Pramāṇa · Search · About · API

Nayadhammakahao 1.16

Nāyādhammakahāo 1.16

Language
Ardhamāgadhī Prakrit

Contents

1.16.1.1

jaï ṇaṁ bhantē samaṇēṇaṁ bhagavayā mahāvīrēṇaṁ0 pannarasamassa nāyajjhayaṇassa ayamaṭṭhē pannattē sōlasamassa ṇaṁ bhantē! nāyajjhayaṇassa kē aṭṭhē pannattē? ēvaṁ khalu jambū! tēṇaṁ kālēṇaṁ tēṇaṁ samaēṇaṁ campā nāmaṁ nayarī hōtthā, tīsē ṇaṁ campāē nayarīē bahiyā uttarapuratthimē disībhāē subhūmibhāgahē nāmaṁ ujjāṇē hōtthā, tattha ṇaṁ campāē nayarīē taō māhaṇā bhāyarō parivasanti taṁ jahā— sōmē sōmadatē sōmabhūī-aḍḍhā jāva aparibhūyā riuvvēya-jaüvvēya-sāmavēya-athavvaṇavēya jāva supariniṭṭhiyā.

1.16.1.2

tēsi ṇaṁ māhaṇāṇaṁ taō bhāriyāō hōtthā, taṁ jahā— nāgasirī bhūyasirī jakkhasirī-sukumālapāṇiyāyāō jāva tēsi ṇaṁ māhaṇāṇaṁ iṭṭhāō0 viulē māṇussaē jāva viharanti.

1.16.1.3

taē ṇaṁ tēsi māhaṇāṇaṁ aṇṇayā kayāi ēgayaō samuvāgayāṇaṁ jāva imēyārūvē mihō kahā-samullāvē samuppajjitthā, ēvaṁ khalu dēvāṇuppiyā! amhaṁ imē viulē dhaṇē-jāva sāvaējjē alāhi jāva āsattamāō kulavaṁsāō pakāmaṁ dāuṁ pakāmaṁ bhōttuṁ pakāmaṁ paribhāēuṁ taṁ sēyaṁ khalu amhaṁ dēvāṇuppiyā! aṇṇamaṇṇassa gihēsu kallākalliṁ vipulaṁ asaṇaṁ-jāva-sāimaṁ uvakkhaḍēuṁ paribhuñjēmāṇāṇaṁ viharittaē aṇṇamaṇṇassa ēyamaṭṭhaṁ paḍisuṇēnti, kallākalliṁ aṇṇamaṇṇassa gihēsu vipulaṁ asaṇa-pāṇa-khāima-sāimaṁ uvakkhaḍāvēnti uvakkhaḍāvēttā paribhuñjēmāṇā viharati.

1.16.1.4

taē ṇaṁ tīsē nāgasirīē māhaṇīē aṇṇayā kayāi bhōyaṇavāraē jāē yāvi hōtthā taē ṇaṁ sā nāgasirī vipulaṁ asaṇa-pāṇa-khāima-sāimaṁ uvakkhaḍēi (2) ēgaṁ mahaṁ sālaïyaṁ tittālāuyaṁ bahusambhārasañjuttaṁ nēhāvagāḍhaṁ uvakkhaḍēi ēgaṁ binduyaṁ karayalaṁsi āsāēi taṁ khāraṁ kaḍuyaṁ akhajjaṁ visabhūyaṁ jāṇittā ēvaṁ vayāsī — dhiratthu ṇaṁ mama nāgasirīē adhannāē apunnāē dūbhagāē dūbhagasattāē dūbhaganimbōliyāē jāē ṇaṁ maē sālaïē tittālaüē bahusambhārasambhiē nēhāvagāḍhē uvakkhaḍiē subahudavvakkhaē nēhakkhaē ya kaē taṁ jaï ṇaṁ mamaṁ jāuyāō jāṇissanti tō ṇaṁ mama khiṁsissanti taṁ jāva mamaṁ jāuyāō na jāṇati tāva mama sēyaṁ ēyaṁ sālaïyaṁ tittālāuyaṁ bahusambhārasambhiyaṁ nēhāvagāḍhaṁ ēgantē gōvittaē annaṁ sālāiyaṁ mahurālāuyaṁ jāva nēhāvagāḍhaṁ uvakkhaḍēttaē, ēvaṁ sampēhēi sampēhēttā taṁ sālatiyaṁ jāva gōvēi, annaṁ sālatiyaṁ mahurālāuyaṁ uvakkhaḍēi, tēsiṁ māhaṇāṇaṁ ṇhāyāṇaṁ jāva suhāsaṇavaragayāṇaṁ taṁ vipulaṁ asaṇa-pāṇa-khāima-sāimaṁ-parivēsēi, taē ṇaṁ tē māhaṇā jimiyabhuttuttarāgayā samāṇā āyantā cōkkhā paramasuibhūyā sakammasampaüttā jāyā yāvi hōtthā taē ṇaṁ tāō māhaṇīō ṇhāyāō jāva vibhūsiyāō taṁ vipulaṁ asaṇa0 āhārēnti (2) jēṇēva sayāiṁ gihāiṁ tēṇēva uvāgacchanti uvāgacchittā sakammasampaüttāō jāyāō.

1.16.2.1

tēṇaṁ kālēṇaṁ tēṇaṁ samaēṇaṁ dhammaghōsā nāmaṁ thērā jāva bahuparivārā, jēṇēva campā nayarī jēṇēva subhūmibhāgē ujjāṇē tēṇēva uvāgacchanti uvāgacchittā ahāpaḍirūvaṁ jāva viharanti, parisā niggayā, dhammō kahiō, parisā paḍigayā.

1.16.2.2

taē ṇaṁ tēsiṁ dhammaghōsāṇaṁ thērāṇaṁ antēvāsī dhammarūī nāmaṁ aṇagārē ōrālē jāva tēyalēssē māsaṁ māsēṇaṁ khamamāṇē viharaï, taē ṇaṁ sē dhammarūī aṇagārē māsakhamaṇapāraṇagaṁsi paḍhamāē pōrisīē sajjhāyaṁ karēi bīyāi pōrisīē jhāṇaṁ jhiyāi ēvaṁ jahā gōyamasāmī tahēva bhāyaṇāiṁ ōgāhēi, tahēva dhammaghōsaṁ thēraṁ āpucchaï jāva campāē nayarīē ucca-nīyamajjhimāiṁ kulāiṁ jāva aḍamāṇē jēṇēva nāgasirīē māhaṇīē gihē tēṇēva anupaviṭṭhē.

1.16.2.3

taē ṇaṁ sā nāgasirī māhaṇī dhammarūiṁ ējjamāṇaṁ pāsaï pāsittā tassa sālaïyassa tittaka-ḍuyassa bahusambhārasambhiyassa nēhāvagāḍhassa nisiraṇaṭṭhāyāē haṭṭhatuṭṭhā uṭṭhāē uṭṭhēi uṭṭhēttā jēṇēva bhattagharē tēṇēva uvāgacchaï uvāgacchittā taṁ sālāiyaṁ tittakaḍuyaṁ ca jāva bahunēhaṁ dhammaruissa aṇagārassa paḍiggahaṁsi savvamēva nisiraï, taē ṇaṁ sē dhammarūī amagārē ahāpajjattamitti kaṭṭu nāgasirīē māhaṇīē gihāō paḍinikkhamaï paḍinikkhamittā campāē nayarīē majjhaṁ-majjhēṇaṁ paḍinikkhamaï paḍinikkhamittā jēṇēva subhūmibhāgē ujjāṇē jēṇēva dhammaghōsā thērā tēṇēva uvāgacchaï dhammaghōsassa adūrasāmantē annapāṇaṁ paḍidaṁsēi paḍidaṁsēttā annapāṇaṁ karayalaṁsi paḍidaṁsēi.

1.16.2.4

taē ṇaṁ dhammaghōsā thērā tassa sālaïyassa0 nēhāvagāḍhassa gandhēṇaṁ abhibhūyā samāṇā taō sālaïyāō0 nēhāvagāḍhāō ēgaṁ binduyaṁ gahāya karayalaṁsi āsādēnti tittagaṁ khāraṁ kaḍuyaṁ akhajjaṁ abhōjjaṁ visabhūyaṁ jāṇittā dhammarūiṁ aṇagāraṁ ēvaṁ vayāsī — jaï ṇaṁ tumaṁ dēvāṇuppiyā! ēyaṁ sālaïyaṁ jāva nēhāvagāḍhaṁ āhārēsi tō ṇaṁ tumaṁ akālē cēva jīviyāō vavarōvijjasi, taṁ mā ṇaṁ tumaṁ dēvāṇuppiyā! imaṁ sālaïyaṁ jāva āhārēsi, mā ṇaṁ tumaṁ akālē cēva jīviyāō vavarōvijjasi, taṁ gacchaha ṇaṁ tumaṁ dēvāṇuppiyā! imaṁ sālaïyaṁ0 ēgantamaṇāvāē acittē thaṇḍilē pariṭṭhavēhi (2) aṇṇaṁ phāsuyaṁ ēsaṇijjaṁ asaṇa-pāṇa-khāima-sāimaṁ paḍigāhēttā āhāraṁ āhārēhi.

1.16.2.5

taē ṇaṁ sē dhammarūī aṇagārē dhammaghōsēṇaṁ thērāṇaṁ ēvaṁ vuttē samāṇē dhammaghōsassa thērassa antiyāō paḍinikkhamaï paḍinikkhamittā subhūmibhāgāō ujjāṇāō adūrasāmantē thaṇḍilaṁ paḍilēhēiṁ paḍilēhēttā taō sālaïyāō0 jāva ēgaṁ bindugaṁ gahāya thaṇḍilaṁsi nisiraï, taē ṇaṁ tassa sālaïyassa [tittakaḍuyassa bahusambhārasambhiyassa] nēhāvagāḍhassa gandhēṇaṁ bahūṇi pipīligāsahassāṇi pāubbhūyāṇi jā jahā ya ṇaṁ pipīligā āhārēi sā tahā akālē cēva jīviyāō vavarōvijjaï.

1.16.2.6

taē ṇaṁ tassa dhammaruissa aṇagārassa imēyārūvē ajjhatthiē cintiē patthiē maṇōgaē saṅkappē samuppajjitthā — jaï tāva imassa sālaïyassa jāva ēgaṁmi bindugaṁmi pakkhittaṁmi aṇēgāiṁ pipīligāsahassāiṁ vavarōvijjanti taṁ jaï ṇaṁ ahaṁ ēyaṁ sālaïyaṁ tittālaüyaṁ bahusambhārasambhiyaṁ nēhāvagāḍhaṁ thaṇḍilaṁsi savvaṁ nisirāmi, tō ṇaṁ bahūṇaṁ pāṇāṇaṁ bhūyāṇaṁ jīvāṇaṁ sattāṇaṁ vahakaraṇaṁ bhavissaï, taṁ sēyaṁ khalu mamēyaṁ sālaïyaṁ jāva nēhāvagāḍhaṁ sayamēva āhārittaē, mamaṁ cēva ēēṇaṁ sarīraēṇaṁ nijjaü tti kaṭṭu.

1.16.2.7

ēvaṁ sampēhēi sampēhēttā muhapōttiyaṁ paḍilēhēi paḍilēhittā sasīsōvariyaṁ kāyaṁ pamajjēi pamajjēttā taṁ sālaïyaṁ tittakaḍuyaṁ bahu nēhāvagāḍhaṁ bilamiya pannagabhūēṇaṁ appāṇēṇaṁ savvaṁ sarīrakōṭṭhagaṁsi pakkhivaï, taē ṇaṁ tassa dhammaruissa taṁ sālaïyaṁ jāva nēhāvagāḍhaṁ āhāriyassa samāṇassa muhuttantarēṇaṁ pariṇamāṇaṁsi sarīragaṁsi vēyaṇā pāubbhūyā ujjalā jāva durahiyāsā.

1.16.2.8

taē ṇaṁ sē dhammarūī aṇagārē athāmē abalē avīriē apurisakkāraparakkamē aghāraṇijja-mitti kaṭṭu āyārabhaṇḍagaṁ ēgantē ṭhavēi ṭhavēttā thaṇḍilaṁ paḍilēhēi, dabbhasanthāragaṁ santharēi, dabbhasanthāragaṁ durūhaï, puratthābhimuhē sampaliyaṅkanisaṇṇē karayalapariggahiyaṁ0 ēvaṁ vayāsī — namōtthu ṇaṁ arahantāṇaṁ jāva sampattāṇaṁ, namōtthu ṇaṁ dhammaghōsāṇaṁ thērāṇaṁ mama dhammāyariyāṇaṁ dhammōvaēsagāṇaṁ, puvviṁ pi ṇaṁ maē dhammaghōsāṇaṁ thērāṇaṁ antiē savvē pāṇāivāē paccakkhāē jāvajjīvāē jāva pariggahē, iyāṇiṁ pi ṇaṁ ahaṁ tēsiṁ cēva bhagavantāṇaṁ antiyaṁ savvaṁ pāṇāiyāvaṁ paccakkhāmi jāva pariggahaṁ paccakkhāmi jāvajjīvāē, jahā khandaō jāva carimēhiṁ ussāsēhiṁ vōsirāmi tti kaṭṭu ālōiya-paḍikkantē samāhipattē kālagaē.

1.16.2.9

taē ṇaṁ tē dhammaghōsā thērā dhammarūiṁ aṇagāraṁ ciraṁ gayaṁ jāṇittā samaṇē nigganthē saddāvēnti saddāvēttā ēvaṁ vayāsī — ēvaṁ khalu dēvāṇuppiyā! dhammarūī aṇagārē māsakkhamaṇāpāraṇagaṁsi sālaïyassa jāva nēhāvagāḍhassa nisiraṇaṭṭhayāē bahiyā niggaē cirāti taṁ gacchaha ṇaṁ tubbhē dēvāṇuppiyā! dhammarūissa aṇagārassa savvaō samantā maggaṇa-gavēsaṇaṁ karēha.

1.16.2.10

taē ṇaṁ tē samaṇā nigganthā jāva paḍisuṇēnti paḍisuṇēttā dhammaghōsāṇaṁ thērāṇaṁ antiyāō paḍinikkhamanti paḍinikkhamittā dhammaruissa aṇagārassa savvaō samantā maggaṇa-gavēsaṇaṁ karēmāṇā jēṇēva thaṇḍilē tēṇēva uvāgacchanti uvāgacchittā dhammarūissa aṇagārassa sarīragaṁ nippāṇaṁ niccēṭṭhaṁ jīvavippajaḍhaṁ pāsanti pāsittā hā hā ahō! akajjamiti kaṭṭu dhammaruīssa aṇagārassa parinivvāṇavattiyaṁ kāussaggaṁ karēnti, dhammaruiyassa āyārabhaṇḍagaṁ gēṇhanti gēṇhittā jēṇēva dhammaghōsā thērā tēṇēva uvāgacchati uvāgacchittā gamaṇāgamaṇaṁ paḍikkamanti paḍikkamittā ēvaṁ vayāsī—

1.16.2.11

ēvaṁ khalu amhē tubbhaṁ antiyāō paḍinikkhamāmō subhūmimāgassa ujjāṇassa paripērantēṇaṁ dhammarūissa aṇagārassa savvaṁ jāva karēmāṇā jēṇēva thaṇḍilē tēṇēva uvāgacchāmō jāva ihaṁ havvamāgayā, taṁ kālagaē ṇaṁ bhantē! dhammaruī aṇagārē imē sē āyārabhaṇḍaē.

1.16.2.12

taē ṇaṁ tē dhammadhōsā thērā puvvagaē uvaōgaṁ gacchanti samaṇē nigganthē nigganthīō ya saddāvēnti saddāvēttā ēvaṁ vayāsī — ēvaṁ khalu ajjō mama antēvāsī dhammarūī nāmaṁ aṇagārē pagaïbhaddaē [pagaïuvasantē pagaïpayaṇukōhamāṇamāyālōbhē miumaddava-sampannē allīṇē bhaddaē] viṇīē māsaṁmāsēṇaṁ anikkhittēṇaṁ tavōkammēṇaṁ appāṇaṁ bhāvēmāṇē jāva nāgasirīē māhaṇīē gihē anupaviṭṭhē, taē ṇaṁ sā nāgasirī māhaṇī jāva taṁ nisiraï, taē ṇaṁ sē dhammarūī aṇagārē ahāpajjattamitti kaṭṭu kālaṁ aṇavakaṅkhēmāṇē viharati.

1.16.2.13

sē ṇaṁ dhammarūī aṇagārē bahūṇi vāsāṇi sāmaṇṇapariyāgaṁ pāuṇittā ālōiyapaḍikkantē samāhipattē kālamāsē kālaṁ kiccā uḍḍhaṁ jāva savvaṭṭhasiddhē mahāvimāṇē dēvattāē uvavaṇṇē, tattha ṇaṁ ajahannamaṇukkōsēṇaṁ tēttīsaṁ sāgarōvamāiṁ ṭhiī pannattā, tattha ṇaṁ dhammaruīyassa vi dēvassa tēttīsaṁ sāgarōvamāiṁ ṭhiī pannattā, sē ṇaṁ dhammarūī dēvē tāō dēvalōgāō jāva mahāvidēhē vāsē sijjhihii.

1.16.3.1

taṁ dhiratthu ṇaṁ ajjō! nāgasirīē māhaṇīē adhannāē apuṇṇāē jāva nimbōliyāē jāē ṇaṁ tahārūvē sāhū dhammarūī amagārē māsakkhamaṇapāraṇagaṁsi sālaïēṇaṁ jāva nēhāvagāḍhaṇaṁ akālē cēva jīviyāō vavarōviē.

1.16.3.2

taē ṇaṁ tē samaṇā nigganthā dhammaghōsāṇaṁ thērāṇaṁ antiē ēyamaṭṭhaṁ sōccā nisamma campāē siṅghāḍaga-tiga-jāva bahujaṇassa ēvamāikkhanti0 dhiratthu ṇaṁ dēvāṇuppiyā! nāgasirīē jāva dūbhaganimbōliyāē, jāē ṇaṁ tahārūvē sāhū sāhūrūvē sālaïēṇaṁ jāva jīviyāō vavarōviē.

1.16.3.3

taē ṇaṁ tēsiṁ samaṇāṇaṁ antiē ēyamaṭṭhaṁ sōccā nisamma bahujaṇō aṇṇamaṇṇassa ēvamāikkhaï ēvaṁ bhāsaï ēvaṁ pannavēi ēvaṁ parūvēi- dhiratthu ṇaṁ nāgasirīē māhaṇīē jāva jīviyāō vavarōviē taē ṇaṁ tē māhaṇā campāē nayarīē bahujaṇassa antiē ēyamaṭṭhaṁ sōccā nisamma āsuruttā jāva misimisēmāṇā jēṇēva nāgasirī māhaṇī tēṇēva uvāgacchanti uvagacchittā nāgasiriṁ māhaṇiṁ ēvaṁ vayāsī — haṁ bhō! nāgasirī! apatthiyapatthiē durantapantalakkhaṇē hīṇapunnacāuddasē sirī-hiri-dhii-kittiparivajjiē dhiratthu ṇaṁ tava adhannāē apunnāē jāva nimbōliyāē, jāē ṇaṁ tumē tahārūvē sāhū sāhūrūvē dhammarūī aṇagārē māsakhamaṇapāraṇagaṁsi sālaïēṇaṁ jāva vavarōviē, uccāvayāhiṁ akkōsaṇāhiṁ akkōsanti uccāvayāhiṁ uddhaṁsaṇāhiṁ uddhaṁsēnti uccāvayāhiṁ nibbhañcchaṇāhiṁ nibbhañcchēnti uccāvayāhiṁ nicchōḍaṇāhiṁ nicchōḍēnti tajjēnti tālēnti tajjittā tālittā sayāō gihāō nicchubhanti.

1.16.3.4

taē ṇaṁ sā nāgasirī sayāō gihāō nicchūḍhā samāṇī campāē nayarīē siṅghāḍaga-tiya-caükka-caccara-caümmuha0 bahujaṇēṇaṁ hīlijjamāṇī khiṁsijjamāṇī nindijjamāṇī garahijjamāṇī tajjijjamāṇī pavvahijjamāṇī dhikkārijjamāṇī thukkārijjamāṇī katthaï ṭhāṇaṁ vā nilayaṁ vā alabhamāṇī daṇḍīkhaṇḍa-nivasaṇā khaṇḍamallaya-khaṇḍaghaḍaga-hatthagayā phuṭṭa-haḍāhaḍa-sīsā macchiyā-caḍagarēṇaṁ annijjamāṇamaggā gēhaṅgēhēṇaṁ dēhambaliyāē vittiṁ kappēmāṇī viharaï.

1.16.3.5

taē ṇaṁ tīsē nāgasirīē māhaṇīē tabbhavaṁsi cēva sōlasa rōgāyaṅkā pāubbhūyā taṁ jahā— sāsē kāsē jōṇisūlē jāva kōḍhē, taē ṇaṁ sā nāgasirī māhaṇī sōlasēhiṁ rōgāyaṅkēhiṁ abhibhūyā samāṇī aṭṭa-duhaṭṭa-vasaṭṭā kālamāsē kālaṁ kiccā chaṭṭhāē puḍhavīē ukkōsēṇaṁ bāvīsasāgarōvamaṭṭhiiēsu naraēsu nēraïyattāē uvavaṇṇā.

1.16.3.6

sā ṇaṁ taō aṇantaraṁ uvvaṭṭittā macchēsu uvavaṇṇā tattha ṇaṁ satthavajjhā dāhavakkantīē kālamāsē kālaṁ kiccā ahēsattamāē puḍhavīē ukkōsaṁ tēttīsaṁ sāgarōvamaṭṭhiīēsu nēraïēsu nēraïyattāē uvavaṇṇā, sā ṇaṁ taōṇantaraṁ uvvaṭṭittā dōccampi macchēsu uvavajjaï, tattha vi ya ṇaṁ satthavajjhā dāhavakkantīē dōccampi ahēsattamāē puḍhavīē ukkōsaṁ tēttīsasāgarōvamaṭṭhiiēsu nēraïēsu nēraïyattāē uvavajjaï, sā ṇaṁ taōhitō uvaṭṭittā taccampi macchēsu uvavaṇṇā, tattha vi ya ṇaṁ satthavajjhā jāva kālaṁ kiccā dōccampi chaṭṭhīē puḍhavīē ukkōsaṁ0 taōṇantaraṁ uvvaṭṭittā uragēsu ēvaṁ jahā gōsālē tahā nēyavvaṁ jāva rayaṇappabhāē puḍhavīō uvvaṭṭittā saṇṇīsu uvavaṇṇā, taō uvvaṭṭittā jāva imāiṁ khahayaravihāṇāiṁ jāva aduttaraṁ ca kharabāyarapuḍhavikāiyattāē tēsu aṇēgasayasahassakhuttō.

1.16.4.1

sā ṇaṁ taōṇantaraṁ uvvaṭṭittā ihēva jambuddīvē dīvē bhārahē vāsaṁ campāē nayarīē sāgaradattassa satthavāhassa bhaddāē bhāriyāē kucchiṁsi dāriyattāē paccāyāyā, taē ṇaṁ sā bhaddā satthavāhī navaṇhaṁ māsāṇaṁ bahupaḍipuṇṇāṇaṁ dāriyaṁ payāyā sukumālakōmaliyaṁ gayatāluyasamāṇaṁ, taē ṇaṁ tīsē ṇaṁ dāriyāē nivvattē bārasāhiyāē ammāpiyarō imaṁ ēyārūvaṁ gōṇṇaṁ guṇanipphaṇṇaṁ nāmadhējjaṁ karēnti- jamhā ṇaṁ amhaṁ ēsā dāriyā sukumālakōmaliyā gayatāluyasamāṇā taṁ hōu ṇaṁ amhaṁ imīsē dāriyāē nāmadhējjaṁ sukumāliyā-sukumāliyā.

1.16.4.2

taē ṇaṁ tīsē dāriyāē ammāpiyarō nāmadhējjaṁ karēnti sūmāliyatti, taē ṇaṁ sā sūmāliyā dāriyā pañcadhāīpariggahiyā taṁ jahā— khīradhāīē jāva girakandamallīṇā iva campagalayā nivvāē nivvādhāyaṁsi suhaṁsuhēṇaṁ parivaḍḍhaï, taē ṇaṁ sā sūmāliyā dāriyā ummukkabālabhāvā jāva rūvēṇa ya jōvvaṇēṇa ya lāvaṇṇēṇa ya ukkiṭṭhā ukkiṭṭhasarīrā jāyā yāvi hōtthā.

1.16.5.1

tattha ṇaṁ campāē nayarīē jiṇadattē nāmaṁ satthavāhē-aḍḍhē0 tassa ṇaṁ jiṇadattassa bhaddā bhāriyā-sūmālā iṭṭhā jāva māṇussaē kāmabhōgē paccaṇubbhavamāṇā viharaï, tassa ṇaṁ jiṇadattassa puttē bhaddāē bhāriyāē attaē sāgaraē nāmaṁ dāraē-sukumālapāṇipāē jāva surūvē, taē ṇaṁ sē jiṇadattē satthavāhē aṇṇayā kayāi sayāō gihāō paḍinikkhamaï paḍinikkhamittā sāgaradattassa gihassa adūrasāmantēṇaṁ vīīvayaï imaṁ ca ṇaṁ sūmāliyā dāriyā ṇhāyā cēḍiyā-cakkavāla-samparivuḍā uppiṁ āgāsatalagaṁsi kaṇaga-tindūsaēṇaṁ kīlamāṇī-kīlamāṇī viharaï.

1.16.5.2

taē ṇaṁ sē jiṇadattē satthavāhē sūmāliyaṁ dāriyaṁ pāsaï pāsittā sūmāliyāē dāriyāē rūvē ya jōvvaṇē ya lāvaṇṇē ya jāyavimhaē kōḍumbiyapurisē saddāvēi saddāvēttā ēvaṁ vayāsī — ēsa ṇaṁ dēvāṇuppiyā! kassa dāriyā kiṁ vā nāmadhējjaṁ sē? taē ṇaṁ tē kōḍumbiyapurisā jiṇadattēṇaṁ satthavāhēṇaṁ ēvaṁ vuttā samāṇā haṭṭhatuṭṭhā karayala jāva ēvaṁ vayāsī — ēsa ṇaṁ dēvāṇuppiyā! sāgaradattassa satthavāhassa dhūyā bhaddāē bhāriyāē attayā sūmāliyā nāmaṁ dāriyā-sukumālapāṇipāyā jāva ukkiṭṭhā.

1.16.5.3

taē ṇaṁ jiṇadattē satthavāhē tēsiṁ kōḍumbiyāṇaṁ antiē ēyamaṭṭhaṁ sōccā jēṇēva saē gihē tēṇēva uvāgacchaï uvāgacchittā ṇhāē jāva mitta-nāi-parivuḍē campāē0 jēṇēva sāgaradattassa gihē tēṇēva uvāgaē, taē ṇaṁ sē sāgaradattē satthavāhē jiṇadattaṁ satthavāhaṁ ējjamāṇaṁ pāsaï pāsittā āsaṇāō abbhuṭṭhēi abbhuṭṭhēttā āsaṇēṇaṁ uvanimantēi uvanimantēttā āsatthaṁ vīsatthaṁ suhāsaṇavaragayaṁ ēvaṁ vayāsī — bhaṇa dēvāṇuppiyā! kimāgamaṇapaōyaṇaṁ?.

1.16.5.4

taē ṇaṁ sē jiṇadattē sāgaradattaṁ ēvaṁ vayāsī — ēvaṁ khalu ahaṁ dēvāṇuppiyā! tava dhūyaṁ bhaddāē attiyaṁ sūmāliyaṁ sāgarassa bhāriyattāē varēmi, jaï ṇaṁ jāṇāha dēvāṇuppiyā! juttaṁ vā pattaṁ vā salāhaṇijjaṁ vā sarisō vā sañjōgō tā dijjaü ṇaṁ sūmāliyā sāgaradāragassa, taē ṇaṁ dēvāṇuppiyā! bhaṇa kiṁ dalayāmō sukaṁ sūmāliyāē? taē ṇaṁ sē sāgaradattē satthavāhē jiṇadtataṁ satthavāhaṁ ēvaṁ vayāsī — ēvaṁ khalu dēvāṇuppiyā sūmāliyā dāriyā ēgā ēgajāyā iṭṭhā jāva kimaṅga puṇa pāsaṇayāē taṁ nō khalu ahaṁ icchāmi sūmāliyāē dāriyāē khaṇamavi vippaōgaṁ taṁ jaï ṇaṁ dēvāṇuppiyā! sāgaraē dāraē mama gharajāmāuē bhavaï tō ṇaṁ ahaṁ sāgarassa sūmāliyaṁ dalayāmi, taē ṇaṁ sē jiṇadattē satthavāhē sāgaradattēṇaṁ satthavāhēṇaṁ ēvaṁ vuttē samāṇē jēṇēva saē gihē tēṇēva uvāgacchaï uvāgacchittā sāgaragaṁ dāragaṁ saddāvēi saddāvēttā ēvaṁ vayāsī — ēvaṁ khalu puttā! sāgaradattē satthavāhē mama ēvaṁ vayāsī — ēvaṁ khalu dēvāṇuppiyā! sūmāliyā dāriyā-iṭṭhā taṁ cēva taṁ jaï ṇaṁ sāgaraē dāraē mama gharajāmāuē bhavaï tō ṇaṁ dalayāmi, taē ṇaṁ sē sāgaraē dāraē jiṇadattēṇaṁ satthavāhēṇaṁ ēvaṁ vuttē samāṇē tusiṇīē, tatē ṇaṁ jiṇadattē satthavāhē annayā kayāi sōhaṇaṁsi tihi-karaṇa-nakkhatta-muhunttasi vipulaṁ asaṇa-pāṇa-khāima-sāimaṁ uvakkhaḍāvēi uvakkhaḍāvēttā mitta-nāi-jāva sammāṇēttā sāgaraṁ dāragaṁ ṇhāyaṁ jāva savvālaṅkāravibhusiyaṁ karēi karēttā purisahassavāhiṇīyaṁ sīyaṁ durūhāvēi durūhāvēttā mitta-nāi-jāva parivuḍē savviḍḍhīē sayāō gihāō niggacchaï niggacchittā campaṁ nayariṁ majjhaṁmajjhēṇaṁ jēṇēva sāgaradattassa gihē tēṇēva uvāgacchaï uvāgacchittā sīyāō paccōrūhaï paccōrūhittā sāgaragaṁ dāragaṁ sāgaradattassa satthavāhassa uvaṇēi.

1.16.5.5

taē ṇaṁ sē sāgaradattē satthavāhē vipulaṁ asaṇa-pāṇa-sāima-khāimaṁ uvakkhaḍāvēi uvakkhaḍāvēttā jāva sammāṇēttā sāgaragaṁ dāragaṁ sūmāliyāē dāriyāē saddhiṁ paṭṭayaṁ durūhavēi durūhāvēttā sēyāpīēhiṁ kalasēhiṁ majjāvēi majjāvēttā aggihōmaṁ karāvēi karāvēttā sāgaragaṁ dārayaṁ sūmāliyaē dāriyāē pāṇiṁ gēṇhāvēi.

1.16.6.1

taē ṇaṁ sāgaraē sūmāliyāē dāriyāē imaṁ ēyārūvaṁ pāṇiphāsaṁ paḍisaṁvēdēiṁ, sē jahānāmaē-asipattē i vā jāva mummurē i vā jāva ēttō aṇiṭṭhatarāē cēva jāva pāṇiphāsaṁ paḍisaṁvēdēi, taē ṇaṁ sē sāgaraē akāmaē avasavvasē muhuttamēttaṁ sañciṭṭhaï, taē ṇaṁ sāgaradattē satthavāhē sāgarassa ammāpiyarō mitta-nāi0 vipulēṇaṁ asaṇa-pāṇa-khāima-sāimaṁ puppha-vattha jāva sammāṇēttā paḍivisajjēi.

1.16.6.2

taē ṇaṁ sāgaraē sūmāliyāē saddhiṁ jēṇēva vāsagharē tēṇēva uvāgacchaï uvāgacchittā sūmāliyāē dāriyāē saddhiṁ taligaṁsi nivajjaï, taē ṇaṁ sē sāgaraē dāraē sūmāliyāē dāriyāē imaṁ ēyārūvaṁ aṅgaphāsaṁ paḍisaṁvēdēi sē jahānāmaē-asipattē i vā jāva ēttō amaṇāmatarāgaṁ cēva aṅgaphāsaṁ paccaṇubbhavamāṇē viharaï, taē ṇaṁ sa sāgaraē dāraē sūmāliyāē dāriyāē aṅgaphāsaṁasahamāṇē avasavvasē muhuttamēttaṁ sañciṭṭhaï taē ṇaṁ sē sāgaradāraē sūmāliyaṁ dāriyaṁ suhapasuttaṁ jāṇittā sūmāliyāē dāriyāē pāsāō uṭṭhēi uṭṭhēttā jēṇēva saē sayaṇijjē tēṇēva uvāgacchaï uvāgacchittā sayaṇijjaṁsi nivajjaï.

1.16.6.3

taē ṇaṁ sā sūmāliyā dāriyā taō muhuttantarassa paḍibuddhā samāṇī païṁvvayā païmaṇurattā païṁ pāsē apassamāṇī talimāō uṭṭhēi uṭṭhēttā jēṇēva sē sayaṇijjē tēṇēva uvāgacchaï uvāgacchittā sāgarassa pāsē anuvajjaï, taē ṇaṁ sē sāgaradāraē sūmāliyāē dāriyāē dōccampi imaṁ ēyārūvē aṅgaphāsaṁ paḍisaṁvēdēi jāva akāmaē avasavvasē muhuttamētaṁ sañciṭṭhaï, taē ṇaṁ sē sāgaradāraē sūmāliyaṁ dāriyaṁ suhapasuttaṁ jāṇittā sayaṇijjāō uṭṭhēi uṭṭhēttā vāsagharassa dāraṁ vihāḍēi vihāḍēttā mārāmukkē viva kāē jāmēva disiṁ pāubbhūē tāmēva disiṁ paḍigaē.

1.16.7.1

taē ṇaṁ sā sūmāliyā dāriyā taō muhuttantarassa paḍibuddhā pativvayā jāva apāsamāṇī sayaṇijjāō uṭṭhēi sāgarassa dāragassa savvaō samantā maggaṇa-gavēsaṇaṁ karēmāṇī-karēmāṇī vāsagharassa dāraṁ vihāḍiyaṁ pāsaï pāsittā ēvaṁ vayāsī — gaē ṇaṁ sē sāgaraē tti kaṭṭu ōhayamaṇasaṅkappā jāva jhiyāyaï, taē ṇaṁ sā bhaddā satthavāhī kallaṁ pāuppabhāyāē0 dāsacēḍiṁ saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiē! vahūvarassa muhadhōvaṇiyaṁ uvaṇēhiṁ, taē ṇaṁ sā dāsacēḍī bhaddāē satthavāhīē ēvaṁ vuttā samāṇī ēyamaṭṭhaṁ tahatti paḍisuṇēi paḍisuṇēttā muhadhōvaṇiyaṁ gēṇhaï gēṇhittā jēṇēva vāsagharē tēṇēva uvāgacchaï uvāgacchittā sūmāliyaṁ dāriyaṁ jāva jhiyāyamāṇiṁ pāsaï pāsittā ēvaṁ vayāsī — kiṇṇaṁ tumaṁ dēvāṇuppiē ōhamayaṇaṁsakappā jāva jhiyāhi.

1.16.7.2

taē ṇaṁ sā sūmāliyā dāriyā taṁ dāsacēḍiṁ ēvaṁ vayāsī — ēva khalu dēvāṇuppiē! sāgaraē dāraē mamaṁ suhapasuttaṁ jāṇittā mama pāsāō uṭṭhēi uṭṭhēttā vāsagharaduvāraṁ avaṅguṇēi jāva paḍigaē taē ṇaṁ ahaṁ taō muhuttantarassa paḍibuddhā jāva vihāḍiyaṁ pāsāmi pāsittā gaē ṇaṁ sē sāgaraē ti kaṭṭu ōhayamaṇasaṅkappā jāva jhiyāyāmi, taē ṇaṁ sā dāsacēḍī sūmāliyē dāriyāē ēyamaṭṭhaṁ sōccā jēṇēva sāgaradattē satthavāhē tēṇēva uvāgacchaï uvāgacchittā sāgaradattassa ēyamaṭṭhaṁ nivēdēi.

1.16.7.3

taē ṇaṁ sē sāgaradattē dāsacēḍīē antiē ēyamaṭṭhaṁ sōccā nisammaṁ āsuruttē0 jāva jēṇēva jiṇadattassa satthavāhassa gihē tēṇēva uvāgacchaï uvāgacchittā jiṇadattaṁ satthavāhaṁ ēvaṁ vayāsī — kiṇṇaṁ dēvāṇuppiyā! ēyaṁ juttaṁ vā pattaṁ vā kulāṇurūvaṁ vā kulasarisaṁ vā jaṇṇaṁ sāgaraē dāraē sūmāliyaṁ dāriyaṁ adiṭṭhadōsavaḍiyaṁ païvvayaṁ vippajahāya ihamāgaē bahūhiṁ khijjaṇiyāhi ya rūṇṭāṇiyāhi ya uvālabhaï.

1.16.7.4

taē ṇaṁ jiṇadattē sāgaradattassa satthavāhassa ēyamaṭṭhaṁ sōccā jēṇēva sāgaraē tēṇēva uvāgacchaï uvāgacchittā sāgarayaṁ dāruyaṁ ēvaṁ vayāsī — duṭṭhu ṇaṁ puttā! tumē kayaṁ sāgaradattassa gihāō ihaṁ havvamātē, tēṇaṁ taṁ gacchaha ṇaṁ tumaṁ puttā! ēvamavi gaē sāgaradattassa gihē, taē ṇaṁ sē sāgaraē dāraē jiṇadattaṁ satthavāhaṁ ēvaṁ vayāsī — aviyāiṁ ahaṁ tāō! giripaḍaṇaṁ vā tarupaḍaṇaṁ vā maruppavāyaṁ vā jalappavēsaṁ vā jalaṇappavēsaṁ vā visabhakkhaṇaṁ vā satthōvāḍaṇaṁ vā vēhāṇasaṁ vā giddhapaṭṭhaṁ vā pavvajjaṁ vā vidēsagamaṇaṁ vā abbhuvagacchējjā nō khalu ahaṁ sāgaradattassa gihaṁ gacchējjā.

1.16.7.5

taē ṇaṁ sē sāgaradattē satthavāhē kuḍuntariyāē sāgarassa ēyamaṭṭhaṁ nisāmēi nisāmēttā lajjiē vilīē viḍḍē jiṇadattassa satthavāhassa gihāō paḍinikkhamaï paḍinikkhamittā jēṇēva saē gihē tēṇēva uvāgacchaï uvāgacchittā sukumāliyaṁ dāriyaṁ saddāvēi saddāvēttā aṅkē nivēsaï nivēsēttā ēvaṁ vayāsī — kiṇṇaṁ tava puttā sāgaraēṇaṁ dāraēṇaṁ mukkā?, ahaṁ ṇaṁ tumaṁ tassa dāhāmi jassa ṇaṁ tumaṁ iṭṭhā jāva maṇāmā bhavissasi tti sūmāliyaṁ dāriya tāhiṁ iṭṭhāhiṁ0 vaggūhiṁ samāsāsēi samāsāsēttā paḍivisajjēi.

1.16.7.6

taē ṇa sē sāgaradattē satthavāhē aṇṇayā uppiṁ āgāsatalagaṁsi suhanisaṇṇē rāyamaggaṁ ōlōēmāṇē-ōlōēmāṇē ciṭṭhaï, taē ṇaṁ sa sāgaradattē ēgaṁ mahaṁ damagapurisaṁ pāsaï daṇḍikhaṇḍa-nivasaṇaṁ khaṇḍamallagakhaṇḍadhaḍaga-hatthagayaṁ phuṭṭa-haḍāhaḍa-sīsaṁ macchiyāsahassēhiṁ annijjamāṇamaggaṁ taē ṇaṁ sē sāgaradattē satthavāhē kōḍumbiyapurisē saddāvēi saddāvēttā ēvaṁ vayāsī — tubbhē ṇaṁ dēvāṇuppiyā! ēyaṁ damaga-purisaṁ vipulēṇaṁ asaṇa-pāṇa-khāima-sāimēṇaṁ palōbhēhi gihaṁ anuppavēsēha anuppavēsēttā khaṇḍamallagaṁ khaṇḍadhaḍagaṁ ca sē ēgantē ēḍēha ēḍēttā alaṅkāriyakammaṁ kārēha ṇhāyaṁ kayabalikammaṁ jāva savvālaṅkāravibhūsiyaṁ karēha karēttā maṇuṇṇaṁ asaṇaṁ0 bhōyāvēha, mama antiyaṁ uvaṇēha.

1.16.7.7

taē ṇaṁ tē kōḍumbiyapurisā jāva paḍisuṇēnti paḍisuṇēttā jēṇēva sē damagapurisē tēṇēva uvāgacchanti uvāgacchittā taṁ damagaṁ asaṇa-pāṇa-khāima-sāimēṇa uvaplalōbhēnti uvappalōbhēttā sayaṁ gihaṁ anuppavēsanti anuppavēsittā taṁ khaṇḍamallagaṁ khaṇḍaghaḍagaṁ ca tassa damagapurissa ēgantē ēḍēnti, taē ṇaṁ sē damagē taṁsi khaṇḍamallagaṁsi khaṇḍadhaḍagaṁsi ya ēḍijjamāṇaṁsi mahayā-mahayā saddēṇaṁ ārasaï taē ṇaṁ sē sāgaradattē satthavāhē tassa damagapurisassa taṁ mahayā-mahayā ārasiya-saddaṁ sōccā nisammaṁ kōḍumbiyapurisē ēvaṁ vayāsī — kinnaṁ dēvāṇuppiyā ēsa damagapurisē mahayā-mahayā saddēṇaṁ ārasaï? taē ṇaṁ tē kōḍumbiyapurisā ēvaṁ vayanti-ēsa ṇaṁ sāmī taṁsi khaṇḍamallagaṁsi khaṇḍaghaḍagaṁsi ya ēḍijjamāṇaṁsi mahayā-mahayā saddēṇaṁ ārasaï.

1.16.7.8

taē ṇaṁ sē sāgaradattē satthavāhē tē kōḍumbiyapurisē ēvaṁ vayāsī — mā ṇaṁ tubbhē dēvāṇuppiyā! ēyassa damagassa taṁ khaṇḍaṁ jāva ēḍēha pāsē sē ṭhavēha jahā ṇaṁ pattiyaṁ na bhavaï, tē vi tahēva ṭhavēnti ṭhavēttā0 tassa damagassa alaṅkāriyakammaṁ karēnti karēttā sayapāgasahassapāgahiṁ tēllēhiṁ abbhaṅgēti abbhaṅgiē samāṇē surabhiṇā gandhaṭṭaēṇaṁ gāyaṁ uvvaṭēnti uvvaṭṭattā usiṇōdaga-gandhōdaēṇaṁ ṇhāṇēnti sīōdagēṇaṁ ṇhāṇēnti pamhala-sukumālāē gandhakāsāīē gāyāiṁ lūhēnti lūhēttā haṁsalakkhaṇaṁ paḍagasāḍagaṁ parihēnti, savvālaṅkāravibhūsiyaṁ karēnti, vipulaṁ asaṇa-pāṇa-khāima-sāimaṁ bhōyāvēnti bhōyāvēttā sāgaradattassa uvaṇēnti.

1.16.7.9

taē ṇaṁ sē sāgaradattē satthavāhē sūmāliyaṁ dāriyaṁ ṇhāyaṁ jāva savvālaṅkāravibhūsiyaṁ karēttā taṁ damagapuriyaṁ ēvaṁ vayāsī — ēsa ṇaṁ dēvāṇuppiyā! mama dhūyā iṭṭhā kantā piyā maṇuṇṇā maṇāmā ēyaṁ ṇaṁ ahaṁ tava bhāriyattāē dalayāmi bhaddiyāē bhaddaō bhavējjāsi, taē ṇaṁ sē damagapurisē sāgaradattassa ēyamaṭṭhaṁ paḍisuṇēi paḍisuṇēttā sūmāliyāē dāriyāē saddhiṁ vāsagharaṁ anupavisaï sūmāliyāē dāriyāē saddhiṁ talimaṁsi nivajjaï, taē ṇaṁ sē damagapurisē sūmāliyāē imēyārūvaṁ aṅgaphāsaṁ paḍisaṁvēdēi sēsaṁ jahā sāgarassa jāva sayaṇijjāō abbhuṭṭhēi abbhuṭṭhēttā vāsagharāō niggacchaï niggacchittā khaṇḍamallagaṁ khaṇḍaghaḍagaṁ ca gahāya mārāmukkē viva kāē jāmēva disiṁ pāubbhūē tāmēva disiṁ paḍigaē, taē ṇaṁ sā sūmāliyā jāva gaē ṇaṁ sē damagapurisē tti kaṭṭu ōhayamaṇasaṅkappā jāva jhiyāyaï.

1.16.8.1

taē ṇaṁ sā bhaddā kallaṁ pāuppabhāyāē rayaṇīē0 jāva dāsacēḍiṁ saddāvēi saddāvēttā ēvaṁ vayāsī — jāva sāgaradattassa ēyamaṭṭhaṁ nivēdēi, taē ṇaṁ sē sāgaradattē tahēva sambhantē samāṇē jēṇēva vāsagharē tēṇēva uvāgacchaï uvāgacchittā sūmāliyaṁ dāriyaṁ aṅkē nivēsēi nivēsēttā ēvaṁ vayāsī — ahō ṇaṁ tumaṁ puttā! purāpōrāṇāṇaṁ jāva paccaṇubbhavamāṇī viharasi, taṁ mā ṇaṁ tumaṁ puttā! ōhayamaṇasaṅkappā jāva jhiyāhi tumaṁ ṇaṁ puttā! mama mahāṇasaṁsi vipulaṁ asaṇaṁ0jahā puṭṭilā jāva paribhāēmāṇī viharāhi. taē ṇaṁ sā sūmāliyā dāriyā ēyamaṭṭhaṁ paḍisuṇēi paḍisuṇēttā kallākalliṁ mahāṇasaṁsi vipulaṁ asaṇaṁ0 jāva paribhāēmāṇī viharaï tēṇaṁ kālēṇaṁ tēṇaṁ samaēṇaṁ gōvāliyāō ajjāō bahussuyāō ēvaṁ jahēva tēyaliṇāē suvvayāō tahēva samōsaḍḍhāō tahēva saṅghāḍaō jāva aṇupaviṭṭhē tahēva jāva sūmāliyā paḍilābhēttā ēvaṁ vayāsī — ēvaṁ khalu ajjāō! ahaṁ sāgarassa aṇiṭṭhā jāva amaṇāmā nēcchaï ṇaṁ sāgaraē dāraē mama nāmaṁ vā jāva paribhōgaṁ vā, jassa-jassa vi ya ṇaṁ dējjāmi tassa-tassa vi ya ṇaṁ aṇiṭṭhā jāva amaṇāmā bhavāmi, tubbhē ya ṇaṁ ajjāō bahunāyāō ēvaṁ jahā puṭṭilā jāva uvaladdhapuvvē jēṇaṁ ahaṁ sāgarassa dāragassa iṭṭhā kantā bhavējjāmi.

1.16.8.2

taē ṇaṁ tāō ajjāō tahēva bhaṇanti tahēva sāviyā jāyā tahēva cintā tahēva sāgaradattaṁ satthavāhaṁ āpucchatti jāva gōvāliyāṇaṁ ajjāṇaṁ antiē pavvaïyā, taē ṇaṁ sā sūmāliyā ajjā jāyā-iriyāsamiyā jāva guttabambhayāriṇī bahūhiṁ caüttha-chaṭṭhaṭṭhama-jāva viharaï.

1.16.8.3

taē ṇaṁ sā sūmāliyā ajjā annayā kayāiṁ jēṇēva gōvāliyāō ajjāō tēṇēva uvāgacchaï uvāgacchittā vandaï namaṁsaï vandittā namaṁsittā ēvaṁ vayāsī — icchāmi ṇaṁ ajjāō! tubbhēhiṁ abbhaṇuṇṇāyā samāṇī campāē nayarīē bāhiṁ subhūmibhāgassa ujjāṇassa adūrasāmantē chaṭṭhañchaṭṭhēṇaṁ anikkhittēṇaṁ tavōkammēṇa sūrābhimuhī āyāvēmāṇī viharittaē.

1.16.8.4

taē ṇaṁ tāō gōvāliyāō ajjāō sūmāliyaṁ ajjaṁ ēvaṁ vayāsī — amhē ṇaṁ ajjō! samaṇīō nigganthīō īriyāsamiyāō jāva guttabambhacāriṇīō nō khalu amhaṁ kappaï bahiyā gāmassa vā jāva saṇṇivēsassa vā chaṭṭhañchṭēṇaṁ jāva viharattiē kappaï ṇaṁ amhaṁ antō uvassayassa vaïparikkhitassa saṅghāḍibaddhiyē ṇaṁ samatalapaïyāē āyāvēttaē, taē ṇaṁ sā sūmāliyā gōvāliyāē ēyamaṭṭhaṁ nō saddahaï nō pattiyaï nō rōēi ēyamaṭṭhaṁ asaddahamāṇī apattiyamāṇī arōyamāṇī subhūmibhāgassa ujjāṇassa adūrasāmantē chaṭṭhañchaṭṭhēṇaṁ jāva viharaï.

1.16.9.1

tattha ṇaṁ campāē laliyā nāma gōṭṭhī parivasaï, naravaï-dinnaviyārā ampāpiyaï niyaya-nippivāsā vēsavihāra-kaya-nikēyā nāṇāviha-aviṇayappahāṇā aḍḍhā jāva aparibhūyā.

1.16.9.2

tattha ṇaṁ campāē dēvadattā nāmaṁ gaṇiyā hōtthā, sūmālā jahā aṇḍa-nāē, taē ṇaṁ tīsē laliyāē gōṭṭhīē aṇṇayā kayāi pañca gōṭṭhillagapurisā dēvadattāē gaṇiyē saddhiṁ subhūbhibhāgassa ujjāyaṇassa ujjāṇasiriṁ paccaṇubbhavamāṇā viharanti, tattha ṇaṁ ēgē gōṭṭhillagapurasē dēvadattaṁ gaṇiyaṁ ucchaṅgē gharēi ēgē piṭṭhaō āyavattaṁ dharēi ēgē pupphapūragaṁ raēi ēgē pāē raēi ēgē cāmarūkkhēvaṁ karēi.

1.16.9.3

taē ṇaṁ sā sūmāliyā ajjā dēvadattaṁ gaṇiyaṁ tēhiṁ pañcahiṁ gōṭṭhillapurisēhiṁ saddhiṁ urālāiṁ māṇussagāiṁ bhōgabhōgāiṁ bhuñjamāṇiṁ pāsaï pāsittā imēyārūvē saṅkappē samuppajjitthā — ahō ṇaṁ imā itthiyā purāpōrāṇāṇaṁ jāva kammāṇaṁ jāva viharaï, taṁ jaï ṇaṁ kēi imassa sucariyassa tava-niyama-bambhacēravāsassa kallāṇē phalavittivisēsē atthi tō ṇaṁ ahamavi āgamissēṇaṁ bhavaggahaṇēṇaṁ imēyārūvāiṁ urālāiṁ jāva viharijjāmi tti kaṭṭu niyāṇaṁ karēi karēttā āyāvaṇabhūmīō paccōruhaï.

1.16.10.1

taē ṇaṁ sā sūmāliyā ajjā sarīrabāusiyā jāyā yāvi hōtthā, abhikkhaṇaṁ-abhikkhaṇaṁ hatthē dhōvēi pāē dhōvēi sīsaṁ dhōvēi muhaṁ dhōvēi thaṇantarāiṁ dhōvēi kakkhantarāiṁ dhōvēi gujjhantarāiṁ dhōvēi jattha ṇaṁ ṭhāṇaṁ vā sējjaṁ vā nisīhiyaṁ vā cēēi tattha vi ya ṇaṁ puvvāmēva udaēṇaṁ abbhukkhēttā taō pacchā ṭhāṇaṁ vā sējjaṁ vā nisīhiyaṁ vā cēēi.

1.16.10.2

taē ṇaṁ tāō gōvāliyāō ajjāō sūmāliyaṁ ajjaṁ ēvaṁ vayāsī — ēvaṁ khalu ajjē amhē samaṇīō nigganthīō iriyāsamiyāō jāva bambhacēradhāriṇīō nō khalu kappaï amhaṁ sarīrabāusiyāē hōttaē, tumaṁ ca ṇaṁ ajjē sarīrabāusiyā abhikkhaṇaṁ-abhikkhaṇaṁ hatthē dhōvēsi jāva cēēsi, taṁ tumaṁ ṇaṁ dēvāṇuppiyaē! ēyassa ṭhāṇassa ālōēhiṁ jāva paḍivajjāhi taē ṇaṁ sā sūmāliyā gōvāliyāṇaṁ ajjāṇaṁ ēyamaṭṭhaṁ nō āḍhāi nō pariyāṇāi aṇāḍhāyamāṇī apariyāṇamāṇī viharaï.

1.16.10.3

taē ṇaṁ tāō ajjāō sūmāliyaṁ ajjaṁ abhikkhaṇaṁ-abhikkhaṇaṁ hīlēnti jāva paribhavanti, abhikkhaṇaṁ-abhikkhaṇaṁ ēyamaṭṭhaṁ nivārēnti taē ṇaṁ tīsē sūmāliyāē samaṇīhiṁ nigganthīhi hīlijjamāṇīē jāva nivārijjamāṇīē imēyārūvē ajjhatthiē jāva samuppajjitthā, jayā ṇaṁ ahaṁ agāravāsamajjhē vasāmi tayā ṇaṁ ahaṁ appavasā, jayā ṇaṁ ahaṁ muṇḍā bhavittā pavvaïyā tayā ṇaṁ ahaṁ paravasā, puvviṁ ca ṇaṁ mamaṁ samaṇīō āḍhanti parijāṇanti iyāṇiṁ nō āḍhanti nō parijāṇanti taṁ sēyaṁ khalu mama kallaṁ pāuppabhāyāē0 gōvāliyāṇaṁ ajjāṇaṁ antiyāō paḍinikkhamittā pāḍiēkkaṁ uvassayaṁ uvasampajjittā ṇaṁ viharittaē tti kaṭṭu ēvaṁ sampēhēi sampēhēttā kallaṁ pāuppabhāyāē0 gōvāliyāṇaṁ ajjāṇaṁ antiyāō paḍinikkhamaï paḍinikkhamittā pāḍiēkkaṁ uvassayaṁ uvasampajjittā ṇaṁ viharaï.

1.16.10.4

taē ṇaṁ sā sūmāliyā ajjā aṇōhaṭṭiyā anivāriyā sacchandamaī abhikkhaṇaṁ-abhikkhaṇaṁ hatthē dhōvēi cēēi tattha vi ya ṇaṁ pāsatthā pāsatthivihāriṇī ōsannā ōsannavihāriṇī kusīlā kusīlavihāriṇī saṁsattā saṁsattavihāriṇī bahūṇa vāsāṇi sāmaṇṇapariyāgaṁ pāuṇaï0 addhamāsiyāē saṁlēhaṇāē0 tassa ṭhāṇassa aṇālōiyapaḍikkantā kālamāsē kālaṁ kiccā īsāṇē kappē aṇṇayaraṁsi vimāṇaṁsi dēvagaṇiyattāē uvavaṇṇā, tatthēgaïyāṇaṁ dēvīṇaṁ navapaliōvamāiṁ ṭhiī pannattā, tattha ṇaṁ sūmāliyāē dēvīē navapaliōvamāiṁ ṭhiī pannattā.

1.16.11.1

tēṇaṁ kālēṇaṁ tēṇaṁ samaēṇaṁ ihēva jambūddīvē dīvē bhārahē vāsē pañcālēsu jaṇavaēsu kampillapurē nāmaṁ nayarē hōtthā- vaṇṇaō, tattha ṇaṁ duvaē nāmaṁ rāyā hōtthā-vaṇṇaō, tassa ṇaṁ culaṇī dēvī, dhaṭṭhajjuṇē kumārē juvarāyā.

1.16.11.2

taē ṇaṁ sā sūmāliyā dēvī tāō dēvalōgāō āukkhaēṇaṁ jāva caïttā ihēva jambuddīvē dīvē bhārahē vāsē pañcālēsu jaṇavaēsu kampillapurē nayarē duvayassa raṇṇō culaṇīē dēvīē kucchiṁsi dāriyattāē paccāyāyā taē ṇaṁ sā culaṇī dēvī navaṇhaṁ māsāṇaṁ jāva dāriyaṁ payāyā, taē ṇaṁ tīsē dāriyāē nivvattabārasāhiyāē imaṁ ēyārūvaṁ nāmaṁ0 jamhā ṇaṁ ēsā dāriyā dupayassa raṇṇō culaṇīē dēvīē attayā taṁ hōu ṇaṁ amhaṁ imīsē dāriyāē nāmadhējjē dōvaī taē ṇaṁ tīsē ammāpiyarō imaṁ ēyārūvaṁ gōṇṇaṁ guṇanipphanna nāmadhējjaṁ karēnti-dōvaī-dōvaī.

1.16.11.3

taē ṇaṁ sā dōvaī dāriyā pañcadhāīpariggahiyā jāva girikandaramallīṇā iva campagalayā nivāya-nivvāghāyaṁsi suhaṁsuhēṇaṁ parivaḍḍhaï taē ṇaṁ sā dōvaī rāyavarakannā ummukkabālabhāvā jāva ukkiṭṭhasarīrā jāyā yāvi hōtthā, taē ṇaṁ taṁ dōvaïṁ rāyavarakannaṁ aṇṇayā kayāi antēuriyāō ṇhāyaṁ jāva savvālaṅkāravibhūsiyaṁ karēnti karēttā duvayassa raṇṇō pāyavandiyaṁ pēsēnti, taē ṇaṁ sā dōvaī rāyavarakaṇṇā jēṇēva duvaē rāyā tēṇēva uvāgacchaï uvāgacchittā duvayassa raṇṇō pāyaggahaṇaṁ karēi.

1.16.11.4

taē ṇaṁ sē duvaē rāyā dōvaïṁ dāriyaṁ aṅkē nivēsēi nivēsēttā dōvaīē rāyavarakannāē rūvē ya jōvaṇṇē ya lāvaṇṇē ya jāyavimhaē dōvaïṁ rāyavarakannaṁ ēvaṁ vayāsī — jassa ṇaṁ ahaṁ tumaṁ puttā! rāyassa vā juvarāyassa vā bhāriyattāē sayamēva dalaïssāmi tattha ṇaṁ tumaṁ suhiyā vā duhiyā vā bhavējjāsi taē ṇaṁ mamaṁ jāvajjīvāē hiyayadāhē bhavissaï, taṁ ṇaṁ ahaṁ tava puttā! ajjāyaē sayaṁvarayaṁ viyarāmi, ajjayāē ṇaṁ tumaṁ dinnaṁ sayaṁvarā jaṁ ṇaṁ tumaṁ sayamēva rāyaṁ vā juvarāyaṁ vā varēhisi sē ṇaṁ tava bhattārē bhavissaï tti kaṭṭu tāhiṁ iṭṭhāhiṁ jāva āsāsēi āsāsēttā paḍivisajjēi.

1.16.12.1

taē ṇaṁ sē duvaē rāyā dūyaṁ saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiyā! bāravaïṁ nayariṁ tattha ṇaṁ tumaṁ kaṇhaṁ vāsudēvaṁ samuddavijayapāmōkkhē dasa dasārē baladēvapāmōkkhē pañca mahāvīrē uggasēṇapāmōkkhē sōlasa rāyasahassē pajjunnapāmōkkhāō addhuṭṭhāō kumārakōḍīō sambapāmōkkhaō saṭṭhi duddantasāhassīō vīrasēṇapāmōkkhāō ēkkavīsaṁ vīrapurisasāhassīō mahāsēṇa pāmōkkhāō chappannaṁ balavagasāhassīō aṇṇē ya bahavē rāīsara-talavara-māḍambiya-kōḍumbiya-ibbha-sēṭṭhi-sēṇāvaï-satthavāhapabhiiō karayalapariggahiyaṁ dasanahaṁ sirasāvattaṁ matthaē añjaliṁ kaṭṭu jaēṇaṁ vijaēṇaṁ vaddhāvēhi vaddhāvēttā ēvaṁ vayāhi-

1.16.12.2

ēvaṁ khalu dēvāṇaüppiyā! kampillapurē nayarē duvayassa raṇṇō dhūyāē cūlaṇīē attayāē dhaṭṭhajjuṇakumārassa bhaïṇīē dōvaīē rāyavarakaṇṇāē sayaṁvarē bhavissaï taṁ ṇaṁ tubbhē duvayaṁ rāyaṁ anugiṇhēmāṇā akālaparihīṇaṁ cēva kampillapurē nayarē samōsaraha, taē ṇaṁ dūē karayala kaṭṭu duvayassa raṇṇō ēyamaṭṭhaṁ paḍisuēi paḍisuṇēttā jēṇēva saē gihē tēṇēva uvāgacchaï uvāgacchittā kōḍumbiyapurisē saddāvēi saddāvēttā ēvaṁ vayāsī — khippāmēva bhō dēvāṇuppiyā cāugdhaṇṭaṁ āsarahaṁ juttāmēva uvaṭṭhavēha tē vi tahēva uvaṭṭhavēnti, taē ṇaṁ sē dūē ṇhāē jāva appamahagghābharaṇālaṅkiyasarīrē cāugghaṇṭaṁ āsarahaṁ durūhaï durūhittā bahūhiṁ purisēhiṁ-saṇṇaddha-jāva gahiyāuha-paharajēhiṁ-saddhiṁ samparivuḍē kampillapuraṁ nayaraṁ majjhaṁmajjhēṇaṁ niggacchaï, pañcālajaṇavayassa majjhaṁmajjhēṇaṁ jēṇēva dēsappantē tēṇēva uvāgacchaï uvāgacchittā suraṭṭhājaṇavayassa majjhaṁmajjhēṇaṁ jēṇēva bāravaī nayarī tēṇēva uvāgacchaï uvāgacchittā bāravaïṁ nayariṁ majjhaṁmajjhēṇaṁ anuppavisaï anuppavisittā jēṇēva kaṇhassa vāsudēvassa bāhiriyā uvaṭṭhāṇasālā tēṇēva uvāgacchaï uvāgacchittā cāugghaṇṭaṁ āsarahaṁ ṭhāvēi ṭhāvēttā rahāō paccōrūhaï paccōrūhittā maṇussavaggurāparikkhittē pāyacāravihārēṇaṁ jēṇēva kaṇhē vāsudēvē tēṇēva uvāgacchaï uvāgacchittā kaṇhaṁ vāsudēvaṁ samuddavijayapāmōkkhē ya dasa dasārē jāva chapanapnaṁ bahalavagasāhassīō karayala taṁ cēva jāva samōsaraha.

1.16.12.3

taē ṇaṁ sē kaṇhē vāsudēvē tassa dūyassa antiē ēyamaṭṭhaṁ sōccā nisamma haṭṭhatuṭṭha0 jāvahiyaē taṁ dūyaṁ sakkārēi sammāṇēi sakkārēttā sammāṇēttā paḍivisajjēi.

1.16.12.4

taē ṇaṁ sē kaṇhē vāsudēvē kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiyā! sabhāē suhammāē sāmudāiyaṁ bhēriṁ tālēhi, taē ṇaṁ sē kōḍumbiyapurisē karayala jāva kaṇhassa vāsudēvassa ēyamaṭṭhaṁ paḍisuṇēi paḍisuṇēttā jēṇēva sabhāē suhammāē sāmudāiyā bhērī tēṇēva uvāgacchaï uvāgacchittā sāmudāiyaṁ bhēriṁ mahayā-mahayā saddēṇaṁ tālēi.

1.16.12.5

taē ṇaṁ tāē sāmudāiyāē bhērīē tāliyāē samāṇīē samuddavijayapāmōkkhā dasa dasārā jāva mahāsēṇapōkkhāō chappannaṁ balavagasāhassīō ṇhāyā jāva vibhūsiyā jahā vibhavaïḍḍhisakkāra-samudaēṇaṁ appēgaïyā hayagayā jāva pāyavihāracārēṇaṁ jēṇēva kaṇhē vāsudēva tēṇēva uvāgacchantiṁ uvāgacchittā karayala0 jāva kaṇhaṁ vāsudēvaṁ jaēṇaṁ vijaēṇaṁ vaddhāvēnti.

1.16.12.6

taē ṇaṁ sē kaṇhē vāsudēvē kōḍumbiyapurisē saddāvēi saddāvēttā ēvaṁ vayāsī — khippāmēva bhō dēvāṇuppiyā! ābhisēkkaṁ hatthirayaṇaṁ paḍikappēha haya-gaya-jāva paccappiṇanti, taē ṇaṁ sē kaṇhē vāsudēvē jēṇēva majjaṇadharē tēṇēva uvāgacchaï uvāgacchittā samattajālā-kulābhirāmē jāva añjaṇagirikūḍasannibhaṁ gayavaïṁ naravaī durūḍhē.

1.16.12.7

taē ṇaṁ sē kaṇhē vāsudēvē samuddavijayapāmōkkhēhiṁ dasahiṁ dasārēhiṁ jāva aṇaṅgasēṇāpāmōkkhāhiṁ anēgāhiṁ gaṇiyāsāhassīhiṁ saddhiṁ samparivuḍē savviḍḍhīē jāva ravēṇaṁ bāravaïṁ nayariṁ majjhaṁmajjhēṇaṁ niggacchaï niggacchittā suraṭṭhāṇajaṇavayassa majjhaṁmajjhēṇaṁ jēṇēva dēsappantē tēṇēva uvāgacchaï uvāgacchittā pañcālajaṇavayassa majjhaṁmajjhēṇaṁ jēṇēva kampillapurē nayarē tēṇēva pahārēttha gamaṇāē.

1.16.13.1

taē ṇaṁ sē duvaē rāyā dōccaṁ pi dūyaṁ saddāvēi saddāvēttā ēvaṁ vayāsī gacchaha ṇaṁ tumaṁ dēvāṇuppiyā! hatthiṇāuraṁ nayaraṁ tattha ṇaṁ tumaṁ paṇḍurāyaṁ saputtayaṁ juhiṭṭhilaṁ bhīmasēṇaṁ ajjuṇaṁ naülaṁ sahadēvaṁ dujjōhaṇaṁ bhāisaya-samaggaṁ gaṅgēyaṁ viduraṁ dōṇaṁ jayaddahaṁ saüṇiṁ kīvaṁ āsatthāmaṁ karayala0 jāva kaṭṭu tahēva samōsaraha! taē ṇaṁ sē dūē ēvaṁ vayāsi- jahā vāsudēvē navaraṁ bhērī natthi jāva jēṇēva kampillapurē nayarē tēṇēva pahārēttha gamaṇāē.

1.16.13.2

ēēṇēva kamēṇaṁ – taccaṁ dūyaṁ0 campaṁ nayariṁ tattha ṇaṁ tumaṁ kaṇhaṁ aṅgarāyaṁ sēllaṁ nandirāyaṁ karayala tahēva jāva samōsaraha caütthaṁ dūyaṁ suttimaïṁ nayariṁ tattha sisupālaṁ damaghōsasuyaṁ pañcabhāisaya samparivuḍaṁ karayala tahēva jāva samōsaraha| pañcamaṁ dūyaṁ0 hatthisīsaṁ nayariṁ tattha ṇaṁ tumaṁ damadantaṁ rāyaṁ karayala tahēva jāva samōsaraha| chaṭṭhaṁ dūyaṁ0 mahuraṁ nayariṁ, tattha ṇaṁ tumaṁ dharaṁ rāyaṁ karayala jāva samōsaraha, sattamaṁ dūyaṁ0 rāyagihaṁ nayariṁ, tattha ṇaṁ tumaṁ sahadēvaṁ jarāsandhasuyaṁ karayala jāva samōsarahā aṭṭhamaṁ dūyaṁ0 kōḍiṇṇaṁ nayaraṁ tattha ṇaṁ tumaṁ rūppiṁ bhēsagasuyaṁ0 karayala tahēva jāva samōsarahā navamaṁ dūyaṁ0 virāṭaṁ nayaraṁ tattha ṇaṁ tumaṁ kīyagaṁ bhāusaya-samaggaṁ karayala jāva samōsarahā dasamaṁ dūyaṁ avasēsēsu gāmāgaranagarēsu aṇēgāiṁ rāyasahassāiṁ jāva samōsaraha.

1.16.13.3

taē ṇaṁ sē dūē tahēva niggacchaï jēṇēva gāmāgara jāva samōsaraha| taē ṇaṁ tāiṁ anēgāiṁ rāyasahassāiṁ tassa dūyassa antiē ēyamaṭṭhaṁ sōccā nisamma haṭṭha0 taṁ dūyaṁ sakkārēi sammāṇēnti paḍivisajjinti.

1.16.13.4

taē ṇaṁ tē vāsudēva pāmukkhā bahavē rāyasahassā pattēyaṁ-pattēyaṁ ṇhāyā saṇṇaddha-baddha-vammiya-kavayā hatthikhandhavaragayā haya-gaya-raha mahayā bhaḍa-caḍagara-raha-paḍakara-vindaparikkhittā saēhiṁ-saēhiṁ nagarēhintō abhiniggacchanti abhiniggacchittā jēṇēva pañcālē jaṇavaē tēṇēva pahārēttha gamaṇē.

1.16.13.5

taē ṇaṁ sē duvaē rāyā kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiyā! kampillapurē nayarē bahiyā gaṅgāē mahānaīē adūrasāmantē ēgaṁ mahaṁ sayaṁvaramaṇḍavaṁ karēha aṇēgakhambha-sayasanniviṭṭhaṁ līlaṭṭhiya-sālibhañjiyāgaṁ jāva paccappaṇanti.

1.16.13.6

taē ṇaṁ sē duvaē rāyā dōccampi kōḍumbiyapurisē saddāvēi saddāvēttā ēvaṁ vayāsī — khippāmēva bhō dēvāṇuppiyā! vāsudēvapāmōkkhāṇaṁ bahūṇaṁ rāyasahassāṇaṁ āvāsē karēha tēvi karēttā0 paccappiṇanti.

1.16.13.7

taē ṇaṁ sē duvaē rāyā vāsudēvapāmōkkhāṇaṁ bahūṇaṁ rāyasahassāṇaṁ āgamaṇaṁ jāṇēttā pattēyaṁ-pattēyaṁ hatthikhandha jāva samparivuḍē agghaṁ ca pajjaṁ ca gahāya savviḍḍhīē kampillapurāō niggacchaï niggacchittā jēṇēva tē vāsudēvapāmōkkhā bahavē rāyasahassā tēṇēva uvāgacchaï uvāgacchittā tāiṁ vāsudēva pāmōkkhāiṁ agghēṇa ya pajjēṇa ya sakkārēi sammāṇēi, tēsiṁ vāsudēva pāmukkhāṇaṁ pattēyaṁ-pattēyaṁ āvāsē viyaraï.

1.16.13.8

taē ṇaṁ tē vāsudēvapāmōkkhā jēṇēva sayā-sayā āvāsā tēṇēva uvāgacchanti uvāgacchittā hatthikhandhēhintō paccōrūhanti paccōrūhittā pattēyaṁ-pattēyaṁ khandhāvāranivēsaṁ karēnti karēttā saēsu-saēsu āvāsēsu anuppavisanti anuppavisittā saēsu-saēsu āvāsēsu āsaṇēsu ya sayaṇēsu ya sannisaṇṇā ya santuyaṭṭā ya bahūhiṁ gandhavvēhiṁ ya nāḍaēhiṁ ya uvagijjamāṇā ya uvanaccijjamāṇā ya viharanti.

1.16.13.9

taē ṇaṁ sē duvē rāyā kampillapuraṁ nayaraṁ anuppavisaï anuppavisittā vipulaṁ asaṇa-pāṇa-khāima-sāimaṁ uvakkhaḍāvēi uvakkhaḍāvēttā kōḍumbiyapurisē saddāvēi saddāvēttā ēva vayāsī — gacchaha ṇaṁ tubbhē dēvāṇuppiyā vipulaṁ asaṇaṁ0 suraṁ ca majjaṁ ca maṁsaṁ ca sīdhuṁ ca pasannaṁ ca subahuṁ puppha-vattha-gandhamallālaṅkāraṁ ca vāsudēva-pāmōkkhāṇaṁ rāyasahassāṇaṁ āvāsēsu sāharaha tēvi sāharanti.

1.16.13.10

taē ṇaṁ sē vāsudēvapāmōkkhā taṁ vipulaṁ asaṇaṁ0 pasannaṁ ca āsāēmāṇā visādēmāṇā paribhāēmāṇā paribhuñjēmāṇā viharanti, jimiyabhuttuttarāgayā vi ya ṇaṁ samāṇā āyantā jāva suhāsaṇavaragayā bahūhiṁ gandhavvēhi jāva viharanti.

1.16.13.11

taē ṇaṁ sē duvaē rāyā paccāvaraṇha-kālasamayaṁsi kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tubbhē dēvāṇuppiyā! kampillapurē siṅghāḍaga-jāva pahēsu vāsudēvapāmōkkhāṇaṁ rāyasahassāṇaṁ āvāsēsu hatthikhandhavaragayā mahayā-mahayā saddēṇaṁ jāva ugghōsēmāṇā ēvaṁ vayaha- ēvaṁ khalu dēvāṇuppiyā0 kallaṁ pāuppabhāyāē jāva duvayassa raṇṇō dhūyāē culaṇīē dēvīē attiyāē ghaṭṭhajjuṇassa bhagiṇīē dōvaīē rāyavarakaṇṇāē sayaṁvarē bhavissaï, taṁ tubbhē ṇaṁ dēvāṇuppiyā! duvayaṁ rāyāṇaṁ anugiṇhēmāṇā ṇhāyā jāva savvālaṅkāravibhūsiyā hatthikhandhavaragayā sakōrēṇṭa0 sēyavaracāmarāhiṁ0 haya-gaya-raha0 mahayā bhaḍa-caḍagara jāva parikkhittā jēṇēva sayaṁvarāmaṇḍavē tēṇēva uvāgacchaha uvāgacchittā pattēyaṁ-pattēyaṁ nāmaṅkiēsu āsaṇēsu nisīyaha nisīittā dōvaïṁ rāyavarakaṇṇaṁ paḍivālēmāṇā-paḍivālēmāṇā ciṭṭhaha tti ghōsaṇaṁ ghōsēha dhōsēttā mama ēyamāṇattiyaṁ paccappiṇaha taē ṇaṁ kōḍumbiyapurisā tahēva jāva paccappiṇanti.

1.16.13.12

taē ṇaṁ sē duvaē rāyā kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tubbhē dēvāṇuppiyā! sayaṁvaramaṇḍapaṁ āsiya-saṁmajjiōvalittaṁ sugandhadhavaragandhiyaṁ pañcavaṇṇapupphōvayārakaliyaṁ kālāgaru-pavara-kundurukka-turukka-jāva gandhavaṭṭibhūyaṁ mañcāimañcakaliyaṁ karēha kāravēi karēttā kāravēttā vāsudēpāmōkkhāṇaṁ bahūṇaṁ rāyasahassāṇaṁ pattēyaṁ-pattēyaṁ nāmaṅkiyāiṁ āsaṇāiṁ atthuyapaccatthuyāiṁ raēha raēttā ēyamāṇattiyaṁ paccappiṇaha, tē vi jāva paccappiṇanti.

1.16.13.13

taē ṇaṁ tē vāsudēvapāmōkkhā bahavē rāyasahassā kallaṁ pāuppabhāyāē0 ṇhāyā jāva savvālaṅkāravibhūsiyā hatthikhandhavaragayā sakōrēṇṭa0 sēyavaracāmarāhiṁ0 haya-gaya-jāva samparivuḍā savviḍḍhīē jāva ravēṇaṁ jēṇēva sayaṁvarāmaṇḍavē tēṇēva uvāgacchanti uvāgacchittā anuppavisanti anuppavisittā pattēyaṁ-pattēyaṁ nāmaṅkiēsu āsaṇēsu nisīyanti dōvaï rāyavarakannaṁ paḍivālēmāṇā-paḍivālēmāṇā ciṭṭhanti.

1.16.13.14

taē ṇaṁ sē paṇḍuē rāyā kallaṁ0 ṇhāē jāva savvālaṅkāravibhūsiē hatthikhandhavaragaē sakōrēṇṭa0 sēyavaracāmarāhiṁ0 haya-gaya0 kampillapuraṁ nagaraṁ majjhaṁmajjhēṇaṁ niggacchaï jēṇēva sayaṁvarāmaṇḍavē jēṇēva vāsudēvapāmōkkhā bahavē rāyasahassā tēṇēva uvāgacchaï uvāgacchittā tēsiṁ vāsudēvapāmōkkhāṇaṁ karayala0 vaddhāvēttā kaṇhassa vāsudēvassa sēyavaracāmaraṁ gahāya uvavīyamāṇē ciṭṭhaī.

1.16.14.1

taē ṇaṁ sā dōvaī rāyavarakannā kallaṁ0 jēṇēva majjaṇagharē tēṇēva uvāgacchaï uvāgacchittā0 ṇhāyā kayabalikammā kaya-kōuya-maṅgala-pāyacchittā suddhappāvēsāiṁ maṅgallāiṁ vatthāiṁ pavara-parihiyā majjhaṇagharāō paḍinikkhamaï paḍinikkhimittā jēṇēva jiṇagharē tēṇēva uvāgacchaï uvāgacchittā jiṇagharaṁ anupavisaï anupavisittā jiṇapaḍimāṇaṁ ālōē paṇāmaṁ karēi karēttā lōmahatthayaṁ parāmusaï ēvaṁ jahā sūriyābhō jiṇapaḍimāō accēi accēttā tahēva bhāṇiyavvaṁ jāva dhūvaṁ ḍahaï0, vāmaṁ jāṇuṁ añcēi dāhiṇaṁ jāṇuṁ dharaṇitalaṁsi nihaṭṭu tikkhuttā muddhāṇaṁ dharaṇitalaṁsi nivēsaï isiṁ paccuṇṇamaï paccuṇṇamittā karayala0 jāva kaṭṭu ēvaṁ vayāsī — namōtthu ṇaṁ arahantāṇaṁ bhagavantāṇaṁ jāva sampattāṇaṁ vandaï namaṁsaï vandittā namaṁsittā jiṇagharāō paḍinikkhamaï paḍinikkhamittā jēṇēva antēurē tēṇēva uvāgacchaï.

1.16.15.1

taē ṇaṁ taṁ dōvaïṁ rāyavarakannaṁ antēuriyāō savvālaṅkāravibhūsiyaṁ karēnti kiṁ tē? varapāyapattanēurā jāva cēḍiyā-cakkavāla-mahayaraga-vinda-parikkhittā antēurāō paḍinikkhamaï paḍinikkhamittā jēṇēva bāhiriyā uvaṭṭhāṇasālā jēṇēva cāugghaṇṭē āsarahē dēṇēva uvāgacchaï uvāgacchittā kiḍḍāviyāē lēhiyāē saddhiṁ cāugghaṇṭaṁ āsarahaṁ durūhaï taē ṇaṁ sē dhaṭṭajjuṇē kumārē dōvaīē rāyavarakannē sāratthaṁ karēi taē ṇaṁ sā dōvaī rāvayarakannā kampillapuraṁ nayaraṁ majjhaṁmajjhēṇaṁ jēṇēva sayaṁvaramaṇḍavē tēṇēva uvāgacchaï uvāgacchittā rahaṁ ṭhavēiṁ rahāō paccōrūhaï paccōrūhittā kiḍḍāviyāē lēhiyāē saddhiṁ sayavarāmaṇḍavaṁ anupavisaï anupavisittā karayala pariggahiyaṁ dasanahaṁ sirasāvattaṁ matthaē ṇaṁ añjaliṁ kaṭṭu tēsiṁ vāsudēva pāmōkkhāṇaṁ bahūṇaṁ rāyavarasahassāṇaṁ paṇāmaṁ karēi taē ṇaṁ sā dōvaī rāyavaraṇṇā ēgaṁ mahaṁ siridāmagaṇḍaṁ-kiṁ tē? pāḍala malli-campaya jāva sattacchayāīhiṁ gandhaddhaṇi muyantaṁ paramasuhaphāsaṁ darisaṇijjaṁ-gēṇhaï taē ṇaṁ sā kiḍḍāviyā jāva surūvā jāva vāmahatthēṇaṁ cillalagaṁ dappaṇaṁ gahēūṇa salaliyaṁ dappaṇasaṅkantabiṁva-sadaṁsiē ya sē dāhiṇēṇaṁ hatthēṇaṁ darisaē pavararāyasīhē phuḍavisaya-visuddha ribhiyagambhīra-mahurabhaṇiyā sā tēsiṁ savvēsi patthivāṇaṁ ammāpiuṇaṁ vaṁsa-satta-sāmattha-gōtta-vikkanti-kanti-bahuvihaāgama-māhappa-rūvaṁ kulasīlajāṇiyā kittaṇaṁ karēi paḍhamaṁ tāva vaṇhipuṅgavāṇaṁ dasāravara-vīrapurisa-tēlōkkavalavagāṇaṁ sattusayasahassā-māṇāvamaddagāṇaṁ bhavasiddhiya-varapuṇḍarīyāṇaṁ cillāgāṇaṁ bala-vīriya-rūva-jōvaṇṇa-guṇa-lāvaṇṇakittiyā kittaṇaṁ karēi taō puṇō uggasēṇamāīṇaṁ jāyavāṇaṁ bhaṇaï-sōhaggarūvakaliē varēhi varapurisagandhahatthīṇaṁ, jō hu tē hōi hiyaya-daïō.

1.16.15.2

taē ṇaṁ sā dōvaī rāyāvarakaṇṇagā bahūṇaṁ rāyavarasahassāṇaṁ majjhaṁmajjhēṇaṁ samaïcchamāṇī-samaïcchamāṇī puvvakayaniyāṇēṇaṁ cōijjamāṇī-cōijjamāṇī jēṇēva pañca paṇḍavā tēṇēva uvāgacchaï uvāgacchittā tē pañca paṇḍavē tēṇaṁ dasaddha-vaṇṇēṇaṁ kusumadāmēṇaṁ āvēḍhiyaparivēḍhiē karēi karēttā ēvaṁ vayāsī — ēē ṇaṁ maē pañca paṇḍavā variyā taē ṇaṁ tāiṁ vāsudēvapāmōkkhāiṁ bahūṇi rāyasahassāṇi mahayā-mahayā saddēṇaṁ ugdhōsēmāṇāiṁ-ugdhōsēmāṇāiṁ ēvaṁ vayanti-suvariyaṁ khalu bhō dōvaīē rāyavara-kannāē tti kaṭṭu sayaṁvaramaṇḍavāō paḍinikkhamanti paḍinikkhamittā jēṇēva sayā-sayā āvāsā tēṇēva uvāgacchanti.

1.16.15.3

taē ṇaṁ dhaṭṭhajjuṇē kumārē pañca paṇḍavē dōvaïṁ ca rāyavarakaṇṇaṁ cāugghaṇṭaṁ āsarahaṁ duruhāvēi duruhāvēttā kampillapuraṁ nayaraṁ majjhaṁmajjhēṇaṁ jāva sayaṁ bhavaṇaṁ anupavisaï.

1.16.15.4

taē ṇaṁ sē duvē rāyā pañca paṇḍavē dōvaïṁ ca rāyavarakaṇṇaṁ paṭṭayaṁ duruhāvēi durūhāvēttā sēyāpīyaēhiṁ kalasēhiṁ majjāvēi majjāvēttā aggihōmaṁ karāvēi pañcaṇhaṁ paṇḍavāṇaṁ dōvaīē ya pāṇiggahaṇaṁ kārāvēi, taē ṇaṁ sē duvaē rāyā dōvaīē rāyavarakannē imaṁ ēyārūvaṁ pīidāṇaṁ dalayaï taṁ jahā— aṭṭha hiraṇṇakōḍīō jāva aṭṭha pēsaṇakārīō dāsacēḍīō, aṇṇaṁ ca vipulaṁ dhaṇa-kaṇaga jāva dalayaï, taē ṇaṁ sē duvaē rāyā tāiṁ vāsudēvapāmōkkhāiṁ bahūiṁ rāyasahassāiṁ vipulēṇaṁ asaṇa-pāṇa-khāima-sāimēṇa puppha-vattha-gandha-jāva paḍivisajjēi.

1.16.16.1

taē ṇaṁ sē paṇḍū rāyā tēsiṁ vāsudēvapāmōkkhāṇaṁ bahūṇaṁ rāyasahassāṇaṁ karayala0 jāva ēvaṁ vayāsī — ēvaṁ khalu dēvāṇuppiyā! hatthiṇāurē nayarē pañcaṇhaṁ paṇḍavāṇaṁ dōvaīē ya dēvīē kallāṇakārē bhavissaï, taṁ tubbhē ṇaṁ dēvāṇuppiyā! mamaṁ anugiṇhamāṇā akālaparihīṇaṁ cēva samōsaraha.

1.16.16.2

taē ṇaṁ tē vāsudēvapāmōkkhā bahavē rāyasahassā pattēyaṁ-pattēyaṁ jāva pahārēttha gamaṇāē. taē ṇaṁ sē paṇḍū rāyā kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tubbhē dēvāṇuppiyā! hatthiṇāurē nayarē pañcaṇhaṁ paṇḍavāṇaṁ pañca pāsāyavaḍiṁsaē kārēha abbhuggayamūsiya vaṇṇaō jāva paḍirūvē taē ṇaṁ tē kōḍumbiyapurisā paḍisuṇēnti jāva kāravēnti taē ṇaṁ sē paṇḍū rāyā pañcahiṁ paṇḍavēhiṁ dōvaīē dēvīē saddhiṁ haya-gaya-jāva parikkhittē kampillapurāō paḍinikkhamaï paḍinikkhamittā jēṇēva hatthiṇāurē tēṇēva uvāgaē.

1.16.16.3

taē ṇaṁ sē paṇḍū rāyā tēsiṁ vāsudēvapāmōkkhāṇaṁ āgamaṇaṁ jāṇittā kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tubbhē dēvāṇuppiyā! hatthiṇāurassa nayarassa bahiyā vāsudēvapāmōkkhāṇaṁ bahūṇaṁ rāyasahassāṇaṁ āvāsē-aṇēga-khambhasayasaṇṇiviṭṭhē kārēha kārēttā jāva tahēva paccappiṇanti.

1.16.16.4

taē ṇaṁ tē vāsudēvapāmōkkhā bahavē rāyasahassā jēṇēva hatthiṇāurē tēṇēva uvāgaē, taē ṇaṁ sē paṇḍū rāyā tē vāsudēva- pāmōkkhē bahavē rāyasahassē jēṇēva hatthiṇāurē tēṇēva uvāgaē, tatē ṇaṁ sē paṇḍurāyā tēsiṁ vāsudēva pāmōkkhāṇaṁ āgamaṇaṁ jāṇittā haṭṭhatuṭṭhē ṇhāē kayabalikammē jahā duvaē jāva jahārihaṁ āvāsē dalayaï.

1.16.16.5

taē ṇaṁ tē vāsudēvapāmōkkhā bahavē rāyasahassā jēṇēva sayāiṁ-sayāiṁ āvāsāiṁ tēṇēva uvāgacchanti tahēva jāva viharanti, taē ṇaṁ sē paṇḍū rāyā hatthiṇāuraṁ nayaraṁ anupavisaï anupavisittā kōḍumbiyapurisē saddāvēi saddāvēttā ēvaṁ vayāsī — tubbhē ṇaṁ dēvāṇuppiyā! vipulaṁ asaṇa-pāṇa-khāima-sāimaṁ tahēva jāva viharanti, taē ṇaṁ sē paṇḍū rāyā tē pañca paṇḍavē dōvaïṁ ca dēviṁ paṭṭayaṁ duruhāvēi duruhāvēttā sēyāpīēhiṁ kalasēhiṁ ṇhāvēi ṇhāvēttā kallāṇakāraṁ karēi karēttā tē vāsudēvapāmōkkhē bahavē rāyasahassē vipulēṇaṁ asaṇaṁ puppha-vattha-gandha-mallālaṅkārēṇaṁ ya sakkārēi sammāṇēi sakkārēttā sammāṇēttā paḍivisajjaēi, taē ṇaṁ tāiṁ vāsudēvapāmōkkhāiṁ bahūiṁ jāva paḍigayāiṁ.

1.16.17.1

taē ṇaṁ tē pañca paṇḍavā dōvaīē dēvīē saddhiṁ antō antēurapariyāla saddhiṁ kallākalliṁ vāraṁvārēṇaṁ urālāiṁ bhōgabhōgāiṁ bhuñjamāṇā viharanti, taē ṇaṁ sē paṇḍū rāyā aṇṇayā kayāiṁ pañcahiṁ paṇḍavēhiṁ kōntīē dēvīē dōvaīē ya saddhiṁ antō antēurapariyāla saddhiṁ samparivuḍē sīhāsaṇavaragaē yāvi viharaï.

1.16.17.2

imaṁ ca ṇaṁ kacchullanāraē-daṁsaṇēṇaṁ aïbhaddaē viṇīē antō-antō ya kalusa hiyaē majjhattha-uvatthiē ya allīṇa-sōmapiyadaṁsaṇē surūvē amaïla-sagala-parihiē kālamiyacamma-uttarāsaṅga-raïyavacchē daṇḍa-kamaṇḍalu-hatthē jaḍāmaüḍadittasiraē jannōvaïya-gaṇēttiya-muñjamēhalā-vāgalagharē hatthakaya-kacchabhīē piyagandhavvē dharaṇigōyarappahāṇē saṁvaraṇāvaraṇi-ōvayaṇuppayaṇi-lēsaṇīsu ya saṅkāṇi-ābhiōgi-pannati-gamaṇi-thambhimaṇīsu ya bahūsu vijjāhasurī vijjāsu vissuyajasē iṭṭhē rāmassa ya kēsavassa ya pajjunna paīva-samba-aniruddha-nisaḍha-ummuya-sāraṇa-gaya-sumuha-dummuhāīṇaṁ jāyavāṇaṁ addhaṭṭhāṇaṁ ya kumārakōḍīṇaṁ hiyaya-daïē santhavaē kalaha-juddha-kōlāhalappiē bhaṇḍaṇābhilāsī bahūsu ya samarasaya-samparāēsu daṁsaṇaraē samantaō kalahaṁ sadakkhiṇaṁ anugavēsamāṇē asamāhikarē dasāravara-vīrapurisa-tēlōkkavalavagāṇaṁ āmantēūṇa taṁ bhagavaïṁ pakkamaṇiṁ gagaṇagamaṇadacchaṁ uppaïō gagaṇamabhilaṅghayantō gāmāgara-nagara-khēḍa-kabbaḍa-maḍamba-dōṇamuha-paṭṭaṇa-sambāha-sahassamaṇḍiya thimiyamēiṇīyaṁ nibbhara jaṇapadaṁ vasuhaṁ ōlēintē rammaṁ hatthiṇāuraṁ uvāgaē paṇḍurāyabhavaṇaṁsi jhatti-vēṇēga samōvaïē.

1.16.17.3

taē ṇaṁ sē paṇḍū rāyā kacchullanārayaṁ ējjamāṇaṁ pāsaï pāsittā pañcahiṁ paṇḍabēhiṁ kuntīē dēvīē saddhiṁ āsaṇāō abbhuṭṭhēti abbhuṭṭhēttā kacchulla-nārayaṁ sattaṭṭhapayāiṁ paccuggacchaï paccuggacchittā tikkhu-ttō āyahiṇa-payāhiṇaṁ karēi karēttā vandaï namaṁsaï vandittā namaṁsittā maharihēṇa0 āsaṇēṇaṁ ya uvanimantēi.

1.16.17.4

taē ṇaṁ sē kacchullanāraē udagapariphōsiyāē dabbhōvaripaccatthuyāē bhisiyāē nisīyaï nisīittā paṇḍurāya-rajjē ya jāva antēurē ya kusalōdantaṁ pucchaï, taē ṇaṁ sē paṇḍū rāyā kōntī dēvī pañca ya paṇḍavā kacchullanārayaṁ āḍhanti jāva pajjuvāsanti.

1.16.17.5

taē ṇaṁ sā dōvaī dēvī kacchullanārayaṁ assañjayaṁ avirayaṁ appaḍihayapaccakkhāyapāvakkamanti kaṭṭu nō āḍhāi nō pariyāṇaï nō abbhuṭṭhēi nō pajjuvāsaï.

1.16.18.1

taē ṇaṁ tassa kacchullanārayassa imēyārūvē ajjhatthiē cintiē patthiē maṇōgaē saṅkappē samuppajjitthā — ahō ṇaṁ dōvaī dēvī rūvēṇaṁ jāva lāvaṇṇēṇa ya pañcahiṁ paṇḍavēhiṁ anubaddhā samāṇī mamaṁ nō āḍhāi jāva nō pajjuvāsaï, taṁ sēyaṁ khalu mama dōvaīē dēvīē vippiyaṁ karēttaē tti kaṭṭu ēvaṁ sampēhēi sampēhēttā paṇḍurāyaṁ āpucchaï āpucchittā uppayaṇiṁ vijjaṁ āvāhēi āvāhēttā tē ukkiṭṭhiē jāva vijjāharagaīē lavaṇasamuddaṁ majjhaṁmajjhēṇaṁ puratthābhimuhē vīīvaïuṁ payattē yāvi hōtthā.

1.16.18.2

tēṇaṁ kālēṇaṁ tēṇaṁ samaēṇaṁ ghāyaïsaṇḍē dīvē puratthimaddha-dāhiṇaḍḍha-bharahavāsē avarakaṅkā nāmaṁ rāyahāṇī hōtthā, tattha ṇaṁ avarakaṅkāē rāyahāṇīē paümanābhē nāmaṁ rāyā hōtthā-mahayāhimavanta0 vaṇṇaō, tassa ṇaṁ paümanābhassa raṇṇō satta dēvīsayāiṁ ōrōhē hōtthā, tassa ṇaṁ paümanābhassa raṇṇō sunābhē nāmaṁ puttē juvarāyāvi hōtthā, taē ṇaṁ sē paümanābhē rāyā antō antēuraṁsi ōrōha-samparivuḍē sīhāsaṇavaragaē viharaï.

1.16.18.3

taē ṇaṁ sē kacchullanāra jēṇēva avarakaṅkā rāyahāṇī jēṇēva paümanābhassa bhavaṇē tēṇēva uvāgacchaï uvāgacchittā paümanābhassa raṇṇō bhavaṇaṁsi jhattiṁ vēgēṇaṁ samōvaïē, taē ṇaṁ sē paümanābhē rāyā kacchullanārayaṁ ējjamāṇaṁ pāsaï pāsittā āsaṇāō abbhuṭṭhēi abbhuṭṭhēttā agghēṇaṁ jāva āsaṇēṇaṁ uvanimantēiṁ, taē ṇaṁ sē kacchullanāraē udagapariphōsiyāē dabbhōvarapaccatthuyāē bhisiyāē nisīyaï jāva kusalōdantaṁ āpucchaï.

1.16.18.4

taē ṇaṁ sē paümanābhē rāyā niyagaōrēhē jāyavimhaē kacchullanārayaṁ ēvaṁ vayāsī — tumaṁ dēvāṇuppiyā bahūṇi gāmāṇi jāva gihāiṁ anupavisasi, taṁ atthiyāiṁ tē kahiñci dēvāṇuppiyā! ērisaē ōrōhē diṭṭhapuvvē jārisaē ṇaṁ mama ōrōhē? taē ṇaṁ sē kacchullanāraē paümanābhēṇaṁ ēvaṁ vuttē samāṇē īsiṁ vihasiyaṁ karēi karēttā ēvaṁ vayāsī — sarisē ṇaṁ tumaṁ paümanābhā! tassa agaḍadaddurassa.kē ṇaṁ dēvāṇuppiyā sē agaḍadaddurē? ēvaṁ jahā malliṇāē ēvaṁ khalu dēvāṇuppiyā! jambuddīvē dīvē bhārahē vāsē hatthiṇāurē nayarē dupayassa raṇṇō dhūyā culaṇīē dēvīē attayā paṇḍussa suṇhā pañcaṇhaṁ paṇḍavāṇaṁ bhāriyā dōvaī nāmaṁ dēvī rūvēṇa ya jāva ukkiṭṭhasarīrā dōvaīē ṇaṁ dēvīē chinnassavi pāyaṅguṭṭhassa ayaṁ tava ōrōhaē sayampi kalaṁ na agghaï tti jāva kaṭṭu paümanābhaṁ āpucchaï āpucchittā jāmēva disiṁ pāubbhūē tāmēva disiṁ paḍigaē.

1.16.18.5

taē ṇaṁ sē paümanābhē rāyā kacchullanārayassa antiē ēyamaṭṭhaṁ sōccā nisamma dōvaīē dēvīē rūvē ya jōvaṇṇē ya lāvaṇṇē ya mucchiē gaḍhiē giddhē ajjhōvavaṇṇē jēṇēva pōsahasālā tēṇēva uvāgacchaï uvāgacchittā pōsahasālaṁ jāva puvvasaṅgaïyaṁ dēvaṁ ēvaṁ vayāsī — ēvaṁ khalu dēvāṇuppiyā! jambuddīvē dīvē bhārahē vāsē hatthiṇāurē jāva sarīrā taṁ icchāmi ṇaṁ dēvāṇuppiyā! dōvaïṁ dēviṁ iha havvamāṇīyaṁ.

1.16.18.6

taē ṇaṁ sē puvvasaṅgaïē dēvē paümanābhaṁ ēvaṁ vayāsī — nō khalu dēvāṇuppiyā! ēyaṁ bhūyaṁ vā bhavvaṁ vā bhavissaṁ vā jaṇṇaṁ dōvaī dēvī pañca paṇḍavē mōttūṇaṁ aṇṇēṇaṁ purisēṇaṁ saddhiṁ urālāiṁ jāva viharissaï, tahāvi ya ṇaṁ ahaṁ tava piyaṭṭhayāē dōvaïṁ dēviṁ ihaṁ havvamāṇēmi tti kaṭṭu paümanābhaṁ āpucchaï āpucchittā tāē ukkiṭṭhāē jāva lavaṇasamuddaṁ majjhaṁmajjhēṇaṁ jēṇēva hatthiṇāurē nayarē tēṇēva pahārēttha gamaṇāē.

1.16.18.7

tēṇaṁ kālēṇaṁ tēṇaṁ samaēṇaṁ hatthiṇāurē nayarē juhiṭṭhillē rāyā dōvaīē dēvīē saddhiṁ uppiṁ āgāsatalagaṁsi suhappasuttē yāvi hōtthā, taē ṇaṁ sē puvvasaṅgaïē dēvē jēṇēva juhiṭṭhillē rāyā jēṇēva dōvaī dēvī tēṇēva uvāgacchaï uvāgacchittā dōvaīē dēvīē ōsōvaṇiyaṁ dalayaï dalaïttā dōvaïṁ dēviṁ giṇhaï giṇhittā tāē ukkiṭṭhāē jāva dēvagaīē jēṇēva avarakaṅkā jēṇēva paümanābhassa bhavaṇē tēṇēva uvāgacchaï uvāgacchittā paümanābhassa bhavaṇaṁsi asōgavaṇiyāē dōvaïṁ dēviṁ ṭhāvēi ṭhāvēttā ōsōvaṇiṁ avaharaï avaharittā jēṇēva paümanābhē tēṇēva uvāgacchaï uvāgacchittā ēvaṁ vayāsī — ēsa ṇaṁ dēvāṇuppiyā maē hatthiṇāurāō dōvaī dēvī ihaṁ havvamāṇīyā tava asōgavaṇiyāē ciṭṭhaï, aō paraṁ tumaṁ jāṇisa tti kaṭṭu jāmēva disiṁ pāubbhūē tāmēva disiṁ paḍigaē.

First 100 of 193 passages. Read on

Translations (2)

Commentaries (2)

Discussed in (1)