvaṁ vayāsī — jaṁ ṇaṁ dēvāṇuppiyā! vaïssanti tassa ṇaṁ āṇā uvavāya-vayaṇa-niddēsē ciṭṭhissāō, taē ṇaṁ sē sēlaē jakkhē uttarapuratthimaṁ disībhāgaṁ avakkamaï avakkamittā vēuvvisamugghāēṇaṁ samōhaṇṇaï samōhaṇittā saṅkhējjāiṁ jōyaṇāiṁ daṇḍaṁ nissaraï dōccampi vēuvviyasamugghāēṇaṁ samōhaṇṇaï samōhaṇittā ēgaṁ mahaṁ āsarūvaṁ viuvvaï viuvvittā māgandiya-dāraē ēvaṁ vayāsī — hambhō māgandiya-dārayā! āruha ṇaṁ dēvāṇuppiyā! mama paṭṭhaṁsi, taē ṇaṁ tē mādaṅgiyadārayā haṭṭhā sēlagassa jakkhassa paṇāmaṁ karēnti karēttā sēlagassa piṭṭhaṁ durūḍhā, taē ṇaṁ sē sēlaē tē māgandiya-dāraē paṭṭhē durūḍhē jāṇittā sattaṭṭhatalappamāṇamēttāiṁ uḍḍhaṁvēhāsaṁ uppayaï uppaïttā tāē ukkiṭṭhāē turiyāē0 divvāē dēvagaīē lavaṇasamuddaṁ majjhaṁmajjhēṇaṁ jēṇēva jambuddīvē dīvē jēṇēva bhārahē vāsē jēṇēva campānayarī tēṇēva pahārēttha gamaṇāē.

1.9.17.1

taē ṇaṁ sā rayaṇadīvadēvayā lavaṇasamuddaṁ tisattakhuttō anupariyaṭṭaï jaṁ tattha taṇaṁ vā jāva ēgantē ēḍēi, jēṇēva pāsāyavaḍēṁsaē tēṇēva uvāgacchaï uvāgacchittā tē māgandiya-dhāraē pāsāyavaḍēṁsaē apāsamāṇī jēṇēva puratthimillē vaṇasaṇḍē jāva savvaō samantā maggaṇa-gavēsaṇaṁ karēi karēttā tēsiṁ māgandiya-dāragāṇaṁ katthaï suiṁ vā0 alabha-māṇī jēṇēva uttarillē ēvaṁ cēva paccatthimillēvi jāva apāsamāṇī ōhiṁ paüñjaï, tē māgandiya-dāraē sēlaēṇaṁ saddhiṁ lavaṇasamuddaṁ majjhaṁ-majjhēṇaṁ vīivayamāṇē pāsaï pāsittā āsuruttā asikhēḍagaṁ gēṇhaï gēṇhittā sattaṭṭha jāva uppayaï uppaïttā tāē ukkiṭṭhāē dēvagaīē jēṇēva māgandiya-dārayā tēṇēva uvāgacchaï uvāgacchittā ēvaṁ vayāsī—

1.9.17.2

haṁ bhō māgandiya-dāragā apatthiyapatthiyā kiṇṇaṁ tubbhē jāṇaha mamaṁ vippajahāya sēlaēṇaṁ jakkhēṇaṁ saddhiṁ lavaṇasamuddaṁ majjhaṁmajjhēṇaṁ vīīvayamāṇā? taṁ ēvamavi gaē jaï ṇaṁ tubbhē mamaṁ avayakkhaha tō bhē atthi jīviyaṁ, ahaṁ ṇaṁ nāvayakkhaha tō bhē imēṇaṁ nīluppalagavala jāva ēḍēmi, taē ṇaṁ tē māgandiya-dāragā rayaṇadīvadēvayāē antiē ēyamaṭṭhaṁ sōccā nisamma abhīyā atatthā anuvviggā akkhubhiyā asambhantā rayaṇadīvadēvayāē ēyamaṭṭhaṁ nō āḍhanti nō pariyāṇanti nō avayakkhanti aṇāḍhāyamāṇā apariyāmāṇā aṇavayakkhamāṇā sēlaēṇaṁ jakkhēṇaṁ saddhiṁ lavaṇasamuddaṁ majjhaṁmajjhēṇaṁ vīīvayanti.

1.9.17.3

taē ṇaṁ sā rayaṇadīvadēvayā tē māgandiya-dāraē jāhē nō sañcāēi bahūhiṁ paḍilōmēhi uvasaggēhi cālittaē vā lōbhittaē vā khōbhittaē vā vipariṇāmittaē vā tāhē mahurēhiṁ siṅgārēhi ya kaluṇēhi ya uvasaggēhi uvasaggēuṁ payattā yāvi hōtthāhaṁ bhō māgandiya-dāragā jaï ṇaṁ tubbhēhiṁ dēvāṇuppiyā! maē saddhiṁ hasiyāṇi ya ramiyāṇi ya laliyāṇi ya kīliyāṇi ya hiṇḍiyāṇi ya mōhiyāṇi ya tāhē ṇaṁ tubbhē savvāiṁ agaṇēmāṇā mamaṁ vippajahāya sēlaēṇaṁ saddhiṁ lavaṇasamuddaṁ majjhaṁmajjhēṇaṁ vīivayaha, taē ṇaṁ sā rayaṇadīvadēvayā jiṇarakkhiyassa maṇaṁ ōhiṇā ābhōēi ābhōēttā ēvaṁ vayāsī — niccampi ya ṇaṁ ahaṁ jiṇapāliyassa aṇiṭṭhā akantā appiyā amaṇuṇṇā amaṇāmā niccaṁ mamaṁ jiṇapāliē aṇiṭṭhē akantē appiē amaṇuṇṇē amaṇāṇē niccampi ya ṇaṁ ahaṁ jiṇarakkhiyassa iṭṭhā kantā piyā maṇuṇṇā maṇāmā niccampi ya ṇaṁ mamaṁ jiṇarakkhiē iṭṭhē kantē piē maṇuṇṇē maṇāmē, jaï ṇaṁ mamaṁ jiṇapāliē rōyamāṇiṁ kandamāṇiṁ sōyamāṇiṁ tippamāṇiṁ vilavamāṇiṁ nāvayakkhaï kiṇṇaṁ tumampi jiṇarakkhiyā! mamaṁ rōyamāṇiṁ kandamāṇiṁ sōyamāṇiṁ tippamāṇiṁ vilavamāṇiṁ nāvayakkhasi?.

1.9.18.1

sā pavararayaṇadīvassa dēvayā ōhiṇā jiṇarakkhiyassa nāūṇa .
vadhanimittaṁ uvariṁ māgandiya-dāragāṇa dōṇhampi ..

1.9.19.1

dōsakaliyā salaliyaṁ nāṇāviha-cuṇṇavāsa-mīsa divvaṁ .
dhāṇa-maṇa-nivvuikaraṁsavvōuya-surabhikusuma-vuṭṭhimpamuñcamāṇī ..

1.9.20.1

nāṇāmaṇi-kaṇaga-rayaṇa-ghaṇṭiyākhiṅkhiṇi nēura-mēhala-bhūsaṇaravēṇaṁ .
disāō vidisāō pūrayantī vayaṇamiṇaṁ vēi sā sakalusā ..

1.9.21.1

hōla vasula gōla nāha daïta piya ramaṇa .
kanta sāmiya nigdhiṇa nitthakka ..
thiṇṇa nikkikava akayaṇṇuya siḍhilabhāva nillajja lukkha .
akaluṇa jiṇarakkhiya majjhaṁ hiyayarakkhagā ..

1.9.22.1

na hu jujjasi ēkkiyaṁ aṇāhaṁ abandhavaṁ tujjha .
calaṇa-ōvāyakāriyaṁ ujjhiuṁ mahannaṁ .
guṇasaṅkara! ahaṁ tumē vihūṇā na samatthāvi jīviuṁ khaṇampi ..

1.9.23.1

imassa u aṇēgajhasa-magara-vividhasāvaya- .
sayāuladharassa rayaṇāgarassa majjhē ..
appāṇaṁ vahēmi tujjha puraō ēhi niyattāhi .
jaï si kuviō khamāhi ēgāvarāhaṁ mē ..

1.9.24.1

tujjha yavigayadhaṇa-vimalasisamaṇḍalāgāra-sassirīyaṁ .
sārayanavakamala-kumuda-kuvalaya-dalanikarisa nibhanayaṇaṁ ..
vayaṇaṁ pivāsāgayāē saddhā mē pēcchiuñjē .
avalōēhiṁ tā i mamaṁ nāha jā tē pēcchāmi vayaṇakamalaṁ ..

1.9.25.1

ēva sappaṇaya-sarala-mahurāiṁ puṇō-puṇō kaluṇāiṁ .
vayaṇāiṁ jampamāṇī sā pāvā maggaō samaṇṇēi pāvahiyayā ..

1.9.26.1

taē ṇaṁ sē jiṇarakkhiē calamaṇē tēṇēva bhūsaṇaravēṇaṁ kaṇṇasuhamaṇaharēṇaṁ tēhi ya sappaṇaya-sarala-mahura-bhaṇiēhiṁ sañjāya-viuṇa-rāē rayaṇadīvassa dēvayāē tīsē sundarathaṇa-jahaṇa-vayaṇa-kara-caraṇa-nayaṇa-lāvaṇṇa-rūva-jōvaṇṇasiriṁ ca divvaṁ sarabhasa-uvagūhiyāiṁ bibbōya-vilasiyāṇi ya vihasiya-sakaḍakkhadiṭṭhi-nissasiya-maliya-uvalaliya-thiya-gamaṇa-paṇaya-khijjiya-pāsāiyāṇi ya saramāṇē rāga-mōhiyamatī avasē kammavasagaē avayakkhaï maggatō saviliyaṁ.

1.9.26.2

taē ṇaṁ jiṇarakkhiyaṁ samuppaṇṇakaluṇabhāvaṁ maccu-galatthalla-nōlliyamaïṁ avayakkhantaṁ tahēva jakkhē u sēlaē jāṇiūṇa saṇiyaṁ-saṇiyaṁ uvvihaï niyagapaṭṭhāhi viyagasaddhē taē ṇaṁ sā rayaṇadīvadēvayā nissaṁsā kaluṇaṁ jiṇarakkhiyaṁ sakalusā sēlagapaṭṭhāhiṁ ōvayantaṁ-dāsa maōsi tti jampamāṇī apattaṁ sāgarasalilaṁ gēṇhiya vāhāhiṁ ārasantaṁ uḍḍhaṁ uvvihaï ambaratalē ōvayamāṇaṁ ca maṇḍalaggēṇaṁ paḍicchittā nīluppala-gavalaguliya-ayasikusumappāgāsēṇa asivarēṇa khaṇḍākhaṇḍi karēi karēttā tatthēva vilavamāṇaṁ tassa ya sarasa-vahiyassa ghēttūṇaṁ aṅgamaṅgāiṁ saruhirāiṁ ukkhittabaliṁ caüddisiṁ karēi sā pañjalī pahiṭṭhā.

1.9.27.1

ēvāmēva samaṇāusō! jō amhaṁ nigganthō vā nigganthī vā āyariya-uvajjhāyāṇaṁ antiē pavvaïē samāṇē punaravi māṇussaē kāmabhōgē āsāyaï patthaï pīhēi abhilasaï sē ṇaṁ ihabhavē cēva bahūṇaṁ samaṇāṇaṁ bahūṇaṁ samaṇīṇaṁ bahūṇaṁ sāvayāṇaṁ bahūṇaṁ sāviyāṇa ya hīlaṇijjē jāva saṁsārakantāraṁ bhujjō-bhujjō anupariyaṭṭissaï jahā va sē jiṇarakkhiē.

1.9.28.1

challiō avayakkhantō niravayakkhō gaō avigdhēṇaṁ .
tamhā pavayaṇasārē nirāvayakkhēṇaṁ bhaviyavvaṁ ..

1.9.29.1

bhōgē avayakkhantā paḍanti saṁsārasāgarē dhōrē .
bhōgēhiṁ niravayakkhā taranti saṁsārakantāraṁ ..

1.9.30.1

taē ṇaṁ sā rayaṇadīvadēvayā jēṇēva jiṇapāliē tēṇēva uvāgacchaï bahūhiṁ anulōmēhi ya paḍilōmēhi ya kharaēhi ya maüēhi ya siṅgārēhi kaluṇēhi ya uvasaggēhi jāhē nō sañcāēi cālittaē vā khōbhittaē vā vipariṇāmittaē vā tāhē santā tantā paritantā nivviṇṇā samāṇā jāmēva disiṁ pāubbhūyā tāmēva disiṁ paḍigayā.

1.9.30.2

taē ṇaṁ sē sēlaē jakkhē jiṇapāliēṇa saddhiṁ lavaṇasamuddaṁ majjhaṁmajjhēṇaṁ vīīvayaï vīīvaïttā jēṇēva campā nayarī tēṇēva uvāgacchaï uvāgacchittā campāē nayarīē aggujjāṇaṁsi jiṇapāliyaṁ piṭṭhāō ōyārēi ōyārēttā ēvaṁ vayāsī — ēsa ṇaṁ dēvāṇuppiyā campā nayarī dīsaï tti kaṭṭu jiṇapāliyaṁ pucchaï jāmēva disaṁ pāubbhūē tāmēva disiṁ paḍigaē.

1.9.31.1

taē ṇaṁ sē jiṇapāliē campaṁ nayari anupavisaï anupavisittā jēṇēva saē gihē jēṇēva ammāpiyarō tēṇēva uvāgacchaï uvāgacchittā ammāpiūṇaṁ rōyamāṇē jāva vilavamāṇē jiṇarakkhiya-vāvattiṁ nivēdēi taē ṇaṁ jiṇapāliē ammāpiyarō mitta-nāi-jāva pariyaṇēṇaṁ saddhiṁ rōyamāṇā0 bahūiṁ lōiyāiṁ mayakiccāiṁ karēnti karēttā kālēṇaṁ vigayasōyā jāyā.

1.9.31.2

taē ṇaṁ jiṇapāliyaṁ aṇṇayā kayāiṁ suhāsaṇavaragayaṁ ammāpiyarō ēvaṁ vayāsī — kahaṇṇaṁ puttā! jiṇarakkhiē kālagaē? taē ṇaṁ sē jiṇapāliē ammāpiūṇaṁ lavaṇasamuddōttāraṁ ca kāliyavāya-saṁmucchaṇaṁ ca pōyavahaṇa-vivattiṁ ca phalahakhaṇḍaāsāyaṇaṁ ca rayaṇadīvuttāraṁ ca rayaṇadīva dēvayā-giṇhaṁṇaṁ ca bhōgavibhūiṁ ca rayaṇadīvadēvayā-appāhaṇaṁ ca sūlāiyapurisadarisaṇaṁ ca sēlagajakkhāāruhaṇaṁ ca rayaṇadīvadēvayā-uvasaggaṁ ca jiṇarakkhiyavāvattiṁ ca lavaṇasamuddaütaraṇaṁ ca campāgamaṇaṁ ca sēlagajakkha āpucchaṇaṁ ca jahābhūyamavitahama-sandiddhaṁ parikahēi.

1.9.31.3

taē ṇaṁ sē jiṇapāliē appasōgē jāē jāva vipulāiṁ bhōgabhōgāiṁ bhuñjamāṇē viharaï.

1.9.32.1

tēṇaṁ kālēṇaṁ tēṇaṁ samaēṇaṁ samaṇē bhagavaṁ mahāvīrē samōsaḍhē jiṇapāliē dhammaṁ sōccā pavvaïē ēgārasaṅgavī, māsiyāē saṁlēhaṇāē0 sōhammē kappē0, dō sāgarōvamāiṁ ṭhiī, mahāvidēhē vāsē sijjhihii0 ēvāmēva samaṇāusō! jāva māṇussaē kāmabhōgē nō puṇaravi āsayaï0 sē ṇaṁ jāva vīīvaïssaï- jahā va sē jiṇapāliē.

1.9.32.2

ēvaṁ khalu jambū! samaṇēṇaṁ bhagavayā mahāvīrēṇaṁ navamassa nāyajjhayaṇassa ayamaṭṭhē pannattē, tti bēmi.

Translations (2)

Commentaries (2)