Thanamga 4.2

Ṭhāṇaṃga 4.2

Language: Ardhamāgadhī Prakrit

4.2.1.1

cattāri paḍisaṁlīṇā pannattā taṁ jahā — kōhapaḍisaṁlīṇē māṇapaḍisaṁlīṇē māyāpaḍisaṁlīṇē lōbhapaḍisaṁlīṇē; cattāri apaḍisaṁlīṇā pannattā taṁ0- kōhaapaḍisaṁlīṇē jāva lōbhaapaḍisaṁlīṇē cattāri paḍisaṁlīṇā pannattā taṁ jahā — maṇapaḍisaṁlīṇē vatipaḍisaṁlīṇē kāyapaḍisaṁlīṇē indiyapaḍisaṁlīṇē cattāri apaḍisaṁlīṇā pa0 taṁ0- maṇaapaḍisaṁlīṇē jāva indiyaapaḍisaṁlīṇē.

4.2.2.1

cattāri purisajāyā pannattā taṁ jahā — dīṇē nāmamēgē dīṇē, dīṇē nāmēgē adīṇē, adīṇē nāmamēgē dīṇē, adīṇē nāmamēgē adīṇē; cattāri purisajāyā pannattā taṁ jahā dīṇē nāmamēgē dīṇapariṇatē, dīṇē nāmamēgē adīṇapariṇatē, adīṇē nāmamēgē dīṇapariṇatē, adīṇē nāmamēgē adīṇapariṇatē.

4.2.2.2

cattāri purisajāyā pannattā taṁ jahā — dīṇē nāmamēgē dīṇarūvē, dīṇē nāmamēgē adīṇarūvē, adīṇē nāmamēgē dīṇarūvē, adīṇē nāmamēgē adīṇarūvē.

4.2.2.3

ēvaṁ dīnamaṇē-4, dīnasaṅkappē-4, dīnapannē-4, dīnadiṭṭhī-4, dīnasīlācārē-4, dīnavavahārē-4, cattāri purisajāyā pa0 taṁ0- dīnē nāmamēgē dīna parakkamē, dīnē nāmaēgē adīnaparakkamē,-4. ēvaṁ savvēsiṁ caübhaṅgō bhāṇiyavvō.

4.2.2.4

cattāri purisajāyā pannattā taṁ jahā — dīṇē nāmamēgē dīṇaparakkamē dīṇē nāmamēgē adīṇaparakkamē adīṇē nāmamēgē dīṇaparakkamē adīṇē nāmamēgē adīṇaparakkamē cattāri purisajāyā pannattā taṁ jahā — dīṇē nāmamēgē dīṇavittī-4, ēvaṁ dīṇajāti, dīṇabhāsī, dīṇōbhāsī.

4.2.2.5

cattāri purisajātā pa0 taṁ0- dīnē nāmaēgē dīnasēvī-4. ēvaṁ dīnē nāma ēgē dīnapariyāē-4. dīnē nāma ēgē dīna pariyālē-4. savvattha caübhaṅgō.

4.2.3.1

cattāri purisajāyā pannattā taṁ jahā — ajjē nāmamēgē ajjē, ajjē nāmamēgē aṇajjē, aṇajjē nāmamēgē ajjē, aṇajjē nāmamēgē aṇajjē. cattāri purisajāyā pannattā taṁ jahā — ajjē nāmamēgē ajja pariṇaē-4, ēvaṁ ajjarūvē, ajjamaṇē, ajjasaṅkappē, ajjapannē, ajjadiṭṭhī, ajjasīlācārē, ajja vavahārē, ajjaparakkamē, ajjavittī, ajjajātī, ajjabhāsī, ajjaōbhāsī, ajjasēvī, ēvaṁ ajjapariyāē, ajjapariyālē. ēvaṁ sattara ālāvagā. jahā dīṇēṇaṁ bhaṇiyā tahā ajjēṇavi bhāṇiyavvā.

4.2.3.2

cattāri purisajāyā pannattā taṁ jahā — ajjē nāmamēgē ajjabhāvē ajjē nāmamēgē aṇajjabhāvē aṇajjē nāmamēgē ajjabhāvē aṇajjē nāmamēgē aṇajjabhāvē.

4.2.4.1

cattāri usabhā pannattā taṁ jahā — jātisampaṇṇē kulasampaṇṇē balasampaṇṇē rūvasampaṇṇē ēvāmēva cattāri purisajāyā pannattā taṁ jahā — jātisampaṇṇē jāva rūvasampaṇṇē.

4.2.4.2

cattāri usabhā pannattā taṁ jahā — jātisampaṇṇē nāmaṁ ēgē nō kulasampaṇṇē, kulasampaṇṇē nāmaṁ ēgē nō jātisampaṇṇē, ēgē jātisampaṇṇēvi kulasampaṇṇēvi, ēgē nō jātisampaṇṇē nō kulasampaṇṇē; ēvāmēva cattāri purisajāyā pannattā taṁ jahā — jātisampaṇṇē nāmaēgē-4.

4.2.4.3

cattāri usabhā pannattā taṁ jahā — jātisampaṇṇē nāmaṁ ēgē nō balasampaṇṇē-4. ēvāmēva cattāri purisajāyā pannattā taṁ jahā — jātisampaṇṇē.

4.2.4.4

cattāri usabhā pannattā taṁ jahā — jātisampaṇṇē nāmaṁ ēgē nō rūvasampaṇṇē-4. ēvāmēva cattāri purasajāyā pannattā taṁ jahā — jātisampaṇṇē nāmaṁ ēgē nō rūvasampaṇṇē, rūvasampaṇē nāmaṁ ēgē nō jātisaṁ paṇṇē-4.

4.2.4.5

cattāri usabhā pannattā taṁ jahā — kulasampaṇṇē nāmaṁ ēgē nō balasampaṇṇē-4, ēvāmēva cattāri purisajāyā pannattā taṁ jahā — kulasampaṇṇē nāmaṁ ēgē nō balasampaṇṇē-4, cattāri usabhā pannattā taṁ jahā — kulasampaṇṇē nāmaṁ ēgē nō rūvasampaṇṇē-4, ēvāmēva cattāri purisajāyā pannattā taṁ jahā — kulasampaṇṇē nāmaṁ ēgē-4, cattāri usabhā pannattā taṁ jahā — balasampaṇṇē nāmaṁ ēgē nō rūvasampaṇṇē-4, ēvāmēva cattāri purisajāyā pannattā taṁ jahā — balasampaṇṇē nāmaṁ ēgē-4.

4.2.4.6

cattāri hatthī pannattā taṁ jahā — bhaddē mandē miē saṅkiṇṇē, ēvāmēva cattāri purisājāyā pannattā jaṁ jahā — bhaddē mandē miē saṅkiṇṇē, cattāri hatthī pannattā taṁ jahā — bhaddē nāmamēgē bhaddamaṇē bhaddē nāmamēgē mandamaṇē bhaddē nāmamēgē miyamaṇē bhaddē nāmamēgē saṅkiṇṇamaṇē, ēvāmēva cattāri purisajāyā pannattā taṁ jahā — bhaddē nāmamēgē bhaddamaṇē, bhaddē nāmamēgē mandamaṇē, bhaddē nāmamēgē miyamaṇē, bhaddē nāmamēgē saṅkiṇṇamaṇē, cattāri hatthī pannattā taṁ jahā — mandē nāmamēgē bhaddamaṇē, mandē nāmamēgē mandamaṇē, mandē nāmamēgē miyamaṇē, mandē nāmamēgē saṅkiṇṇamaṇē ēvāmēva cattāri purisajāyā pannattā taṁ jahā — mandē nāmamēgē bhaddamaṇē taṁ cēvā.

4.2.4.7

cattāri hatthī pannattā taṁ jahā — miē nāmamēgē bhaddamaṇē, miē nāmamēgē mandamaṇē miē nāmamēgē miyamaṇē miē nāmamēgē saṅkiṇṇamaṇē, ēvāmēva cattāri purisajāyā pannattā taṁ jahā — miē nāmamēgē bhadda maṇē, taṁ cēva.

4.2.4.8

cattāri hatthī pannattā taṁ jahā — saṅkiṇṇē nāmamēgē bhaddamaṇē, saṅkiṇṇē nāmamēgē mandamaṇē, saṅkiṇṇē nāmamēgē miyamaṇē, saṅkiṇṇē nāmamēgē saṅkiṇṇamaṇē, ēvāmēva cattāri purisajāyā pannattā taṁ jahā — saṅkiṇṇē nāmamēgē bhaddamaṇē, taṁ cēva jāva saṅkiṇṇē nāmamēgē saṅkiṇṇamaṇē.

4.2.5.1

madhuguliya-piṅgalakkhō aṇupuvva-sujāya-dīhaṇaṅgūlō
puraō udaggadhīrō savvagasamādhitō bhaddō

4.2.6.1

cala-bahala-visama-cammō thūlasirō thalaēṇa pēēṇa
thūlanaha-danta-vālō haripiṅgala-lōyaṇō mandō

4.2.7.1

taṇuō taṇuyaggīō taṇuyataō taṇuyadanta-naha-vālō
bhīrū tatthuvviggō tāsī ya bhavē miē nāmaṁ

4.2.8.1

ētēsiṁ hatthīṇaṁ thōvā thōva tu jō aṇuharati hatthī
rūvēṇa va sīlēṇa va sō saṅkiṇṇatti nāyavvō

4.2.9.1

bhaddō majjaï saraē mandō uṇa majjatē vasantaṁmi
miu majjati hēmantē sakiṇṇō savvakālaṁmi

4.2.10.1

cattāri vikahāō pannattāō taṁ jahā — itthikahā bhattakahā dēsakahā rāyakahā, itthikahā caüvvihā pannattā taṁ jahā — itthīṇaṁ jāikahā itthīṇaṁ kulakahā itthīṇaṁ rūvakahā itthīṇaṁ ṇēvatthakahā; bhattakahā caüvvihā pannattā taṁ jahā — bhattassa āvāvakahā bhattassa ṇivvāvakahā bhattassa ārambhakahā bhattassa ṇiṭṭhāṇakahā; dēsakahā caüvvihā pannattā taṁ jahā — dēṁsavihikahā dēsavikappakahā dēsacchandakahā dēsaṇēvatthakahā; rāyakahā caüvvihā pannattā taṁ jahā — raṇṇō atiyāṇakahā raṇṇō ṇijjāṇakahā raṇṇō balavāhaṇakahā raṇṇō kōsakoṭṭhāgārakahā; caüvvihā kahā pannattā taṁ jahā — akkhēvaṇī vikkhēvaṇī saṁvēyaṇī nivvēdaṇī; akkhēṇī kahā caüvvihā pannattā taṁ jahā — āyāraakkhēvaṇī vavahāraakkhēvaṇī paṇṇattiakkhēvaṇī diṭṭhivātaakkhēvaṇī; vikkhēvaṇī kahā caüvvihā pannattā taṁ jahā — sasamayaṁ kahēi sasamayaṁ kahittā parasamayaṁ kahēi, parasamayaṁ kahettā sasamayaṁ ṭhāvaïtā bhavati, sammavāyaṁ kahēi sammavāyaṁ kahettā micchāvāyaṁ kahēi, micchāvāyaṁ kahettā sammavāyaṁ ṭhāvaïttā bhavati; saṁvēyaṇī kahā caüvvihā pannattā taṁ jahā — ihalōgasaṁvēyaṇī paralōgasaṁvēyaṇī ātasarīrasaṁvēyaṇī parasarīrasaṁvēyaṇī; nivvēdaṇī kahā caüvvihā pannattā taṁ jahā — ihalōga ducciṇṇa kammā ihalōgē duhaphalavivāga-sañjutā bhavanti, ihalōgē ducciṇṇā kammā paralōgē duhaphalavivāgasañjuttā bhavanti, paralōgē ducciṇṇā kammā ihalōgē duhaphalavivāgasañjutta bhavanti, paralōgē ducciṇṇā kammā paralōgē duhaphalavivāgasañjuttā bhavanti, ihalōgē suciṇṇā kammā ihalōgē suhaphalavivāgasañjuttā bhavanti, ihalōgē suciṇṇā kammā paralōgē suhaphalavivāgasañjuttā bhavanti ēvaṁ caübhaṅgō.

4.2.11.1

cattāri purisajāyā pannattā taṁ jahā — kisē nāmamēgē kisē, kisē nāmamēgē daḍhē, daḍhē nāmamēgē kisē, daḍhē nāmamēgē daḍhō cattāri purisajāyā pa0- kisē nāmamēgē kisasarīrē, kisē nāmamēgē daḍhasarīrē, daḍhē nāmamēgē kisasarīrē, daḍhē nāmamēgē daḍhasarīrē, cattāri purisajāyā pa0- kisasarīrassa nāmamēgassa nāṇadaṁsaṇē samuppajjati nō daḍhasarīrassa, daḍhasarīrarassa nāmamēgassa nāṇadaṁsaṇē samuppajjati nō kisasarīrassa, ēgassa kisarīrassavi ṇāṇadaṁsaṇē samuppajjati daḍhasarīrassavi, ēgassa nō kisasarīrassa nāṇadaṁsaṇē samuppajjati nō daḍhasarīrassa.

4.2.12.1

caühiṁ ṭhāṇēhiṁ nigganthāṇa vā nigganthīṇa vā assiṁ samayaṁsi atisēsē nāṇadaṁsaṇē samuppajjiukāmēvi na samuppajjejjā taṁ jahā — abhikkhaṇaṁ-abhikkhaṇaṁ itthikahaṁ bhattakahaṁ dēsakahaṁ rāyakahaṁ kahettā bhavati; vivēgēṇa viussaggēṇaṁ nō sammamappāṇaṁ bhāvittā bhavati, puvvarattāvarattakālasamayaṁsi nō dhammajāgariyaṁ jāgaraïttā bhavati, phāsuyassa ēsaṇijjassa uñchassa sāmudāṇiyassa nō sammaṁ gavēsittā bhavati; iccētēhiṁ caühiṁ ṭhāṇēhiṁ nigganthāṇa vā nigganthīṇaṁ vā jāva nō samuppajjejjā.

4.2.12.2

caühiṁ ṭhāṇēhiṁ nigganthāṇa vā nigganthīṇa vā assiṁ samayaṁsi atisēsē nānādaṁsaṇē samuppajjiukāmē samuppajjejjā taṁ jahā — itthikahaṁ bhattakahaṁ dēsakahaṁ rāyakahaṁ nō kahettā bhavati, vivēgēṇa viussagaṇaṁ sammamappāṇaṁ bhāvettā bhavati, puvvarattāvarattakālasamayaṁsi dhammajāgariyaṁ jāgaraïttā bhavati, phāsuyassa ēsaṇijjassa uñchassa sāmudāṇiyassa sammaṁ gavēsittā bhavati; iccētēhiṁ caühiṁ ṭhāṇēhiṁ nigganthāṇaṁ vā nigganthīṇaṁ vā assiṁ samayaṁsi atisēsē nāṇadaṁsaṇē samuppajjiukāmē samuppajjejjā.

4.2.13.1

nō kappati nigganthāṇa vā nigganthīṇa vā caühiṁ mahāpāḍivaēhiṁ sajjhāyaṁ karettaē, taṁ jahā — āsāḍhapāḍivaē indamahapāḍivaē kattiyapāḍivaē sugimhagapāḍivaē.

4.2.13.2

nō kappati nigganthāṇaṁ vā nigganthīṇa vā caühiṁ sañjhāhiṁ sajjhāyaṁ karettaē, taṁ jahā — paḍhamāē pacchimāē majjhaṇhē aḍḍharattē.

4.2.13.3

kappaï nigganthāṇa vā nigganthīṇa vā cāukkālaṁ sajjhāyaṁ karettaē taṁ jahā puvvaṇhē avaraṇha paōsē paccūsē.

4.2.14.1

caüvvihā lōgaṭṭhitī pannattā taṁ jahā — āgāsapatiṭṭhiē vātē, vātapatiṭṭhiē udadhī, udadhipatiṭṭhiyā puḍhavī, puḍhavapatiṭṭhiyā tasā thāvarā pāṇā.

4.2.15.1

cattāri purisajāyā pannattā taṁ jahā — tahē nāmamēgē, nōtahē nāmamēgē, sōvatthī nāmamēgē, padhāṇē nāmamēgē; cattāri purisajāyā pannattā taṁ jahā — āyantakarē nāmamēgē nō parantakarē, parantakarē nāmamēgē nō āyaṅkarē, ēgē āyaṅkarēvi parantakarēvi, ēgē nō āyaṅkarē nō parantakarē.

4.2.15.2

cattāri purisajāyā pa0 taṁ0- āyantamē nāmamēgē nō parantamē, parantamē nāmamēgē nō āyantamē, ēgē āyantamēvi parantamēvi, ēgē nō āyantamē nō parantamē; cattāri purisajāyā pannattā taṁ jahā — āyandamē nāmamēgē nō parandamē-4.

4.2.16.1

caüvvihā garahā pannattā taṁ0- uvasampajjāmittēgā garahā, vitigicchāmittēgā garahā, jaṅkiñcimicchāmittēgā garahā, ēvampi pannattēgā garahā.

4.2.17.1

cattāri purisajāyā paṇṇatā taṁ jahā — appaṇō nāmamēgē alamanthū bhavati nō parassa, parassa nāmamēgē alamanthū bhavati nō appaṇō, ēgē appaṇōvi alamanthū bhavati parassavi, ēgē nō appaṇō alamanthū bhavati nō parassa.

4.2.17.2

cattāri maggā pannattā taṁ jahā — ujjū nāmamēgē ujjū, ujjū nāmamēgē vaṅkē, vaṅkē nāmamēgē ujjū, vaṅkē nāmamēgē vaṅkē; ēvāmēva cattāri purisajāyā pannattā taṁ jahā — ujjū nāmamēgē ujjū-4.

4.2.17.3

cattāri maggā pannattā taṁ jahā — khēmē nāmamēgē khēmē, khēmē nāmamēgē akhēmē, akhēmē nāmamēgē khēmē, akhēmē nāmamēgē akhēmē; ēvāmēva cattāri purisajāyā pannattā taṁ jahā — khēmē nāmamēgē khēmē-4.

4.2.17.4

cattāri maggā pannattā taṁ jahā — khēmē nāmamēgē khēmarūvē, khēmē nāmamēgē akhēmarūvē, akhēmē nāmamēgē khēmarūvē, akhēmē nāmamēgē akhēmarūvē; ēvāmēva cattāri purisajāyā pannattā taṁ jahā — khēmē ṇāma mēgē khēmarūvē-4.

4.2.17.5

cattāri sambukkā pannattā taṁ jahā — vāmē nāmamēgē vāmāvattē, vāmē nāmamēgē dāhiṇāvatē, dāhiṇē nāmamēgē vāmāvattē, dāhiṇē nāmamēgē dāhiṇāvattē; ēvāmēva cattāri purisajāyā pannattā taṁ jahā — vāmē nāmamēgē vāmāvattē-4.

4.2.17.6

cattāri dhūmasihāō pannattāō taṁ jahā — vāmā nāmamēgā vāmāvattā-4. ēvāmēva cattāri itthīō pannattāō taṁ jahā — vāmā nāmamēgā vāmāvattā-4.

4.2.17.7

cattāri aggisihāō pannattāō taṁ jahā — vāmā nāmamēgā dāhiṇāvattā-4; ēvāmēva cattāri itthīō pannattāō taṁ jahā — vāmā nāmamēgā dāhiṇāvattā-4.

4.2.17.8

cattāri vāyamaṇḍaliyā pannattā taṁ jahā — vāmā nāmamēgā vāmāvattā-4; ēvāmēva cattāri itthīō pannattāō taṁ jahā — vāmā nāmamēgā vāmāvattā-4.

4.2.17.9

cattāri vaṇasaṇḍā panttā taṁ jahā — vāmē nāmamēgē vāmāvattē-4; ēvāmēva cattāri purisajāyā pannattā taṁ jahā — vāmē nāmamēgē vāmāvattē-4.

4.2.18.1

caühiṁ ṭhāṇēhiṁ nigganthē nigganthiṁ ālāvamāṇē vā saṁlavamāṇē vā nātikkamati taṁ jahā — panthaṁ pucchamāṇē vā, panthaṁ dēsamāṇē vā, asaṇaṁ vā pāṇaṁ vā khāimaṁ vā sāimaṁ vā dalēmāṇē vā, asaṇaṁ vā pāṇaṁ vā khāimaṁ vā sāima vā dalāvēmāṇē vā.

4.2.19.1

tamukkāyassa ṇaṁ cattāri ṇāmadhejjā pannattā taṁ jahā — tamēti vā tamukkakātēti vā andhakārēti vā mahandhakārēti vā. tamukkāyassa ṇaṁ cattāri ṇāmadhejjā pannattā taṁ jahā — lōgandhagārēti vā lōgatamasēti vā dēvandhagārēti vā dēvatamasēti vā. tamukkāsassa ṇaṁ cattāri ṇāmadhejjā pannattā taṁ jahā — vātaphalihēti vā vātaphalihakhōbhēti vā dēvaraṇṇēti vā dēvavūhēti vā.

4.2.19.2

tamukkātē ṇaṁ cattāri kappē āvarittā ciṭṭhati taṁ jahā — sōdhammīsāṇaṁ saṇaṅkumāra-māhindaṁ.

4.2.20.1

cattāri purisajāyā pannattā taṁ jahā — sampāgaḍapaḍisēvī nāmamēgē, pacchaṇṇapaḍisēvī nāmamēgē, paḍuppaṇṇanandī nāmamēgē, nissaraṇanandī nāmamēgē.

4.2.20.2

cattāri sēṇāō pannattāō taṁ jahā — jaïttā nāmamēgā nō parājiṇittā, parijiṇittā nāmamēgē nō jaïttā, ēgā jaïttāvi parājiṇittāvi, ēgā nō jaïttā nō parājiṇittā; ēvāmēva cattāri purisajāyā pannattā taṁ jahā — jaïttā nāmamēgē nō parājiṇittā-4. cattāri sēṇāō pannattāō taṁ jahā — jaïttā nāmamēgā jayaī, jaïttā nāmamēgā parājiṇati, parājiṇittā nāmamēgē jayaï, parājiṇittā nāmamēgā parājiṇati; ēvāmēva cattāri purisajāyā pannattā taṁ jahā — jaïttā nāmamēgē jayaï-4.

4.2.21.1

cattāri kētaṇā pannattā taṁ jahā — vaṁsīmūlakētaṇaē meṇḍhavisāṇakētaṇaē gōmuttikētaṇaē avalēhaṇiyakētaṇaē; ēvāmēva caüvidhā māyā pannattā taṁ jahā — vaṁsīmūlakētaṇāsamaṇā jāva avalēhaṇiyakēta-ṇāsamāṇā; vaṁsīmūlakētaṇāsamāṇaṁ māyāmaṇupaviṭṭhē jīvē kālaṁ karēti nēraïēsu uvavajjati, meṇḍhavisāṇa-kētanāsamāṇaṁ māyāmaṇupaviṭṭhē jīvē kālaṁ karēti tirikkhajōṇiēsu uvavajjati, gōmutti0 kālaṁ karēti maṇussēsu uvavajjati, avalēhaṇiya jāva dēvēsu uvavajjati.

4.2.21.2

cattāri thambhā pannattā taṁ jahā — sēlathambhē aṭṭhithambhē dāruthambhē tiṇisalatāthambhē; ēvāmēva caüvvidhē māṇē paṇṇattē taṁ jahā — sēlathambhasamāṇē jāva tiṇisalatāthambhasamāṇē, sēlathambhasamāṇaṁ māṇaṁ aṇupaviṭṭhē jīvē kālaṁ karēti nēraïēsu uvavajjati, ēvaṁ jāva tiṇisalatāthambhasamāṇaṁ māṇaṁ aṇupaviṭṭhē jīvē kālaṁ karēti dēvēsu uvavajjati.

4.2.21.3

cattāri vatthā pannattā taṁ jahā — kimirāgarattē kaddamarāgarattē khañjaṇarāgarattē haliddarāgarattē; ēvāmēva caüvvidhē lōbhē paṇṇattē taṁ jahā — kimirāgarattavatthasamāṇē kaddamarāgaratta-vatthasamāṇē khañjaṇarāgara-ttavattha samāṇē haliddarāgarattavatthasamāṇē; kimirāgarattavatthasamāṇaṁ lōbhamaṇupaviṭṭhē jīvē kālaṁ karēi nēraïēsu uvavajjaï tahēva jāva haliddarāgarattavattha-samāṇaṁ lōbhamaṇupaviṭṭhē jīvē kālaṁ karēi dēvēsu uvavajjaï.

4.2.22.1

caüvvihē saṁsārē paṇṇattē taṁ jahā — nēraïyasaṁsārē jāva dēvasaṁsārē.

4.2.22.2

caüvvihē āuē paṇṇattē taṁ jahā — nēraïyaāuē jāva dēvāuē.

4.2.22.3

caüvvihē bhavē paṇṇattē taṁ jahā — nēraïyabhavē jāva dēvabhavē.

4.2.23.1

caüvvihē āhārē paṇṇattē taṁ jahā — asaṇē pāṇē khāimē sāimē; caüvvihē āhārē paṇṇattē taṁ jahā — uvakkhasarasampaṇṇē uvakkhaḍasampaṇṇē sabhāvasampaṇṇē parijusiyasampaṇṇē.

4.2.24.1

caüvvihē bandhē paṇṇattē taṁ jahā — pagatibandhē ṭhitibandhē aṇubhāvabandhē padēsabandhē.

4.2.24.2

caüvvihē uvakkamē paṇṇattē taṁ jahā — bandhaṇōvakkamē udīraṇōvakkamē uvasamaṇōvakkamē vippariṇāmaṇōvakkamē.

4.2.24.3

bandhaṇōvakkamē caüvvihē paṇṇattē taṁ jahā — pagatibandhaṇōvakkamē ṭhitibandhaṇōvakkamē aṇubhāvabandhaṇō-vakkamē padēsabandhaṇōvakkamē. udīraṇōvakkamē caüvvihē paṇṇattē taṁ jahā — pagatiudīraṇō-vakkamē ṭhitiudīraṇōvakkamē aṇubhāvaüdīraṇōvakkamē padēsaüdīraṇōvakkamē. uvasāmaṇōvakkamē caüvvihē paṇṇattē taṁ jahā — pagatiuvasāmaṇō-vakkamē ṭhitiuvasāmaṇōvakkamē aṇubhāvaüvasāmaṇōvakkamē padēsaüvasā-maṇōvakkamē. vippariṇāmaṇōvavakkamē caüvvihē paṇṇattē taṁ jahā — pagatavivippariṇāmaṇōvakkamē ṭhitivippa-riṇāmaṇōvakkamē aṇubhāvavippariṇāma-ṇōvakkamē paēsavippariṇāmaṇōvakkamē.

4.2.24.4

caüvvihē appābahuē paṇṇattē taṁ jahā — pagatiappābahuē ṭhitiappābahuē aṇubhāvaappābahuē paēsaappāhuē.

4.2.24.5

caüvvihē saṅkamē paṇṇattē taṁ jahā — pagatisaṅkamē ṭhitisaṅkamē aṇubhāvasaṅkamē paēsasaṅkamē.

4.2.24.6

caüvvihē nidhattē paṇṇattē taṁ jahā — pagatiṇidhattē ṭhitinidhattē aṇubhāvanidhattē paēsanidhattē.

4.2.24.7

caüvvihē ṇigāyitē paṇṇattē taṁ jahā — pagatiṇigāyitē ṭhitiṇigāyittē aṇubhāvaṇigāyitē paēsaṇigāyitē.

4.2.25.1

cattāri ekkā pannattā taṁ jahā — daviekkaē māuekkaē pajjavekkaē saṅgahekkaē.

4.2.26.1

cattāri katī pannattā taṁ jahā — davitakatī māuyakatī pajjavakatī saṅgahakatī.

4.2.27.1

cattāri savvā pa0 taṁ0 - nāmasavvaē ṭhavaṇasavvaē āēsasavvaē niravasēsasavvaē.

4.2.28.1

māṇusuttarassa ṇaṁ pavvayassa caüdisiṁ cattāri kūḍā pannattā taṁ jahā — rayaṇē rataṇuccaē savvarayaṇē rataṇasañcaē.

4.2.29.1

jambuddīvē dīvē bharahēravatēsu vāsēsu tītāē ussappiṇīē susamasusamāē samāē cattāri sāgarōvamakōḍākōḍīō kālō hutthā, jambuddīvē dīvē bharahēravatēsu vāsēsu imīsē ōsappiṇīē susamasusamāē samāē cattāri sāgarōvamakōḍākōḍīō kālō pannattō, jambuddīvē dīvē bharahēravatēsu vāsēsu āgamēssāē ussappiṇīē susamasusamāē samāē cattāri sāgarōvamakōḍākōḍīō kālō bhavissaï.

4.2.30.1

jambuddīvē dīvē dēvakuruuttarakuruvajjāō cattāri akammabhūmīō pannattāō taṁ jahā — hēmavatē hēraṇṇavattē harivarisē rammagavarisē, cattāri vaṭṭavēyaḍḍhapavvattā pannattā taṁ jahā — saddāvātī viyaḍāvātī gandhāvātī mālavantaparitātē, tattha ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā sātī pabhāsē aruṇē paümē jambuddīvē dīvē mahāvidēhē vāsē caüvvihē paṇṇattē taṁ jahā — puvvavidēhē avaravidēhē dēvakurā uttarakurā, savvē vi ṇaṁ nisaḍhanīlavantavāsaharapavvatā cattāri jōyaṇasayāiṁ uḍḍhaṁ uccattēṇaṁ cattāri gāusayāiṁ uvvēhēṇaṁ pannattā jambuddīvē dīvē mandarassa pavvayassa puratthimē ṇaṁ sītāē mahānadīē uttarakūlē cattāri vakkhārapavvayā pannattā taṁ jahā — cittakūḍē pamhakūḍē naliṇakūḍē ēgasēlē, jambuddīvē dīvē mandarassa pavvayassa puratthimē ṇaṁ sītāē mahānadīē dāhiṇakūlē cattāri vakkhārapavvayā pannattā taṁ jahā — tikūḍē vēsamaṇakūḍē añjaṇē mātañjaṇē.

4.2.30.2

jambuddīvē dīvē mandarassa pavvayassa paccatthimē ṇaṁ sīōdāē mahānadīē dāhiṇakūlē cattāri vakkhārapavvayā pannattā taṁ jahā — aṅkāvatī pamhāvatī āsīvisē suhāvahē.

4.2.30.3

jambuddīvē dīvē mandarassa pavvayassa paccatthimē ṇaṁ sīōdāē mahānadīē uttarakūlē cattāri vakkhārapavvayā pannattā taṁ jahā — candapavvatē sūrapavvatē dēvapavvatē nāgapavvatē.

4.2.30.4

jambuddīvē dīvē mandarassa pavvayassa caüsu vidisāsu cattāri vakkhārapavvayā pannattā taṁ jahā — sōmaṇasē vijjuppabhē gandhamāyaṇē mālavantē.

4.2.30.5

jambuddīvē dīvē mahāvidēhē vāsē jahaṇṇapaē cattāri arahantā cattāri cakkavaṭṭī cattāri baladēvā cattāri vāsudēvā uppajjiṁsu vā uppajjanti vā uppajjissanti vā.

4.2.30.6

jambuddīvē dīvē mandarē pavvatē cattāri vanā pannattā taṁ jahā — bhaddasālavanē nandaṇavanē sōmanasavanē paṇḍagavanē, jambuddīvē dīvē mandarē pavvatē paṇḍagavanē cattāri abhisēgasilāō pannattāō taṁ jahā — paṇḍukambalasilā aïpaṇḍukambalasilā rattakambalasilā atirattakambalasilā, mandaracūliyā ṇaṁ uvariṁ cattāri jōyaṇāiṁ vikkhambhēṇaṁ pannattā ēvaṁ- dhāyaïsaṇḍadīvapuratthimaddhēvi kālaṁ ādiṁ karettā jāva mandaracūliyatti, ēvaṁ jāva pukkharavaradīvapaccatthimaddhē jāva mandaracūliyatti.

4.2.31.1

jambuddīvagaāvassaga tu kālāō cūliyā jāva
ghāyaïsaṇḍē pukkharavarē ya puvvāvarē pāsē

4.2.32.1

jambuddīvassa ṇaṁ dīvassa cattāri dārā pannattā taṁ jahā — vijayē vējayantē jayantē aparājitē, tē ṇaṁ dārā cattāri jōyaṇāiṁ vikkhambhēṇaṁ tāvaïyaṁ cēva pavēsēṇaṁ pannattā, tattha ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā — vijayē vējayantē jayantē aparājitē.

4.2.33.1

jambuddīvē dīvē mandarassa pavvayassa dāhiṇē ṇaṁ cullahimavantassa vāsaharapavvayassa caüsu vidisāsu lavaṇasamuddaṁ tiṇṇi-tiṇṇi jōyaṇasayāiṁ ōgāhittā ettha ṇaṁ cattāri antaradīvā pannattā taṁ jahā — ēgūrūyadīvē ābhāsiyadīvē vēsāṇiyadīvē naṅgōliyadīvē, tēsu ṇaṁ dīvēsu caüvvihā maṇussā parivasanti, taṁ jahā — ēgūrūyā ābhāsiyā vēsāṇiyā naṅgōliyā, tēsiṁ ṇaṁ dīvāṇaṁ caüsu vidisāsu lavaṇasamuddaṁ cattāri-cattāri jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — hayakaṇṇadīvē gayakaṇṇadīvē gōkaṇṇadīvē sakkulikaṇṇadīvē, tēsuṁ ṇaṁ dīvēsu caüvvidhā maṇussā parivasanti taṁ jahā — hayakaṇṇā gayakaṇṇā gōkaṇṇā sakkulikaṇṇā.

4.2.33.2

tēsiṁ ṇaṁ dīvāṇaṁ caüsu vidisāsu lavaṇasamuddaṁ pañca-pañca jōyaṇasayāiṁ ōgāhittā ettha ṇaṁ cattāri antaradīvā pannattā taṁ jahā — āyaṁsamuhadīvē meṇḍhamuhadīvē aōmuhadīvē gōmuhadīvē, tēsu ṇaṁ dīvēsu caüvvihā maṇussā bhāṇiyavvā, tēsi ṇaṁ dīvāṇaṁ caüsu vidisāsu lavaṇasamuddaṁ cha-cha jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — āsamuhadīvē hatthimuhadīvē sīhamuhadīvē vagdhamuhadīvē, tēsu ṇaṁ dīvēsu caüvvihā maṇussā bhāṇiyavvā.

4.2.33.3

tēsi ṇaṁ dīvāṇaṁ caüsu vidisāsu lavaṇasamuddaṁ satta-satta jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — āsakaṇṇadīvē hatthikaṇṇadīvē akaṇṇadīvē kaṇṇapāuraṇadīvē, tēsu ṇaṁ dīvēsu maṇussā bhāṇiyavvā.

4.2.33.4

tēsi ṇaṁ dīvāṇaṁ caüsu vidisāsu lavaṇaṁsamuddaṁ aṭṭhaṭṭha jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — ukkāmuhadīvē mēhamuhadīvē vijjumuhadīvē vijjudantadīvē, tēsuṁ ṇaṁ dīvēsu maṇussā bhāṇiyavvā.

4.2.33.5

tēsiṁ ṇaṁ dīvāṇaṁ caüsu vidisāsu lavaṇasamuddaṁ nava-nava jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — dhaṇadantadīvē laṭṭhadantadīvē gūḍhadantadīvē suddhadantadīvē, tēsu ṇaṁ dīvēsu caüvvihā maṇussā parivasanti taṁ jahā — dhaṇadantā laṭṭhadantā gūḍhadantā suddhadantā.

4.2.33.6

jambuddīvē dīvē mandarassa pavvayassa uttarēṇaṁ siharissa vāsaharapavvayassa caüsu vidi-sāsu lavaṇasamuddaṁ tiṇṇi-tiṇṇi jōyaṇasayāiṁ ōgāhettā ettha ṇaṁ cattāri antaradīvā pannattā taṁ jahā — ēgūrūyadīvē sēsaṁ tahēva niravasēsaṁ bhāṇiyavvaṁ jāva suddhadantā.

4.2.34.1

jambuddīvassa ṇaṁ dīvassa bāhirillāō vēiyantāō caüdiṁsi lavaṇasamuddaṁ pañcāṇaüiṁ jōyaṇasahassāiṁ ōgāhettā ettha ṇaṁ mahatimahālatā mahālañjaraṇḍhāṇasaṇṭhitā cattāri mahāpāyālā pannattā taṁ jahā — valayāmuhē kēuē jūvaē īsarē, tattha ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā kāla mahākālē vēlambē pabhañjaṇē.

4.2.34.2

jambuddīvassa ṇaṁ dīvassa bāhirillāō vēiyantāō caüddisi lavaṇasamuddaṁ bāyālīsaṁ-bāyālīsaṁ jōyaṇasahassāiṁ ōgāhettā ettha ṇaṁ caüṇhaṁ vēlandharaṇāgarāīṇaṁ cattāri āvāsapavvatā pannattā taṁ jahā — gōthūbhē udaōbhāsē saṅkhē dagasīmē, tattha ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā gōthūbhē sivaē saṅkhē maṇōsilāē.

4.2.34.3

jambuddīvassa ṇaṁ dīvassa bāhirillāō vēiyantāō caüsu vidisāsu lavaṇasamuddaṁ bāyālīsaṁ-bāyālīsaṁ jōyaṇasahassāiṁ ōgāhettā ettha ṇaṁ caüṇhaṁ aṇuvēlandharaṇāgarāīṇaṁ cattāri āvāsapavvattā pannattā taṁ jahā — kkakōḍaē vijjuppabhē kēlāsē aruṇappabhē, tatthaṁ ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā — kakkōḍaē kaddamaē kēlāsē aruṇappabhē.

4.2.34.4

lavaṇē ṇaṁ samuddē cattāri candā pabhāsiṁsu vā pabhāsanti vā pabhāsissanti vā, cattāri sūriyā taviṁsu vā tavanti vā tavissanti vā, cattāri kittiyāō jāva catāri bharaṇīō cattāri aggī jāva cattāri jamā cattāri aṅgārā jāva cattāri bhāva-kēū, lavaṇassa ṇaṁ samuddassa cattāri dārā pannattā, taṁ jahā — vijaē vējayantē jayantē aparājitē, tē ṇaṁ dārā cattāri jōyaṇāiṁ vikkhabhēṇaṁ tāvaïyaṁ cēva pavēsēṇaṁ pannattā tattha ṇaṁ cattāri dēvā mahiḍḍhiyā jāva paliōvamaṭṭhitīyā parivasanti taṁ jahā vijaē vējayanti jayantē aparājiē.

4.2.35.1

ghāyaïsaṇḍē ṇaṁ dīvē cattāri jōyaṇasayasahassāiṁ cakkavālavikkhambhēṇaṁ paṇṇattē, jambuddī-vassa ṇaṁ dīvassa bahiyā cattāri bharahāiṁ cattāri ēravayāiṁ, ēvaṁ jahā saddusēsaē tahēva niravasēsaṁ bhāṇiyavvaṁ jāva cattāri mandarā cattāri mandaracūliyāō.

4.2.36.1

nandīsaravarassa ṇaṁ dīvassa cakkavāla-vikkhambhassa bahumajjhadēsabhāgē caüddisiṁ cattāri añjaṇagapavvatā pannattā taṁ jahā — puratthimillē añjaṇagapavvatē dāhiṇillē añjaṇagapavvatē paccatthimillē añjaṇapagapavvatē uttarillē añjaṇagapavvatē, tē ṇaṁ añjaṇagapavvatā caürāsītiṁ jōyaṇasahassāiṁ uḍḍhaṁ uccattēṇaṁ ēgaṁ jōyaṇa sahassaṁ uvvēhēṇaṁ mūlē dasajōyaṇasahassāiṁ vikkhambhēṇaṁ tadaṇantaraṁ ca ṇaṁ māyāē-māyāē parihāyamāṇā-parihāyamāṇā uvarimēgaṁ jōyaṇasahassaṁ vikkhambhēṇaṁ pannattā mūlē ikkatīsaṁ jōyaṇasahassāiṁ chacca tēvīsē jōyaṇasatē parikkhēvēṇaṁ uvariṁ tiṇṇi-tiṇṇi jōyaṇasahassāiṁ ēgaṁ ca chāvaṭṭhaṁ jōyaṇasataṁ parikkhēṇaṁ, mūlē vicchiṇṇā majjhē saṅkhettā, uppiṁ taṇuyā0 gōpucchaṁsaṇṭhāṇasaṇṭhitā savvaañjaṇamayā acchā saṇhā laṇhā ghaṭṭhā maṭṭhā nīrayā nimmalā nippaṅkā nikkaṅkaḍa-cchāyā sappabhā samirīyā saüjjōyā pāsāīyā darisaṇīyā abhirūvā paḍirūvā, tēsi ṇaṁ añjaṇagapavvayāṇaṁ uvariṁ bahusamaramaṇijjā bhūmibhāgā pannattā tēsi ṇaṁ bahusamara-maṇijjāṇaṁ bhūmibhāgāṇaṁ bahumajjhadēsabhāgē cattāri siddhāyataṇā pannattā, tē ṇaṁ siddhāyataṇā ēgaṁ jōyaṇasayaṁ āyāmēṇaṁ paṇṇāsaṁ jōyaṇāiṁ vikkhambhēṇaṁ bāvattariṁ jōyaṇāiṁ uḍḍhaṁ uccattēṇaṁ, tēsiṁ siddhāyataṇāṇaṁ caüdisiṁ cattāri dārā pannattā taṁ jahā — dēvadārē asuradārē nāgadārē suvaṇṇadārē, tēsu ṇaṁ dārēsu caüvvihā dēvā parivasanti taṁ jahā — dēvā asurā nāgā suvaṇṇā, tēsi ṇaṁ dārāṇaṁ puraō cattāri muhamaṇḍavā pannattā, tēsi ṇaṁ muhamaṇḍavāṇaṁ puraō cattāri pecchāgharamaṇḍavā pannattā, tēsi ṇaṁ pecchādharamaṇḍavāṇaṁ bahumajjhadēsabhāgē cattāri vaïrāmayā ukkhāḍā pannattā, tēsi ṇaṁ vaïrāmayāṇaṁ akkhāḍagāṇaṁ bahumajjhadēsabhāgē cattāri maṇipēḍhiyātō pannattāō, tāsi ṇaṁ maṇipēḍhitāṇaṁ uvariṁ cattāri sīhāsaṇā pannattā, tēsi ṇaṁ sīhāsaṇāṇaṁ uvariṁ cattāriṁ vijayadūsā pannattā, tēsi ṇaṁ vijayadūsagāṇaṁ bahumajjhadēsabhāgē cattāri vaïrāmayā aṅkusā pannattā, tēsu ṇaṁ vaïrāmaēsu aṅkusēsu cattāri kumbhikā muttādāmā pannattā, tē ṇaṁ kumbhikā muttādāmā pattēyaṁ-pattēyaṁ aṇṇēhiṁ tadaddhaüccattapamāṇamittēhiṁ caühiṁ addhakumbhikkēhiṁ muttādāmēhiṁ, savvatō samantā samparikkhittā, tēsi ṇaṁ pecchāgharamaṇḍavāṇaṁ puraō cattāri maṇipaḍhiyāō panattāō, tāsi ṇaṁ maṇipēḍhiyāṇaṁ uvariṁ cattāri-cattāri vēiyathūbhā pannattā, tēsi ṇaṁ cēiyathūbhāṇaṁ pattēyaṁ-pattēyaṁ caüddisiṁ cattāri maṇipēḍhiyāō pannattāō, tāsi ṇaṁ maṇipēḍhiyāṇaṁ uvariṁ cattāri jiṇapaḍimāō savvarayaṇāmaīō sampaliyaṅkaṇisaṇṇāō thūbhābhimuhāō ciṭṭhanti taṁ jahā — risabhā vaddhamāṇā candānanā vārisēṇā, tēsi ṇaṁ cēiyathūbhāṇaṁ puraō cattāri maṇipēḍhiyāō pannattāō, tāsi ṇaṁ maṇipēḍhiyāṇaṁ uvariṁ cattāri cēiyarukkhā pannattā, tēsi ṇaṁ cēiyarukkhāṇaṁ puraō cattāri maṇipēḍhiyāō pannattāō, tāsi ṇaṁ maṇipēḍhiyāṇaṁ uvariṁ cattāri mahindajjhayā pannattā, tēsi ṇaṁ mahindajjhayāṇaṁ puraō cattāri nandāō pukkhariṇīō pannattāō, tāsi ṇaṁ pukkhariṇīṇaṁ pattēyaṁ-pattēyaṁ caüdisiṁ cattāri vaṇasaṇḍā pannattā, taṁ jahā — puratthimēṇaṁ dāhiṇē paccatthimē ṇaṁ uttarē ṇaṁ.

4.2.37.1

puvvē ṇaṁ asōgavaṇaṁ dāhiṇaō hōi sattavaṇṇavaṇaṁ
avarē ṇaṁ campagavaṇaṁ cūtavaṇaṁ uttarē pāsē

4.2.38.1

tattha ṇaṁ jē sē puratthimillē añjaṇagapavvatē tassa ṇa caüddisiṁ cattāri nandāō pukkhariṇīō pannattāō taṁ jahā — nanduttarā nandā āṇandā nandivaddhaṇā, tāō ṇaṁ nandāō pukkhariṇīō ēgaṁ jōyaṇasayasahassaṁ āyāmēṇaṁ paṇṇāsaṁ jōyaṇasahassāiṁ vikkhambhēṇaṁ dasajōyaṇasatāiṁ uvvēhēṇaṁ, tāsi ṇaṁ pukkhariṇīṇaṁ pattēyaṁ-pattēyaṁ caüddisiṁ cattāri tisōvāṇapaḍirūvagā pannattā, tēsi ṇaṁ tisōvāṇapaḍirūvagāṇaṁ puratō cattāri tōraṇā pannattā taṁ jahā — puratthimē ṇaṁ dāhiṇē ṇaṁ paccatthimē ṇaṁ uttarē ṇaṁ, tāsi ṇaṁ pukkhariṇīṇaṁ pattēyaṁ-pattēyaṁ caüddisiṁ cattāri vaṇasaṇḍā pannattā taṁ jahā — puratō dāhiṇē ṇaṁ paccatthimē ṇaṁ uttarē ṇaṁ, tāsi ṇaṁ pukkhariṇīṇaṁ bahumajjhadēsabhāgē cattāri dadhimuhagapavvayā pannattā tē ṇaṁ dadhimuhagapavvayā caüsaṭṭhiṁ jōyaṇasahassāiṁ uḍḍhaṁ uccattēṇaṁ ēgaṁ jōyaṇasahassaṁ uvvēhēṇaṁ savvattha samā pallagasaṇṭhāṇasaṇṭhitā dasa jōyaṇasahassāiṁ vikkhambhēṇaṁ ekkatīsaṁ jōyaṇasahassāiṁ chacca tēvīsē jōyaṇasatē parikkhēvēṇaṁ, savvarayaṇāmayā acchā jāva paḍirūvā, tēsi ṇaṁ dadhimuhagapavvatāṇaṁ uvari bahusamaramaṇijjā bhūmibhāgā pannattā sēsaṁ jahēva añjaṇagapavvatāṇaṁ tahēva niravasēsaṁ bhāṇiyavvaṁ, jāva cūtavaṇaṁ uttarē pāsē, tattha ṇaṁ jē sē dāhiṇillē añjaṇagapavvattē tassa ṇaṁ caüdisiṁ cattāri nandāō pukkhariṇīō pannattāō, taṁ jahā — bhaddā visālā kumudā poṇḍarīgiṇī, tāō ṇaṁ nandāō pukkhariṇīō ēgaṁ jōyaṇasayasahassaṁ sēsaṁ taṁ cēva jāva dadhimuhagapavvatā jāva vaṇasaṇḍā, tattha ṇaṁ jē sē paccatthimillē añjaṇagavvatē tassa ṇaṁ chaüddisiṁ cattāri nandāō pukkhariṇīō pannattāō taṁ jahā — nandisēṇā amōhā gōthūmā sudaṁsaṇā, sēsaṁ taṁ cēva tahēva dadhimuhagapavvatā tahēva siddhāyayaṇā jāva vaṇasaṇḍā, tattha ṇaṁ ja sē uttarillē añjaṇagapavvatē tassa ṇaṁ caüddisiṁ cattāri nandāō pukkhariṇīō pannattāō taṁ jahā — vijayā vējayanti jayantī aparājitā, tāō ṇaṁ nandāō pukkhariṇīō ēgaṁ jōyaṇasayasahassaṁ sēsaṁ taṁ cēva pamāṇaṁ tahēva dadhimuhaga-pavvattā tahēva siddhāyayaṇā jāva vaṇasaṇḍā.

4.2.38.2

nandīsaravarassa ṇaṁ dīvassa cakkavāla-vikkhambhassa bahumajjhadēsabhāgē caüsu vidisāsu cattāri ratikaragapavvatā pannattā taṁ jahā — uttarapuratthimillē ratikaraga-pavvaē dāhiṇapuratthimillē ratikaragapavvaē dāhiṇapaccatthimillē ratikaragapavvaē uttarapaccatthimillē ratikaragapavvaē, tē ṇaṁ ratikaragapavvatā dasa jōyaṇasayāiṁ uḍḍhaṁ uccattēṇaṁ dasa gāuya-satāiṁ uvvēhēṇaṁ savvattha samā jhallarisaṇṭhāṇasaṇṭhitā dasa jōyaṇasahassāiṁ vikkhambhēṇaṁ ekka-tīsaṁ jōyaṇasahassāiṁ chacca tēvīsē jōyaṇasatē parikkhēvēṇaṁ, savvarayaṇāmayā acchā jāva paḍirūvā, tattha ṇaṁ jē sē uttarapuratthimillē ratikaragapavvatē tassa ṇaṁ caüddisiṁ īsāṇassa dēviṁ- ddassa dēvaraṇṇō caüṇhamaggamahisīṇaṁ jambuddīvapamāṇāō cattāri rāyahāṇīō pa0 taṁ0- nanduttarā nandā uttarakurā dēvakurā, kaṇhāē kaṇharāīē rāmāē rāmarakkhiyāē, tattha ṇaṁ jē sē dāhiṇapuratthimillē ratikaragapavvatē, tattha ṇaṁ caüddisiṁ sakkassa dēvindassa dēvaraṇṇō caüṇhamaggahisīṇaṁ jambuddīvapamāṇāō cattāri rāyahāṇīō pannattāō taṁ jahā — samaṇā sōmaṇasā accimālī maṇōramā paümāē sivāē satīē añjūē, tattha ṇaṁ jē sē dāhiṇapaccatthimillē ratikaragapavvatē tattha ṇaṁ caüddisiṁ sakkassa dēvindassa dēvaraṇṇō caüṇhamaggamahisīṇaṁ jambuddīvapamāṇamettāō cattāri rāyahāṇīō pannattāō taṁ jahā — bhūtā bhūtavaḍēṁsā gōthūmā sundasaṇā, amalāē accharāē navamiyāē rōhiṇīē.

4.2.38.3

tattha ṇaṁ jē sē uttarapaccatthimillē ratikaragapavvatē tassa ṇaṁ caüddisimīsāṇassa dēvindassa dēvaraṇṇō caüṇhamaggamahisīṇaṁ jambuddīvappamāṇamettāō cattāri rāyahāṇīō pannattāō taṁ jahā — rayaṇā rataṇuccayā savvarataṇā rataṇasañcayā, vasūē vasuguttāē vasumittāē vasundharāē.

Translations (2)

Ṭhāṇaṃga: Hindi translation (Dīparatnasāgara, 2019) — Hindi
Ṭhāṇaṃga: Gujarati translation (Dīparatnasāgara, 2020) — Gujarati

Commentaries (2)

Sthānāṅgavṛtti — Abhayadeva Sūri, Sanskrit
Ṭhāṇaṃga: ṭīkānusārī vivecana — Muni Dīparatnasāgara, Gujarati

Discussed in (1)

A History of the Canonical Literature of the Jainas — Kapadia 1941, English

Thanamga 4.2

Contents

Translations (2)

Commentaries (2)

Discussed in (1)